Miteko co Mapostolu 24:1-27
24 Uvira waya mahuku mathanu, nankuttho muulupale Ananiyasi ni mahumu akiina ni mayowaakihera milattu mmoca eehaniya Teeritulu, yahorwaa wakovernatoore wiira yankasari Paulu.
2 Wiihaniya wawe, Teeritulu ahopacera wuuluma eeraka:
“Nihaana nnema ninci ila ilapweela, nlattu wawinyu Akhulupale ni nlattu wankhiliinyu ninaakhala saana ila ilapweela.
3 Ukati wotheene ni mapuro otheene, hiiva ninaacuwela iyo itthwiiyo ni ninaasukhuru, Akhulupale Felisi.
4 Masi, wiira nihirihakace ukatiinyu, kinawuulepelani, nuunamaaneenyu nniviriyane vakaani.
5 Hiiva, nihoona wiira ula nlopwanoola phinwaana unyakulihana ni phinwiiriha ayuuta otheene unrukunuwela kuvernu, uhiya commo, ula khanle nhooleli aatthu ottiini yowiikhumeleliha o Nasaree.
6 Ula ciicammo ahomananiha uhiiriha itempulu; vano hiiva nihonvara.
7 ——
8 Akhulupale, mwankohakohaka nnaahala woona wiira citthu cotheene cuuhimenryeehuni cikhanle ikhweeli.”
9 Vano, ayuuta ciicammo yanrumeleliha citthu cootheriyaawe yiiraka caari ikhweeli.
10 Ukati kovernatoore wanthoonyilyaawe Paulu wiira oolumace, uyo ahaakhula:
“Kicuwelaka wiira nyuuva nkhanle asuwiisi ikhumelo yokhalayi aala apoovwaala, kinawuuluma wiira kiicaakihe.
11 Akhulupale pooti waavyaavya ucuwela mwaaneeneenyu, wiira ikhumelo nihuku kirweelyaaka u Yerusalemu wiira kanswalele Nluku khaanavira mahuku 12.
12 Ni ayo khaakiphwanyile kinnyakulihananaka ntthu ntempulu ni hataa kaathukumanihaka atthu ootakhala nrima utempulu awula nipuro nikhwaawe nonsittatti.
13 Ni khaarina hataa itthu inoonihera wiira citthu cinkiirelaaya wiira kihopanka cikhanle ikhweeli.
14 Masi mi itthu incuwelaaka phiila: Mi kineettela iphiro ayo aneehanaaya ittiini yowiikhumeleliha kanvarelaka nteko Nluku aasinhiya-taataaka, kaaminiki citthu cotheene cantikhiye ni maporofeeta.
15 Ni mi, kinanweherera Nluku, niweherero ala alopwanaala ciicammo nirinaaya, wiira unaahala ukhala wunwelelihiya waatthu ookhwa, anasariya ni atthu oohisariya.
16 Nlattu wo iyo itthwiiyo mi kinawiikurumica uhihiyerera ukhalana nrima wootaphuwa uhoolo wa Nluku ni uhoolo waapinaatamu.
17 Uvira waya myaakha cinci, kaahowa u Yerusalemu, waawaanela micanko apoovwaaka ni uvaha itthuvo.
18 Ukati miiva waawaceraaka citthu caka, ala yahokiphwanya kinari ntempulu kiireerihaka, masi woohinnyakulihanana ntthu. Masi nwo, yahaavo ayuuta akiina o Asiya
19 yaalamuliya ukhala va uhoolo winyu Akhulupale wiira ahimyace itthu ivanryaaka yootakhala, wakhala wiira khweeliini ihaavo itthu yootakhala ipankilyaaka.
20 Waahikhale commo, ala alopwana aryaala va, ahimye wakhala wiira yahooniya itthu yootakhala ukati waakihukumwaaya u Sinedriyu.
21 Yaahikhale itthu yaakhuwenlyaaka iriyaryaaya kiiraka: ‘Kinhukhumwiya nlattu woolalyeera wunwelelihiya waatthu!’”
22 Vano, ukhala wiira Felisi ancuwela sana-saana myaha cooluma Iphiro ca Apwiiya, ahohiyerera mwahooyo eeraka: “Ukati unhalaawe uwa Liisiya, komantante aanatoropa, kinaahala ulakela ula mwahoola.”
23 Vano, uyo ahonruma nhooleli aanatoropa wiira antthuke, masi anhiye uwaceriya naapoovwaawe anwaanelaka citthu cimpheelaawe.
24 Uvira waya mahuku vakaani, Felisi ahowa ni Trusila, amwaarawe yaari nyuuta; ahoruma wiihaniya Paulu ni ahomwiiwelela oolumaka umwaamini Yesu Kristu.
25 Vano, Paulu upacera wawe wuuluma isariya, wiivaraca ni uhukhumwiya unhala uwa, Felisi ahoova ni aheera: “Neemeleleke vaava, pooti urwaa, masi kakhalanaka ukati kinaahala uruma wiira uwaaniye-tho.”
26 Ukati yooyo, anweherera wiira Paulu anvahe nsurukhu. Phimaana, anruma ikwaha cinci wiira arweeliye amoopane mwaha.
27 Vano, uvira waya myaakha miili, Porsiyu Festu, ahokhala nipuro na Felisi. Ni Felisi ukhala wiira ampheela ukupaliya naayuuta, ahonhiya Paulu nkhattya.
