MPANTTA 33
Isiyani Umwene wa Nluku unhalaaya upanka?
Umwene wa Nluku uneera ulamulelaka wiirimu. Woohipica, uyo unaahala upanka marukunuso moolupale va watuninyani va. Nttwee noone citthu comaana cinhalaaya upanka Umwene wa Nluku.
1. Manannani Umwene wa Nluku unhalaaya uwaana nnema ni isariya va watuninyani va?
Yesu, khanle Mwene o Umwene wa Nluku, naahala waamalamaliha atthu oohinamaana ni ikuvernu ca apinaatamu ukhottoni yo Harmacetom. (Apokalipise 16:14, 16) Yakhumelelaka iyo itthwiiyo, vano inaahala wiirannya inatiri yo mbiiblyani ineera: “Unhaleela vakaani paahi, atthu oohiloka khanhala ukhala-tho.” (Isaalimu 37:10) Avarelaka nteko Umwene wa Nluku, Yesu naahala uwaana nnema ni isariya ntuninyani motheene.—Nsome Isaiya 11:4.
2. Makhaleloni anhaleehu ukhalana yeerannyaaka ile impheelaawe Nluku va watuninyani va?
Muupuwele nyuuva nkhalaka ntuninyani imphwanyannya paahi atthu aneettela isariya ni ookhalana makhalelo omaana; ni otheene anonfenta Yehova ni anfentana! Commo phinhalaaya ukhalakhaliya va watuninyani va Umwene wa Nluku wanceraka ulamulela. Ukhala wiira “ale aneettela isariya phinhala ukhala walaponi ni ankookhala mpaka.” (Isaalimu 37:29) Khaavo nohala uwerennya ni atthu otheene ankookhala mpaka.
3. Isiyani Umwene wa Nluku ihalaaya upanka yamalamalihiyaka atthu oohinamaana?
Yamalamalihiyaka atthu oohinamaana, Yesu naahala ulamulela myaakha 1.000. Nhina uyo ukatyuuyo, uyova wamoca ni makristau 144.000 anhalaawe waalamulelana, anaahala waakavihera atthu va watuninyani va ukhala oohipahuwa. Wuumaleloni myaakha 1.000, ituninya yotheene inaahala ukhala ipeepho ni atthu otheene anhala ukhala ootteeliya kontha anaahala wiiwelela malamulo a Nluku. Vano, Yesu Kristu naahala waahokolosera Umwene Athumwaane, Yehova. Ncina na Yehova ninaahala ‘ureerihiya’ niinanna nihinatokwaaya ureerihiya. (Matewus 6:9, 10) Unaahala woonannya sana-saana wiira Yehova phiri nhooleli naawacera atthu. Vano, Yehova naahala ummalamaliha Sotwani, maciinnyaawe ni atthu otheene anhala uthanla uhiiwelela ikuvernwaawe. (Apokalipise 20:7-10) Nlattu wo Umwene wa Nluku, makhalelo mu ntuninyani mmo anhala ukhala oohipahuwa nhina wo citthu cotheene ni unhala ukhalakhaliya commo mpaka.
MUNCERERE WIITTHUCA WINYU
Moone nlattuni ninlamuliyeehu ukupaleela wiira Nluku naahala uvarela nteko umwennyaawe wiira eerannyeehe inatiri co mbiiblyani cotheene cinooluma citthu cinhala wiirannya wahoolo.
4. Umwene wa Nluku unaahala umalamaliha ikuvernu caapinaatamu
Ibiiblya ineera: “Pinaatamu nanhoolela pinaatamu nkhwaawe wiira amphwanyihe masakha.” (Eklesyaste 8:9) Yehova naahala uvarela nteko umwennyaawe wiira amalamalihe citthu cotheene coohinamaana cimpankiya.
Nsome Daniele 2:44 ni 2 Atesalonika 1:6-8. Mwamalihaka usoma, moopele mwaha ala makohwaala:
-
Yehova ni Yesu anhala wiirihani ikuvernu ca apinaatamu ni ale ankavihera nnyo ikuvernunnyo?
