MPANTTA 16

Citthuni cipankilyaawe Yesu ukati waaryaawe watuninyani?

TOCAR

Atthu enci anancuwela Yesu. Masi akiinaayo ancuwela paasi citthu caamwiirannyenle ukati waaryaawe mwaana, akiina anoncuwela wiira uyo aari porofeeta oocuwelaca ni akhwaawyaayo citthu cimwiirannyenle ukati waakhwaawe. Masi nasomaka mbiiblyani ihantisi cinonttonkaca ukati waaryaawe va watuninyani va, ninawiitthuca citthu cinci ca Yesu. Nhina ula mpanttoola, ninaahala woona citthu cofayita cinene cipankilyaawe Yesu, ni mananna nnyo citthunnyo cinookaviheraayani.

1. Ntekoni wootepa ukhalana ifayita waavaraawe Yesu?

Nteko wootepa ukhalana ifayita waavaraawe Yesu waari “ulalya ihapari comaana co Umwene wa Nluku.” (Nsome Luka 4:43.) Ihapari comaana caalalyaawe Yesu cooluma Umwene, awula ikuvernu ya Nluku inhala umalamaliha masakha otheene anaakhumelela apinaatamu. a (Moone niwehero.) Yesu ahoviriha myaakha miraru ni nuusu alalyaaka iyo ihapari innivaha nweherero womaaneeyo.—Matewus 9:35.

2. Kontha isiyani Yesu Kristu waapankaawe miiriirya?

Ibiiblya ineera wiira Nluku ahonruma Yesu upanka “miiriirya ni miteko cootikhiniha.” (Miteko 2:22) Nlattu wokuru yaavahiyaawe ni Nluku, Yesu ahokhitiri umaaliha iphyoo yuulupale, waaliha atthu imiliyau cene, waavoniha aretta ni hataa uwunweleliha atthu ookhwa. (Matewus 8:23-27; 14:15-21; Markus 6:56; Luka 7:11-17) Miiriirya caapankilyaawe Yesu cinawoonihera wiira uyo aaveleelihiye ni Nluku. Ni ciicammo cinawoonihera wiira Yehova haana ikuru yoomalamaliha masakha annikhumelela.

3. Isiyani ineetthuceehu nimananna Yesu caakhalaawe va watuninyani va?

Yesu ikhumelo ompiyaawe naamwiiwelela Yehova. (Nsome Joau 8:29.) Uyo hopanka iyo itthwiiyo muukumini wawe motheene, hataa ukati waalupatthiyaawe. Uyo hothoonyera wiira wanaakhitirya apinaatamu unswalela Nluku, hataa yaananaka marikariko. Coo, Yesu hohiya “ntakihero wiira nitthare meettelwaawe saana-saana.”—1 Peturu 2:21.

MUNCERERE WIITTHUCA WINYU

Moone mananna Yesu cilalyenryaawe ihapari comaana ni cipankilyaawe miiriirya.

4. Yesu anlalyeera ihapari comaana

Yesu heetta ikiloometru cinci mparapaarani contthupi wiira akhitiri waalalyeera ihapari comaana atthu enci. Nsome Luka 8:1, ni mwamalihaka usoma, moopele mwaha ala makohwaala:

Niireke Yesu aalalyeera paasi atthu yaawa mpaka nipuro niryaawe?
Isiyani Yesu yaapankaawe wiira aaphwanye atthu owaalalyeera?

Nluku aheera khalayiiru wiira Mesiya anhala ulalyeera ihapari comaana. Nsome Isaiya 61:1, 2, ni mwamalihaka usoma, moopele mwaha ala makohwaala:

Manannani Yesu ciirannyeehilyaawe ila inatiriila?
Nyuuva woonela winyu, ala mahukwaala atthu ahaana yeewaka ihapari comaana?

5. Yesu aheetthuciha ikhweeli cofayita cinene

Uhiya paasi ulalya ihapari comaana co Umwene wa Nluku, Yesu ciicammo aanaavaha ikano comaana. Moone ikano caavahilyaawe ukati waataphulelaawe mwaha umwaakoni. Nsome Matewus 6:14,34 ni 7:12. Mwamalihaka usoma, moopele mwaha ala makohwaala:

Ikanoni Yesu civahilyaawe nhina nnya iveerusunnya?
Nnya ikanonnya pooti waakavihera atthu mahukwaala?

6. Yesu ahopanka miiriirya

Yehova ahonvaha ikuru Yesu wiira akhitiri upanka miiriirya. Moone ntakihero nimoca. Nsome Markus 5:25-34 awula moone IVIDIYU. Mwamalihaka, moopele mwaha ala makohwaala.

IVIDIYU: Yesu nawaavoniha athiyana (5:10)

Hi nihoona wiira athiyanaayo yanwerennya cinene. Hataa ukhalaka commo, isiyani ayo yaakupaleelaaya?
Isiyani itepile wuucivelani nhina ula mwiiriryoola?

Nsome Joau 5:36, ni mwamalihaka usoma, moopele mwaha nna nikohonna:

Miiriirya caapankilyaawe Yesu caavahile usaahitini awula caathoonyera isiyani?

Mwaanaacuwela?

Citthu cotheene cincuweleehu ca Yesu cantikhiye nlivuruni ya Matewus, Markus, Luka ni Joau. Nnyo ilivurunnyo cineehaniya ivangeeliyu. Khula ntthu antikhile nnyo ivangeeliyunnyo hottonkaca citthu cimmuuluma Yesu cihittonkacilyaawe nkhunanawe. Nakumanihaka cotheene nnyo citthunnyo, hi ninaakhitiri woona mananna Yesu caakhalaawe va watuninyani va.

MATEWUS

Iyo phiri ivangeeliyu ipaceriye wantikhiya. Nhina iyo ivangeeliywiiyo, ninaaphwanya citthu cinci ciitthucihilyaawe Yesu, venci-venci nhina Umwene wa Nluku.
MARKUS

Iyo phiri ivangeeliyu itepile ukhala yankaani. Ni iyo ilivuru inooluma citthu cootteeliha nrima.
LUKA

Inaattonkaca mananna Yesu caatepaawe uvaha ifayita ulompa ni mananna caatafityaawe athiyana.
JOAU

Nhina iyo ivangeeliywiiyo, ninaaphwanya myaha Yesu caawoopannyaawe asipatthannyaawe ni atthu akhwaawe. Iyo inaanikavihera woona makhalelo yaarinaawe Yesu.