1. Isiyani inlamuliyeehu upanka wiira noopwe nihuku na Yehova?

 “NIHUKU na Yehova” mbiiblyani, ninaaciya nihuku Yehova naahukhumwaawe amwiinannyaawe ni uwoopola apoovwaawe. Iyo ihokhumelela ikwaha cinci khalayi. (Isai. 13:1, 6; Ezek. 13:5; Sof. 1:8) Mahukweehwaala, nihuku na Yehova ninhala upacera ukati ahooleli isiyaasa unhalaaya utuphela Ibabilooniya Yuulupale ukhottoni yo Harmacetom. Wiira noopwe nno nihukunno, nihaana wiitthenkaca nenna co. Yesu heetthuciha wiira nihaana nikhalaka owiitthenkaceene wiira nakhitiri uvilela nihuku no masakha moolupale. Iyo inoonihera wiira nihaana wiitthenkaca khula nihuku.—Mat. 24:21; Luka 12:40.

2. Kontha isiyani moolumo Paulu aawantikhenlyaawe atesalonika akhanlyaaya ofayita mahukweehwaala?

² Nhina iwarakha yoopacera Paulu yaakaviheriyaawe ninnepa wowaarya wiira awantikhele atesalonika, ahovarela nteko malattanihero menci wiira aakurumice makristau ukhala owiitthenkaceene wiira yavilele nihuku nohukhumu na Yehova. Paulu ancuwela wiira nihuku na Yehova khanaahala uwa ule ukatyuule. (2 Atesal. 2:1-3) Waahookhalaru commo, uyo ahaakurumica mayamunnaawe ukhala owiitthenkaceene, khampa nno nihukunno niri wakhiviru. Hiiva ciicammo pooti weettela iyo ikanweeyo. Nttwee noone itthu yaataphulenlyaawe nhina: (1) manannani nihuku na Yehova ninhalaaya uwa, (2) tipani nohala uhoopwa nihuku na Yehova ni (3) mananna owiitthenkaca wiira noopwe.

3. Manannani nihuku na Yehova ninhalaaya uwa khampa latarawu uhiyu? (Nwehe ciicammo ilatarato.)

³ “Khampa latarawu nowaawe uhiyu.” (1 Atesal. 5:2) Iyo ikhanle itthu yoopacera nhina citthu tthaaru Paulu caalattanihenryaawe  nihuku na Yehova. Ikwaha cinci, malatarawu anwaaka uhiyu atthu anarupile, nihuku nihinwehereraaya. Nihuku na Yehova ciicammo, ninhala uwa woohipica ni atthu enci anhala wiira ututuseriya. Citthunnyo cinhala wiirannya woohipica mpaka makristau eekhweeli anaahala utikhinaca. Masi, woovirikana naatthu ootakhala nrima, hiiva makristau eekhweeli khaninhala utankanyiya.

4. Manannani nihuku na Yehova ninlikanacaaya naathiyana eerukulu ampheela uyara?

⁴ “Khampa athiyana eerukulu inaaphwanyaaya yoowerya ukati wooyara.” (1 Atesal. 5:3) Athiyana yakhalaka niirukulu, ayo khancuwela nihukuni inhalaaya waaphwanya yoowerya wiira ayare, masi ayo anaakupali wiira iyo itthwiiyo inaahala wiirannya. Woohipica, ayo anaapacera uyara ni yoowerya inaatepa ni inaapica uvira. Woolikanaca, khanincuwela nihuku awula iwoora ninhalaaya uwa nihuku na Yehova, masi ninaakupali wiira nno nihukunno ninaahala uwa. Ihukhumu ca Yehova khacinhala upica ni atthu ootakhala nrima khanhala woopwa.

