MWAHA WOOSOMIYA 15
NCIPO 124 Nkhale ookhuluvelya
Nlipihace ukhuluvela winyu mphwinko wa Yehova
“Nwuupuwele atthu anhoolela iriyariinyu, atthu yuuhimyenreni nuulumo na Nluku.”—MABERE. 13:7.
ITTHU INHALEEHU WIITTHUCA
Ninaahala woona itthu inhaleehu upanka wiira nihihiye uhisima ni ukhuluvela mphwinko wa Yehova.
1. Manannani apoovu a Yehova iseekulu yoopacera yaaryaaya otthonkomannyaaca?
WOKHULA nkwaha Yehova navahaawe apoovwaawe nteko, uyo noweherera wiira uvariye nimananna otthonkomannyaaca. (1 Akor. 14:33) Wootakihera itthu mpheelaawe Nluku, ukhanle ulalyeenya ihapari comaana ntuninyani mootheene. (Mat. 24:14) Ni Yehova honvaha Yesu nrintti wooholela uyo ntekooyo. Ni Yesu ciicammo naavaresesa uyo ntekooyo, wiira uvariye nimananna otthonkomannyaaca. Iseekulu yoopacera, maloko yaahotthonkomanihaciya, ni mahumu yaahothanliya wiira ahoolele ni yeettihere. (Mite. 14:23) U Yerusalemu, iseekulu yoopacera, ikhurupu yaatthonkomanihaciye yo maapostolu waahela nhina mahumu, yanlakela citthu coohala upanka wiira miloko cootheene ceettele. (Mite. 15:2; 16:4) Itthu yaakhumelela, “miloko cootheene canlipihiya nhina mminepani ni canonnuwa wo khula nihuku.”—Mite. 16:5.
2. Ukhuma mwaakha 1919, isiyani Yehova ipankilyaawe wiira aavahe malakihero ni iyoolya yomminepani apoovwaawe?
2 Ileelo, Yehova nanlelo nawaatthonkomanihaca apoovwaawe. Ukhuma mwaakha wo 1919, Yesu naavarela nteko ikhurupu yankaani yaalopwana oothanliya wiira atthonkomanihace nteko woolalyeera ni waavaha iyoolya atthari a Yesu. a (Luka 12:42) Unawoonannya wiira Yehova ciicammo neera acaalihaka nteko unvaraaya ayo alopwanaayo.—Isai. 60:22; 65:13, 14.
3-4. a) Ntaphulele ifayitani imphwanyeehu nlattu wookhala apoovu otthonkomannyaaca. b) Isiyani inhaleehu woona nhina ula mwahoola?
3 Waakhanle wiira hiiva niri ohitthonkomannyaca, khanaahala ukhitiri uvara nteko Yesu niithanlenlyaawe. (Mat. 28:19, 20) Muupuwele, wootakihera unari wiira hiiva khanaathanleliya ncoko woolalyeera, khula ntthu aahala ulalyeera nipuro ninoncivela. Micoko cikhwaawe caahala ukhala coolalyeeriya venci. Nnawuupuwela iparakha nirineehu nlattu wookhala apoovu otthonkomannyaaca?
4 Ukati Yesu waaryaawe watuninyani, uyo ahaatthonkomanihaca attharyaawe, ni ileelo uyova nanlelo nawaatthonkomanihaca apoovwaawe. Nhina ula mwahoola, ninaarwaa woona ntakihero Yesu ninihiyenryaawe ni manannani mphwinkweehu ninttharaaya nno ntakiheronno. Ciicammo ninaarwaa woona nlattuni ninlamuliyeehu woonihera uhisima ni ukhuluvela mphwinko wa Yehova.
MPHWINKWEEHU WOOTTHONKOMANIHINYA UNAATHARA NTAKIHERO NA YESU
5. Manannani ninhaleehu utthara ntakihero na Yesu? (Joau 8:28)
5 Yesu eetthucile naathumwaane itthu yowuuluma ni yoopanka. Nittharaka ntakihero na Yesu, mphwinko wa Yehova unavarela nteko Ibiibiliya wiira uniitthucihe itthu yomaana ni itthu yootakhala ni ukhala nimananna anoncivela Yehova. (Nsome Joau 8:28; b 2 Tim. 3:16, 17) Mphwinko unanuupucera usoma Ibiibiliya, nimananna oweettela itthu ineetthuceehu. Manannani upanka iyo unhalaaya unikavihera?
6. Ifayitani cimphwanyeehu nasomaka Ibiibiliya?
6 Hiiva ninaaphwanya ifayita venci ukati ninsomeehu Ibiibiliya, nivarelaka nteko ilivuru cihu. Wootakihera, ninalattaniha itthu nineetthuceehu mbiibiliyani ni malakihero ninvahiyeehu mwimphwinkoni. Noonaka wiira malakihero nivahiyeehu anaavaranaca ni itthu inhimyaaya Ibiibiliya, ukhuluvela wihu mphwinko wa Yehova unaatepa wuunnuwa.—Aroo. 12:2.
7. Ihaparini Yesu ilalenryaawe ni manannani mphwinko wa Yehova unttharaaya ntakihero nawe?
7 Yesu anlalyaa “ihapari comaana co mweene wa Nluku.” (Luka 4:43, 44) Uhiya commo, Yesu enre wiira awiitthucaawe yahaana alalyeeraka ihapari co mweene. (Luka 9:1, 2; 10:8, 9) Mahukweehwaala hiiva nintthara mphwinko wa Yehova, ninaalalya ihapari co mweene hataa nikhalaka nipuroni awula nikhalanaka mirinttini.
8. Iparakhani nirineehu?
8 Ikhanle iparakha yuulupale uwuulumana atthu umwene wa Nluku! Ni iyo iparakheeyo khinaaphwanela atthu otheene. Wootakihera, ukati Yesu waaryaawe watuninyani uyo khaahiyerenre wiira maciini amuulume uyova. (Luka 4:41) Mahukweehwaala ciicammo, ntthu wiira ancere ulalyeera ihapari comaana awula upanka mphantte waapoovu a Yehova haana eekurumicaka. Nihiiva ninaathoonyera wiira ninaavaha ifayita uyo ntekooyo naalalyeeraka vale khula ukati ninkhitiriihu. Toko Yesu hiiva nimpheela waala iphyoo wo mweene wa Nluku wanrima waatthu ampheela wiitthuca ikhweeli ca Nluku.—Mat. 13:3, 23; 1 Akor. 3:6.
9. Manannani mphwinko wa Yehova untaphulelaaya ncina na Nluku?
9 Yesu ahowiitthuciha atthu ncina na Nluku. Ukati Yesu waalompaawe, uyo aheera: “Miiva kihaacuweliha ncina ninyu.” (Joau 17:26) Nattharaka ntakihero Yesu nihimilyaawe, mphwinko wa Yehova unawiikurumica wiira waacuwelihe atthu ncina na Nluku. Mananna oopanka iyo itthwiiyo ukhanle uvarela nteko Ibiibiliya Tradução do Novo Mundo da Bíblia Sagrada. Utaphuleliya wo iyo Ibiibiliyeeyo inaaphwanyannya yoomalela awula yoomiphantte woopwahaka iluuka 270. dziapêndice A4 ni A5 anaathonyera manannani ni kontha isiyani ncina na Nluku niiheliyaaya mbiibiliyani. Apêndice C, imphwanyannya nhina Bíblia de Estudo, nlattuni ncina na Nluku ninlamuliyaaya ukhumela coowantikiya ceekristau niiluuka ikereeku ikwaha 237.
10. Isiyani ineetthuceehu niitthu ihimilyaaya atthiyana o Mianmar?
10 Khampa Yesu, hiiva nimpheela waakavihera atthu ucuwela ncina na Nluku. Athiyana amoca ankhala ncoko wo Mianmar yaarina myaakha 67, yaahetthuca wiira ncina Nluku Yehova ni yahancera wunla. Ayo aheera co: “Miiva akinaapaca wiiwa ncina na Nluku. . . . Nhookitthuciha itthu yofayita cinene uvikana cootheene”. Khampa nonneehu ala manannaala ukati hiiva uwiitthuciheehu atthu ncina na Nluku, ayova pooti urukunusa makhalelwaaya.
NHIHIYERERE WOONIIHERA UKHULUVELA WINYU MPHWINKO WA YEHOVA
11. Manannani mahumu anooniheraaya wiira anaakhuluvela mphwinko wa Yehova? (Nwehe ciicammo ilatarato.)
11 Manannani mahumu anhalaaya woonihera ukhuluvela mphwinko wa Yehova? Ukati mahumu anaakhelaaya malakihero, ayo anaasoma saana ni anawiikurumica wiira yeettele. Wootakihera uhiya waakhela malakihero anhimya paahi mananna oopanka miphantte co mikutthaano ni ulompela nloko, ayo ciicammo anawaakhela malakihero anhimya mananna owaacera ikhontwaa ca Kristu. Ukati mahumu anttharaaya malakihero anaakhelaaya mumphwinkoni wa Yehova mayamunna anawiicoona ukhala oofentiya ni uwaceriya Yehova.
