1-3. a) Inannani yokhatteya ihukhumwiyeehu utthukeliya otheene cihu? b) Isiyani Yehova inhalaawe upanka wiira anoopole?

MUUPUWELE nyuuva nnahukhumwiye utthukeliya nkhatteya woohikhuma-tho nlattu wo itthu ihipankileenyu. Nyuuva nnawoona wiira khiivo nnohaleenyu ukhitiri upanka wiira iyo itthwiiyo ihiirannye ni nnawancera uhikhalana nweherero. Vano, nyuuva nnancuwela ntthu rina ikuru wiira awoopoleni ni uyo nawuukhuluvelihani upanka iyo. Mwaahala wiicoona cani?

² Otheene cihu nihoohukhumwiya utthukeliya nkhatteya. Iyo ikhatteyeeyo ukhanle ukhwa. Khiivo inkhitiriihu upanka wiira nihikhwe. Masi Yehova haana ikuru wiira anoopole. Uyo naakhuluveliha wiira ukhwa, ukhanle “nwanani oomalela”, khunha ukhala-tho.—1 Akorintu 15:26.

³ Nkoopuwelani inanna ninhaleehu ukhala ukati unhalaaya uhikhala-tho ukhwa. Ni uhiya paasi Yehova umalamaliha ukhwa, uyo ciicammo naahala waavaha ukumi ale akhwile. Iyo itthwiiyo Ibiiblya ineehana wunwelela. Yehova hokhuluveliha: “Ale yuukhwenleni anaahala ukhala akumi.” (Isaiya 26:19) Nhotoko wuupuwela maanaaya isiyani iyo itthwiiyo?

4. a) Ninhala uphwanya vayi nimaaliho nakhweliyaka mmuciihu awula mpatthaniihu? b) Atthuni akinaku yaari apatthani oolupale a Yesu?

⁴ Ukhweliya mmuciihu awula mpatthaniihu unaawerya cinene. Unkhala toko khaninhala-tho ukhitiri uvilela uriipiya nrima unniphwanya. Untepa uniwerya, kontha ninawoona  wiira khiivo inhaleehu ukhitiri upanka wiira ntthuuyo ahokoleele ukhala nkumi. Masi Ibiiblya inaanivaha nimaaliho neekhweeli. (Nsome 2 Akorintu 1:3, 4.) Wootakihera, ukati Yesu waaryaawe watuninyani, ihaavo yeerannyeele inoonihera wiira uyova ni Yehova anaapheela waaturusela ukhala akumu atthu akhwile. Yesu aanonthotolaka Laazaru ni asirokorawe, Marta ni Mariya. Ooraaru caya yaari apatthani oolupali a Yesu. Ibiiblya ineera: “Yesu aanonfenta Marta, mwaamunnawe ni Laazaru.” Masi nihuku nimoca, Laazaru aahokhwa.—  Joau 11:3-5.

5, 6. a) Yesu aakhanle cani uwoona wawe amucyaawe ni asipatthannyaawe Laazaru yonlaka? b) Ucuwela wiira Yesu ahoriipiya nrima unnimaaliha inannani?

⁵ Yesu aholakela urwaa ummaaliha Marta ni Mariya. Marta weewilyaawe wiira Yesu aanaawa, uyo ahonsikamela. Uyo ahotteeliya venci umoonana wawe Yesu, masi aheera: “Pwiiya, unari wiira mwahaavo vaa, mwanrokoraka khaakhwa.” Uyo ooniha wiira Yesu khiivo yaahalaawe upanka. Nuuwakatyaaya, Yesu ahomoona Mariya onlaka, uyo ahoriipiya nrima cinene uwoona wawe Marta ni Mariya yonlaka, mpaka nuuyo ahonla. (Joau 11:21, 33, 35) Uyo ahoona uwerya toko vaavale ninoneehu nakhweliyaka ntthu ninonfenteehu.

⁶ Iyo itthwiiyo innimaaliha cani? Iyo inaanimaaliha kontha inoonihera wiira Yehova ni Yesu khunaacivela ntthu akhwaaka. (Joau 14:9) Ni iri itthu yomaana ucuwela wiira Yehova haana ikuru wiira amalihe ukhwa weemaara imoca. Ni iyo phiitthu inhalaawe upanka woohipica.

7, 8. a) Nlattuni Marta wahaapheelaawe wiira mahiye a Laazaru apattakuliye? b) Isiyani Yesu yaapankilyaawe upattakuliya waya mahiyaayo?

⁷ Irutthu ya Laazaru yaheesiya mmahiye ni ayo yahottiyeliya ni nluku nuulupale. Yesu aheera: “Ncusihe nluku.” Masi  Marta khaapheela wiira apattakuliye mahiyaayo kontha yahovira mahuku macese Laazaru nakhwile. (Joau 11:39) Uyo khaacuwela wiira Yesu anaahala umunweleliha mwanrokorawe.

⁸ Vano, Yesu aheera: “Laazaru, ukhumele utanno!” Vano, Marta ni Mariya yahoona itthu yootikhiniha. “Nlopwana aakhwale ahokhuma.” (Joau 11:43, 44) Yesu ahomunweleliha Laazaru! Uyo ahohokoleela ukhala wamoca naamucyaawe ni asipatthannyaawe. Amucyaawe pooti wankapattaaya ni umoopana mwaha. Ula waari mwiiriirya womaana!

9, 10. a) Tipani anvahile ikuru Yesu wiira akhitiri uwunweleliha atthu ookhwa? b) Kontha isiyani iryaaya itthu yofayita ucuwela wiira khalayi yaahaavo atthu yonwelelihiye?

⁹ Niireke wiira Yesu aawunweleliha atthwaayo niikuru cawe? Mena. Yehova phanvahile nnyo ikurunnyo. Yesu ahoonihera iyo itthwiiyo upanka wawe nivekelo hinaaya umunweleliha Laazaru. (Nsome Joau 11:41, 42.) Masi khunakhala wiira Laazaru phaatokile wunwelelihiya paasi. * Wootakihera, Ibiiblya inaamuuluma mwaaruusi mmoca aarina myaakha 12 aawerennyile cinene. Uyo aari mwaana mmoca Jairo aarinaawe. Jairo ahonsaka ni ahonlepela Yesu wiira anvonihe mwanawe. Ukati Jairo waamuulumanaawe Yesu, yaahowa alopwana ni yahomwiirela Jairo: “Mwaamwanooyo hokhwa! Unonnyakulelani Mwiitthucihuuyo?” Masi Yesu ahomwiirela Jairo: “Uhoove, woonihere paasi waamini waa, ni uyo naahala woopwa.” Yesu ahorwaa mpaka uwannyawe  Jairo. Uphiya wawe, uyo ahowoona atthu yonlaka ni aheera: “Umaaliye wunliya nwo, uyo khakhwileetthu; naarupa.” Asitthumwaane mwaaruusyuuyo pooti yaaneekohaka isiyani Yesu yaapheelaawe uhimya ni ayo moolumacerwaayo. Yesu aholepela wiira atthu akiina akhumele vate. Vano, uyo ahokela mpaani waaryaawe mwaaruusyuuyo. Yesu ahovara sana-saana ntata na mwaaruusyuuyo ni aheera: “Mwaaruusi, wunwe!” Nkoopuwelani inanna asitthumwaane yaatteeliyaaya ukati waamonnyaaya mwanaya onwaka ni eettaka! Yesu ahomunweleliha mwanaya. (Markus 5:22-24, 35-42; Luka 8:49-56) Wiirannya waya iyo itthwiiyo, khula ikwaha yanwehaaya mwanaya, ayo yaanoopuwela itthu Yehova yaapankilyaawe anvarelaka nteko Yesu.

¹⁰ Uhookhalaru wiira atthu yonwelelihiye ni Yesu khayaahiile ukhala oopahuwa ni wahoolo yahokhwa-tho, iri itthu yofayita ucuwela wiira yaahaavo yonwelihiye, kontha iyo itthwiiyo inawoonihera wiira Yehova khweeliini naapheela ni naahala uwunweleliha atthu akhwile.

11. a) Isiyani Ibiiblya inhimyaaya nhina ilivuru ya Eklesyaste 9:5? b) Iyo itthwiiyo inniitthuciha wiira Laazaru aari cani ukati waakhwilyaawe?

¹¹ Ibiiblya inaahimya sana-saana nhina ilivuru ya Eklesyaste 9:5 wiira “atthu ookhwa khaanoopuwela hataa itthu.” Iyo inoonihera wiira, ukati Laazaru waakhwilyaawe, uyo khaacuwela hataa itthu yeerannya. Toko Yesu weerilyaawe, waakhala khampa wiira Laazaru aanaarupa.— Joau 11:11.

12. Isiyani innikupaliha wiira Laazaru ahonwelelihiya khweeli?

¹² Atthu enci yahomoona Yesu amunwelelihaka Laazaru. Wunwelelihiya Laazaru khayaari itthu yowoothiya. Laazaru ahoturuwela ukhala nkumi! Hataa alupatthi a Yesu yaanaacuwela  wiira uyo mwiiriiryooyo waheerannya. (Joau 11:47) Uhiya commo, atthu enci yahorwaa unthotola Laazaru ni yahancera waamini wiira Yesu aaruminye ni Nluku. Alupatthi a Yesu, khayaacivenle itthu yeerannyeeleeyo, phimaana ayo yaholakela umwiiva Yesu ni Laazaru.—Joau 11:53; 12:9-11.

13. Kontha isiyani ninlamuliyeehu ukupali wiira Yehova naahala uwunweleliha atthu akhwile?

¹³ Yehova phumpile citthu cotheene. Phimaana, hiivano ninaacuwela wiira uyo haana ikuru yoohala waavaha ukumi atthu otheene akhwile. Uhiya commo, Yesu ahohimya wiira “otheene ari mmahiyeni” anaahala wunwelelihiya. (Joau 5:28) Iyo maanaaya wiira ahaavo atthu akhwile Yehova nohalaawe waahokolosera ukhala akumi. Uyo khanaaliyala atthu otheene ampheelaawe uwunweleliha. Niireke iyo itthwiiyo pooti wiirannya? Iyeeni, Ibiiblya ineera wiira Yehova naacuwela ncina no khula itthoottwa iri wiirimu ni ineera wiira nnyo cihaavo imiliyau cene. (Nsome Isaiya 40:26.) Ukhala wiira Yehova naacuwela ncina no khula itthoottwa, khweeliini uyo khunhala unrika uwuupuwela atthu nohalaawe uwunweleliha.

14, 15. Moolumo a Jó anniitthuciha isiyani nhina wunwelelihiya atthu akhwile?

¹⁴ Nlopwana mmoca ookhuluvelya answalela Yehova eehaniya Jó, aanaakupali wiira unaahala ukhala wunwelela waatthu akhwile. Uyo ahokoha: “Ntthu akhwaaka naahala uhokoleela ukhala nkumi?” Jó ahomwiirela Yehova. “Unaahala wiihana, ni miiva kinaahala uwaakhula. Unaahala wuunukhela woona citthu cumpalyaa.” Ala moolumwaala anniitthuciha wiira Yehova naapheela cinene uwunweleliha atthu akhwile.—Joau 14:13-15.

