MPANTTA 10
Isiyani inlamuliyeenyu upanka wiira mikutthaano co Masaahiti a Yehova cuukavihereni?
Nhopaca urwaa unkutthaanoni wo Masaahiti a Yehova? Wakhala wiira khannapaca urwaa, atthunaka wuupuwela paahi upaceriha urwaa unaawiirihani ukhala niiwasiwaasi. Pooti ukhalaka wiira nnawiikoha co: ‘Isiyani ineerannya mmamikutthaanoni co Masaahiti a Yehova? Kontha isiyani cihaana ifayita? Kontha isiyani kinlamuliyaaka urwaa? Nhina ula mpanttoola, nnaahala wiitthuca manannani urwaa mmikutthaanoni cinhalaaya wuukaviherani umpatthanana Nluku ni hataa muukumini winyu.
1. Nlattuni Masaahiti a Yehova anthukumanaaya?
Namantikha Ibiiblya mmoca aheera: “Wanlokoni nuulupale, kinaahala unttottopela Yehova.” (Isaalimu 26:12) Inanna imocaaru, Masaahiti a Yehova unawaacivela cinene uthukumana. Ayo anthukumana wiira anttottopele awula answalele Nluku. Phimaana, Masaahiti a Yehova o ntuninyani motheene anaathukumana khula isumana wiira answalele Nluku, yiipe macipo ni wiira alompe. Khula mwaakha, ayo ciicammo anaakhalanaka mikutthaano cuulupale. Masaahiti a Yehova unawaacivela venci cinene urwaa mmamikutthaanoni ceekristau.
2. Isiyani nnohaleenyu wiitthuca mwarwaaka mmamikutthaanoni wihu?
Mmamikutthaanoni wihu itthu invareseseehu cinene ukhanle usoma Ibiiblya. Hi ninaasoma Nuulumo na Nluku, ‘utaphulela sana-saana, nathoonyeraka maanaaya isiyani.’ (Nsome Nemiya 8:8.) Nyuuva mwarwaaka nnyo mikutthaanonnyo, nnaahala wiitthuca myaha ca Yehova ni makhalelwaawe. Ukati unhaleenyu uvira mweetthucaka mananna Yehova cinoonfentaaweni, nyuuva nnaahala umpatthanana uyova. Ciicammo nnaahala wiitthuca isiyani inlamuliyeenyu upanka wiira uyo ookavihereni ukhalana itthoko yootteeliya.—Isaiya 48:17, 18.
3. Kontha isiyani unaahala ureera nyuuva waacuwela atthu akhwaawe mmamikutthaanoni wihu?
Yehova neera wiira “nihaana niwaceranaka wiira nikurumicane uthoonyera nifento ni upanka miteko comaana, woohihiya uthukumana.” (Maberewu 10:24, 25, mawehero) Mmamikutthaanoni cihu, nyuuva nnaahala waaphwanya atthu anwacerana khweeliini khula ntthu ni nkhunanawe. Nwo, nyuuva nnaahala waaviriyana atthu yuulumaka citthu comaana co mbiiblyani. (Nsome Arooma 1:11, 12.) Khampa nyuuva, ayo ciicammo ampheela wuncerera wiitthuca myaha ca Nluku. Uhiya commo, nyuuva nnaahala waacuwela atthu enci ankhala ootteeliya, hataa yaananaka masakha. Nnya citthunnya phimmwiiriha Yehova unikurumica uhihiyerera urwaa mmamikutthaanoni!
MUNCERERE WIITTHUCA WINYU
Moonelele isiyani ineerannya mmamikutthaanoni co Masaahiti a Yehova. Ciicammo mwiitthuce nlattuni unaareera wiikurumica urwaa nnyo mikuttaanonnyo.
4. Mananna cimpankiyaaya mikutthaano co Masaahiti a Yehova
Ukati wo maapostolu a Yesu Kristu, makristau yanthukumana wiira answalele Yehova. (Arooma 16:3-5) Nsome Akolosu 3:16, ni mwamalihaka usoma, moopele mwaha nna nikohonna:
-
Ukati wo maapostolu, manannani makristau canswalelaaya Yehova?
Mahukwaala, Masaahiti a Yehova ciicammo khanhiyerera uthukumana wiira answalele Yehova. Wiira ncuwele mananna cimpankiyaaya nnyo mikutthaanonnyo, moone IVIDIYU. Mwamalihaka woona, ciicammo moone ilatarato inthoonyera atthu anari unkutthaanoni, ni moopele mwaha ala makohwaala:
-
Nvidiyuni, nyuuva nhoona isiyani ineerannya Usalauni yo Umwene. Citthuni cineerannya Usalauni yo Umwene cinlikanaca ni nnye cihimiye nhina Akolosu 3:16?
