Miteko co Mapostolu 5:1-42
-
Ananiyasi ni Safira (1-11)
-
Maapostolu anaapanka mathoonyero ni mitikhiniho (12-16)
-
Anaatthukeliya ni anaatthukuliya (17-21a)
-
Anaarwaaniya-tho u Sinedriyu (21b-32)
-
‘Nihaana uhoolelihera umwiiwelela Nluku khampa nhooleli, uhiya apinaatamu (29)
-
-
Ikano ya Kamaliyeeli (33-40)
-
Ulalyeera inupa ni inupa (41, 42)
5 Vano, nlopwana mmoca eehaniya Ananiyasi, ni amwaarawe yeehaniya Safira, yahotumiha imattaaya.
2 Vano, aholeehana naamwaarawe waawayaniha nsurukhuuyo, ni mphantte nkinooyo uvitha ni mphantte nkiinooyo yahaarweehela maapostolu.
3 Peturu ahonkoha eeraka: “Ananiyasi, nlattuni unhiyerenrya Sotwani awiirihaka uthepyaca ala manannaala nnepa wowaarya, ni waawayanihaka nsurukhu womatta itumihilya?
4 Uhinaaya utumiha imatteeyo, khayaari yawaa? Ni utumiha waa, nsurukhuuyo khawaari wawaa? Nlattuni upankilya itthu toko ila? Khawaathepyacile apinaatamu, masi Nluku.”
5 Vano, Ananiyasi wiiwa wawe ayo moolumwaayo, ahomora ni ahokhwa. Ni atthu otheene ucuwela waya iyo itthwiiyo, yahoova venci.
6 Vano, amirawo yahovilikelaca niikuwo irutthwaawe, yahoteesera vate ni yahorwaa unsikha.
7 Uvira waya iwoora tthaaru, amwaara Ananiyasi yahowa. Ayo khayaacuwela itthu yeerannyeele.
8 Peturu ahaakoha, eeraka: “Nkihimeerye, nsurukhu ntumihileenyu imattooyo phiyooloola? Ayo yahaakhula yeeraka: “Iyee, phiyooyo.”
9 Vano, Peturu aheera: “Nlattuni nyuuva naawanyinyu nleehanneenyu uthepyaca nnepa wowaarya wa Yehova? Amirawo yaasikhile awanyinyu ari wankhora, ayo anawuucisani ni wuukumiherani vate.”
10 Woohipica, ayo yahomorela uhoolo wa Peturu ni yahokhwa. Ukati amirawo waakenlyaaya, yahaaphwanya anakhwile, yahaacisa ni yahaakumihera vate ni yahorwaa waasikha mphantte waasikhiyaaya awannyaya.
11 Vano, atthari otheene ni atthu otheene wiiwa waya iyo itthwiiyo, yahoova venci.
12 Uhiya commo, maapostolu khayaahiyerera upanka mathoonyero ni mitikhiniho cinci iriyari yaapoovu, ni otheene caya yahothukumana nnipirothini na Salomau.
13 Khweeliini, yahaavo atthu akiina yaawoova waatakaneelana, masi apoovu yaanaattottopela.
14 Uhiya commo, alopwana ni athiyana enci yaanaawaamini Apwiiya ni ayo yaanaakhala atthari.
15 Mpaka atthu yaanaakumihera aretta vate, mmaparapaarani, ni yanwaatalela mmamikorini cooyevaca ni mmatthattoni wiira Peturu avira, akiina yaakwanye irunkwaawe wiira avone.
16 Ciicammo, atthu yaakhuma isittatti cowaattamela u Yerusalemu, yaanaawaana aretta, ookeliya ni maciini ni otheene yanvonihiya.
17 Vano, nankuttho muulupale ni atthu otheene yaari nkhayi nuuyo, yaapanka mphantte wottiini yo masatuseu, yaheemela ninaacanre nttima.
18 Vano, ayo yahaavara maapostolwaayo ni yahaatthukela nkhattya.
19 Masi uhiyu, nahowa nlayikha na Yehova nahotthukula mikhora cookhattya, nahaakumihera vate ni naheera:
20 “Nrwaace utempulu ni nhihiyerere waalalyeera apoovu ihapari cookumi.”
21 Wiiwa waya ala moolumwaala, yahokela ntempulu wicisuuru ni yahopacera wiitthuciha.
Ukati waawilyaawe nankuttho muulupale naatthu yaari nkhayi nuuyo, yaaheehana isinedriyu yotheene ni mahumu o Isarayeli, ni yahoruma uwaaniya maapostolu yaari nkhattya.