5. Manannani ukati wo masakha moolupale unlattanacaaya nuukhuma ncuwa?

⁵ Khampa ukhuma ncuwa. Nlattanihero noneeraru na Paulu nawuuluma-tho malatarawu anenya uhiyu. Masi, ila ikwaheela unkhala toko Paulu nolattanihera nihuku na Yehova nuukhuma ncuwa, kahi malatarawu. (1 Atesal. 5:4) Malatarawu pooti uviriha ukati mwinci yinyaka woohicuwelela. Ni unaasa ukati wahaawehereraaya ni ayo pooti wooniya naatthu akiina. Ukati wo masakha moolupale unaahala waathoonyihera ale akhanle malatarawu, ankhanyerera ukhala mpiphini yapankaka citthu cihinoncivela Nluku. Woovirikana naayo, hiiva nihaana unyema itthu phiitthu inonriipiha nrima Yehova ni waavya upanka “citthu cotheene cikhanle comaana, cosariya ni ceekhweeli.” (Efesu 5:8-12) Paulu naavarela-tho nteko malattanihero meeli awaacaka ale anhala uhoopwa.

6. Manannani atthu enci ilelo cinrupaaya? (Nwehe 1 Atesalonika 5:6, 7.)

⁶ “Ale anrupa.” (Nsome 1 Atesalonika 5:6, 7. b) Paulu nawaalattanihera atthu anhala uhoopwa nihuku na Yehova naatthu anrupa. Ayo khancuwelela ukati unvira ni itthu ineerannya iriyaryaaya. Phimaana, ayo khancuwelela itthu yofayita inkhumelela ni khiivo impankaaya. Atthu enci ilelo anaarupa nhina mminepani. (Aroo. 11:8) Ayo khankupali wiira hiiva ninkhala mahuku ookhicera ni wiira masakha moolupale anaahala ukhumelela woohipica. Cakhumelelaka citthu ntuninyani toko ikhotto ni iretta coomwaryeela, ayo anaakupali ni anaapacera waavyaavya ihapari comaana co Umwene wa Nluku. Masi uhiya urwaanela uhoolo, ayo anaaturuwela urupa. Hataa ale ankupali wiira ninaahala uphiya nihuku nohukhumu, anoona wiira ninaahala upica uwa nno nihukunno. (2 Pet. 3:3, 4) Masi hi ninaacuwela wiira nihaana uhiitthaala khula nihuku wiira nihirupe.

7. Manannani atthu anhala uhoopwa nihuku na Yehova anlikanacaaya ninanhapaliya?

⁷ “Ananhapaliya.” Paulu ahaalattanihera atthu anhala utankanyiya ni Nluku naatthu oowurya nipha venci. Nanhapaliya naapica ucuwelela itthu inkhumelela nipuro niryaawe ni nolakela upanka citthu coohinamaana. Woolikanaca, atthu ootakhala nrima khiivo impankaaya yeewaka Nuulumo na Nluku. Ayo anthanla meettelo anhala uwiiriha utankanyiya. Phimaana, makristau eekhweeli ahaana wiikurumica wiira ahiitthaale awula akhale owiitthenkaceene wiira alakele upanka citthu comaana. (1 Atesal. 5:6) Namasoma Ibiiblya mmoca hottonkaca, eeraka co: “Ntthu nokhala woohiitthaala, nokhala oomaala ni khanoova. Uyo naakhitiri wuupuwela citthu comaana ni ulakela upanka citthu comaana.” Masi, nlattuni ikhanlyaaya itthu yofayita iyo itthwiiyo? Wiira nihiikelakelihe citthu cosiyaasa awula citthu co ntuninyani. Ukati untepaaya waattamela nihuku na Yehova, ninaahala utepa wiicoona ukhanyererihiya ukelakela nnyo myahannyo. Masi, khaninlamuliya utepa ukhala niiwasiwaasi nlattu wo nnyo citthunnyo. Nnepa wowaarya wa Yehova unaahala unikavihera ukhala oomaala ni ulakela upanka citthu comaana.—Luka 12:11, 12.

