MWAHA WOOSOMIYA 12
NCIPO 77 Waarya Mulaponi Wooriipela
Nhiye weetta wapiphini—Mweette wowoonnya
“Nyuuva mwaari khampa ipiphi, masi vano nri khampa nthuko.”—EFESU 5:8.
ITTHU INHALEEHU WIITTHUCA
Ninaahala woona isiyani inniitthucihaaya moolumo ipiphi ni nthuko yantikhilyaawe Paulu nhina ikapiitulu 5 yo Efesu.
1-2. a) Isiyani yaamwiirannyeela Paulu ukati waawantikhenlyaawe iwarakha makristau o Efesu? b) Makohoni anhaleehu waakhula?
HATAA ukati waatthukiyaawe u Roma, apostolu Paulu aheekurumica waalipiha mayamunnaawe. Ukhala wiira uyo khaalamuliya uwootola, ahowantikhela iwarakha. Ihaavo iwarakha imoca uyo yaawantikhenlyaawe makristau o Efesu mwaakha wo 60 awula 61, nawile Kristu.—Efesu 1:1; 4:1.
2 Myaakha 10 uttuli, hinaaya wantikha iyo iwarakheeyo, Paulu ahoviriha ukati nimayamunna o Efesu. Uyo aholalyeera ni aheetthuciha ihapari comaana nkhayi naayo. (Mite. 19:1, 8-10; 20:20, 21) Paulu aanawaafenta cinene ayo mayamunnaayo ni aapheela waakavihera wiira ahihiye unswalela Yehova. Vano, nlattuni Paulu aawantikhenlyaawe iwarakha oolumaka ipiphi ni nthuko? Ni isiyani otheene cihu nineetthucereehu ikano yaavahilyaawe mayamunna o Efesu? Nttwee naakhule ayo makohwaayo.
UKHUMA MPIPHINI NI UTTHUNA NTHUKO
3. Moolumoni Paulu yaawantikhenlyaawe makristau o Efesu?
3 Paulu ahowantikhela makristau o Efesu co: “Nyuuva mwaari khampa ipiphi, masi vano nri khampa nthuko.” (Efesu 5:8) Naala moolumwaala, Paulu naavirikaniha ipiphi ni nthuko wiira awoonihere makristau o Efesu mananna caarukunusilyaaya meettelwaaya. Nttwee noone nlattuni Paulu wenryaawe wiira ayo yaari khampa ipiphi.
4. Isiyani inoonihera wiira atthu o Efesu yaari wapiphini nhina mminepani?
4 Ittiini cowootha. Ahinaaya ukhala makristau, mayamunna o Efesu yaakupali citthu cowoothiya ceetthucihiya mmattiinini ni yaanaattharatthara venci citthu co maciini. Wasittatti yo Efesu phaaryaaya itempulu ya nluku onthiyana eehaniya Ártemis. Atthu enci yaawehera iyo isittattiiyo khampa nipuro nootekatekiya nootepa ureera ule ukatyuule. Atthu yaanaarwaa iyo itempulwiiyo wiira yaaswalele anlukwaaya. Uhemiya ni utumiya ttontto Ártemis aari nakoso aaphwanyiha iluukuru cinene ile isittattiile. (Mite. 19:23-27) Ciicammo, iyo isittattiiyo yaanaacuweliya venci wiira naari nipuro noopankaciya macattuka cinene.—Mite. 19:19.
5. Isiyani inoonihera wiira atthu o Efesu yaari wapiphini nhina meettelwaaya?
5 Urupihana woohiloka. Isittatti yo Efesu waahoomwaryeela cinene urupihana woohiloka ni atthu enci yaakhala iyo isittattiiyo khayoonela ihaaya itthu yaapankaaya. Khayooniha ukhala itthu yootakhala wuuluma citthu cosece mapuro yaapankiya iteatro ni hataa ciicammo mmattiinini. (Efesu 5:3) Atthu enci o Efesu ‘yahohiya meettelo otheene omaana.’ Ayo moolumwaayo maanaaya wiira ayo ‘yahohiya woona uwerya.’ (Efesu 4:17-19) Ahinaaya uncuwela Yehova ni ahinaaya wiitthuca meettelo omaana, ayo khawaawuulihaca muru yapankaka itthu yoohinamaana. Ayo ciicammo khayaawacera wakhala wiira citthu caapankaaya caanankasiri Yehova awula mena. Phimaana Paulu wenryaawe wiira ayo ‘yaari wapiphini ni yaari uttayi nuukumi unvahaawe Nluku.’
