Miteko co Mapostolu 21:1-40
21 Waamwalanana wihu, nahowela ikalawa ni nahorwaa u Koosi. Waaseele nahorwaa u Roti, ukhuma wihu nwo nahorwaa u Paatara.
2 Umphwanya wihu naviyu aarwaa u Fenisiya, nahonwela ni nahorwaa.
3 Woona wihu ni uvira wihu iiliya yo Siipere, nahovira moono wonthiyana, nahorwaa u Siiriya ni nahophiya u Tiro waarwaawe naviyu uhiya mirintti.
4 Nahowaavya atthari ni nahaaphwanya, nahokhala nwo mahuku 7. Masi, akaviheriyaka ninnepa wowaarya, khayaahiyerera umwiirela Paulu wiira hiphiye u Yerusalemu.
5 Umaliha wihu uthotola ale mapurwaale, nahokhuma ni nahopacera ikwaheehu ni otheene caya, nkhayi naathiyana ni asaana, yahoniveleela mpaka vate waya isittatti. Vano, nahokhoroma upahari ni naholompa
6 ni khula ntthu ahonleeha nkhunanawe. Vano, nahonwela naviyu ni ayo yahoturuwela mmawannyaya.
7 Vano umalihera wihu nkwaheehu, nahonwela naviyu u Tiru mpaka u Petolemayita; nahaasalamiha mayamunnaayo ni nahokhala naayo nihuku nimoca.
8 Waaseele, nahokhuma ni nahorwaa u Sesareya; nwo nahokela itthoko ya Filipe namalalyeera, aapanka mphantte waalopwana 7 ni nahokhala nkhayi nuuyo.
9 Uyo nlopwanooyo ahaana asaana 4 asithiyana yaari athupa yaavara nteko weeporofeeta.
10 Ukhala wihu nwo mahuku menci, ahowa porofeeta mmoca aakhuma u Yuteya eehaniya Aakapu.
11 Waawilyaawe unoonanana, uyo ahokusa isintu ya Paulu, ahotthuka inyaa cawe ni matataawe ni aheera: “Co phineeraaya nnepa wowaarya: ‘Mwaneene ila isintwiila, naahala utthukiya naayuuta u Yerusalemu, ni ayuutaayo anaahala waavaha amalaponi.’”
12 Wiiwa wihu iyo itthwiiyo ni atthu yaari nkhayi ni hi, nahopacera unlepela Paulu wiira hirwee u Yerusalemu.
13 Paulu ahaakhula eeraka: “Nnonlelani mmananihaka ulolovihaca itthu ilakenlyaaka? Mwaamini wiira mi, kiri owiitthenkaceene wiira kitthukiye mpaka ciicammo ukhwa u Yerusalemu nlattu wa Apwiiya Yesu.”
14 Ukhala wiira khanaakhitinri unhiiha, nahohiya unkhanyereriha ni naheera: “Yiirannye itthu impheelaawe Yehova.”
15 Uvira waya ale mahukwaale, naheetthenkaca wiira nirwee u Yerusalemu.
16 Atthari akhwaawe o Sesareya, yahoniveleela uwannyawe Masoni, o Siipere naarweehu ulukama; ni uyo aapanka mphantte waatthari oopacera.
17 Uphiya wihu u Yerusalemu, mayamunna yahonaakhelela unaattenle nrima.
18 Waaseele, nahokhuma nkhayi ni Paulu ni nahorwaa umoonanana Tiyaku, ni mahumu otheene yahaavo.
19 Uyo ahaasalamiha ni ahaahimerya citthu cotheene comaana Nluku aapankilyaawe waamalaponi nlattu wonteko woolalyeera waavaraawe.
20 Umaliha waya wiiwa nnyo citthunnyo, yahopacera unttitthimiha Nluku, masi yahomwiirela: “Munna, weeva unaacuwela sana-saana wiira ayuuta enci ahomwaamini Nluku ni otheene anawiikurumica weettela nlamulo.
21 Masi, ayo aheewa wiira weeva, unaawiitthuciha ayuuta otheene ankhala waamalaponi wiira ahiye wiiwelela Nlamulo na Moceesi, uwiirelaka wiira ayo khanlamuliya uwuuliha asaanaaya ni hataa weettela ileema caya.