Mahumu anaanikavihera ukhuluvela malakihero ninvahiyeehu mumphwinkoni wa Yehova (Nwehe iparaagarafu 11) e
12. a) Kontha isiyani ninlamuliyeehu owiiwelela mayamunna annihoolela? (Maberewu 13:7, 17) b) Kontha isiyani nihaana niiweheehaka makhalelo omaana o mayamunneehu anhoolela mphwinko?
12 Hiiva naakhelaka malakihero ni mahumu, nihaana niweelelaka awula nittharaka. Napankaka commo, unaahala ukhala woohirika mahumu wiira avare ntekwaaya wooholela nloko saana. Ibiibiliya ineera nihaana nikhalaka owiiwelela ale annihoolela. (Nsome Maberewu 13:7, 17. c) Masi ikwaha cikhwaawe pooti ukhala itthu yoorika. Kontha isiyani? Kontha ayo alopwanaayo akhanle oopahuwa. Masi, hiiva natepaka uweheeha citthu cinvonyaaya, ni uhiya uweheeha citthu comaana cimpankaaya, khweeliini hiiva ninaahala unkavihera ule khanle mwananiihu. Manannani? Awananiihu ampheela wiira hiiva naanyihacere wiira Yehova khanvarela nteko mphwinkwaawe wootthonkomannyaaca wiira aneettihere, nakhalaka niiweheehaka citthu cinvonyaaya mayamunna annihoolela, khweeliini naahala ukhala nuupuwelaka citthu cootakhala nhina mphwinkweehu ni khaninhala ukhuluvela-tho. Isiyani inlamuliyeehu upanka wiira nicuwele ni nikhotte citthu cowoothiya awananiihu cinoolumaaya?
NHAHIYERERE ATTHU ALOLOVIHACAKA UKHULUVELA WINYU MPHWINKO WA YEHOVA
13. Manannani awanani a Nluku ammananihaaya unanariha mphwinko wa Yehova?
13 Awanani a Nluku ammananiha wiira citthu cootheene comaana co mumphwinkoni wa Yehova cikhanle citthu cowoothiya. Wootakihera hiiva niheetthuca mbiiblyani wiira Yehova noweherera wiira atthu anonswalela akhale omaana mwiirutthuni waya, moopuwelelwaaya ni nhina mminepani. Ni Ibiibiliya iheera khula ntthu noohala upanka itthu yoohiloka ni woohittharuwa khanlamuliya ukhala wanlokoni. (1 Akor. 5:11-13; 6:9, 10) Masi, ukhala wiira hiiva ninawiiwelela nno nlamulonno, awananiihu aneera wiira hiiva khaninaafenta atthu, hiiva ninawaahukhumu atthu ni ciicammo wiira hiiva khaninapheela atthu oovirikana.
14. Tipani khanle nwanani o mphwinko wa Yehova?
14 Muncuwele ule khanle nwanani o mphwinko wa Yehova. Sotwani Tiyapu, uyo himmwarusela wootha nhina mphwinkweehu. “Ni uyo hiri apaapaawe wootha.” (Joau 8:44; Upha. 3:1-5) Vano, nhituthuwe wiira Sotwani nawaavarela nteko atthu akhwaawe wiira amwarusele ihantisi cowoothiya nhina mumphwinkoni wa Yehova. Iyo phiitthu yaamwiirannyenle Yesu ni makristau oopacera.
15. Isiyani ahooleli ottiini yampanklyaaya Yesu ni attharyaawe?
15 Yesu mwaana a Nluku ari oohipahuwa ni ahopanka miiriirya cootikhiniha, wahookhalaru commo Sotwani ahaavarela nteko atthu wiira amootherye. Wootakihera, ahooleli ottiini yaanaahimerya apoovu wiira “Yesu oomola maciini anvarelaka nteko nhooleli omaciini.” (Mark. 3:22) Uwakati Yesu waahukhumwinyaawe, ahooleli ottiini yaahomotherya unruwana Yehova ni yaahomanaaniha waakurumica apoovu wiira alepele wiiviya. (Mat. 27:20) Nuuwakatyaaya awiitthuci a Yesu waalalyeraaya ihapari comaana awanannyaaya yaanakhannyereriha apoovu yaakurumicaka uhikhala mphantte wo mayamunna. (Mite. 14:2, 19) Ithapuleliyaaka iveerusu ya Miteko 14:2, A Sentinela 1 yo Dezembro, 1998, ineera: “Nhitteeliye nrima naayo nlattu wookhotta ihapari, awanani o Yutaa yaahokumihera ikampanya yo waatarawaca amananihaka wiiriha apoovu o Yutaa waathanya makristau.”
