Miteko co Mapostolu 7:1-60
7 Vano, nankuttho muulupale ahonkoha: “Ila kineewaakeela ikhanle ikhweeli?”
2 Estevau aahaakhula eeraka: “Alopwana, mayamunna ni mayaapaapa, nkiviriyane! Nluku owaarya, ahonkhumelela nhiya-taateehu Aparahaamu, ukati waaryaawe u Mesopotamia, hinathamela u Hara,
3 ni ahomwiirela: ‘Uhiye ilapwaa, amucyaa ni urwee ilapo inhalaaka wuuthoonyera.’
4 Vano, uyo ahokhuma ilapo yo makaltewu ni ahorwaa ukhala u Hara. Ni nwo, ukhwa waya athumwaane, Nluku ahomwiirela uthamele ila ilapo nnokhaleenywiila.
5 Masi uyo khanhiyenre hataa itthu, hataa ikhato yoopheela unyakela, masi ahonkhuluveliha wiira anhala unvaha ilapo ni akhwaaka vale ucuulwaawe wanhalana, waahokhalaru wiira aari hinayara.
6 Uhiya commo, Nluku ahomwiirela wiira uculwaawe wanhala ukhala ilapo ihikhanle yawaya, ni apoovu o iyo ilapweeyo yanhala waapanka ipottha ni waahuviha myaakha 400.
7 ‘Ni kinaahala waahukhumu apoovu anhala waapanka ipottha.’ Nluku phineera, ‘ni uhoolo waya, ayo anaahala ukhuma wiira akiswalele nna nipuronna.’
8 Ciicammo, ahompankana nleehano nowuula, ni uyo ahonyara Isaaki ni ahomuuliha nihuku naapihenryaawe mahuku 8, ni Isaaki ahonyara Yaakopi, ni Yakopi ahaayara ahooleli omaloko 12.
9 Ni ahooleli omaloko 12 otheene, yaahonkhalela nttima Yusufu ni yaahaatumihera atthu o Wiciipitu. Masi, Nluku aari nuuyo.
10 Ni ahomoopola mmasankihoni wawe motheene ni ahonvaha ucuwelaca uhoolo wa Farawo, mwene o Wiciipitu. Ni ahonvahacera uhoolela ilapo yotheene yo Wiciipitu ni uwannyawe.
11 Vano, yahovola itala cinene ilapo yo Wiciipitu ni yo Kanaa, iyee, yahosankiha venci, ni asinhiya-taateehu khayaaphwanya itthu wiira alye.
12 Vano, Yaakopi aheewa yiiriyaka wiira u Wiciipitu yahaavo iyoolya, ni ahaaruma ikwaha yoopacera asinhiya-taateehu.
13 Vano, ikwaha yonayeeli, Yusufu ahaahimerya asulupalyaawe wiira uyo aari Yusufu, ni Farawo ahaacuwela amucyaawe Yusufu.
14 Vano, Yusufu ahoruma wiira arweeliye athumwaane ni amucyaawe otheene, atthu yaawile yahophiya 75.
15 Yaakopi ahorwaa u Wiciipitu ni nwo phaakhwenlyaawe ni ciicammo asinhiya-taateehu.
16 Ayo yahokusiya ni urwaa usikhiya u Sikee, mahiye Aparahaamu aathumanannyaawe asaana a Hamoori, u Sikee ninsurukhu wo paraata.
17 Waattamela waya ukati waahalaaya wiirannya itthu Nluku yankhuluvelihilyaawe Aparahaamu, apoovu yanvira yuncereryaaka u Wiciipitu.
18 Masi, ahokhumelela-tho mwene nkhwaawe u Wiciipitu ahancuwela Yusufu.
19 Uyo mwennyooyo, aalamulela nuulavilavi wiira aahuvihe asipaapeehu, aakhanyererihaka waahiya asaanaaya wiira akhwe.
20 Uyo ukatyuuyo, ahoyariya Moceesi ni uyo aari ooreera. Uyo aakhanle naasithumwaane myeeri miraru paahi.
21 Masi, ukati waahinnyaawe, mwaana a Farawo ahonttotta ni ahonkhalana khampa mwanawe onyara.
22 Vano, Moceesi aheetthucihiya ucuwelaca wotheene waatthu o Wiciipitu. Khweeliini, uyo aanoonihera nimoolumacerwaawe ni citthu caapankaawe.
