MWAHA WOOSOMIYA 14
NCIPO 56 Mweetteleke Ekeekhai
“Mwiikurumice urwaa uhoolo wiira nkhalane waamini woolipa”
“Niikurumice ukhomaala.”—MABERE. 6:1.
ITTHU INHALEEHU WIITTHUCA
Woona manannani nkristau ookhomaala cinoopuwelaawe, cimpankaawe citthu cinoncivela Yehova ni cinooniheraawe ucuwelaca ukati woolakela citthu coohala upanka.
1. Isiyani Yehova inwehereraawe wiira nipanke?
NIHUKU anamathelana antepaaya utteeliya ninkhalaka nihuku ninonnyaraaya mwaana oopacera. Hataa ukhalaka wiira ayo ayaryaayo ananfenta uyo mwaanooyo, ayo khanweeherera wiira akhale mwaana mpaka. Khweeliini, yiirannyaaka iyo ayo anaakhala oosanka. Inanna imocaaru, hataa ukhalaka wiira Yehova naakhala ootteeliya anoonaka nincuwelaka, uyova khanweeherera wiira nikhaleke asaana nhina mminepani mpaka. (1 Akor. 3:1) Uhiya commo, uyo nopheela wiira hiiva nihaana ukhala makristau ookhomaala nhina mminepani.—1 Akor. 14:20.
2. Isiyani inhaleehu woona nhina ula mwahoola?
2 Ukhala nkristau ookhomaala nhina mminepani maanaaya isiyani? Isiyani inlamuliyeehu upanka wiira nikhale makristau ookhomaala? Kontha isiyani iyoolya yo mminepani phi itthu yuulupale innikavihera ukhala makristau ookhomaala? Ni kontha isiyani ninlamuliyeehu unyema wiikhuluvela cinene? Nhina ula mwahoola, ninaarwaa waakhula ala makohwaala.
UKHALA NKRISTAU OOKHOMAALA NHINA MMINEPANI MAANAAYA ISIYANI?
3. Ukhala nkristau ookhomaala maanaaya isiyani?
3 Mbiibiliyani, nuulumo “wuunuwa” niiluuka ikereeku ciicammo ninaaca “ukhomaala,” “ulikana” ni “wuunuwa cinene.” a (1 Akor. 2:6) Khampa mwaana hinhiyereraawe wuunuwa, hiiva ciicammo nihaana nihihiyereraka wuunuwiiha upatthaniihu ni Yehova. Napankaka commo, hi ninaakhala ookhomaala nhina mminepani. Hataa ukhalaka wiira ninawiicoona ukhala ookhomaala, niireke nanlelo khaavo marukunuso anlamuliyeehu upanka? (1 Tim. 4:15) Otheene cihu, hataa ciicammo amirawo, pooti ukhitiri ukhala makristau ookhomaala nhina mminepani. Masi ninhala ucuwela cani wiira nikhanle makristau ookhomaala awula mena?
4. Isiyani immonihera ntthu ukhala nkristau ookhomaala?
4 Nkristau noonihera ukhala ookhomaala aahihiyerereke weettela ile impheelaawe Yehova ni aahitotheke upanka paasi citthu cinoncivela ni cimpheelaawe. Khweeliini, hi nikhanle atthu oopahuwa ni ikwaha cinci ninaavonyaka. Masi unookhalaru commo, nkristau ookhomaala nawoonihera khula mahuku wiira nawuupuwela ni naapanka citthunnyo nimananna anoncivela Yehova. Nkristau ookhomaala naahiya makhalelo okhalayi ni nawiikurumica wuupuwela khampa Yehova cinoopuwelaawe. (Efesu 4:22-24) Uyo heetthuca ulakela upanka citthu comaana, kontha naweettela malamulo ni malakihero o mbiibiliyani. Phimaana, uyo khanweherera wantikheliya ilista yo citthu cinlamuliyaawe upanka ni cihinlamuliyaawe upanka. Nhina khula itthu impankaawe, uyo khanhiya weettela ile ilakenlyaawe.—1 Akor. 9:26, 27.
5. Isiyani atthunaka inhala wiirannyeela makristau ohikhomaala? (Efesu 4:14, 15)
5 Vano nkristau oohikhomaala nhina mminepani nawaakuva uthepiya naale ammwarusela citthu cowoothiya ni naale ahiile unswalela Nluku anwuuluma pusya Masaahiti a Yehova. b (Nsome Efesu 4:14, 15. c) Nkristau oohikhomaala nhina mminepani nawaakhalela nttima akhunanawe, khampica unkumihaca nanrokottole wanlokoni, khampica uviruwa awula utthekeliya nlattu wo citthu cimpankaaya akhunanawe ni khankhitiri wiivaraca wiira hivare itampi yuulupale.—1 Akor. 3:3.
