1. Toko cihimiyaaya nhina Efesu 6:10-13, manannani Yehova nothoonyeraawe wiira nawaawacera ale anonswalela? Utaphulele.

YEHOVA khanle Nluku o nifento ni nawaawacera venci ale anonswalela. Phimaana uyo naanikavihera wiilipihaca wiira ahinikhitiri alupatthiihu. Alupatthiihu oolupale khanle Sotwani ni maciini. Yehova naanihimyera wiira naanyeme ni naanivaha yotheene impheeleehu wiira ayo malayikhaayo ahinikhitiri. (Usome Efesu 6:10-13.) Inanna imoca yo wiilipihaca wiira Sotwani hinikhitiri uri utthuna ukaviheriya ni Yehova ni unkhuluvela cinene uyova paasi. Nihaana nuupuwelaka toko apostolu Paulu. Uyo hantikha eeraka: “Ukhala wiira Nluku ri ni hiiva, tipani nhala unirukunuwela?”—Aroo. 8:31.

2. Isiyani inhaleehu wiitthuca ula mwahoola?

² Hiiva nikhanle makristau eekhweeli, khaninonhoolelihera cinene Sotwani ni maciini. Hiiva ninthanla uhoolelihera wiitthuca citthu ca Yehova ni mananna onswalela. (Isaa. 25:5) Hataa ukhalaka commo, nihaana nicuwelaka itapha ca Sotwani. Kontha isiyani? Kontha nacuwelaka itapha ca Sotwani, uyo khanhala unithepya. (2 Akor. 2:11; niwehero) Ula mwahoola, ninaahala wiitthuca itapha imoca Sotwani ni maciini invarelaaya nteko wiira aathepye atthu. Ciicammo ninaahala wiitthuca mananna owiilipihaca wiira Sotwani ni maciini ahinikhitiri.

3-4. a) Ukhwiri isiyani? b) Ukati waakohiyaaya atthu, woonannyaale cani wiira khaamala enci anaamini ukuru cookhwiri?

³ Sotwani ni maciini anawiikurumica cinene waathepya atthu. Itthu imoca invarelaaya nteko ukhanle ukhwiri. Ale  ampanka ukhwiri aneera wiira anaacuwela upanka citthu cihinkhitiryaaya upanka atthu akhwaaya. Wootakihera, ahaavo aneera wiira anaacuwela citthu cinhala ukhumelela uhooolo yavarelaka nteko ihako ni itthonttwa. Ahaavo akiina aneera wiira anaakhitiri uwuulumana atthu akhwaale. Ciicammo ahaavo ale ampanka ukhwiri ni macattuka, ni ayo pooti umananiha unlwaa ntthu nuukhwiri. *

⁴ Ilelo atthu enci ntuninyani anaakupali ikuru cookhwiri. Ukohiya waya atthu olapo 18 co ncoko wo América Latina ni woo Caribe, wahoonannya wiira khula atthu araru yaakohiya, aanaakhumelela mmoca ookupali macattuka awula ukhwiri, ni atthu enci ciicammo anaakupali wiira unaakhitiryaa wuulumana minepa. Yahokohiya ciicammo atthu olapo 18 co África. Nhina atthu otheene yaakohiye, enci yaheera wiira anaakupali ukhwiri. Ninaacuwela wiira hataa nikhalaka nipuroni, nihaana niikhikiceraka wiira ninyeme ukhwiri. Kontha Sotwani naamananiha uhapusa “ituninya yotheene inkhaliya.”—Apoka. 12:9.

5. Yehova noonela cani ukhwiri?

⁵ Yehova khanle “Nluku eekhweeli.” (Isaa. 31:5) Vano, Yehova noonela cani ukhwiri? Unanrusa! Yehova ahowiirela asarayeli: “Nhinkhalane wamoca ntthu naapaha asaanaawe wamooroni, awula nwasera ihako, nopanka macattuka, nototha misintto, nkhwiri, naalwaa akhunanawe niinyanka, nontotha ntthu noolumana minepa, nontotha nahako, awula naalepela atthu ookhwa. Kontha Yehova unrusa ule nopanka nnya citthunnya.” (Deut. 18:10-12) Ninaacuwela wiira makristau khaneettela-tho Nlamulo Yehova naavahalyaawe asarayeli. Masi ciicammo ninaacuwela wiira uyo nanlelo unanrusa ukhwiri.—Mal. 3:6.