22 Vano, ninhala upankani nlattu wo iyo itthwiiyo? Ayo anaahala ucuwela wiira uhowa mu.
23 Vano, upanke itthu inhaleehu wuuhimerya: Ahaavo va alopwana 4 ampankile natiri.
24 Waacise ayo alopwanaayo wiireerihace nkhayi naayo, ni ulive citthu cotheene cimpheeliya wiira cimetthiye ikharari cinyu. Commo, atthu otheene anaahala ucuwela wiira itthu inoolumiya waaciyaka weeva khinakhala ikhweeli, masi yoone wiira weeva unaweettela sana-saana ni unawiiwelela nlamulo.
25 Vano, amalaponi ammwaamini Nluku, nihaaveleelihera iwarakha naahimeryaka itthu ilakenleehu, wiira ahaana yanyemaka itthuvo cinvahiya anluku oohikhweeli, ciicammo iphome, inama cowiiviya makhuce ni urupihana woohiloka.”
26 Vano, waaseele, Paulu ahaakusa ayo alopwanaayo ni ahorwaa wiireeriha nkhayi naayo. Umaliha wawe, ahokela ntempulu wiira ahimyace ukati waahaalaaya umala nwo wiireerihanwo ni ukati waahalaawe nankuttho uvaha itthuvo yo khula ntthu.
27 Ukati waapiiheraawe mahuku 7, neereerihale ayuuta o Asiya umoona waya Paulu, ntempulu yahaatheperya apoovu ni ayo yahonvara,
28 yakhuwelaka: “Alopwana o Isarayeli, nnikavihere! Ula phi yooyo nlopwana nowiitthuciha atthu otheene ni mapuro ootheene citthu cinwuuluma pusya apoovweehu, cinooluma pusya Nlamulo nihu ni nna nipuronna. Ni uhiya commo, ula mpaka haawaana akereku ntempulu ni honanariha nna nipuro nowaaryanna.”
29 Kontha yaahopaca umoona Tiroofimu o Efesu, nari nkayi nuuyo, ni yoopuwela wiira Paulu aahonrwaana ntempulu.
30 Atthu otheene oosittatti yahopacera unyakula ni yahowa atthu enci yatthawaka, yahonvara Paulu ni yahompurulacera vate waya itempulu, ni woohipica cahotthukiya mikhorannyo.
31 Ukati waamananihaaya umwiiva, komantante aanatoropa ahaakhela ihapari wiira isittatti yotheene yo Yerusalemu, wannyakulihaniya.
32 Woohipica, ahaathukumaniha anatoropa ni ahooleli aanatoropa, aahorwaa nno nipuronno atthawaka. Umoona waya komantante aanatoropa yahohiya umwaattakaca Paulu.
33 Vano, komantante aanatoropooyo ahomwaattamela, ahoruma wiira atthukiye nuunyolo miili; vano, ahokoha wiira uyo aari tipani ni isiyani yaatthekilyaawe.
34 Atthu okhurupu imoca yaakhuwela itthu yaavirikana ni itthu yaakhuwelaaya ikhupu ikhwaawe. Vano, ukhala wiira kheewa itthu yaahimiya nlattu woonyakulaciya, ahoruma wiira arwaaniye ukwartelu.
35 Uphiya waya nipuro naaweliya, ahaana ateesiyaka, kontha khaakhitiri nlattu wowaattakaciya naapoovu.
36 Ciicammo, yahaavo atthu enci yaakhuwela yiiraka: “Mmwiive!”
37 Uhaleelaka vakaani ukelihiya nkwartelu, Paulu ahonkoha komantante aanatoropooyo co: “Kinaatthuniheriya wuuluma itthu?” Uyo ahomwaakhula eeraka: “Unawoorya wuuluma ikereku?
38 Khunakhala, weeva mwiiciipitu aathepenrye atthu uhiiwelela nlamulo na kuvernu ni aakusile anamwiiva 4.000 aarwaanaka muuthakoni?”
39 Paulu ahaakhula eeraka: “Khweeliini, mi kinyuuta, o Tarsu, isittatti yuulupale cinene yo Siliisiya. Sontte, kinawuulepelani nkitthunihere uwuulumana apoovu.”
40 Utthuniheriya wawe wuulumaca, Paulu neemenle nipuro naaweliya, ahonwusa ntata ni apoovu otheene yahomaala. Vano, uyo ahopacera uwuulumana niiluka iheperewu eeraka:
