1. Isiyani yankavihenre Jó utepa uncuwela Yehova?

 NHINA myaha cotheene Jó coopilyaawe muukumini wawe, uhaavo mwaha mmoca waari wootepa ureera: mwaha waamoopannyaawe Yehova Nluku. Nhina uyo mwahooyo, Yehova ahomwiirela Jó wiira aweheehe citthu cowumpiya. Upanka commo wahonkavihera Jó ukhuluvela ucuwelaca wa Nluku ni waawacera wawe saana atthu anonswalela. Wootakihera, Jó aheetthuca wiira Yehova naawacera inama. Phimaana, uyo anhala unwacera Jó ciicammo. (Jó 38:39-41; 39:1, 5, 13-16) Jó aheetthuca makhalelo menci a Yehova aweheehaka citthu cumpilyaawe.

2. Kontha isiyani pooti unirika uweheeha citthu cumpilyaawe Yehova?

² Hiiva ciicammo ninaatepa uncuwela Yehova naweheehaka citthu cumpilyaawe. Wakhala wiira nyuuva nnokhala wasittatti, atthunaka khannotepa woona cinene citthu cumpilyaawe Yehova. Ni hataa ukhalaka wiira nnokhala nipuro nowaattamela itakhwa, pooti ukhalaka wiira khannokhalana ukati wowoona citthu cumpilyaawe Nluku. Phimaana, ninaahala wiitthuca nlattuni unreeraaya ukumiha ukati ni wiikurumica uweheeha citthu cumpilyaawe Nluku. Ninaahala woona mananna Yehova ni Yesu civarenlyaaya nteko citthu cowumpiya wiira awiitthucihe atthu ni isiyani hiiva inlamuliyeehu upanka wiira nitepe wiitthucera citthu cowumpiya.

3. Nlattuni waneereehu wiira Yehova aapheela wiira Atamu atikhinace citthu cumpilyaawe?

³ Yehova aapheela wiira Atamu atikhinace citthu cowumpiya. Ukati Yehova waamumpilyaawe Atamu, uyo ahomweesa mpeephoni ni ahonvaha nteko woowacera ni wowuunuwiha ijardim yo Eeteni. (Upha. 2:8, 9, 15) Muupuwele mananna Atamu caakhanlyaawe ootteeliya ukati woonaawe inuku cimelaka ni ithutu  awula ifoloore cihulyaaka! Uwacera ile ijardiile yaari iparakha yuulupale yaavahiyaawe Atamu! Yehova ciicammo ahonvahacera Atamu uvaha ncina khula inama. (Upha. 2:19, 20) Yehova pooti waavahaawe ncina nnyo inamannyo, masi uyo anvahile iyo iparakheeyo Atamu. Khweeliini, Atamu hinavaha ncina khula inama, atthunaka anweheeha mananna inameeyo caakhalaaya ni caathukaaya ni makhalelwaaya. Uyo ntekooyo waanantteeliha nrima. Khweeliini, iyo itthwiiyo yahonkavihera Atamu umoona Yehova ukhala namatekateka muulupale ni namacuwelaca upanka citthu.

4. a) Nlattuni hiiva ninlamuliyeehu uweheeha citthu cowumpiya? b) Nhina citthu cowumpiya cotheene, isiyani intepa wuutikhinihani?

⁴ Hiiva nihaana niweheehaka citthu cowumpiya, kontha Yehova nopheela wiira nipanke iyo itthwiiyo. Isaiya 40:26 ineera: “Nkawehani wiirimu ni moone. Tipani umpale nnya citthunnya?” Khunrika waakhula nno nikohonno. Yehova hocariha wiirimu, watuninyani ni mpahari citthu cooreera ni cootikhiniha uyo umpilyaawe. Ni nnyo citthunnyo cinaanikavihera uncuwela saana Yehova. (Isaa. 104:24, 25) Muupuwele ila itthwiila: Yehova numpile nimananna ninkhitiriihu woona citthu comaana ni unicivela. Ni hiiva ninkhitiri upanka iyo itthwiiyo, kontha Yehova honivaha citthu thanu mwiirutthuni wihu. Nnyo citthunnyo cikhanle: miitho, manyaru, matata, nlimi ni iphula

5. Toko cinhimyaaya Arooma 1:20, nlattuni ikhanlyaaya itthu yofayita uweha ni wuupuwela citthu cowumpiya?

⁵ Ibiiblya inaahimya itthu ikiina innikurumica uweheeha ni wuupuwela citthu cowumpiya. Ibiiblya ineera wiira citthu cowumpiya cinaanikavihera ucuwela makhalelo a Yehova. (Nsome Arooma 1:20. b) Wootakihera, moone citthu cotheene ntuninyani cipankiyaaya nimananna ooreera. Iyo inawoonihera khweeliini wiira Nlukwiihu khanle namacuwelaca. Ni muupuwele iyoolya cinci ni coovirikana cirineehu. Iyo inawoonihera wiira khweeliini, Yehova naanifenta. Noopuwelaka makhalelo a Yehova anooniheriya nhina citthu cumpilyaawe, hiiva ninancuwela saana ni ninaatepa umpatthanana. Nttwee noone vano mananna Yehova caavarenlyaawe nteko citthu cowumpiya wiira eetthucihe myaha cofayita.

6. Isiyani ineetthucereehu inuni cineehaniya cegonha?

⁶ Yehova hohelela ukati khula itthu. Khula mwaakha, ukhuma wiimaleloni mweeri wo Fevereiro mpaka iriyari mweeri wo Maio, asarayeli yaanoonaka inuni cineehaniya cegonha civavaka. Uyo phuukati nnyo inuninnyo waathamelaaya  mphantte wooculu ilapo yo Isarayeli. Yehova ahowiirela co apoovu o Isarayeli: “Cegonha naacuwela ukatyaawe woothamela micoko cikhwaawe.” (Jer. 8:7) Yehova holakela ukatini nnyo inuninnyo unlamuliyaaya uthamela micoko cikhwaawe. Inanna imocaaru, uyo holakela ukati unhalaawe uwaana ihukhumu cawe. Vano, moonaka inuni cithamelaka ncoko nkiina, muupuwele wiira hiiva pooti wanonkhuluveleehu Yehova wiira uyo holakela ukati unhalaawe umalamaliha ila ituninya yoohinamaaneela.—Habak. 2:3.

7. Isiyani ninwiitthucereehu asaaka? (Nwehe Isaiya 40:31.)

⁷ Yehova nawaavaha ikuru aswalyaawe. Amuulumanaka porofeeta Isaiya, Yehova ahokhuluveliha wiira uyo nawaavaha ikuru aswalyaawe wiira avave khampa saaka ukati waahalaaya wiicoona ukhala oololovaca. (Nsome Isaiya 40:31. c) Asarayeli yanwoonaka asaaka yavavaka nculu cinene ninavihile ncuwa ni woohaatta mapupha. Iyo inoonihera wiira Yehova ciicammo pooti waavaha ikuru aswalyaawe khampa naavahaawe ikuru asaaka. Khula ikwaha inhaleenyu umoona mwaanuni avavaka uculu ciinene woohaatta mapupha, muupuwele wiira Yehova pooti wuuvahani ikuru wiira nkhitiri uvilela masakha anoophwanyani.

8. Isiyani Jó yeetthucenryaawe citthu cumpilyaawe Yehova, ni hiiva isiyani nineetthuceehu?

⁸ Hiiva pooti wanonkhuluvelehu Yehova. Yehova ahonkavihera Jó woona wiira pooti wankhuluvelaawe uyova. (Jó 32:2; 40:6-8) Nhina mwaha Yehova waamoopannyaawe Jó, ahooluma citthu cinci cumpilyaawe, toko itthonttwa, mahutte ni itari. Yehova ciicammo ahooluma inama, toko imope yontakhwani ni ikhavalu (Jó 38:32-35; 39:9, 19, 20) Citthu cotheenennyo cahomwiitthuciha Jó kahi paahi ikuru cirinaawe Yehova, masi ciicammo nifento ni ucuwelaca rinaawe. Jó waamalihilyaawe umoopana Yehova uyo mwahooyo, ahotepa unkhuluvela uvikana khalayi. (Jó 42:1-6) Hiiva ciicammo noopuwelaka citthu Yehova cumpilyaawe, ninawoona wiira uyo khanle namacuwelaca oohimalela ni khanle nakuru unipwaha hiiva ni uyo haana ikuru yoomaliha uhuva wihu ni khweeliini naahala umaliha. Ucuwela iyo itthwiiyo unaanikavihera utepa unkhuluvela Yehova.

9-10. Ipula ni ncuwa ninniitthuciha isiyani?

