Nuulumo “piyoneeru” naaciya ntthu noonenela ncoko wo naanaano ni naahulela iphiro akhunanawe wiira avire. Pooti waneeriyaaya wiira Yesu aari piyoneeru, ukhala wiira aaveleelihiye walaponi ulalya ihapari cinoopola ukumi, aakaka iphiro imphwanyiha woopwa. (Matewus 20:28) Ilelo, attharyaawe anaatthara ntakihero nawe yaviraka ukati mwinci ‘yaapankaka eetthuci’. (Matewus 28:19, 20) Akiina anaalakela ukhala mapiyoneeru.

Piyoneeru thi ule niivaherera ulalyeera ukati mwinci. Masaahiti a Yehova otheene anaalalyeera ihapari comaana. Masi, ahaavo antthenkaca makhalelwaaya wiira akhale mapiyoneeru owiicaaverya, yalalyeeraka iwoora 70 khula mweeri. Wiira yooryaanihe uvara ratta uyo ntekooyo, mapiyoneeru enci anaavya nteko uhinvariya ukati mwinci. Akiina anaathanliya ukhala mapiyoneeru oowiivaherera wiira yalalyeere mapuro anthwa anamalalyeera o Umwene, ayo anlalyeera khula mweeri iwoora 130. Mapiyoneerwaayo ankhala atteeliyaka nlattu woohirikarikihaca makhalelwaaya, ni ankhala yakhuluvelaka wiira Yehova naahala waakavihera uphwanya citthu cinaathwa. (Matewus 6:31-33; 1 Timotiyu 6:6-8) Ale ahinooryaaniha ukhala piyoneeru owiivaherera ukati wotheene, pooti ukhala piyoneeru ookavihera, yalalyeeraka iwoora 30 awula 50 khula mweeri.

Piyoneeru nokurumiciya ni nifento nirinaawe ni Yehova ni naatthu. Toko Yesu, hiivano nihoona wiira ahaavo atthu enci ampheela ucuwela moolumo a Nluku ni itthu impheelaawe upanka. (Markus 6:34) Masi hiiva nihaana moolumo anhala waakavihera nenna co, anhala waavaha nweherero woohoolo. Nifento nirinaawe piyoneeru naatthu akhwaawe ninankurumica waakavihera ucuwela ihapari comaana. (Matewus 22:39; 1 Atesalonika 2:8) Iyo inaalipihaca waamini wawe, umwaattamela cinene Nluku ni inawuncerera utteeliya wawe.—Miteko 20:35.

• Woonela winyu upiyoneeru isiyani?

• Isiyani nwiiriha akiina ukhala mapiyoneeru owiivaherera ukati wotheene?