6. Nlattuni Paulu wenryaawe wiira atthu o Efesu yaahokhala “khampa nthuko”?
6 Masi atthu akiina o Efesu yahohiya weetta wapiphini. Paulu enre wiira ‘vano ayo yaari khampa nthuko wamoca ni Apwiiya.’ (Efesu 5:8) Ayo yaholakela ukhala yeettelaka itthu inhimyaaya nuulumo na Yehova, ninlattanaca ninthuko unnimwaleela wiira nicuwele iphiro yooreera weetta. (Isaa. 119:105) Ayo atthwaayo yahohiya citthu cowoothiya cotheene ceetthucihiya mmattiinini ni yahohiya urupihana woohiloka. Ayo yahancera untakiha Nluku ni yahopanka yotheene yaakhitinryaaya wiira answalele ni antteelihe nrima Nluku.—Efesu 5:1.
7. Makhalelweehu anlattanaca cani nimakhalelo o makristau o Efesu?
7 Inanna imocaaru, hiiva nihinaaya ucuwela ikhweeli, naari wapiphini nhina mminepani ni meettelweehu. Atthu akiina iriyariihu yaanaarwaaka mmafestani cottiini cowootha ni akiina yaanaapanka urupihana woohiloka. Masi ukati wiitthucileehu ikano ca Nluku, nihorukunusa meettelweehu ni nihancera ukhala khampa Yehova cimpheelaawe. Upanka commo uhoniphwanyiha ifayita cinci. (Isai. 48:17) Masi ciicammo, ninaakhalana marikariko. Nihaana niikurumicaka wiira nikhotte ipiphi ihiileehu uttuli ni nihihiye weetta wanthukoni. Masi ninhala ukhitiri cani upanka commo?
Image digitally reproduced with the permission of the Papyrology Collection, Graduate Library, University of Michigan, P.Mich.inv. 6238. Licensed under CC by 3.0
Paulu ahowantikhela mayamunna o Efesu ikano comaana. Hiiva ciicammo pooti weettela nnyo ikanonnyo (Nwehe iparaagarafu 7) h
NHIYE WEETTA WAPIPHINI
8. Toko cinooniheraaya Efesu 5:3-5, isiyani atthu o Efesu yaalamuliyaaya unyema?
8 Nsome Efesu 5:3-5. a Makristau o Efesu wiira ahiye weetta wapiphini nhina meettelwaaya, yahaana yakhottaka upanka khula itthu inonkasiri Yehova. Ni itthu inonrusa Yehova khunakhala urupihana woohiloka paahi, masi ciicammo woopela mwaha citthu cosece awula cinkurumica urupihana woohiloka. Paulu ahowuupusera makristau o Efesu wiira ayo yahaana yanyemaka nnyo citthunnyo yapheelaka ‘ukela muumweneni wa Kristu ni wa Nluku.’
9. Kontha isiyani nihaana ninyemaka khula itthu inkurumica urupihana woohiloka?
9 Hi ciicammo nihaana ninyemaka ‘upanka citthu copiphi.’ (Efesu 5:11) Ikhweeli phi ila: ntthu awehaka, aviriyanaka awula akhalaka ukati wotheene oolumaka citthu cosece, nomalela upanka itthu yootakhala. (Upha. 3:6; Tiya. 1:14, 15) Ihaavo ilapo imoca mayamunna yaapankilyaaya ikhurupu yowoopiya myaha mwinternetini nhina nnye cineehaniya redes sociais. Wiipaceroni, ayo mayamunnaayo yooluma myaha co mminepani nhina iyo ikhurupwiiyo. Masi vano wahoolo, ayo yahancera wuuluma citthu cosece. Nuuwakatyaaya, mayamunna enci yaari nhina iyo ikhurupwiiyo yaheera wiira myaha coohinamaana coolumaaya phaawiirihile uvara itampi yoorupihana woohiloka.