⁹ Yesu ancuwela sana-saana citthu cowumpiya. Ibiiblya immwiihana Yesu ‘nanteko oocuwelaca,’ kontha uyo ahokhalana iparakha yowaakavihera Athumwaane wumpa citthu cotheene cirivo. (Miru. 8:30) Ni ukati Yesu waaryaawe va watuninyani va, uyo ahovarela nteko cuwumpiya wiira awiitthucihe attharyaawe uncuwela Yehova. Nttwee noone citthu ceetthucihilyaawe.

¹⁰ Yehova nawaafenta atthu otheene. Ukati waataphulelaawe mwahaawe muulupale woomwaakoni, Yesu ahaahimyeera attharyaawe citthu piili Yehova cumpilyaawe atthu enci cihinvahaaya ifayita: ncuwa ni ipula. Wiira ukumiihu ukhale saana, cihaana ukhala nnyo citthu piilinnyo. Ni Yehova natthunne, khaahala waavaha ncuwa ni ipula atthu oohiloka. Masi nlattu wonifento nawe, uyo nawaavaha nnyo citthunnyo atthu otheene. (Mat. 5:43-45) Yesu ahovarela nteko nnyo citthu piilinnyo wiira awiitthucihe attharyaawe wiira Yehova nopheela waathoonyihera nifento atthu otheene. Phimaana, khula nihuku nnohaleenyu woona ncuwa nikelaka awula irupaka ipula, muupuwele ufenta wa Yehova ni uhaathanla wawe atthu. Ni inanna imoca yootakiha ufenta wa Yehova ukhanle waalalyeera atthu otheene.

11. Isiyani ineetthuceehu naawehaka asinuni?

¹¹ Yehova naanivaha citthu cotheene nimpheeleehu muukumini wihu. Ukati waataphulelaawe mwahaawe muulupale umwaakoni, Yesu ciicammo aheera: “Mwaaweheehe asaanuni anvava uculu, ayo khaanaala ni khanhepha, khanthotokaniha nnikhupini, masi Apaapeenyu, ari wiirimu, anawaaliha ayo asinunnyaayo.” (Mat. 6:26) Atthunaka ukati Yesu woolumaawe iyo itthwiiyo, atthwaayo yanwoona asinuni yavavaka uculu. Phimaana, Yesu ahaakoha: “Niireke nyuuva khantepale ukhalana ifayita yowaavikana ayo [asinunnyaayo]?” Ayo manannaayo, Yesu honikavihera woona wiira Yehova naahala univaha citthu cinnithwaa! (Mat. 6:31, 32) Moolumo a Yesu anawaalipiha aswali ookhuluvelya a Yehova ilelo. Mmirawo mmoca piyoneera nokhala u Espanha ancukulaca, kontha khaakhitiri uphwanya inupa yookhala. Masi ukati waawehilyaawe asinuni yalyaaka inuku ni mihokorokho cikhwaawe, uyo aheecoona saana. Uyo heera: “Uwoona ayo asinunnyaayo wahokikavihera wuupuwela wiira Yehova nawaawacera. Uyo ciicammo naahala ukiwacera miiva.” Vano, anavinreene mahuku vakaani, ayo anuunwaayo yahokhitiri uphwanya inupa yookhala.

12. Toko cineeraaya Matewus 10:29-31, isiyani immwiitthucereehu Yehova namoonaka mpeleele?

¹² Yehova naamoona ukhalana ifalyita khula ntthu iriyariihu. Yesu hinaaya waaruma attharyaawe wuulalyaani moolumo a Nluku, uyo aahaakavihera umaliha woova ulupatthiya. (Nsome Matewus 10:29-31. d) Wiira aakavihere uyo ahovarela nteko nlattanihero naasinuni yahaathwaa ncoko wo Isarayeli: mpeleele. Ukati wa Yesu, uyo aari mwaanuni ahooniya ukhalana ifayita. Masi Yesu ahowiirela atthwaayo co: “khaavo hataa mpeleele mmoca nomorela vathi Apaapeenyu woohicuwela.” Ni ciicammo aheera: “Nyuuva nhaana ifayita cinene waavikana ampeleele enci.” Ayo manannaayo, Yesu ahaakhuluveliha attharyaawe wiira Yehova aanaamoona ukhalana ifayita khula ntthu iriyaryaaya. Phimaana, ayo khayaarina isariya yowoova ulupatthiya. Ikwaha cotheene, atthari a Yesu waahalaaya umoona mpeleele ukati waalalyeeraaya mmasittatti ni mwaaliteeya, ayo yanhala wuupuwela moolumo a Yesu. Inanna imocaaru, ikwaha cotheene nyuuva nnohaleenyu umoona mwaanuni, muupuwele wiira Yehova naawoonani ukhalana ifayita cinene, kontha nhaana ifayita venci waavikana ampeleele enci. Nkaviheriyaka ni Yehova, nyuuva pooti ukhitiri uvilela, hataa nlupatthiyaka venci.—Isaa. 118:6.

