MAPROFETA okhalayi yaanaamwamini Nluku. Yaanaakupali inatiri cawe ni yaakhala yeettelaka. Caarii phinnyi ceeciyo inatiri ciyo?

Uvikana vakani ukathi wo Atamu ni Hawa wankhottenlyaaya Nluku Uwedeni, Nluku ahohimya wiira aanaahala unruma ntthu unyakatta muru wo “inwaa” inthoonyera ukhala “inwaa yuulupale . . . , inwaa yoophattuwa, ineehaniya Tiyapu, Sotwani”, anharipwaka wiira hikhale-tho. (Uphattuwaca 3:14, 15; Apokalipise 12:9, 12) Coo, maprofeta yananweherera ntthu aahala uwa wiira apanke iyo. Aakookhala tipani?

Uvira waya Myaakha 2.000, yapankiyeru yeele inatiriile yoopacera, Yehova ahonhimerya profeta Abrahamu wiira yooyo aahala uwa, aahala ukhala ucuulwaawe. Uyo ahonkhuluveliha ila: “Wariyari wo ucuulwaa maloko oothene owatuniyani anaahala wiiphwanyiha iparakha, ukhala wiira uheewelela ncuunaka.”—Uphattuwaca 22:18.

Mwaakha wo 1473 A.E.C. Nluku ahonhimerya profeta Moses ihapari cikina-tho co “ucuulu”. Moses ahaahimerya asaana a Israyeli wiira: “Profeta mmoca owanlokoni waa, aasunnaa, oolattanaca ni miivano, phinhalaawe Yehova, Nlukwaa, wuuwaanela ni ula phinlamuliyeenyu umwiiwelela.” (Deuteronomiyu 18:15) Phimaana, toko Moses, profeta yooyo aahala uwa munlokoni na Abrahamu.

Profeta yooyo aahala ukhala ciicammo ucuulu wa Mwene Davidi ni aahala ukhala mwene muulupale. Nluku ahonkhuluveliha Mwene Davidi: ‘Kinaarwaa unmwaana nculaa nhala wuuttiya ni kinaahala ulipiha utikitherya ikiitti yo umwenyaawe mpaka.’ (2 Samuweli 7:12, 13) Nluku ciicammo ahoonihera wiira yooyo ucuulu uyo wa Davidi waahala  wiihaniya “Mwaana Aamwene Onnema,” ni ahohimya wiira: “Winciva ulamulela wo mwaana aamwene ni wonnema khunhala umala, waculuwaya ikiitti ya Davidi ni waculu waya umwennyaawe, wiira alipihe utikitherya ni wiira akhalihere ni ankhili ni wosariya, ukhuma phiyaru vaa mpaka.” (Isaiya 9:6, 7) Nhooleli yooyo osariya naarwa urehererya nnema ni isariya ntuniyani moothene. Masi yooyo aahala ukhumelela yaakhani?

Nlayikha nneehaniya Gabriyeli ahomwiirela profeta Daniyele: “Uhaana ucuwelaka ni wiiweehaka saana wiira nakhumeru nuulumo nowiira areheleliye ni atekiye-tho Jerusalem, mpaka uwa Mesiya, Nhooleli, cinhala ukhala isumana saapa, ni ciicammo isumana sithiini na piili.” (Daniele 9:25) Iyo yahophiyera isumana 69 co myaakha—khula isumana inhimya ukhala myaakha 7—utakaniha coothene cinkhala myaakha 483. Ukathi yooyo waari wo 455 A.E.C. mpaka 29 E.C. *

Niireke wiira Mesiya, profeta onlattanana Moses ni ucuulu wootepa uwehereriya, khweeli waalee mwaakha wo 29 E.C.? Nttwee noone.