23 “Vano upiiha wawe myaakha 40 aholakela urwaa waathotola mayamunnaawe, asarayeli.
24 Ukati waamonnyaawe nlopwana o Wiciipitu anhuvihaka munnaawe woohisariya, uyo ahomwaakiha aahuvihiyooyo, ni ahomwiiva nlopwana o Wiciipituuyo.
25 Uyo oona wiira mayamunnaawe yanhala ucuwelela wiira Nluku nonvarela nteko uyo wiira awoopole, masi ayo khayaacuwelenle iyo itthwiiyo.
26 Waaseele, uyo ahorwaa uwootola-tho ni ahaaphwanya alopwana eeli yaattakanaka, ni ahomananiha ummaliha nanrokottole yaarinaaya awiirelaka: ‘Alopwana, nyuuva nkhanle ntthu ni munnaawe, kontha isiyani nnohuvihaneenyu?’
27 Masi ule anhuviha nkhunanawoole, ahonkakha Moceesi ni ahomwiirela: ‘Tipani oovahacenre ukhala nhooleliihu ni ukhala suwiisiihu?
28 Kiireke umpheela ukiiva toko umwiivilyaa ncana ule nlopwana o Wiciipituule?’
29 Wiiwa wawe iyo itthwiiyo, Moceesi ahotthawela ilapo ikhwaawe yo Mitiya, waayanryaawe asaana eeli.
30 Uvira waya myaakha 40, nlayikha nimoca nahonkhumelela muuthakoni umwaakoni wo Sinaayi, wamwirini wo mwiiwa waapharela mooro.
31 Woona wawe iyo itthwiiyo, Moceesi ahokhala ootikhinihiya. Vano, waattamela wawe wiira ooneehe sana-saana, aaheewa ncu na Yehova:
32 ‘Mi kikhanle Nluku asinhiya-taataa, Nluku a Aparahaamu, a Isaaki ni a Yaakopi.’ Moceesi ahopacera uthukumela ni khaaphenle-tho uweha.
33 Yehova ahomwiirela: ‘Urule isantaliyanyo, kontha nipuro unyakelaa nikhanle nowaarya.
34 Khweeliini, kihoona uhuva waapoovwaaka ari u Wiciipitu, kiheewa wunla waya ni kihokhuruwa wiira kiwoopole. Vano, kinawuuveleliha u Wiciipitu.’
35 Yooyo Moceesi yankhottilyaaya yiiraka: ‘Tipani oovahacenre ukhala nhooleliihu ni suwiisiihu? Yooyo, Nluku phanrumilyaawe wiira akhale nhoolelyaaya ni awoopole avarelaka nteko nlayikha nankhumelenle wamwirini wo mwiiwa.
36 Uyo nlopwanooyo, aahaahoolela wiira akhumele vate, apankaka mathoonyero ni mitikhiniho u Wiciipitu, u Mar Vermelho ni muuthakoni myaakha 40.
37 Ula khanle Moceesi aawiirenle asaana o Isarayeli: ‘Nluku naahala unthanla iriyariinyu munneenyu, porofeeta oolikana ni mi.’
38 Uyo, Phiyoole aari nkhayi naapoovu muuthakoni; uyo aari ni nlayikha naamulumanne umwaakoni Sinaayi naasinhiya-taateehu. Uyo ahaakhela moolumo owaarya ni ookumi wiira anihimeerye.
39 Asinhiya-taateehu khayaatthunne umwiiwelela, yaahokhotta ni wanrimani waya yoopuwela uturuwela u Wiciipitu,
40 amwiirelaka Arawu: ‘Unipankele anluku wiira anihoolele, kontha hi khanincuwela itthu imwiirannyenle ula Moceesi ula va, nikumihile u Wiciipituuyo.’