8. Toko cinhimiyaaya 1 Atesalonika 5:8, manannani ninlamuliyeehu wiitthenkaca wiira nakhitiri uvilela nihuku na Yehova? (Nwehe ciicammo ilatarato.)

⁸ ‘Niware iyuuma inkhikicera ikhakaaca ni ikapaseeti.’ Paulu honilattaanihera anatoropa oohiitthaala ni owiitthenkaceene wiira yaane ikhotto. (Nsome 1 Atesalonika 5:8. c) Natoropa ahaana akhalaka owiitthenkaceene wiira aane ikhotto ukati wotheene waahalaaya ukhumelela ikhotto. Inkhumelela itthu imocaaru ni hiiva. Wiira nikhale owiitthenkaceene wiira navilele nihuku na Yehova, nihaana ukhala oowaraceene waamini ni ufenta, toko natoropa cinwaraawe iyuuma inkhikicera ikhakaaca ni nihaana nikhalanaka niweherero, toko natoropa cinwaraawe ikapaseeti. Ala makhalelwaala pooti unikavihera venci.

9. Manannani waamini wihu unnikhikiceraaya?

⁹ Iyuuma inkhikicera ikhakaaca yankhikicera nrima wa natoropa. Waamini ni nifento ninaakhikicera nrimeehu. Ayo makhalelwaayo anaahala unikavihera urwaanela uhoolo unvarela wihu nteko Nluku ni untthara wihu Yesu. Waamini unaaniiriha ukupali wiira Yehova naahala waatthuvela atthu otheene ammwaavya ninrimaaya wotheene. (Mabere. 11:6) Waamini ciicammo unaanikurunica  urwaanela uhoolo ukhuluvelya wihu wamiithoni wa nhooleliihu, Yesu, hataa naananaka marikariko. Wiira nilipihace waamini wihu ni uvilela wihu, pooti waneetthucereehu matakihero o mayamunneehu aneekurumica urwaanela uhoolo ukhuluvelya waya, hataa yalupatthiyaka ni yaananaka marikariko oohikhalana nsurukhu. Iyo itthwiiyo pooti unikavihera unyema ukhala atthu oonicivela ukhalana citthu cinci, naatakihaka mayamunneehu ahinaavya ukhalana citthu cinci muukumini waya ni aneesa nipuro noopacera Umwene wa Nluku. d

10. Manannani unfenta wihu Nluku ni atthu akiina unnikaviheraaya uvilela?

¹⁰ Nifento nikhanle nofayita cinene wiira nikhale niweheehaka ni nihiitthaale. (Mat. 22:37-39) Unfenta wihu Nluku unaanikavihera uvilela wuulalyeerani hataa iyo itthwiiyo iniwaanelaka marikarikoni. (2 Tim. 1:7, 8) Hiiva ciicammo, ninaawoonihera nifento ale ahinonswalela Yehova. Phimaana, khaninhiyerera ulalyeera ncoko unkhaleehu, hataa ninvarelaka nteko telefooni ni iwarakha. Hi nihaana niweherero nowiira wanihukuni ayo atthwaayo anaahala urukunusa moopuwelelwaaya ni upacera upanka citthu comaana.—Ezek. 18:27, 28.