6. a) Sotwani novarela cani nteko ukhwiri wiira aawaanele masakha atthu? b) Toko cineeraaaya Eklesyaste 9:5, isiyani khweeliini inwiira atthu akhwile?

⁶ Yehova naanihimyera wiira nihaana unyema ukhwiri kontha naacuwela wiira ukhwiri phi itthu Sotwani invarelaawe nteko wiira aawaanele masakha atthu. Avarelaka nteko ukhwiri, Sotwani naamwarusela wootha wawe—mpaka ciicammo itthu yowoothiya inoolumiya wiira atthu ookhwa nanlelo anaakhala akumi nipuro nikhwaawe. (Usome Eklesyaste 9:5.) Sotwani ciicammo naavarela nteko ukhwiri wiira awoopopihe atthu ni aahapuse munttalani wa Yehova. Sotwani khweeliini mpheela wiira atthu ampanka ukhwiri akhuluvele malayikha ootakhala uhiya unkhuluvela Yehova.

7. Isiyani Yehova innihimyeraawe?

⁷ Toko cihimyalyaaya mwahoola wuupaceroni, Yehova naanihimyera yotheene impheeleehu ucuwela wiira Sotwani ni maciini ahinithepye. Ninaahala woona citthu cinlamuliyeehu upanka coohala unilipihaca wiira Sotwani ni maciini ahinikhitiri.

8. a) Manannani oopacera ninlamuliyeehu wiikhikicera wiira ninyeme malayikha ootakhala? b) Isaalimu 146:4 inthoonyera cani wootha wa Sotwani nhina itthu inkhumelela muukhwani?

⁸ Usome Ibiiblya ni wuupuwele insomaa. Ala phi mananna oopacera owiikhikicera wiira ninyeme wootha wo malayikha ootakhala. Nuulumo na Nluku ninkhala toko soowa owiitha. Nuulumo na Nluku ninaathoonyera citthu  cowoothiya Sotwani cimmwaruselaawe ni ciicammo ninaathoonyera ikhweeli. (Efesu 6:17) Wootakihera, Ibiiblya inaathoonyera wiira atthu ookhwa khanwuulumana atthu akumi. (Usome Isaalimu 146:4.) Ibiiblya ciicammo inaanuupusera wiira Yehova veekhaawe phinkhitiri uhimya woohivonyaniha citthu cinhala wiirannya uhoolo. (Isai. 45:21; 46:10) Phimaana, wiikurumice usoma Ibiiblya ni wuupuwela insomaa. Wapanka commo, iyo inaahala wuukavihera ukhotta ni wuurusa citthu cowoothiya cinhimyaaya malayikha ootakhala.

9. Citthuni cimpankiya cinvaranaca ni ukhwiri?

⁹ Unyeme khula itthu invaranaca ni ukhwiri. Makristau eekhweeli anaanyema khula inanna yookhwiri. Wootakihera, hiiva khaninrwaa uhakoni ni khanimmananiha uwuulumana atthu ookhwa. Toko cithoonyenryaaya mwaha woosomiya uvinre, ntthu akhwaaka khanintthara ilema cinvaranaca ni itthu inhimiya wiira atthu ookhwa nanlelo anaakhala akumi nipuro nikiina. Ciicammo khaninwasera ihako nivarelaka nteko itthonttwa wiira nicuwele citthu cinhala wiirannya uhoolo ni ninaanyema khula inanna yoowaseriya ihako. (Isai. 8:19) Nnyo citthunnyo cinawoopiha kontha cinaaniiriha ukhala wamoca ni Sotwani ni maciini.

10-11. a) Isiyani yaapankalyaaya atthu akiina oositati yooEfesu wiitthuca waya ikhweeli? b) Toko cihimiyaaya nhina 1 Akorintu 10:21, kontha isiyani nihaana naatakihaka makristau oopacera, ni ninlamuliya waatakiha cani?