6. Isiyani inlattanaaya wunnuwa nhina mminepani? (Nwehe ciicammo ilatarato.)
6 Khampa conneehu wiipaceroni, Ibiibiliya inaalattaniha wuunuwa nhina mminepani ni wuunuwa wo mwiirutthuni. Mwaana naapheela ukhikiceriya ni uvahiya ankhili nintthu muulupale, kontha uyo khiivo incuwelaawe. Wootakihera, nnyari nanvarela ntata mwanawe wiira atuphanihe iparapaara. Nuuwakatyaaya, uyo mwaanooyo nawuunuwa ni anumwaane ananhiya atuphaka iparapaara veekhaawe. Masi ayo anaamuupusera uyo mwaanooyo wiira haana aweehaka wakhala wiira inaawa ikaaro awula mena, hinaaya utupha iparapaara. Vano ukati uyo mwaanooyo noonuwaawe naacuwela itthu yoohala upanka hinaaya utupha iparapaara. Inanna imocaaru, khampa mwaana nopheelaawe ukaviheriya nintthu muulupale wiira anyeme upanka itthu yootakhala, ciicammo nkristau oohikhomaala nhina mminepani naapheela ukaviheriya nimakristau ookhomaala nhina mminepani wiira anyeme upanka citthu cinhala uhonona upatthannyaawe ni Yehova ni wiira alakele upanka citthu comaana. Masi nkristau akhalaka ookhomaala, naahala ucuwela itthu yoohala upanka attharaka ikano co mbiibiliyani ni mananna Yehova cinweheraawe citthunnyo. Naala manannaala, uyo naahala ukhitiri weettela itthu yiitthucilyaawe.
Makristau ohikhomaala ahaana wiitthuca ulakela itthu yoohala upanka eettelaka ikano co mbiibiliyani (Nwehe iparaagarafu 6)
7. Niireke nkristau ookhomaala naapheela ukaviheriya?
7 Niireke wiira nkristau ookhomaala mminepani khanhala upheela ukaviheriya? Mena. Mayamunna ookhomaala mminepani ikwaha cikiina anaapheela ukaviheriya. Masi ayo anaaviriyana ni nkristau oohikhomaala. Munna oohikhomaala nhina mminepani nopheela wiira ahimeriye itthu yoohala upanka. Masi nkristau ookhomaala nhina mminepani naatotha ukaviheriya naale arina ankhili ni ucuwelaca. Uyo nawaalepela ankhili acuwelaka wiira Yehova noweherera wiira ‘khula ntthu aacise nrinttyaawe.’—Akalas. 6:5.
8. Niireke makristau ookhomaala ahaana akhalaka oolikanaca?
8 Hiiva otheene irutthu cihu cinaavirikana. Inanna imocaaru, makristau ookhomaala arina makhalelo oovirikana, toko ucuwelaca, ulipa nrima, mayamunna akhwaawe anawoonihera ukhala anamavaha ni akhwaawe anaathoonyera waawacera atthu. Phimaana, makristau yaananaka masakha mamocaaru, ayo pooti upanka citthu coovirikana, masi otheene khanhiya weettela ile inhimyaaya Ibiibiliya. Iyo pooti wiirannya venci-venci wakhalaka wiira khanivo nlamulo no mbiibiliyani ni khula nkristau pooti uthanla upanka ile inhala unhiya ninrima wootaphuwa. Phimaana, ayo khanhala umuuluma pusya nkhunanaya nlattu wiira citthu cilakenlyaaya upanka kahi phi citthu uyo cilakenlyaawe upanka. Uhiya commo, ayo anawiikurumica utotha ukhalakhala ninnema.—Aroo. 14:10; 1 Akor. 1:10.
ISIYANI INLAMULIYEEHU UPANKA WIIRA NIKHALE MAKRISTAU OOKHOMAALA?
9. Niireke wunnuwa wo mminepani ukhanle wowaakuvyaaca? Ntaphulele.
9 Khula mwanhima nuuwakatyaaya nawuunuwa, utthuna-nuuhitthuna. Masi wuunuwa wo mminepani khuneerannya ayo manannaayo. Wootakihera, mayamunna o Korintu yaheetthuca ikhweeli, yahopattisiya, yahaakhela nnepa wowaarya ni apostolu Paulu ahowiitthuciha citthu cinci. (Mite. 18:8-11) Masi encyaayo cahovira myaakha cinci ahinaaya ukhala makristau ookhomaala. (1 Akor. 3:2) Isiyani inlamuliyeehu upanka wiira ihiniirannyeele iyo itthwiiyo?