22 Ukati makwaarta waaphiilyaaya ukhattya, khayaaphwanyile maapostolwaayo. Vano yahoturuwa ni yahaahimerya yeeraka:
23 “Niphwanyile ikhattyeeyo inatthukiye sana-saana ni makwaarta aneemenle mmamikhorani, masi ukati utthukunleehu, khanimphwanyile ntthu nkhattyammo.”
24 Ukati weewilyaaya iyo itthwiiyo, nhooleli ootempulu ni ahooleli aanankuttho, yahokhala ootikhinihiya yeekohaka isiyani yaahala wiirannya-tho.
25 Masi, ahowa nlopwana mmoca ni ahowiirela: “Alopwana mwaatthukenleenyu nkhattyaayo ari utempulu nna co, anwiitthuciha apoovu.”
26 Vano, Nhooleli ootempulu ni makwaarta yahaarweela ni yahaawaana, masi khayaapankile itthu yootakhala, kontha yaanawoova uvonyakaciya nimaluku naapoovu.
27 Vano, ayo yahaawiiha ni yahoweemesa iriyari isinedriyu. Ni nankuttho muulupale ahaakohakoha,
28 eeraka: “Hi khaniwiirenleni wiira nhiitthucihe-tho nvarelaka nteko nno ncinanno? Masi mooneke! Nyuuva nhocariha u Yerusalemu citthu nneetthuciheenyu ni nholakela uniwaanela iphomyaawe uyo nlopwanooyo.”
29 Peturu ni maapostolu makiina, yaahaakhula yiiraka: “Nihaana uhoolelihera umwiiwelela Nluku khampa nhooleli, uhiya apinaatamu.
30 Nluku asinhiya-taateehu homunweleliha Yesu, nyuuva mmwiivileenyu mwankhomelaka wanipottoni.”
31 Nluku honttitthimiha amweesaka moonwaawe wonlopwana ni honkhaliha nkhulupale ni moopoli, wiira awiirihe asarayeli uttharuwa ni uleveleliya matampyaaya.
32 Hiiva nikhanle masaahiti o nnyo citthunnyo, ni nnepa wowaarya Nluku naavahaawe ale ammwiiwelela khampa nkhulupale ciicammo ukhanle saahiti.
33 Wiiwa waya iyo itthwiiyo, yahoviruwa venci ni mpaka upheela uwiiva.
34 Masi nfariseu mmoca eehaniya Kamaliyeeli, aheemela uhoolo isinedriyu, uyo aari nlopwana eetthuciha nlamulo ni aattitthimihiya naapoovu otheene, ni ahoruma wiira maapostolu akumiheriye vate vakaani.
35 Vano, uyo ahowiirela: “Alopwana o Isarayeli, ratta niitthu nnohaleenyu waapanka ala alopwanaala.
36 Wootakihera, hotoko uwa Tewuta eeciihana nkhulupale, atthu akiina ookhalaka 400 yahontthara. Masi uyo, hokhwa ni atthu otheene yantthara ahomwarya, ni citthu caapheelaawe upanka khaciirannyeele-tho.
37 Ukhwa wawe uyo, mahuku owiicantikhihiya, ahokhumelela Yuuta o Kalileya ni atthu enci yahontthara. Uyo nlopwanooyo ciicammo, hokhwa ni atthu otheene yantthara ahomwarya.
38 Phimaana, nlattu wo citthu cineerannya, kinoohimeeryani wiira, nhaapanke itthu ala alopwanaala, mwaahiye ninnema, citthu cinvaraaya wakhala wiira citthu caapinaatamu, cinaahala umalamala.
39 Masi wakhala wiira ca Nluku, nyuuva khannohala ukhitiri umalamaliha. Kontha pooti ukhala wiira nnohala umwaanana mwaneene Nluku.”
40 Van8o, yaaheewelela miruku caavahilyaawe. Yahowiihana maapostolu, yahaacapha ni yahowiirela ahuulume-tho ncina na Yesu ni yahaahiya urwaa.
41 Vano, maapostolu yahokhuma usinedriyu unaattenle nrima, kontha yahoona ukhala iparakha uhuvihiya, nlattu woncina na Yesu.
42 Ni khula mahuku, utempulu, inupa ni inupa, khayaahiyerera wiitthuciha ni ulalyeera ihapari comaana caamuuluma Yesu Kristu.
