MPANTTA 11
Isiyani nnolamuliyeenyu upanka wiira mwasomaka Ibiiblya mphwanyere ifayita?
Muupuwele nyuuva mwapheelaka ukutta imatteenyu yootakhala venci cinene, ni nlattu wootakhala cinene nyuuva khannocuwela nipuro noopacera ukutta. Wiira uyo ntekooyo uhitepe wuurikelani atthunaka nyuuva mwanhala ukawanihaca imatteeyo nimiphantte cooyevaca ni coohirikarika. Nyuuva pooti upanka itthu imocaaru ukati woosoma Ibiiblya. Atthunaka nnawiikohaka co: Kancereke usoma mphantteni? Nhina ula mpanttoola, ninaahala woopela mwaha citthu coohirikarikaca cinlamuliyeenyu upanka wiira wuuciveleni usoma Ibiiblya ni wiira mwiiweehe itthu insomeenyu.
1. Kontha isiyani unaareera usoma Ibiiblya khula nihuku?
Ntthu nosoma Ibiiblya, awula “nlamulo na Yehova,” nokhala ootteeliya ni citthu cimpankaawe cinankhumela saana. (Nsome Isaalimu 1:1-3.) Mahuku oopacera, mmananihe usoma Ibiiblya khula mahuku ni iminutu vakaani paasi. Ukati unhaleenyu ucuweleeha nuulumo na Nluku, nyuuva unaahala wuucivelani cinene usoma Ibiiblya.
2. Isiyani inlamuliyeenyu upanka wiira mwasomaka Ibiiblya mphwanyere ifayita itthu isomileenyu?
Wiira niphwanyere ifayita itthu insomeehu mbiiblyani, nihaana nuupuwelaka itthu insomeehwiiyo. (Josuwe 1:8, niwehero) Iyo maanaaya wiira uhiyerera usomanwo vakaani ni wancera wuupuwela itthu yaasomeehu. Ukati unsomeenyu, mwiikohe co: ‘Ila itthu isomilyaakeela inkiitthuciha isiyani ya Yehova, Nluku? Kivareleke cani nteko muukumini waka? Kivareleke cani nteko nnya iveerusu kisomilyaakannya wiira kaakavihere akhunanaka?’
3. Isiyani nnolamuliyeenyu upanka wiira nkhitiri ukhalana ukati woosoma Ibiiblya?
Nyuuva unawuurikelani ukhalana ukati woosoma Ibiiblya? Atthu enci phineecoonaaya ciicammo. Mmananihe ‘uvarela nteko ratta ukatiinyu.’ (Efesu 5:16) Nyuuva pooti upanka iyo itthwiiyo nthanlaka ukati woosoma Ibiiblya khula nihuku. Ahaavo atthu anlakela usoma Ibiiblya wicisuuru, akinaku anlakela usoma Ibiiblya ukati nkhwaawe, atthunaka ukati unlyaaya iyoolya yoothana, ni akinaku unaacivela usoma Ibiiblya uhiyu, yapheelaka urwaa urupa. Vano nyuuva? Ukatini unooneenyu wiira wanhala ureera nyuuva usoma Ibiiblya?
MUNCERERE WIITTHUCA WINYU
Moone citthu cinlamuliyeenyu upanka wiira mwasomaka Ibiiblya mphwanyere ifayita. Ni moone manannani cinlamuliyeenyu wiitthenkaca saana wiira mphwanyere ifayita usomihiya winyu Ibiiblya.
Khampa nyuuva cineetthuceenyu wancera ulya iyoolya yaariinyu nhinapaca ulya, ciicammo pooti waneetthuceenyu wuucivelani usoma Ibiiblya.
4. Mpanke citthu cinhala uwiirihani wuucivelani usoma Ibiiblya
Wancera usoma Ibiiblya atthunaka pooti ukhala itthu yoorika, masi nyuuva pooti wiitthuca wuucivelani cinene usoma Ibiiblya. Iyo itthwiiyo ineerannya toko vaavale ntthu neetthucaawe uncivela icoolya caaryaawe hinatoko ulya. Nsome 1 Peturu 2:2, ni mwamalihaka usoma, moopele mwaha nna nikohonna:
-
Woonela winyu, usoma Ibiiblya khula nihuku unaahala wuukaviherani wuucivelani?
Moone IVIDIYU wiira ncuwele isiyani ipankilyaaya atthu akiina wiira yancere waacivela usoma Ibiiblya. Mwamalihaka woona, moopele mwaha ala makohwaala:
-
Ividiyu imalihileehu woona, citthuni caarikarikihela amirawo usoma Ibiiblya?
-
Isiyani yaakavihenre ayo amirawaayo uhihiyerera usoma Ibiiblya khula nihuku?