10. Isiyani inlamuliyeehu upanka wiira nikhale makristau ookhomaala? (Yuda 20)
10 Ikhanle itthu yoorika ukhala nkristau ookhomaala nhina mminepani naahilakeleke upanka itthu. Ale unaacivela “uhicuwelaca” khampheela wiikurumica wiira yuunuwe nhina mminepani. (Miru. 1:22) Hiiva khanimpheela ukhala khampa ale ari oolupale, masi ahinhiya waakhuluvela asithumwanaya wiira alakele upanka itthu, uhiya commo hiiva nihaana niikurumicaka wuunuwa nhina mminepani ni ulipihaca upatthani urineehu ni Yehova. (Nsome Yuda 20. d) Wakhalaka wiira nyuuva nnopheela ukhala nkristau ookhomaala nhina mminepani, munlompe Yehova wiira nkhalane wanrima winyu nnyo citthuunyo ni “wuuvahani ikuru wiira nkhitiri upanka.”—Afili. 2:13.
11. Manannani Yehova cinnikaviheraawe wiira nikhale ookhomaala? (Efesu 4:11-13)
11 Yehova khanweherera wiira nunnuwe nhina mminepani woohikaviheriya. Ale ankavihera khampa makampuci ni eetthucihi o nloko neekristau, ari owiitthenkaca wiira anikavihere ukhala makristau ookhomaala nhina mminepani ni wiira “alikanane wunnuwa wa Kristu.” (Nsome Efesu 4:11-13. e) Yehova ciicammo naanivaha nnepaawe wowaarya wiira unikavihere ukhalana “moopuwelelo a Kristu.” (1 Akor. 2:14-16) Uhiya commo, Yehova horuma wantikhiya ilivuru ceese cinhimya mananna Yesu oopuwelaawe, yaapankaawe, moolumaceerwaawe ni makhalelwaawe ukati waaryaawe va watuninyani va. Utakiha mananna Yesu oopuwelaawe ni citthu capankaawe unaaniriha ukhala makristau ookhomaala.
IFAYITA IRINAAYA IYOOLYA YOOLIPA YO MMINEPANI
12. Citthuni “cofayita cinonhimya Yesu”?
12 Wiira nikhale makristau ookhomaala, nihaana nuupuwelaka citthu coopacera niitthucileehu ‘uhiya paahi cinonhimya Kristu.’ Wootakihera, citthu cofayita coopacera nineetthuceehu phinnya: uttharuwa, waamini, upattisiya ni wunwelelihiya. (Mabere. 6:1, 2) Nnya phiicitthu makristau cinlamuliyaaya ucuwela ni ukupaali. Phimaana Apostolu Paulu, ahoohimya nnya citthuunyo ukati waalalyeeraawe atthu nihuku no Pentecostes. (Mite. 2:32-35, 38) Wiira nikhale atthari a Kristu nihaana naaminiki nnya citthuunyo. Wootakihera, Apostolu Paulu, ahoohimya eeraka: ‘Ule noopheela ukhala ntthari a Kristu haana aaminiki iparakha yoowunwelelihiya’. (1 Akor. 15:12-14) Masi, wiira nikhale makristau ookhomaala, nihaana wiikurumica venci uhiya paahi wiitthuca nnya citthuunya.
13. Isiyani inlamuliyeehu upanka wiira niphwanyere ifayita iyoolya yoolipa yo mminepani ihiminye nhina Maberewu 5:14? (Nwehe ciicammo ilatarato.)
13 Uvirikana wo citthu nineetthuceehu nhina iyoolya yo mminepani uhiya paahi maalamulo a Yehova, masi ciicammo malakiherwaawe, phiitthu inhala uniikavihera ucuwela mananna Yehova cinoopuwelaawe. Wiira niphwanyere ifayita iyoolya yomminepani, nihaana nisomaka, nuupuwelelaka itthu nsomeehu ni weettela sana-saana nuulumo na Nluku. Napankaka iyo, hiiva ninawiitthuca ulakela upanka itthu inontteeliha nrima Yehova. f—Nsome Maberewu 5:14. g
Iyoolya yoolipa yo mminepani inaaniitthuciha mananna oolakela upanka itthu inontteeliha Yehova (Nwehe iparaagarafu 13) h