-
Moopuwelaka citthu cotheene ca Yehova ni ca Yesu ciitthucileenyu, kontha isiyani nnolamuliyeenyu ukupaleela wiira ihukhumu inhalaaya upanka inhala ukhala yosariya?
5. Yesu khanle Mwene oohipahuwa
Ukhala wiira Yesu khanle Mwene o Umwene wa Nluku, uyo naahala upanka citthu cinci comaana wiira aakavihere atthu va watuninyani va. Moone IVIDIYU inoonihera wiira Yesu naapheela waakavihera atthu ni Nluku honvaha ikuru wiira akhitiri upanka iyo itthwiiyo.
Citthu cipankilyaawe Yesu ukati waaryaawe va watuninyani va cinawoonihera citthu cuulupale cinhalaawe muumweneni wa Nluku. Iparakhani cinhala wiirannya wahoolo ciromoliye va vathiva cinooneenyu upica wiirannya? Nsome iveerusu co mbiiblyani cinooluma nnyo iparakhannyo.
|
UKATI WAARYAAWE VA WATUNINYANI VA, YESU . . . |
NARYEENE WIIRIMU, YESU NAAHALA . . . |
|---|---|
|
|
|
|
|
|
|
|
6. Umwene wa Nluku unaahala uwaana makhalelo omaana
Umwene wa Nluku unaahala uwiiriha apinaatamu ukhalana makhalelo omaana, khampa Yehova caapheelelaawe ukhuma nenne nokhalayi. Atthu anhala ukhala mpaka, wapeephoni va watuninyani va. Moone IVIDIYU inthoonyera mananna Yehova cinhalaawe unruma Yesu wiirannyeeha ile impheelaawe va watuninyani va.
Nsome Isaalimu 145:16, ni mwamalihaka usoma, moopele mwaha nna nikohonna:
-
Nneecoona cani ucuwela winyu wiira Yehova naahala ‘utteeliha nrima citthu cikumi cotheene?’
ATTHU AKIINA ANEERA: “Unari wiira atthu otheene anawiikurumica, hiiva nanhala ukhitiri umaliha masakha ankhumelela ntuninyani.”
-
Masakhani ahinkhitiriya umalamalihiya niikuvernu ca apinaatamu, masi anhala umalamalihiya nuumwene wa Nluku?
UTHIKILELA
Umwene wa Nluku unaahala upanka citthu cotheene uyova cimpheelaawe wiira cipankiye. Uyo umwennyooyo unaahala ukhaliha ila ituninyeela ipeephoni ni atthu enci omakhalelo omaana anaahala unswalela mpaka.
Wuupuwela
-
Manannani Umwene wa Nluku unhalaaya ureeriha ncina na Yehova?
-
Kontha isiyani ninlamuliyeehu ukupaleela wiira Umwene wa Nluku unaahala wiirannyeeha inatiri cotheene co mbiiblyani?
-
Nhina citthu cotheene cinhalaaya upanka Umwene wa Nluku, phiiyi nyuuva intepeenyu upheela woona yiirannyaaka?
MWAPHEELAKA UCUWELA CITTHU CIKIINA
Ncuwele Harmacetom isiyani.
“Ikhotto yo Harmacetom ikhanle isiyani?” (Mwaha umphwanyannya nsayitini jw.org)
Moone isiyani inhala wiirannya nhina wo myaakha 1.000 cinhalaawe ulamulela Yesu. Ciicammo moone isiyani inhala wiirannya camalaka nnyo myaakhannyo.
“Isiyani inhala wiirannya nihuku nohukhumu?” (Ukhalenla, 1 yo Setembro yo 2012)
Moone manannani amuci cinlamuliyaaya wiicuupuwela anari upeephoni.
Nhina ihantisi ineera “Makoho menci yaanaakihiya nimasukhuli,” moone manannani nlopwana mmoca aarukunuwenle isiyaasa ciphwanyilyaawe waakhuliya wo makoho yaarinaawe.
“Ibiiblya inaarukunusa makhalelo aatthu” (Ukhalenla, 1 yo Janeiro yo 2012)