-
Nhina ividiyu imalihileehu woona awula ilatarato iri nculwiila va, ihaavo-tho itthu ikhwaawe yoonileenyu yuucivenleni nhina mananna cimpankiyaaya mikutthaano?
Nsome 2 Akorintu 9:7, ni mwamalihaka usoma, moopele mwaha nna nikohonna:
-
Kontha isiyani Masaahiti a Yehova khanlepela nsurukhu mmamikutthaanoni waya?
Nyuuva wamoca naale anoosomihani Ibiiblya nwehe iporokaraama yo nkutthaano unwa.
-
Mphantteni wo uyo nkutthaanooyo unooneenyu wiira unaahala wuucivelani uviriyana awula unaahala wuukaviherani muukumini winyu?
Mwaanaacuwela?
Nsayitini jw.org, anaattonkaciya mapuro o ntuninyani motheene cimpankiyaaya nnyo mikutthaanonnyo ni iwoora caya.
-
Mmamikutthaanoni wihu, hi ninaaviriyana myaha citaphuleliyaka, ninawoona mathoonyero yapankiyaka ni ninawoona ividiyu. Mikutthaano cihu cimpacera ni cimmalela niicipo ni nivekelo.
-
Cihaavo miphantte co mmikutthaanoni cihu cinlepeliyaaya atthu waakhula nikoho, usoma iveerusu co mbiiblyani awula uhimya itthu yiitthucilyaaya yapheelaka.
-
Atthu otheene anaalattuliya mmikutthaanoni wihu—athiyana, alopwana, owuuluvala ni hataa asaana.
-
Mmamikutthaanoni co Masaahiti a Yehova khaavo nolepela nsurukhu.
5. Nhaana mwiikurumicaka wiira nkhitiri urwaa umikutthaanoni
Moone ntakihero naamuci a Yesu Kristu. Khula mwaakha, ayo yankhuma u Nazaré nuurwaa u Yerusalemu wiira yarwee utempulu. Iyo ikwaheeyo yaakhala yoorika, ukhala wiira yahaana yeettaka ikolometuru 100, awula mahuku mararu, mmamyaakoni. Nsome Luka 2:39-42, ni mwamalihaka usoma, moopele mwaha ala makohwaala:
-
Woonela winyu, wiira amuci a Yesu Kristu arwee u Yerusalemu yahaana yiikurumicaka?
-
Kontha isiyani nyuuva nhaana mwiikurumicaka wiira nrwee mmikutthaanoni ceekristau?
-
Woonela winyu, unaahala ureera nyuuva urwaa mmikutthaanoni? Kontha isiyani nneereenyu commo?
Ibiiblya ineera wiira ikhanle itthu yuulupale uthukumana naakhunanihu wiira ninswalele Yehova. Nsome Maberewu 10:24, 25, ni mwamalihaka usoma, moopele mwaha nna nikohonna:
-
Nlattuni nihinlamuliyeehu uhiyerera urwaa mmikutthaanoni ceekristau?
ATTHU AKIINA ANEERA: “Nyuuva pooti wahinrweenyu uthukumana naatthu akhwaawe wiira munswalele Nluku, usoma Ibiiblya veekha unaatosa.”
-
Iveerusuni awula ntakiheroni no mbiiblyani ninoonihera mananna Nluku cinweheraawe iyo itthwiiyo?
UTHIKILELA
Urwaa mmamikutthaanoni ceekristau unaahala wuukaviherani wiitthuca myaha cinci ca Yehova ni ulipihaca upatthani urineenyu nuuyo. Uhiya commo, mikutthaano cinaahala wuukaviherani unswalela Nluku wamoca naatthu akiina.
Wuupuwela
-
Kontha isiyani Yehova nopheelaawe wiira nirwee mmamikutthaanoni?
-
Isiyani inhaleenyu wiitthuca mwarwaaka mmamikutthaanoni co Masaahiti a Yehova?
-
Nnaakhitiri wuupuwela inanna ikhwaawe cinhalaaya wuukaviherani mikutthaano?
MWAPHEELAKA UCUWELA CITTHU CIKIINA
Moopuwelaka urwaa unkutthaanoni wo makristau, nnaakhalaka niiwasiwaasi? Iyo ihotoko umwiirannyeela nlopwana mmoca. Moonelele manannani cancenryaawe urwaa umikutthaanoni.
Moone isiyani yaamwiirihile mmirawo mmoca uncivela mikutthaano ceekristau ni isiyani yaapankilyaawe wiira hihaleele hataa nkutthaano.
Moonelele mananna atthu akiina cinweheraaya mikutthaano.
Muncuwele nlopwana mmoca wancivela nkhitto ni aari ikhurupu yaanannyatha. Moone mananna cirukunusilyaawe makhalelwaawe urwaa wawe umikutthaanoni co Masaahiti a Yehova
“Mi akaarwaa nipuro woohincisa kaputthyaaka” (Ukhalenla, 1 yo Julho yo 2014)