10. Sotwani nomananiha cani unithepya? (Efesu 5:6)
10 Ituninya inhoolelaawe Sotwani impheela unithepya ni unikupaliha wiira citthu Yehova cinaateelihaawe cikhanle comaana. (2 Pet. 2:19) Hi khanintikhina wiira nwo ukhanle wootha wa Sotwani! Ukhuma nenne nokhalayi, Sotwani naamananiha waathepya atthu ayo manannaayo, wiira ahicuwelele isiyani ikhanle yomaana ni yoohinamaana. (Isai. 5:20; 2 Akor. 4:4) Phimaana, nhina ifiilime, iporokaraama co TV ni mwinternetini, cihaavo citthu cinci cinkumiheriya cinvirikaniha ikano comaana ca Yehova. Sotwani nopheela unikupaliha wiira citthu coohinamaana cimpankiya cinene ilelo, khweeliini, cikhanle comaana ni khacinnipanka pusya.—Nsome Efesu 5:6. b
11. Itthu yaamwiirannyenle Angela inoonihera cani wiira nihaana neettelaka ikano yo Efesu 5:7? (Nwehe ciicammo ilatarato.)
11 Sotwani nopheela wiira naapatthanane atthu ahinnikurumica umwiiwelela Yehova. Phimaana, Paulu ahowiirela makristau o Efesu co: “Nhaapatthanane” atthu ampanka citthu cinonrusa Nluku. (Efesu 5:7) Uvirikana nuukati wo makristau o Efesu, ilelo, thi hi ninlamuliya utepa waathanla saana atthu oohala waapatthanana. Kontha mahukwaala, khunrika uviriha ukati nikhula ntthu, kahi paahi co ni co, masi ciicammo nhina redes sociais. Angela, c nokhala u Ásia, hoonelela wiira redes sociais cinawoopiha. Uyo heera co: “Nnyo cinkhala khampa itapha inoovariha weeva woohicuwelela. Wahophiya ukati mi wahoonaaka ukhala itthu yootakhala waapatthanana atthu ahinhisima ikano co mbiiblyani. Nuuwakatyaaya, kahancera wuupuwela wiira khayaari itthu yootakhala ukhalana meettelo ahinoncivela Yehova.” Angela ahocaaliya, ukhala wiira mahumu yahonkavihera urukunusa meettelwaawe. Uyo heera-tho: “Nna co, mi kinaaviriha ukati kuupuwelaka citthu co mminepani, uhiya citthu co redes sociais.”
Waathanla ratta atthu anaapatthananeehu phinhala unikavihera uhihiya weettela ikano ca Yehova (Nwehe iparaagarafu 11)
12. Isiyani inhala unikavihera uhihiya utthara ikano ca Yehova cinhimya isiyani ikhanle itthu yomaana ni yoohinamaana?
12 Khaninlamuliya ukupali itthu inoopuwelaaya atthu o ntuninyani, wiira khunnanara upanka citthu cinonrusa Yehova. Hi ninaacuwela wiira iyo ikhanle itthu yowoothiya. (Efesu 4:19, 20) Phimaana, unaareera wiikoha co: ‘Kinneekurumica wiira kihivirihe ukati mwinci naatthu anaavaranaaka nteko, anaasomanaana awula atthu akhwaawe ahinhisima ikano ca Yehova? Miiva kinaalipa nrima wiira kaavaanyihe ale aneera wiira pooti uhiiwelelela ikano ca Yehova, hataa ayo yahalaka wuupuwela wiira miiva kinaatepiha?’ Toko cinthoonyeraaya 2 Timotiyu 2:20-22, hataa wanlokoni, hi nihaana naathanlaka ratta atthu oohala waapatthanana. Nhiliyale wiira atthu akhwaawe o wanlokoni pooti uhuukaviherani unvaresesa Yehova.
NHIHIYE WEETTA KHAMPA “ASAANA O NTHUKO”
13. ‘Uhihiya weetta khampa asaana o nthuku’ maanaaya isiyani? (Efesu 5:7-9)
13 Paulu ahaakurumica makristau o Efesu ukhotta ipiphi, masi ciicammo ‘uhihiya weetta khampa asaana o nthuko.’ (Nsome Efesu 5:7-9. d) Masi iyo itthwiiyo maanaaya isiyani? Nimoolumacero vakaani, maanaaya wiira nihaana neettaka khampa makristau ukati wotheene. Ni wiira nikhitiri upanka commo, nihaana nihihiyaka usoma Ibiiblya nivarelaka nteko ilivuru cihu. Ciicammo, nihaana niweheehaka ntakihero ni citthu ciitthucihilyaawe Yesu, ule khanle “nthuko wo ntuninyani.”—Joau 8:12; Miru. 6:23.