41 Vano, ale mahukwaale, yaahompanka ttontto owooru ni yaahopacera unvaha itthuvo ni yahopacera utteeliya nlattu wottontto yampankilyaaya.
42 Phimaana, Nluku aahaahiya, ni ahaahiyerera yaswalelaka citthu cowiirimu, khampa cantikhiyaaya nlivuruni co maporofeeta: ‘Nloko no Isarayeli, kiireke itthuvo mwaavaheenyu muuthakoni myaakha 40 mwaakivaha mi?
43 Mena, nyuuva nhonteesa heema a Moloki ni itthonttwa ya nluku Reefa, attontto mwaapankileenyu wiira mwaaswalele. Phimaana, kinaahala wuurweehani uttayi upwaha u Babilooniya.’
44 Asinhiya-taateehu yahaana heema aavaha usaahiti muuthakoni, toko coolumilyaawe Ule aamuulumanne Moceesi, amwiirelaka wiira aahaana ampankaka heema toko aamonnyaawe.
45 Ni asinhiya-taateehu, yahovahiya heemooyo naasithumwanaya ni yahonwaana nkhayi ni Yosuwe, ilapo yaamalaponi Nluku aawoomonlyaawe uhoolo wa asinhiya-taateehu. Uyo aahohiiya ila ilapweela mpaka mahuku a Davidi.
46 Uyo, ooniya ukhala ntthu ookhuluvelyaa ni Nluku. Ni uyo aholepela wiira akhalane iparakha yontekela inupa Nluku a Yaakopi.
47 Masi, Salomau phantekenle iyo inupeeyo.
48 Toko cihimilyaawe porofeeta, nkhulupale otuniya yotheene khankhala inupa yootekiya naapinaatamu:
49 ‘“Irimu ikhanle ikhateraaka yo umwene ni ituniya nkhikicero no inyaa caka. Inupani mwaahaleenyu ukitekela?” Neera Yehova. “Nipuroni naahala ukhala nipuro naka noomumula?
50 Akihimmwe miiva kipankile citthu cotheene nnya?”’
51 “Atthu owiithenca ni oohitthuna uhimeriya, nyuuva ikhumelo yokhalayi nnaakhotta nnepa wowaarya. Khampa apankilyaaya asinhiya-taateenyu nyuuva himpankeenyu ciicammo.
52 Porofeetani asinhiya-taateenyu ahinlupatthilyaaya? Khweeliini, ayo ahowiiva ale yaahimile wiira anhala uwa nasariya, yooyo nyuuva munvariihileenyu ni mmwiiviihileenyu,
53 nyuuva nhaakhela nlamulo mwaahimeriyeenyu nimalayikha, masi khamwiiwelenle.”
54 Wiiwa waya nnyo citthunnyo, ayo yaahopacera ukhura miinwaaya, yanweheehaka Estevau.
55 Vano, uyo unancanre nnepa wowaarya, ahoweheeha wiirimu ni ahoona uttitthima wa Nluku ni Yesu neemenle moono wonlopwana wa Nluku,
56 ni aheera: “Kinawoona irimwiiyo ihoohulya, ni mwaana apinaatamu howeemela moono wonlopwana wa Nluku.”
57 Vano, ayo yahokhuwela cinene ni yahottiyelela manyarwaaya, ni otheene caya yahorwaa umwattakaca.
58 Umoomola waya nsittatti, yahopacera unvonyakaca ni maluku. Masaahiti yahohiya ikuwo caya uhoolo wawe mmirawo mmoca eehaniya Saulu.
59 Ukati wampwesakacaaya Estevau, uyo aheera: “Pwiiya Yesu, mwaakhelele ukumyaaka.”
60 Ukhoroma wawe, ahokhuwela venci eeraka: “Yehova, uhaahukhumu ala atthwaala nlattu wo ila itampiila.” Ni wuulumaca wawe commo, ahokhwa.