-
Isiyani yaapankilyaaya ayo amirawaayo wiira yasomaka Ibiiblya yiiweehe?
Citthu cinhala wuukaviherani wancera usoma:
-
Nthanle Ibiiblya yootaphuleliya saana ni yoohirikarika usoma. Nyuuva mwatthunaka pooti usoma Ibiiblya Tradução do Novo Mundo, iyo inaaphwanyannya niiluuka cinci.
-
Mwancere usoma miphantte co mbiiblyani cinooneenyu wiira nnaahala uphwanyera ifayita cinene. Moone citthu cihimiye nhina ikwaaturu “Mwancere usoma Ibiiblya.”
-
Mwantikhe mphantte usomileenyu. Wiira nkhitiri upanka iyo, nvarele nteko ikwaaturu ineera: “Nyuuva nnawuupuwela nipuro neemelenleenyu?”
-
Mwaavarele nteko aplikatiivu JW Library®. Nhina ayo aplikatiivwaayo, nyuuva pooti usoma awula uviriyana Ibiiblya nipuro hi nipuro, mwanvarelaka nteko telefooni, itableti awula ikomputatoori.
-
Nvarele nteko miphantte cineehaniya Apêndice cimphwanyannya mbiiblyani Tradução do Novo Mundo. Nhina nnyo miphanttennyo cinaaphwanyannya citthu toko: maapa, ikwaaturu, ni mphantte uneehaniya Glossário. Nnyo citthunnyo cinaahala wuukaviherani wiiweeha itthu insomeenyu.
5. Mwiitthenkace uhinaaya uphiya ukati unsomihiyeenyu Ibiiblya
Nsome Isaalimu 119:34, ni mwamalihaka usoma, moopele mwaha nna nikohonna:
-
Kontha isiyani unaareera ulompa nhinaaya wancera usoma Ibiiblya, awula nhinaaya wancera utthenkaca usomihiya winyu Ibiiblya?
Isiyani nnolamuliyeenyu upanka wiira mphwanyere ifayita khula mpantta wo ila ilivurwiila? Ukati uneetthenkaceenyu usomihiya winyu Ibiiblya, mmananihe upanka nnya citthunnya:
-
Nsome iparaagarafu coopacera co mpantta unhaleenyu usomihiya.
-
Nsome iveerusu co mbiiblyani ciromoliye mmaparaagarafunimmo ni mwaavyaavye woonelela mananna cinvaranacaaya ni mwaha unhaleenyu usomihiya.
-
Nkhwererye vathi waya moolumo anaakhula makohwaayo. Upanka commo, unaahala wuukaviherani woopela mwaha sana-saana uyo mpanttooyo wamoca nuule noosomihani.
Mwaanaacuwela?
Masaahiti a Yehova ahovarela nteko Ibiiblya cinci coovirikana, masi hi unicivela uvarela nteko Ibiiblya Tradução do Novo Mundo da Bíblia Sagrada kontha iyo khiyaakakhanihaciye, khinrika wiiweeha ni nhina waya ninaaphwanyannya ncina na Nluku.—Nwehe mwaha umphwanyannya nsayitini jw.org yeekunya “Masaahiti a Yehova anvarela nteko Ibiiblya yoovirikana ni nnye cirinaaya akhunanaya?”
ATTHU AKIINA ANEERA: “Usoma Ibiiblya uvaha nteko. Uhiya commo, akirina ukati ni akimala woocya.”
-
Nyuuva nnoonela cani usoma Ibiiblya?
UTHIKILELA
Wiira mphwanyere ifayita itthu inhimyaaya Nuulumo na Nluku, nthanle ukati woosoma Ibiiblya, nlompe wiira mwiiweehe itthu inhaleenyu usoma ni mwiitthenkace uhinaphiya ukati unhaleenyu usomihiya.
Wuupuwela
-
Isiyani inlamuliyeenyu upanka wiira mphwanyere ifayita itthu ineetthucihaaya Ibiiblya?
-
Iwoorani nyuuva atthunaka inlamuliyeenyu uthanla wiira nsome Ibiiblya?
-
Kontha isiyani unaareera wiitthenkaca uhinaphiya ukati unsomihiyeenyu Ibiiblya?
MWAPHEELAKA UCUWELA CITTHU CIKIINA
Moone citthu cinlamuliyeenyu upanka wiira mwasomaka Ibiiblya mphwanyere ifayita.
“Isiyani nnolamuliyeenyu upanka wiira wuuciveleni usoma Ibiiblya?” (Ukhalenla, N.º 1 yo 2017)
Moone mananna mararu oosoma Ibiiblya.
Moonenele mananna cinhalaaya wancera wuucivelani usoma Ibiiblya.
Mwiitthuce mananna omaana oosoma Ibiiblya anvarelaaya nteko atthu ikhumelo yo khalayi.