¹⁰ Uhiye ukhalana ikaruma cookhwiri. Iseekulu yoopacera, atthu akiina oositati yo Efesu yaanaapanka ukhwiri. Wiitthuca waya ikhweeli, yahopanka itthu yomaana woohipica. Ibiiblya ineera: “Atthu enci yaapanka macattuka yahocisa ilivuru caya ni yahopaha waatthuni.” (Mite. 19:19) Ale atthwaale yaanaapheela cinene ulipa wiira anyeme malayikha ootakhala. Ilivuru co macatthuka caarinaaya caari consurukhu mwiinci. Masi uhiya unvaha ntthu cile ilivuru cile awula uthumiha, ayo yaanoopaha cotheene. Unciveliha Yehova yoonale ukhala  itthu yofayita cinene uvikana iperesu colivuru caarinaaya.

¹¹ Ninhala waatakiha cani makristau oseekulu yoopacera? Wakhala wiira uhaana ikaruma yookhwiri—toko ihirisi awula itthu inwaraawe ntthu wiira eelipihace ni cihikele minepa cootakhala—wakhalana nnyo citthunnyo, phataari uriha awula upaha.—Usome 1 Akorintu 10:21.

12. Isiyani ninlamuliyeehu wiikoha nhina matthukelweehu?

¹² Uweheehe ratta mathukelwaa. Wiikohe co: ‘Miiva kinaasomaka ilivuru, irevista awula myaha comwinternetini cinoonihera ukhwiri? Vano icipo, ifiilime, iporokarama co TV awula ikeemi cinkicivela, kiireke cinawoonihera ukhwiri? Kiireke cinawoonihera citthu toko mavampiiru awula atthu owaakhura akhunanaya, ni cinawoonihera upankiyaka ukhwiri? Kiireke cinaathoonyera wiira khuntakhala upanka macattuka, ukwiri ni uvaha mahusi?’ Khunakhala wiira mathukelo otheene owoonihera ihantisi coohikhweeli anoonihera ukhwiri. Phimaana, ukati woothanla mathukelo, ulakele uhithanla mathukelo anvaranaca ni itthu yonrusa Yehova. Nihaana wiikurumica “uhihiya ukhalana muupuwelelo womaana uhoolo wa Nluku.”—Mite. 24:16. *

13. Isiyani ihinlamuliyeehu upanka?

¹³ Uhitepe woopela mwaha citthu co maciini. Nihaana nipankaka toko Yesu. (1 Pet. 2:21) Hinaaya uwa watuninyani, Yesu aakhala wiirimu ni aanaacuwela citthu cinci ca Sotwani ni maciini. Masi Yesu khoopela mwaha citthu caapankalyaaya ayo malayikha oohinamaanaayo. Yesu aapheela waahimyera atthu myaha ca  Yehova, ni khaapheela unsipa awula unlemeliha Sotwani mahala. Hiiva nihaana nintakihaka Yesu ni khaninlamuliya umwarusela myaha co maciini. Uhiya commo, hiiva nihaana uthoonyera wiira ‘nrimeehu unaatthapa nlattu wo itthu yomaana’, awula ikhweeli.—Isaa. 45:1.

14-15. a) Kontha isiyani khaninlamuliya utepa woova malayikha ootakhala? b) Isiyani inthoonyera wiira Yehova nawaakhikicera apoovwaawe?

¹⁴ Uhitepe woova malayikha ootakhala. Ntuninyani yoopahuwa inkhaleehu, citthu cootakhala pooti ukhumelela ukati uhinweherereehu: asitente awula ihasara, iretta ni mpaka ukhwa. Masi khaninlamuliya wuupuwela wiira malayikha ootakhala phinkumihaca citthu cootakhala cotheene. Ibiiblya ineera wiira “uwakati ni cookhumelela coohiwehereriya” pooti umphwanya khula ntthu. (Ekles. 9:11) Nhina maciini, Yehova hothoonyera wiira haana ikuru cinene waavikana maciini. Wootakihera, Yehova khanhiyale Sotwani amwiivaka Jó. (Jó 2:6) Ukati wa Moses, Yehova ahothoonyera wiira haana ikuru cinene waapwaha anankuttho omacattuka o Wiciipitu.(Nkw. 8:18; 9:11) Yehova ciicammo ahonvaha ikuru Yesu wiira anhakhe Sotwani ni maciini wiirimu amoomolelaka vathi. Woohipica, ayo anaahala utthukeliya munliwini ni khaavo nohalaaya unhasara.—Apoka. 12:9; 20:2, 3.

