Miteko co Mapostolu 28:1-31
28 Ukati woopweeleehu, naahocuwelela wiira naari iiliya yo Malta.
2 Atthu yaakhala iyo iiliyeeyo yahonithoonyera unamaana. Yahoparihela mooro ni yahonaakhela sana-saana, kontha yanrupa ipula ni wanririya.
3 Vano, Paulu ahothukumaniha ikhuni, ni ukati weesilyaawe wamooroni, nlattu wooviha yaahokhuma inwaa yoohapala ni yahonvilinkelela ntata nawe.
4 Woona waya inwaa yoohapala yavilinkelelaka ntata na Paulu, atthu yaakhala ile iiliyeele yahopacera wiirelana ayaayoru co: “Khweeliini ula nlopwanoola nammalukuni, hataa ukhalaka wiira hoopwa mpahari, Isariya* khintthunihenre ukhala nkumi.”
5 Masi uyo, ahotathela inweeyo wamooroni ni khayampankile itthu yootakhala.
6 Vano, ayo atthwaayo yaaweherera wiira ntatanawenno nanhala wiipa awula uyo anhala ukhwa. Masi uweherera waya ukati mwinci ni woona waya wiira iyo inweeyo khayampankile itthu, yahorukunusa moopuwelelwaaya ni yahancera wiira uyo aari nluku.
7 Waattamela nipuro naaryeehu, yahaavo mapuro o iyo iiliyeeyo anlopwana mmoca eehaniya Puupuliu. Uyo ahonaakhela saana uwannyawe ni ahonihiya ukhala mahuku mararu.
8 Vano, athumwaane Puupuliu yanwerennya, ayo yaari niikopo ni iretta yoonyiya iphome. Vano, Paulu ahorwaa uwoonanana, ahoweesera matataawe aholompa ni ahaavoniha.
9 Wiirannya waya iyo itthwiiyo, atthu otheene yaawerennya ile iiliyeele yahopacera umwaavya Paulu ni ayo ciicammo yaanvonihiya.
10 Uhiya commo, yaahonittitthimiha anivahaka citthu cinci, ukati waarweehu unwela naviyu yahonivaha citthu cotheene caapheeleehu.
11 Uvira waya myeeri miraru, nahokhuma nnaviyuni uhoolo wawe aahemiye ttontto “Aasaana a Zewu.” Uyo naviyuuyo aari o Alexantriya ni ahoviriha iyiita yotheene nari iyo iiliyeeyo
12 Nahophiya u Sirakusa ni naahokhala nwo mahuku mararu.
13 Ukhuma wihu nwo, nahophiya u Regiyu. Waaseele yahopacera iphyoo yaakhuma uhitto ilapo ni nahokhuma ni naahophiya u Peteeyoli nihuku nonayeeli.
14 Nwo nahaaphwanya mayamunna, yaanikhanyererihile wiira nikhale nwo mahuku 7. Vano naahorwaa u Rooma.
15 Ukati mayamunna o Rooma wiiwilyaaya wiira hi naahophiya, yahowa unoonanana Uparaasa yo Apiyu ni Unupani Tthaaru yaakheliya aletto. Paulu uwoona wawe, ahonsukhuru Nluku ni ahokhala oolipihiya.
16 Uphiya wihu u Rooma, Paulu ahotthuniheriya ukhala veekhaawe, ni natoropa mmoca ankhalenlaka.
17 Uvira waya mahuku mararu, Paulu ahowiihana alopwana ayuuta yaarina ifayita cinene. Uthukumana waya, ahowiirela: “Alopwana, mayamunna, uhookhalaru wiira mi akaapankile itthu yootakhala apoovu ni nkivirikanihile ileema canhiya-taateehu, kihotthukiya u Yerusalemu ni uvahereriya mmatatani waarooma.
18 Ukikohakoha waya, ayo yahopheela ukitthukula, kontha khayoona itthu yookootherya wiira kihukhumwiye ni kiiviye.
19 Masi ayuuta yahokhotta, phimaana mi kaaholepela wiira mwahaaka wawaceriye ni Seesari. Hataa ukhalaka wiira miiva akaarina nlattu woowuuluma pusya apoovwaaka.
20 Phimaana, kilepenlyaaka uwoonananani ni uwuulumanani, nlattu wo niweherero asarayeli arinaaya ilelo mi phintthukiyaaka nuula unyoloola.”
21 Ayo yahomwiirela: “Hi khanaakhenle iwarakha caakhuma u Yuteya caawaaca weeva, ni khaavo munna o Yuteya nihimenrye itthu yootakhala weeva upankilya.
22 Masi nihoona wiira unaareera uwiiwa itthu unoopuwela, kontha itthu incuweleehu yo ila ittiiniila ukhanle wiira mapuro otheene inaavanyihiya.”
23 Vano, ayo atthwaayo yahaavya nihuku wiira yamoonanane Paulu ni yahorwaa atthu enci umoonanana Paulu nipuro naalukamilyaawe, ni uyo, ukhuma wicisu mpaka uhiyu ahowiitthuciha citthu cinci ni aholalyeera ihapari comaana co Umwene wa Nluku, awiirihaka atthwaayo unhisimu ni umwaamini Yesu toko naahimyaaya nlamulo na Moceesi ni no maporofeeta.
24 Atthu akinaayo yaanaakupali itthu yaahimyaawe, masi akhwaawe khayaamini.
25 Vano, ukhala wiira yanvanyihana ayaayooru, yahanca umwaryaana khula ntthu arwaaka uwannyawe, vano Paulu aheera co:
“Nnepa wowaarya uhuuluma uwaacaka anhiya-taateenyu, unvarelaka nteko porofeeta Isaiya:
26 ‘Urwee waahimeerye apoovwaayo co: “Nyuuva nnaahala wiiwa, masi khannohala ucuwelela; ni khweeliini, nyuuva nnahala uweha, masi khannohala woona.
27 Kontha ala apoovwaala ahotthuka manyarwaaya, ahotthuka miithwaaya, wiira miithwaaya ahoone ni manyarwaaya ahiiwe sana-saana, ni wanrimani waya wiira ahittharuwe, wiira mi kaavonihe.”’
28 Phimaana ncuwele wiira, woopoliya wamalaponi unkhuma wa Nluku, naayo anaahala umwiiwelela.”
29 ——
30 Paulu ahokhala inupa yaalukamilyaawe myaakha miili ni anwaakhela ni mananna omaana atthu otheene yaawa umoona,
31 aalalyeeraka ihapari comaana co Umwene wa Nluku ni awiitthucihaka ikhweeli ca Apwiiya Yesu Kristu alipakoono nrima woohikhottihiya.*
Notas
^ Niikereku Diki aaciya Nluku osariya aahala uwa awula isariya yahoonnya.
^ Awula: oolumaka nimananna ootaphuwa.