¹⁵ Nyuuva nneecoona cani moopuwelaka wunwelela waatthu akhwile? Khannokhala ootteeliya nrima ucuwela wiira Yehova naapheela cinene uwunweleliha atthu akhwile? Masi  nyuuva pooti wiikohaka co: ‘Vano amucyaaka ni asipatthannyaaka? Kiireke naayo anaaha wunwelelihiya?’ Nttwee noone itthu Ibiiblya inhimyaaya nhina atthu anhala wunwelelihiya ni nipuroni ninhalaaya ukhala.

16. Kontha isiyani wunwelela waatthu unhala wiirannya unhala ukhala wootepa ureera?

¹⁶ Atthu yonwelelihiye khalayi, yahoturuwela-tho ukhala wamoca naamucyaaya ni asipatthannyaaya watuninyani vaava. Iyo itthwiiyo inaahala wiirannya toothooni ukati Nluku nohalaawe uwunweleliha atthu akhwile, masi uyo ukatyuuyo unhala ukhala wootepa ureera. Kontha isiyani? Kontha atthu anhala wunwelelihiya anaahala ukhalana iparakha yoohala ukhala mpaka ni woohiwehererya-tho ukhwa. Ni ituninya khinhala ukhala toko ciryaaya mahukwaala. Ikhotto, ikhirini ni iretta khacinhala ukhala.

17. Tipani nohala wunwelelihiya?

¹⁷ Tipani nohala wunwelelihiya? Yesu enre wiira unaahala uphiya ukati “unhalaaya wiiwa ncu nawe otheene ari mmahiyeni ni anaahala ukhuma.” (Joau 5:28, 29) Ciicammo Ibiiblya ineera: “Ipahari yahaahokolosa atthu yaakhwenle mommo, ukhwa ni mahiye yahaahokolosa atthu ookhwa yaarinaaya.” (Apokalipise 20:13) Iyo maanaaya wiira atthu imiliyau cene akhwile anaahala uturuwela ukhala akumi. Ni apostolu Paulu ahoruminya wantikha wiira “unaahala ukhala wunwelela wa atthu oweettela isariya ni naayo ooheettela.” (Nsome Miteko 24:15.) Yeeriyaka atthu oweettela isariya ni atthu ooheettela, anaaciya taapani?

18. “Atthu oweettela isariya”anhala wunwelelihiya taapani?

¹⁸ Yeeriyaka “atthu oweettela isariya” anaaciya atthu ookhuluvelya yanswalela Yehova. Otheene ale yanswalela Yehova yaakhala ukati Yesu waaryaawe hinaaya uwa watuninyani  ari nkhurupuni yaatthu ookhuluvelya, toko: Nowee, Aparahaamu, Sara, Moocesi, Ruti ni Esteri. Mwapheelaka waacuwela akhwaawe-tho, pooti usoma ilivuru yo Maberewu ikapiitulu 11. Masi “atthu oweettela isariya” khaanaaciyaka paasi ale yanswalela Yehova khalayi. Atthu yanswalela Yehova akhwile ukatiihula, ciicammo ari nkhurupuni yaatthu “oweettela isariya” ni ayo anaahala wunwelelihiya.

19. Yeeriyaka atthu “ooheettela” isariya anaaciya taapani? Iparakhani Yehova nohalaawe waavaha?

 ¹⁹ Yeeriyaka atthu “ooheettela” isariya anaaciya atthu imiliyau cene yaheewile myaha ca Yehova. Uyo khaaliyanle ayo atthwaayo. Yehova naahala uwunweleliha ayo atthwaayo ni naahala waavaha ukati wiira yiitthuce myaha cawe ni apanke ile impheelaawe.

20. Atthuni anhala uhunwelelihiya?

²⁰ Masi niireke wiira atthu otheene akhwile anaahala wunwelelihiya? Mena. Yesu ahohimya wiira ahaavo atthu anhala uhituruwela-tho ukhala akumi. (Luka 12:5) Ayo atthwaayo, phaale apankile citthu coohinamaana ni ahitthunne urukunusa makhalelwaaya. Masi tipani nohala ulakela wakhala wiira ntthu naaphwanela wunwelelihiya awula mena? Yehova phiri Suwiisi oomalihera, masi ciicammo uyo honthanla Yesu wiira ‘akhale suwiisi aatthu akumi ni akhwile.’— Miteko 10:42. Ibiiblya ineera wiira ayo atthwaayo anrwaa u Geheena. Nwehe Niwehero n.° 19.