11. Manannani waafenta wihu mayamunneehu unnikaviheraaya? (Nwehe 1 Atesalonika 5:11.)

¹¹ Unfenta nkhunanihu unhela nhina waafenta mayamunneehu. Pooti wampankeehu iyo “nilipihanaka ni nikurumicanaka.” (Nsome 1 Atesalonika 5:11. e) Woolikanaca ni anatoropa yaana ikhotto nkhayi, hiiva ninaalipihana. Khweeliini, natoropa pooti wanrakalihaawe nkhunanawe ukhottoni, masi uyo khaapanka imweeni. Woolikanaca, khanimpheela waariipiha nrima mayamunneehu imweeni awula waalivyaanihera itthu inipankilyaaya yootakhala. (1 Atesal. 5:13, 15) Hiiva ciicammo, ninawoonihera nifento nihu naahisimaka mayamunna avahaceriye uhoolela wanlokoni. (1 Atesal. 5:12) Ukati Paulu waawantikhenlyaawe iwarakha atesalonika, nno nlokonno naari nophiyaaru ni khanaarina hataa mwaakha mmoca. Atthunaka alopwana yaahoolela nno nlokonno yaari ahineetthuca citthu cinci ni atthunaka  yanvonyanihaca citthunnyo. Waahookhalaru commo, ayo waanaaphwanela uhisimiya. Wanvireehu naattamelaka ukati wo masakha moolupale, nihaana nitepaka waakhuluvela mahumu o wanlokoni ni utthara ikano caya. Waphiyaka uyo ukatyuuyo, pooti ukhalaka wiira hiiva khaninhala ukhitiri uwuulumana mayamunna o nipuro cinhooleliya miteko cihu ntuninyani motheene ni oopeteli. Phimaana, ikhanle itthu yofayita wiitthuca waafenta mahumu o wanlokoni wihu nenna co. Hataa ikhumelelaka isiyani, khanimpheela wiitthaala ni nimpheela uhiweheeha citthu anvonyanihaaya mayamunneehu. Nihaana naaweheraka khampa wiira Yehova ni Yesu phinaavaha ikano ayo alopwana ookhuluvelyaayo.

12. Manannani niweherero cinkhikiceraaya moopuwelelweehu?

¹² Khampa ikapaseeti waakhikiceraaya muru wa natoropa, niweherero nihu nowoopoliya ninaakhikicera moopuwelelweehu. Niweherero ninaanikupaliha wiira ituninya khiivo invahaaya ikhanle yomaana. (Afili. 3:8) Niweherero nihu ninaanikavihera ukhala atthu oomaala ni oolipa. Iyo phi itthu yaakhumelenle mayanuunwiihu Wallace ni Laurinda, ankavihera u África. Isumana tthaaru paahi, ooyeeli waya yaahokhweliya asithumwanaya. Nlattu woretta yo COVID-19, ayo khayaakhitinri urwaa uwaani wiira yakhale naamucyaaya. Anuunwiihu Wallace aheera: “Niweherero nowunwelelihiya atthu ookhwa ninaakikavihera uwuupuwela, kahi mananna yaaryaaya ahinakhwa masi mananna cinhalaaya ukhala upeephoni. Nno niwehereronno ninaakimaaliha kakhalaka ooriipiya nrima nlattu wo citthu cotheene cikhumelenle.”

13. Isiyani inlamuliyeehu upanka wiira naakhele nnepa wowaarya?

¹³ “Nhittipihe mooro wo nnepa.” (1 Atesal. 5:19) Paulu aholattaniha nnepa wowaarya ninkhalaneehu ni mooro. Nakhalanaka nnepa wowaarya wa Nluku, unaaniiriha upheela upanka citthu comaana ni ukhalana ikuru yonvarela nteko Yehova. (Aroo. 12:11) Masi isiyani inlamuliyeehu upanka wiira naakhele nnepa wowaarya? Hiiva nihaana ulompa nilepelaka nnepa wowaarya, usoma Nuulumo na Nluku ni upanka mphantte mumphwinkoni woothotokanihiya wa Yehova. Upanka nnyo citthunnyo, unaahala unikavihera utotha ukhalana “nhokorokho wo nnepa.”—Akalas. 5:22, 23.

