Miteko co Mapostolu 23:1-35
23 Paulu waaweha wawe atthu yaari u Sinedriyu, aheera: “Alopwana, mayamunna, mpaka ilelo, kihovara citthu comaana uhoolo wa Nluku ninrima wootaphuwa.”
2 Nankuttho Ananiyasi ahoruma wiira atthu yaamwaattamenle amwaatte malakwaayo.
3 Vano, Paulu ahomwiirela: “Nluku naahala uwaatta, isiri yookayariya,* wonkomile va wiira ukihukhumu, ukati yooyo unaavonyaniha Nlamulo urumaka wiira kaattiye?”
4 Atthu yaarivo nwo yahomwiirela: “Unanruwana nankuttho muulupale a Nluku?”
5 Ni Paulu ahaakhula: “Mayamunna, mi akaacuwela wiira uyo nankuttho muulupale. Kontha uhantikhiya: ‘Uhiwuulume pusya ahooleli aapoovwaa.’”
6 Ukhala wiira ancuwela wiira nno nipuronno yahaavo masatuseu ni mafariseu, Paulu ahokhuwela venci eeraka: “Alopwana, mayamunna, mi kikhanle nfariseu, mwaana o mafariseu. Phimaana vaa, kinhukhumwiya nlattu woolalyeera wunwelelihiya waatthu.”
7 Uhimya wawe iyo itthwiiyo, wahopacera unyakulihaniya mafariseu ni masatuseu ni atthwaayo yaahorukunuwelana.
8 Kontha masatuseu aneera wiira khuuvo wunwelelihiya waatthu ookhwa, malayikha ni hataa nnepa, masi mafariseu anaakupali nnyo citthunnyo.
9 Vano, waahopacera unyakuliya venci, ni anamantikha akhwaawe opartitu yo mafariseu yahonwa ni yahopacera unyakulihana ananyoonyiye venci, yiiraka: “Khaninoona itthu yootakhala ipankilyaawe ula nlopwanoola, wakhala wiira nnepa awula nlayikha nihoomuulumana.”
10 Vano, yanvira atepaka unyakulihana ni komantante aanatoropa aanoova wiira ayo yanhala unhita. Phimaana, aahaaruma anatoropa ukhuruwa wiira yankumihe iriyaryaaya ni anrweehe ukwaarteelu.
11 Vano ule uhiyuule, yahonkhumelela Apwiiya ni yahomwiirela: “Ulipe nrima! Kontha toko civahilyaa usaahiti ukuulumaka miiva u Yerusalemu, uhaana urwaaka uvaha usaahiti ciicammo u Rooma.”
12 Usa waya, ayuuta yahopanka ikhurupu ni yaholeehana wiira amwiive ni yaholakela alaphaka wiira khayaahala ulya hataa uwurya ahimwiivile Paulu.
13 Yaari alopwana 40, yaalakenle yalaphaka umwiiva.
14 Ayo alopwanaayo yahorwaa waanankuttho oolupale ni womahumu aapoovu, ni yaheera: “Niholakela nilaphaka wiira khaninhala ulya itthu, nihimwiivile Paulu.
15 Vano, nyuuva ni Isinedriyu yotheene nhaana urwaa umwiirela komantantyuuyo wiira anwaane va vathi va, wiira awoonananeni, khampa nnopheela ucuwela sana-saana itthu immwiirannyeela. Masi hinaphiya, hi ninhala ukhala owiitthenkaceene wiira nimwiive.”
16 Vano, mwaana aarokorawe Paulu ahocuwela itthu yaalehaniya ahorwaa ukwarteelu ni ahonhimerya Paulu citthu cotheene.
17 Phimaana, Paulu ahomwiihana nhooleli aanatoropa mmoca ni ahomwiirela: “Unkuse ula mmirawoola ni unrwaane wa komantante, kontha ihaavo itthu impheelaawe unhimerya.”
18 Uyo ahoncisa mpaka wa komantante aanatoropa ni ahomwiirela: “Paulu tthukiye aahookiihana, ni ukilepela wiira kinwaane ula mmirawoola, kontha haana itthu impheelaawe wuuhimeryani.”
19 Komantantyuuyo ahovara moono wa mmirawooyo ni ahonkusa mphanttyaaweru, ni ahonkoha: “Umpheela ukihimerya isiyani?”
20 Uyo ahomwaakhula: “Ayuuta aholeehana wuulepelani Paulu wiira munrwaane u Sinedriyu meelo, khampa ampheela ucuwela sana-saana itthu immwiirannyeela.
21 Masi nhiwiiwelele, kontha alopwana ookhalaka 40 aholeehana umwiipithela Paulu, ni aholapha wiira khanhala ulya hataa uwurya ahimwiivile Paulu. Aheetthenkaca, anweherera wiira nyuuva ntthune itthu inhalaaya wuulepelani.
22 Vano, komantantyuuyo ahonhiya mmirawooyo urwaa, masi hinarwaa ahomwiirela: “Uhinhimerye ntthu wiira uhokihimerya ila itthwiila.”
23 Vano, uyo ahowiihana ahooleli aanatoropa eeli ni ahowiirela: “Mwaatthenkace anatoropa 200, anakavalu 70 ni anamavaka 200 wiira arwee u Sesareya 21 oora.
24 Ciicammo, munwaanele Paulu ikhavalu nohalaawe uwela, wiira munkuse munkhikiceraka saana mpaka wa kovernatoore Felisi.”
25 Ni uyo ahantikha iwarakha yeera:
26 “Klautiyu Liisiya nkhulupale, kovernatoore Felisi. Isalamu!
27 Ula nlopwanoola, aahoovariya naayuuta ni yaahanle vakaani umwiiva, masi mi woohipica kahorwaa naanatoropaaka ni kahomoopola, kontha kahocuwela wiira uyo khanle nrooma.
28 Vano, kipheelaka ucuwela nlattuni wootherihaciyaawe, kahonkusa u Sinedriyu waya.
29 Kihoona wiira ayo yaamotheryaca yavarelaka nteko Nlamulo naya, masi khaamoothenrye hataa itthu imwiiriha umphwanela wiiviya awula utthukiya.
30 Vano, ukhala wiira koohimeriya wiira yaaleehana umwiiva uyo nlopwanooyo, kihonveleeliha woohipica akhulupale ni kihoruma wiira ale ammootherya apanke iyo itthwiiyo uhoolo winyu.”
31 Vano, toko caakhenlyaaya malamulo, anatoropa yahonvara Paulu ni yahonkusa uhiyu mpaka u Antipatride.
32 Waaseele, anakhavalu yahorwaa ni Paulu ni anatoropa akiina yahoturuwela ukwaarteelu.
33 Anakhavalu yahophiya u Sesareya, yahonvaha kovernatoore iwarakheeyo ni ciicammo yahoncuweliha Paulu.
34 Vano, kovernatooryooyo ahosoma iwarakheeyo ni ahokoha wiira aakhuma iprovinsiyani; ahohimeriya wiira aari o Silisiya.
35 Ni uyo aheera: “Mi kinaahala wiiwelela itthu itthekilyaa, yawaaka atthu anwootheryaca.” Ni ahoruma wiira atthukeliye inupa ya Herooti.
Notas
^ Awula: weeva nawootha.