14. Nnepa wowaarya wa Nluku unnikavihera cani?
14 Napheelaka uhihiyerera weetta ‘khampa asaana o nthuko,’ ciicammo nihaana nikaviheriyaka ninnepa wowaarya wa Nluku. Kontha isiyani? Kontha unaarika unyema upanka citthu cootakhala nhina ila ituninya inkhaleehwiila. (1 Atesal. 4:3-5, 7, 8) Nnepa wowaarya unaahala unikavihera unyema moopuwelelo oohiloka o ntuninyani ni citthu cowoothiya cinvirikaniha ikano ca Yehova. Nnepa wowaarya unaahala ciicammo unikavihera upanka “citthu cotheene cikhanle comaana, cosariya ni ceekhweeli.”—Efesu 5:9.
15. Isiyani inlamuliyeehu upanka wiira Nluku anivahe nnepaawe wowaarya? (Efesu 5:19, 20)
15 Inanna ikhwaawe yo waakhela nnepa wowaarya ukhanle ulompa. Yesu aheera wiira Yehova naahala ‘waavaha nnepa wowaarya ale anonlepela.’ (Luka 11:13) Nanttottopelaka Yehova umikutthaanoni, hiiva ciicammo ninawaakhela nnepa wowaarya. (Nsome Efesu 5:19, 20. e) Nnepa wowaarya phinhala univaha ikuru wiira nikhitiri ukhalana meettelo anoncivela Yehova.
16. Isiyani inhala unikavihera ulakela upanka citthu comaana? (Efesu 5:10, 17)
16 Napheelaka ulakela itthu yuulupale, nihaana nitothaka ucuwela ‘isiyani impheelaawe Yehova,’ vano ulakela upanka itthu impheelaawe. (Nsome Efesu 5:10, 17. f) Naphwanyaka ikano co mbiiblyani cinnoonihera itthu yoohala upanka, unkhala khampa Yehova naanoonihera itthu uyova inoopuwelaawe nhina uyo mwahooyo. Vano, neettelaka ikano ca Yehova, ninaakhitiri ulakela upanka citthu comaana.
17. Manannani ninhaleehu uvarela nteko saana ukatiihu? (Efesu 5:15, 16) (Nwehe ciicammo ilatarato.)
17 Paulu ahaahimerya mayamunna o Efesu wiira ayo yahaana yavarelaka nteko saana ukatyaaya. (Nsome Efesu 5:15, 16. g) ‘Ntakhali’ noolumiya nhina nnyo iveerusunnyo khanle Sotwani. Uyo nopheela wiira niwacere citthu co ila ituninyeela mpaka wahinkhalaneehu ukati wonswalela Yehova. (1 Jo. 5:19) Woohicuwelela, nkristau atthunaka nawancera utotha cinene nsurukhu, usoma ni nteko, uhiya waavya mananna oovara cinene miteko ca Yehova. Iyo itthwiiyo yeerannyaaka, inthoonyera wiira uyo hancera wuupuwela khampa atthu o ntuninyani. Ninaacuwela wiira nsurukhu, usoma ni mihakhu khacinakhala citthu cootakhala. Masi khaninlamuliya uhoolelihera nnyo citthunnyo khampa itthu yoopacera muukumini wihu. Napheelaka uhihiyerera weetta khampa asaana o nthuko, nihaana nivarelaka nteko ratta ukatiihu ni uhoolelihera upanka citthu cikhanle cofayita.
Makristau o Efesu yahovarela nteko ratta ukatyaaya, yeekurumicaka ulalyeera (Nwehe iparaagarafu 17)
18. Isiyani munna Donald yaapankilyaawe wiira avarele nteko ratta ukatyaawe?
18 Ntothe mananna o wuncerera nteko unonvareleenyu Yehova. Iyo phi itthu yaapankilyaawe munna mmoca neehaniya Donald, nokhala u África do Sul. Uyo heera: “Mi kaheemela ni kahoopuwela isiyani yaahooleliheraaka muukumini waka. Vano, kahonlompa Yehova ninrimaaka wotheene ni kahonlepela wiira akikavihere uvara cinene nteko woolalyeera. Ciicammo, kahonlepela wiira akikavihere uphwanya nteko waahala ukikavihera ukhalana ukati wiira kilalyeere cinene. Iyo itthwiiyo yaheerannya, kontha Yehova ahokikavihera. Vano, mi ni amwaaraka nahancera uvara nteko weepiyoneeru.”
