Ale ampanka mphantte wo amuci o Peteli, anaavara miteko cinci coovirikana yawaceraka nteko woolalyeera wo ilapo imoca awula upwaha. Miteko cinvaraaya pooti ukhala utaphulela ilivuru, wimpirimiri ilivuru, ukawa ilivuru mmalokoni, upanka ividiyu awula uhoolela miteko cikhwaawe cinvariya ncoko umphwanyannyaaya iPeteli.

Mahumu Anhoolela iPeteli anaawehaweha miteko cinvariya. Mphwinko wo Mahumu Unhoolela unawaathanla Mahumu Oohoolela iPeteli ootepa ukhuluveliya, ayo ankhala araru awula anaapwaha. Ayo mahumwaayo phinkhala yaattonkaceraka mayamunna o Mphwinko wo Mahumu Unhoolela inanna cineettaaya miteko co khula iPeteli ni wakhala wiira ahaavo masakha ankhumelela. Citthu cinhimyeriyaaya Mphwinko wo Mahumu Unhoolela cinaakavihera uyo mphwinkooyo ulakela isiyani inlamuliyaaya ukumihera mmalivuruni, isiyani inlamuliya woopeliya mwaha mmikutthaanoni ni mmithukumanoni cuulupale. Mphwinko wo Mahumu Unhoolela unawaaveleeliha mahumu makhwaawe mmapeteli wiira yaathotole ni yaavahe malakihero Mahumu Anhoolela iPeteli oohala waakavihera uvara ntekwaaya saana. (Miruku 11:14) Inaatthenkaciya iporokarama toko utaphuleliya mwaha ni munna veleelihiye, wiira alipihiye ale ankhala ncoko uri iPeteli.

Anaakaviheriya maloko ari ncoko imphwanyannyaaya iPeteli. Mahumu Anhoolela iPeteli phinlakela wiira apankiye maloko onaanaano. Ciicammo ahaavo mayamunna antafiti miteko co mapiyoneeru, co mamisiyonaariyu ni ca mamootoli o isirikwiitu o ncoko iryaaya iPeteeli. Ayo mahumwaayo phintthenkaca mithukumano ni ikonkreesu, phinhoolela nteko wootekatekaca Isalau co Umwene ni phinwacera nteko wooveleelihiya ilivuru mmalokoni. Miteko cotheene cinvariya u Peteli cinaakavihera weetta saana nteko woolalyeera.—1 Akorintu 14:33, 40.

• Manannani mahumu anhoolela iPeteli ankaviheraaya Mphwinko wo Mahumu Unhoolela?

• Mitekoni cinvariya mmapeteli?