14. Isiyani inlamuliyeehu unyema wiira nihihiye waakhela nnepa wa Nluku? (Nwehe ciicammo ilatarato.)

 ¹⁴ Yehova anivahaka nnepaawe wowaarya nihaana nikhikiceraka mooro wo mminepani wiira ‘nihittipihe’. Yehova naavaha nnepaawe wowaarya ale arina moopuwelelo ni meettelo omaana. Uyo khanhala univaha nnepaawe wowaarya nakhalaka nuupuwelaka citthu coohinamaana awula napankaka itthu ihinoncivela. (1 Atesal. 4:7, 8) Uhiya commo, wiira nihihiye waakhela nnepa wowaarya khaninlamuliya “uvyaavyeehaca inatiri” ca Nluku. (1 Atesal. 5:20) Nnyo inatirinnyo cinhela nhina ihapari Nluku nivahilyaawe avarelaka nteko nnepaawe wowaarya cinooluma nihuku na Yehova ni uhiitthaala wihu ala mahukweehwaala. Hi khaninoopuwela wiira Harmacetom naahala upica venci. Uhiya commo, hi ninaaweherera wiirannya woohipica. Ninoonihera iyo itthwiiyo nihihiyereraka ukhalana meettelo omaana ni ukhala nivaraka miteko cinoonihera wiira ninonswalela Nluku mmoca eekhweeli mahuku otheene.—2 Pet. 3:11, 12.

15. Manannani ninlamuliyeehu unyema myaha cowoothiya ni citthu maciini cimmwaruselaaya? (Nwehe 1 Atesalonika 5:21.)

¹⁵ Wahoolo, woohipica amwiinani a Nluku anaahala ukhuwela yiiraka: “Nnema ni mpuha.” (1 Atesal. 5:3) Maciini anaahala umwarusela citthu cowoothiya ntuninyani motheene, cinhalaaya ukupali atthu enci. (Apoka. 16:13, 14) Vano hiiva? Hi khaninhala uthepiya ‘nawehaceraka saana citthu cotheene’ [awula natothaka woona wakhala wiira nnyo citthunnyo cikhanle ikhweeli awula mena]. (Nsome 1 Atesalonika 5:21; f niwehero.) Nuulumo “uwehacera” nootaphuleliya niiluuka ikereeku naavareliyaka nteko wiira ahimiye mananna atthu caattehaaya iwooru wiira yoone wakhala wiira ikhanle yokhweeli awula mena. Hiiva nihaana uwehaweha wakhala wiira itthu nineeweehu ni insomeehu ikhanle ikhweeli. Iyo yaari itthu yofayita cinene wiira yaakavihere atesalonika ni ikhanle itthu yofayita cinene ukatiihuula, unviraaya utepaka waattamela masakha moolupale. Uhiya wiiyeviha cinene nikupaliki citthu cotheene atthu akiina anhimyaaya, nihaana uvarela nteko moopuwelelweehu wiira nilattaanihe itthu nineeweehu ni insomeehu niitthu inhimyaaya Ibiiblya ni mphwinko wa Yehova. Napankaka commo, khaninhala uthepiya ni citthu cowoothiya maciini cimmwaruselaaya.—Miru. 14:15; 1 Tim. 4:1.

16. Isiyani hiiva inkupaliihu inhala wiirannya wahoolo ni isiyani impheeleehu upanka?

¹⁶ Khampa ikhurupu, hi ninaacuwela wiira aswali a Nluku anaahala woopwa nihuku no masakha moolupale. Masi khanincuwela wo khula ntthu itthu inhala unkhumelela. (Tiya. 4:14) Hataa ukhalaka wiira ukati wo masakha moolupale hiiva ninaahala ukhala nuukumi awula mena, naahihiyeke umwiiwelela Yehova, uyo naahala unitthuvela anivahaka ukumi woohimala. Ale athanliye anaahala urwaa ukhala wiirimu nkhayi ni Yesu Kristu ni ikhontwaa cikiina cinaahala ukhala upeephoni va watuninyani va. Phimaana, nimpheela uhiitthaala niweheehaka niweherero nihu nomaana ni ukhala owiitthenkaceene wiira nakhitiri uvilela nihuku na Yehova!