16. Isiyani inlamuliyeehu wuupuwela neewaka cowoothiya cinhimya mphwinko wa Yehova?
16 Mahukweehwaala Sotwani nanlelo namwaarusela wootha. Uyo nawootha “ntuninyani motheene unkhaliya.” (Apok. 12:9) Mweewaka ihantisi cowoothiya cinhimya mphwinkweehu, ni mayamunneehu anhoolela muupuwele mananna awanani a Nluku yanwacenryaaya Yesu ni attharyaawe o iseekulu yoopacera. Khampa Ibiibiliya yaahimilyaaya atthwaayo yanhala waattharatthara ni wuuluma pusya apoovu a Nluku mahukweehwaala. (Mat. 5:11, 12) Hi khaninhala waamini citthu cowoothiya nancuwelaka tipani nokumihera woothanwo ni upanka yotheene inkhitiriihu wiira niikhikicere woohipica. Isiyani inlamuliyeehu upanka wiira niikhikicere?
17. Isiyani inlamuliyeehu upanka wiira nikhotte ihapari cowoothiya? (2 Timotiyu 1:13) (Nwehe ciicammo ikwaaturu “ isiyani inhaleenyu upanka mweewaka ihapari cowoothiya.”)
17 Nhiiwelele ihantisi cowoothiya. Apostolu Paulu ahovaha malakihero itthu yoohala upanka yiiwaka citthu cowoothiya. Paulu ahonruma Timotiyu para . . . Urwaa waahimyeera atthu wiira “ahiiwelele ihantisi cowoothiya ni wiira akhotte nnyo ihantisi cowoothiyannyo.” (1 Tim. 1:3, 4; 4:7) Khampa mwaana oohicuwela itthu, naalokottha itthu vathi ni naahela mwaano. Masi ntthu muulupale naacuwela itthu yowoopiha khampa iyo itthwiiyo. Hiiva ninaakhotta ihantisi cowoothiya kontha ninaacuwela tipani nokumiherera citthu cowoothiya. Hiiva nineewelela paahi ihantisi coolipiha ni cokhweeli.—Nsome 2 Timotiyu 1:13. d
18. Ninhala woonihera cani ukhuluvela wihu mphwinko wa Yehova?
18 Nhina ula mwahoola, nihoona citthu tthaaru mphwinko wa Yehova cinontakihaaya Yesu. Ukati nyuuva unsomeenyu Ibiibiliya, mmananihe woona mananna hiiva nintthareehu ntakihero na Yesu. Mwaakavihere akhunaninyu wanlokoni wiicoona uhisimiya ni ukhuluvela mphwinko wa Yehova, ni ciicammo unswalela wookhuluvelya nkhayi ni mphwinkwaawe unvarelaawe nteko wiira upanke ile impheelaawe. (Isaa. 37:28) Ni nhihiyerere uvaha ifayita iparakha irineehu yoovara nteko nkhayi naapoovu oofenta.
MWAAHALA WAAKHULA CANI?
-
Manannani apoovu a Nluku anontakihaaya Yesu ileelo?
-
Manannani ninhaleehu woonihera uhisima ni ukhuluvela mphwinko wa Yehova?
-
Isiyani inhaleehu upanka niiwaka ihantisi cowoothiya?
NCIPO 103 Axitokweene: Yoovaha ya Yehova
a Nwehe ikwaaturu “kontha isiyani 1919?”, ilivuru A Adoração Pura de Jeová — É Restaurada! ipaagina 102-103.
b Joau 8:28 Vano Yesu ahowiirela co: Mwamalihaka unthomya wanipottoni Mwaana Apinaatamu, vano phinhaleenyu ucuwela wiira uyo thi miiva ni wiira khiivo impankaaka kilakelaka miiva, masi kinoolumaca toko Apaapa cikiitthucihilyaaya.
c Maberewu 13:7 Nwuupuwele atthu anhoolela iriyariinyu, atthu yuuhimyenreni nuulumo na Nluku, ni ukati wooweha ifayitaaya meettelwaaya, ntakihe waamini waya. 17 Nkhale oowiiwelela ale anhoolela iriyariinyu ni nkhale ootthunela moolumwaaya, kontha ayo phi noowehawehani ni anaahala uhukhumwiya; wiira avare uyo ntekooyo yatteeliyaka nrima, ni kahi yacukulacaka, kontha ucukulaca waya waanaahala wuuhononani.
d 2 Timotiyu 1:13 Uvaresese moolumo omaana akiiwilyaa, wooniheraka waamini ni nifento nirineehu nlattu woomwaataanana Yesu Kristu.
e UTTONKACIYA WO ILATARATO: Ukati mahumu ammalihaaya woopela mwaha mananna olaleeriya mapuro aatthu enci, nhooleli mmoca okhurupu nawaaruma anamalalyeera weemela anaphitenrye isiri.