14. Manannani Paulu waakavihenryaawe Akorintu wuunuwa nhina mminepani ni ukhala ookhomaala?
14 Makristau ohikhomaala nhina mminepani ikwaha cikhwaawe unawaarika utthara malakihero o mbiibiliyani, ni uvarela nteko ukati unlakelaaya upanka itthu. Akhwaawe anoopuwela wiira khanivo nlamulo no mbiibiliyani, ayo anaapanka itthu impheelaaya. Akhwaaweayo ampheela uphwannya malakihero o mbiibiliyani masi khinakhala itthu impheeliya. Wootakihera, makristau Okorintu yaahonlepela Paulu wiira aavahe malakihero yaahala waatthuniha ulya iyoolya yaavahiya anluku ohikweeli. Uhiya Paulu waahimyeera itthu yaahalaaya upanka, uyo ahowoonihera ifayita irinaaya wuupuwela, khula ntthu haana uthanla itthu yoohala upanka. Paulu anaataphulela iyo itthwiiyo avarelaka nteko malakihero o mbiibiliyani. Ala manannaala khula ntthu aahala uthanla itthu yaahala unhiya nimoopuwelelo omaana ni uhinkakatthula ntthu nkhunanawe. (1 Akor. 8:4, 7-9) Woopanka iyo itthwiiyo, Paulu anawaakavihera akorintu wunnuwa nhina mminepani. Ala manannaala ayo yaalamuliya uvarela nteko moopuwelelwaaya uhiya ukhuluvela moopuwelelo aakhunanaya awula waavyavya malakihero.
15. Manannani Paulu waakavihenryaawe makristau o Eheperewu uhihiyerera wuunuwa nhina mminepani?
15 Hiiva niheetthucera itthu yofayita cinene, uhiya itthu Paulu yaawantikhenlyaawe makristau oheperewu. Makristau yahaalipile nhina mminepani ‘yaahoturuwela ulya iyoolya yohilipa uhiya iyoolya yoolipa.’ (Mabere. 5:12) Ayo khayaatthuna citthu conanaano Yehova ceetthucihaawe. (Miru. 4:18) Wootakihera, ukhwa wa Kristu, nlamulo na Moceesi naahohinnya uvareliya nteko, masi makristau Oyutaa yaanakhanyerere wiira neetteliye. Vano niireke myaakha 30 khacaari cinci wiira Ayuuta arukunuse moopuwelelwaaya? (Aroo. 10:4; Titu 1:10) Khula ntthu aahala usoma iwarakha Paulu awantikhenlyaawe maheperewu anhala woona wiira ila iwarakheela yaahimya iyoolya yoolipa yo mminepani. Ni iyo iwarakheeyo yaahakavihera woona mananna oopheela unswalela Yehova ni wiiriha ulipa nrima wiira ahihiye ulalyeera hataa yoopoihaciyaaka na Yuuta.—Mabere. 10:19-23.
NHIKHALE OWIIKHULUVELA VENCI
16. Uhiya wuunuwa, isiyani inlamuliyeehu upanka?
16 Hiiva nihaana niikurumicaka uhiya paahi wiira nikhale ookhomaala, masi ciicammo uhihiyerera ukhala ntthu ookhomaala. Maanaaya wiira nihaana ninyemaka wiikhuluvela cinene. (1 Akor. 10:12) Ni ciicammo nihaana uhihiya wiiwehaweha wiira nikhale ookhikicerya wakhalaka wiira ninawiikurumica wunnuwa nhina mminepani.—2 Akor. 13:5.
17. Manannani iwarakha Paulu awantikhenlyaawe Akolosu inoniheraaya ifayita irinaaya uhihiyerera ukhala nkristau ookhomaala?
17 Iwarakha ya Akolosu, Paulu nawuuluma-tho mananna oohihiyerera ukhala ookhomaala nhina mminepani. Makristau o Akolosu yaari ookhomaala nhina mminepani, masi Apostolu Paulu ahaahimerya wiira yaari itthu yootakhala wuupuwela khampa atthu ontuninyani. (Akol. 2:6-10) Ni Epafras anaacuwela sana-saana mayamunna onne nlokonne phimaana, uyo anaalompela ayo mayamunnaayo wiira akhale oolipa nhina mminepani. (Akol. 4:12) Isiyani ineetthuceehu? Toko Paulu ni Epafras yancuwela wiira ahihiyerere ukhala ookhomaala yahaana yiikurumicaka ni akaviheriyaka ni Nluku. Ayo yaapheela wiira Akolosu ahihiyerere ukhala ookhomaala hataa yaakhumelelaka masakhani oorika.
