MPANTTA 36
Nkhale ntthu ookhuluvelya ukati wotheene
Atthu otheene unawaacivela ukhalana apatthani ookhuluvelya. Yehova ciicammo unancivela. Masi ukhala ntthu ookhuluvelya ila ituninya icanre atthu oohikhuluvelyeela unaarika. Hataa ukhalaka commo, kontha isiyani unaareera ukhala ntthu ookhuluvelya?
1. Itthuni yofayita cinene inlamuliya uniiriha ukhala atthu ookhuluvelya?
Nakhalaka atthu ookhuluvelya ninaathoonyihera wiira ninanfenta ni ninanhisimu Yehova. Muupuwele ila itthwiila: Yehova naacuwela citthu cotheene cinuupuweleehu ni cimpankeehu. (Maberewu 4:13) Uyo naanoona nathoonyiheraka ukhala atthu ookhuluvelya ni naavaha ifayita iyo itthwiiyo. Nuulumo nawe nineera: “Yehova unrusa ntthu oohikhuluvelya, masi nawaapatthanana cinene atthu ookhuluvelya.”—Miruku 3:32.
2. Manannani cinlamuliyeehu uthoonyihera ukhala atthu ookhuluvelya khula nihuku?
Yehova nopheela wiira ‘nuulumelane ikhweeli.’ (Zakariya 8:16, 17) Iyo itthwiiyo maanaaya isiyani? Iyo maanaaya wiira ukati woowuulumana amuciihu, atthu anaavaraneehu nteko, mayamunneehu o wanlokoni awula ahooleli okuvernu, khaninlamuliya uwoothacera awula uhaahimyereeha ikhweeli. Ntthu ookhuluvelya khanennya ni khanaalelyaca akhunanawe. (Nsome Miruku 24:28 ni Efesu 4:28.) Ciicammo, ntthu ookhuluvelya naaliva misokho cotheene. (Arooma 13:5-7) Nimoolumacero makhwaawe, hiiva nihaana nikhalanaka meettelo ookhuluvelya nhina wo citthu cotheene.—Maberewu 13:18.
3. Kontha isiyani unaareera ukhala ntthu ookhuluvelya?
Nacuweliyaka ukhala atthu ookhuluvelya, atthwaayo ciicammo anaanikhuluvela. Coo, ninaakavihera wanlokoni neekristau ukhuluvelaniya khampa amuci eekhweeli. Uhiya commo, hiiva ninaahala ukhalana nrima wootaphuwa. Ukhuluvelya wihu ‘unaareeriha ile ineetthucihaawe moopoliihu, Nluku,’ ni unaawiiriha atthu akhwaawe upheela wiitthuca myaha ca Yehova.—Titu 2:10.
MUNCERERE WIITTHUCA WINYU
Moone manannani Yehova cinkhalaawe hiiva nooniheraka ukhuluvelya ni ifayita imphwanyereehu muukumini wihu. Ni ciicammo moone mananna owoonihera ukhuluvelya nhina wo citthu cinci co muukumini wihu.
4. Ukhuluvelya unantteeliha nrima Yehova
Nsome Isaalimu 44:21 ni Malakiya 3:16. Mwamalihaka usoma, moopele mwaha ala makohwaala:
-
Woonela winyu, kontha isiyani khaninlamuliya wuupuwela wiira ninaakhitiri unvitha Yehova citthu cikhwaawe cimpankeehu?
-
Woonela winyu, Yehova nokhala cani nalakelaka uhimya ikhweeli, hataa ukhalaka wiira unaarika?
Asaana yahimyaaka ikhweeli, anawaatteeliha nrima asithumwanaya. Hiiva nahimyaka ikhweeli, ninantteeliha nrima Yehova.
5. Nkhale ookhuluvelya nhina wo citthu cotheene
Atthu enci anoopuwela wiira unaarika ukhala ntthu ookhuluvelya ukati wotheene. Masi moone nlattuni ninlamuliyeehu ukhala atthu ookhuluvelya nhina wo citthu cotheene. Moone IVIDIYU.
Nsome Maberewu 13:18, ni mwamalihaka usoma, moopele mwaha manannani ninlamuliyeehu uthoonyera ukhala atthu ookhuluvelya . . .
-
watthokoni.
-
untekoni awula ucikolani.
-
ni nhina citthu cikhwaawe.
6. Ukhala atthu ookhuluvelya unaaniphwanyiha ifayita muukumini wihu
Khweeliini, ukhala atthu ookhuluvelya ikwaha ikhwaawe pooti uniwaanela masakha muukumini wihu. Masi uhookhalaru commo, iyo phi itthu yooreera upanka. Nsome Isaalimu 34:12-16, ni mwamalihaka usoma, moopele mwaha nna nikohonna:
-
Manannani ukhala ntthu ookhuluvelya unhalaaya wuukaviherani ukhalana ukumi womaana?
-
Alopwana oothela ni athiyana ootheliya yathoonyeraka ukhuluvelya anaalipihaca uthelanaca waya
-
Ananteko yathoonyeraka ukhuluvelya anaamwiiriha patarawaaya waakhuluvela
-
Atthu anthoonyera ukhuluvelya anaawiiriha akhulupale ookuvernu waakhuluvela
ATTHU AKIINA ANEERA: “Wootha vakaani khinakhala itthu yootakhala.”
-
Kontha isiyani nyuuva nnokupaliinyu wiira Yehova unanrusa wootha wenenwo?
UTHIKILELA
Yehova nopheela wiira asipatthannyaawe otheene athoonyihere ukhala atthu ookhuluvelya nhina wo citthu cotheene cinoolumaaya ni cimpankaaya.
Wuupuwela
-
Manannani cinlamuliyeehu woonihera ukhala atthu ookhuluvelya?
-
Kontha isiyani khaninlamuliya wuupuwela wiira wanaakhitirya unvithavitha citthu cikhwaawe Yehova?
-
Kontha isiyani nyuuva nnaapheela ukhala ookhuluvelya nhina wo citthu cotheene?
MWAPHEELAKA UCUWELA CITTHU CIKIINA
Manannani ayari cinlamuliyaaya uwiitthuciha asaanaaya ukhala ookhuluvelya?
Kontha isiyani unaareera wiirannyeeha itthu ikhuluvelihileehu?
Mwiirannyeehe citthu cinkhuluveliheenyu ni nnaahala ucaalihiya (9:09)
Moone nlattuni ninlamuliyeehu uliva misokho hataa ukhalaka wiira nsurukhuuyo khunvareliya nteko saana.
“Nyuuva nhaana nlivaka misokho?” (Ukhalenla, 1 yo Setembro yo 2011)
Isiyani yankurumicile nlopwana mmoca oohikhuluvelya urukunusa makhalelwaawe?
“Kiheetthuca wiira Yehova khanle nakiriri ni namalevelela” (Ukhalenla, 1 yo Maio yo 2015)