21, 22. a) Inannani yorutthu nokhalanaawe ntthu nonwelelihiya wiira akhale wiirimu? b) Tipani pacenre wunwelelihiya wiira akhale wiirimu?

²¹ Ibiiblya ineera wiira ahaavo atthu anrwaa ukhala wiirimu. Ntthu nohala ukhala wiirimu khanonwelelihiya niirutthu yeepinaatamu. Uyo nonwelelihiya niirutthu yoominepani.

²² Yesu phipacenre wunwelelihiya wiira akhale wiirimu. (Joau 3:13) Uvira waya mahuku mararu Yesu nakhwile, Yehova ahomunweleliha. (Isaalimu 16:10; Miteko 13:34, 35) Yesu khonwelelihiye niirutthu yeepinaatamu. Apostolu Peturu ahoolumaca eeraka: “Uyo khwile niirutthu yeepinaatamu, masi haakhela ukumi wonnepa.” (1 Peturu 3:18) Yesu hoturuwela ukhala nlayikha nokuru. (1 Akorintu 15:3-6) Masi  Ibiiblya ineera wiira kahi Yesu veekhaawe phaahala wunwelelihiya wiira akhale wiirimu.

23, 24. Taapani anhala wunwelelihiya wiira yakhale wiirimu?

²³ Uhalaka ukati vakaani Yesu hinaaya wiiviya, uyo ahowiirela attharyaawe: “Nikwaha ukoowaavyerani nipuro.” (Joau 14:2) Iyo maanaaya wiira ahaavo atthari a Yesu yaahala wunwelelihiya wiira yakhale wiirimu wamoca nuuyo. Yesu ahohimya wiira yaahala ukhala atthu vakaani, phimaana aheehana iyo ikhurupwiiyo “nikhoto nankaani.” (Luka 12:32) Iwooni imoca apostolu Joau yaarinaawe, uyo ahoona nummerunaya ayo atthwaayo. Joau enre wiira ahomoona Yesu “neemenle wamwaakoni wo Usiyawu, nari nkhayi naatthu 144.000.”—Apokalipise 14:1.

²⁴ Makristau 144.000, yaahala wunwelelihiya mwaani wiira yakhale wiirimu? Yaahala wunwelelihiya ukati Yesu waahalaawe ukhala Mwene. (1 Akorintu 15:23) Nna coo Yesu hokhala Mwene wiirimu, ni nhina makristau 144.000 yaahala ukhala wiirimu, enci ahokhwa ni ahonwelelihiya. Masi makristau akiina ari iyo ikhurupwiiyo khaanaaya ukhwa. Yakhwaka vale, ayo anaahala wunwelelihiya ukati yooyo wiira yakhale wiirimu. Vano atthu imiliyau cene akhwile anhala wunwelelihiya wiira yakhale wapeephoni watuninyani, anhala wunwelelihiya mwaani? Anhala wunwelelihiya wahoolo.

25. Ikapiitulu inhaleehu ikela isiyani inhaleehu usoma?

²⁵ Woohipica, Yehova naahala unoopola nkhatteeya niryeehu, ukhanle ukhwa. Ukhwa khunhala ukhala-tho! (Nsome Isaiya 25:8.) Masi isiyani inrwaaya uvara atthu anhala wunwelelihiya wiira yakhale wiirimu? Ibiiblya ineera wiira ayo atthwaayo ankoolamulela ni Yesu Muumweneni wa Nluku. Ikapiitulu inhaleehu ukela ninaahala usoma sana-saana uyo Umwennyooyo.