18. Isiyani atthunaka inhala umwiirannyeela nkristau ookhomaala? (Nwehe ciicammo ilatarato.)
18 Apostolu Paulu ahaahimerya makristau oheperewu wiira nkristau ookhomaala pooti uhiya waamininya ni Yehova mpaka. Nkristau pooti ukhalana moopuwelelo oorika yaahala umwiiriha uhoniihera uttharuwa ni commo pooti uhileveleliya ni Yehova. Wootteeliha nrima, makristau oheperewu khaayakhumelele iyo. (Mabere. 6:4-9) Isiyani ineetthucaaya makristau omahukweehwaala, ahiile urwaa wuulalyeerani umikutthaanoni awula yoomoliye wanlokoni, nuuwakatyaaya yooniheraka uttharuwa ni uturuwela wanlokoni? Ayo akhanle owiiyeviha ni ottharuwa, naala manannaala ayo anawoonihera wiira akhanle atthu ovirikana naale Paulu awantikilyaawe yaahala uhaamininya-tho ni Yehova mpaka. Khweeliini, vano yanturuwelaka Yehova. (Ezek. 34:15, 16) Mahumu o wanlokoni anaamwaavya munna oocuwelaca wiira akavihere ukhala ookhomaala nhina mminepani.
Yehova naanivaha yotheene impheeleehu wiira anikavihere ulipa nhina mminepani (Nwehe iparaagarafu 18)
19. Isiyani impheeleehu?
19 Wakhala wiira nyuuva nnaawikurumica ukhala nkristau ookhomaala, nyuuva nnaahala ukhitiri wiiranyeeha ile ilakenleenyu. Nhihiyerere wiitthuca ikhweeli co mbiibiliyani ni khampa Yehova cinoopuwelaawe. Nyuuva mwakhalaka nkristau ookhomaala, mpake ile nkhitiriinyu wiira nhihiyerere mpaka.
MWAAHALA WAAKHULA CANI?
-
Ukhala nkristau ookhomaala maanaaya isiyani?
-
Manannani ninhaleehu wuunuwa nhina mminepani?
-
Kontha isiyani niihinlamulyeehu wiikhuluvela cinene?
NCIPO 65 Nivikaniheke Olaleerya!
a Coowantikiya co iheperewu khacinvarela nteko moolumo “ookhomaala” ni “ohikhomaala”, masi inawuuluma paahi ala moopuwelelwaala. Wootakihera, ilivuru ya Miruku inawuuluma uvirikana wa ntthu khanle mmirawo oohicuwelaca ni oocuwelaca rina ankhili.—Miru. 1:4, 5.
b Nwehe mwaha “Mananna owiikhikicera ihapari cowoothiya” mphantte uneera “Myaha cikhwaawe” nhina isayiti jw.org ni aplikatiivu JW Library.®
c Efesu 4:14 Vano khaninlamuliya ukhala toko asaana, nikhalaka khampa oovonyiya ni mawimpi ni oohapuseriya khula mphantte ni citthu cotheene cineetthucihiya, nuulavilavi urinaaya apinaatamu, ni niitapha cowoothiya. 15 Masi, muulumeke ikhweeli ni moonihere nifento, ciicammo nuunuwe niinanna cotheene, wiira nkhale munttharaka ule khanle nhooleli, Kristu.
d Yuda 20 Masi nyuuva, afentyaaka, mwiilipihe nhina waamini winyu wowaarya cinene ni nlompe ni nnepa wowaarya,
e Efesu 4:11 Ni uyo haavaha akiina khampa maapostolu, akiina maaporofeeta, akiina anaamalalyeera, ni akiina khampa amakampuci ni eetthucihi, 12 wiira yaatthonkomanihace mayoweettela isariya, wiira avare nteko woolalyeera, wiira ulipihiye mphwinko wa Kristu, 13 mpaka wankhitiryaaya otheene cihu ukhalana waamini ni ucuwela ikhweeli ca Mwaana a Nluku, wiira nikhale atthu ookhomaala, wanlikananeehu wunnuwa wa Kristu.
f Nwehe mphantte “Nruku wo myaha coohala usoma” ila irevisteela.
g Maberewu 5:14 Masi iyoolya yoolipa anlya atthu arina waamini woolipa. Ayo akhanle atthu alemalenle uvarela nteko moopuwelelwaaya wiira acuwele isiyani ikhanle itthu yomaana ni yoohinamaana.
h UTTONKACIYA WO ILATARATO: Wiira athanle itthu yoohala woona TV, munna naweettela ikano cineetthucaawe nnuulumoni na Nluku.