19. Isiyani inlamuliyeehu upanka wiira nihihiye weetta ‘khampa asaana o nthuko’?
19 Iwarakha Paulu yaawantikhenlyaawe mayamunna o Efesu yahaakavihera unvaresesa Yehova. Iyo iwarakheeyo ciicammo pooti unikavihera hiiva. Khampa ciitthucileehu, iyo iwarakheeyo inaanikavihera waathanla ratta asipatthaniihu ni mathukelweehu. Ciicammo, inaanikurumica uhihiya usoma Ibiiblya wiira ikhweeli inlattanaca ninthuko inoonihere iphiro yooreera weetta. Ni nihoona wiira iyo iwarakheeyo inaahimya ifayita urinaaya nnepa wowaarya wa Nluku, kontha unaanikavihera ulakela upanka citthu comaana cinoncivela Yehova. Upanka citthu cotheenennyo unaahala unikavihera ukhotta ipiphi yo ila ituninyeela ni uhihiya weetta wanthukoni!
NNOHALA WAAKHULA CANI?
-
“Ipiphi” ni “nthuko” unoolumiya nhina Efesu 5:8 ikhanle isiyani?
-
Isiyani inlamuliyeenyu upanka wiira nnyeme “ipiphi”?
-
Isiyani inlamuliyeehu upanka wiira ‘nihihiye weetta khampa asaana o nthuko’?
NCIPO 95 Ekeekhai Ennitepa Waarya
a Efesu 5:3 Uraruwa, citthu coohinamaana cotheene ni ikhwilu cihiromoliye mena vakaani iriyariinyu, kontha iyo kihimwena itthu impankaaya atthu anonswalela Nluku. 4 hataa meettelo owoonihaca ihaaya, myaha cinthoonyera ulolo ni myaha cooruwana—kontha nnyo cikhanle citthu coohinamaana; masi uhiya upanka commo, nyuuva munsukhurweeleke Nluku. 5 Kontha nyuuva nnaacuwela ila itthwiila ni nnaakupali: khaavo ntthu nopanka urupihana woohiloka, ntthu nopanka citthu coohiirya, nakhwilo—maanaaya wiira ntthu naaswalela attontto. Khaavo hataa ntthu nopanka nnyo citthunnyo nhala ukela muumweneni wa Kristu ni wa Nluku.
b Efesu 5:6 Hikhale ntthu nohala wuuthepyani nimoolumo oololo. Kontha nlattu wo nnya citthunnya, Nluku nawaaviruwela atthu ahimmwiiwelela.
c Macina makhwaawe ahaakakhanihiya.
d Efesu 5:7 Phimaana, nhiwaatanane ayo atthwaayo. 8 Kontha wiipaceroni, nyuuva mwaari khampa ipiphi, masi vano nhokhala khampa nthuko wamoca ni Apwiiya. Nhihiye weetta khampa asaana o nthuko. 9 Kontha nhokorokho wo nthuko ukhanle citthu cotheene comaana, cosariya ni ceekhweeli.
e Efesu 5:19 Moope mwaha nlipihanaka niisaalimu, munttottopelaka Nluiku ni mmwiipelaka Yehova icipo co mminepani ninrimeenyu wotheene, 20 nhihiyaka munsukhurweela citthu cotheene Nluku, Apaapeehu, mwancina na Apwiiyeehu Yesu Kristu.
f Efesu 5:10 Nhoolelihere upanka woohihiyerera itthu inaacivela Apwiiya. 17 Phimaana, nhiye ukhala atthu oohankhili, masi ncuwele isiyani Yehova impheelaawe.
g Efesu 5:15 Nweheehe saana meettelweenyu wiira nhikhale khampa alolo, masi nkhale atthu oocuwelaca, 16 nvarelaka nteko ratta ukatiinyu, ukhala wiira ninkhala mahuku oohiloka.
h ILATARATO: Ilatarato inoonihera iwarakha Paulu yaawantikhenlyaawe makristau o Efesu.