¹⁵ Ilelo, khacimala citthu cinthoonyera wiira Yehova nawaakhikicera apoovwaawe. Muupuwele ila itthwiila: hiiva nihaana nilalyeeraka ni nawiitthucihaka atthu ikhweeli ntuninyani motheene. (Mat. 28:19, 20) Uyo ntekooyo unaathoonyera citthu coohinamaana cotheene cipankalyaawe Sotwani. Khweeliini, waari wiira Sotwani naakhitiri, aanaahala umananiha umalamaliha nteko wotheene unvareehu. Masi uyo khankhitiri. Phimaana, khaninlamuliya utepa woova malayikha ootakhala. Hiiva ninaacuwela wiira “meetho a Yehova anaaweha ituninya yotheene, wiira aakavihere ale arina nrima wonvaresesa uyova paasi.” (2 Ikor. 16:9) Naahinhiyeke Yehova, khiivo itthu maciini inhalaaya upanka wiira anihasare.

16-17. Uhimye ntakihero ninthoonyera wiira unyema malayikha ootakhala ikhanle itthu impheela ulipa nrima.

¹⁶ Unyema malayikha ootakhala, itthu impheela ulipa nrima, utepa wakhalaka wiira apatthaniihu awula amuciihu anaanikhanyereriha  utthara ilema cinvirikaniha Ibiiblya. Masi Yehova nawaavaha iparakha ale anthoonyera ulipa nrima. Moone itthu yankhumelenle Erica, nokhala u Gana. Ukati waarinaawe myaakha 21, Erica ahotthuna usomihiya Ibiiblya. Masi athumwaane Erica yaari nankuttho ni yaanaapanka macattuka. Phimaana, amucyaawe Erica yaaweherera wiira uyo aanaahala weettela ilema yeera wiira ahaana ulya inama yotthuvo yaavahereriye anluku aathumwaane. Ukati Erica waakhottilyaawe utthara iyo ilemeeyo, amucyaawe yoonenle wiira uyo ahaaruwana anluku aathumwaane. Ayo yaanaakupali wiira anluku yaanaahala unttarusa Erica ni iretta.

¹⁷ Amucyaawe Erica yahomananiha unkhanyereriha, masi uyo khaatthunale. Phimaana, Erica ahoomoliya wapuwani waamucyaawe. Masi Masaahiti a Yehova akhwaawe yahomwaakhelela Erica mmapuwani waya. Yehova honcaaliha Erica ni honvaha amuci akiina—atthu ankupali citthu cinkupalyaawe yoonihenre ukhala asuulupalyaawe ni asirokorawe. (Mark. 10:29, 30) Hataa oomoliyaka naamucyaawe ni hataa amucyaawe yapahaka citthu cawe, Erica khaahiyale unvaresesa Yehova. Uyo hopattisiya ni ilelo nvara nteko weepiyoneeru owiicaaverya (pioneira regular). Erica khanoova maciini. Awaacaka amucyaawe, uyo heera: “Kinaalompa khula nihuku wiira amucyaaka ciicammo ancuwele Yehova ni yoone utaphuwa unkhalaneehu nanswalelaka Nlukweehu onifento.”

18. Iparakhani cinhaleehu waakhela nankhuluvelaka Yehova?

¹⁸ Khunakhala wiira otheene cihu inaahala unikhumelela itthu yoorika yoohala utteha waamini wihu toko yankhumelenle Erica. Masi otheene cihu nihaana wiilipihaca wiira ninyeme malayikha ootakhala ni nihaana unkhuluvela Yehova. Napankaka commo, Yehova naahala univaha iparakha cinci ni khaninhala uthepiya ni Sotwani. Ciicammo khaninhala utepa woova maciini cinene, mpaka wanhiyeehu unswalela Yehova. Venci-venci, ninaahala ukhalana upatthani wootepa ulipa ni Nluku. Phimaana, ulakele weettela ikano ivahalyaawe Tiyaku: “Mmwiiwelele Nluku; masi munkhottele Sotwani, ni uyo naahala wuutthawani. Mmwaattamele Nluku, ni uyova naahala uwaattamelani.”—Tiya. 4:7, 8.