13. Isiyani inlamuliyeehu upanka wiira nincuwele saana Yehova?

¹³ Hiiva pooti uncuwela Yehova sana-saana nlattu wooweha citthu cumpilyaawe. Masi isiyani inlamuliyeehu upanka? Yoopacera, nihaana nikumihaka ukati wiira niweheehe citthu cowumpiya. Nihaana nuupuwelaka isiyani inniitthucihaaya  nhina makhalelo a Yehova. Masi upanka commo pooti unirika. Nuunu mmoca nokhala u Camarões neehaniya Géraldine heera: “Mi kuunuwenle usittatti. Phimaana, kihaana wiikurumica venci wiira kiwehe citthu cowumpiya.” Humu mmoca neehaniya Afonso heera: “Mi kiheetthuca wiira kihaana kikumihaka ukati wiira kiweheehe citthu cowumpiya ni wuupuwelela isiyani inkiitthucihaaya nhina makhalelo a Yehova.”

14. Isiyani Davidi yeetthucilyaawe ukati woopuwelaawe citthu cowumpiya?

¹⁴ Nhina Isaalimu 8:3, 4, Davidi hantikha co: “ Koonaka vale irimu caa, cumpiye ni makokhwaa, mweeri ni itthoottwa cumpilyaa, pinaatamu ooweherera ukhwa isiyani iryaawe, wiira weeva umuupuwele.” Davidi aanawuupuwela citthu cumpilyaawe Yehova. Davidi awehaka wiirimu ni oonaka itthonttwa, uyo khoona itthonttwa paahi, masi ciicammo aanawoona makhalelo omaana a Yehova. Uyo aheetthuca wiira Yehova khanle nkhulupale. Davidi ciicammo aanawuupuwela mananna ootikhiniha uyova coonuwilyaawe munthuukwani waanumwaane. Khweeliini, wuupuwela citthu cotheenennyo waanaamwiiriha utepa utikhinaca ucuwelaca wa Yehova.—Isaa. 139:14-17.

15. Nhimye makhalelo a Yehova aneetthuceehu nawehaka citthu cumpilyaawe. (Nwehe Isaalimu 148:7-10.)

¹⁵ Khampa Davidi, atthunaka hiiva khunnirikela uphwanya itthu yumpilyaawe Yehova yoohala uweheeha ni wuupuwela itthu inniitthucihaaya. Hi pooti wanooneehu makhalelo omaana a Yehova, kontha ari iriyariihu. Wootakihera, moone ikuru ca Yehova ukati ninooviheraayani ncuwa mwiirutthuni winyu. (Jer. 31:35) Muupuwele ucuwelaca wa Yehova mwamoonaka mwaanuni atekaka ipuurwaawe. Muupuwele mananna Yehova khanlyaawe ooteehaca mwamoonaka mwalapwa oomolanihaka mwiilaawe. Ni munsukhuru Yehova nlattu wo nifento nawe mwawoonaka ayari yanthukanaka mwanaya. Hi nihaana citthu cinci cinniitthuciha makhalelo a Yehova. Citthu cotheene Yehova cumpilyaawe—cuulupale ni hataa cankaani, coottayi ni cowakhiviru—citthu cotheennyo cinanttottopela Yehova.—Nsome Isaalimu 148:7-10. e

16. Isiyani ninlamuliyeehu upanka?

¹⁶ Nlukwiihu khanle namacuwelaca, nanifento, nakuru ni citthu cotheene cipankilyaawe cikhanle comaana. Hiiva ninaakhitiri woona sana-saana ayo makhalelwaayo ni makhwaawe nhina citthu cumpilyaawe. Phimaana, nihaana nikumihaka ukati wiira niweheehe citthu cumpilyaawe ni wuupuwela citthu cinniitthucihaaya nhina makhalelo a Yehova. Napankaka commo, ninaahala utepa umwaatanana Mumpiihu. (Tiya. 4:8) Nhina mwaha nkiina unttharana nuula, ninaahala woona manannani ayari cinlamuliyaaya uvarela nteko citthu cowumpiya wiira yaakavihere asaanaaya umpatthanana Yehova.