Miteko co Mapostolu 17:1-34
17 Vano, yahopanka ikwaha yaviraka u Anfiipoli ni u Apolonia, ni yahophiya u Tesalonika waaryaaya isinakooka yaayuuta.
2 Paulu, toko caalamalenlyaawe ahokela nsinakooka ni ahopacera uwuulumana, ni ahoviriha isaapatu tthaaru awiitthucihaka, avarelaka nteko Cowantikhiya Cowaarya:
3 uyo aanaataphulela ni anwoonihera nhina Cowantikhiya Cowaarya, wiira Kristu ahaana akhwaaka ni onwelelihiyaka, uyo eerela co: “Ula khanle Kristu Yesu kinoolalyeerakani.”
4 Nlattu wo iyo itthwiiyo, atthu akiina yahokupali ihapari comaana ni yahaatakaneelana Paulu ni Sila, ni atthu enci akereeku yanswalela Nluku, yahopanka itthu imocaaru ni athiyana enci yaattitthimihiya.
5 Vano, ayuuta yaahokhala ninttima. Nlattu wo iyo itthwiiyo, yahaathukumaniha alopwana ootakhala nrima yahaarina itthu yoovara iyo isittattiiyo, ni yahopanka ikhurupu wiira anyakulihe isittatti yotheene. Vano, yahokela inupa ya Casoni yamwaavyaka Paulu ni Sila wiira yaakumihere vate waatthuni.
6 Ukhala wiira khayamphwanyile, yahoncisa Casoni ni mayamunna akhwaawe ni yahaarwaana waahooleli osittatti, yakhuwelaka: “Ale alopwana annyakuliha ituninya yotheene ahophiya mu,
7 ni alukamile wa Casoni. Otheene ala alopwanaala, khaaniiwelela nlamulo, aneera wiira haavo mwene, Yesu.”
8 Wiiwa waya ayo moolumwaayo, atthu enci ni ahooleli oosittatti, yaahonyoonyiya.
9 Vano, Casoni ni mayamunna makhwaawe, uliva waya nsurukhu waalanliyaaya, yaahohinnya urwaa.
10 Wiila waya, mayamunna yahonveleliha Paulu ni Sila u Pareya, uphiya waya nwo yahokela nsinakooka ya ayuuta.
11 Ayo yahaana moopuwelelo omaana waapwaha atthu o Tesalonika, kontha yahokupali nuulumo na Nluku ni yansoma khula nihuku Cowantikhiya Cowaarya wiira yoone wakhala wiira itthu yiiwilyaaya, yaari ikhweeli.
12 Phimaana atthu akiina, yaahomwaamini Nluku, hataa athiyana akereeku yaattitthimihiya ni ciicammo alopwana akhwaawe.
13 Masi, ukati ayuuta o Tesalonika waacuwenlyaaya wiira Paulu anlalyeera nuulumo na Nluku ciicammo u Pereya, yahorwaa mpaka nwo wiira yampace ni waatheperya atthwaayo.
14 Vano, mayamunna yahonveleela Paulu woohipica upahari, masi Sila ni Timotiyu yahohala wonwo.
15 Mayamunna yaakhumile ni Paulu yahonveleela mpaka u Ateena, ni ukati waaturuwaaya yahovahiya malakihero wiira yanhimerye Sila ni Timotiyu mananna yaalamuliyaaya uphiya nipuro naaryaawe Paulu woohipica.
16 Ukati waawehereraawe u Ateena, Paulu ahonyoonyiya venci woona wawe wiira iyo isittattiiyo yahaavo attontto yaaswaleliya.
17 Vano, ahopacera uwiitthuciha mmasinakooka, ayuuta ni atthu enci yanswalela Nluku. Ni ciicammo aanawiitthuciha khula nihuku, atthu otheene yaaphwanyaawe mapuro oocariya.
18 Uhiya commo, mafilosofu akhwaawe, Mapikurewu ni ciicammo Masitoyiku yahopacera unnyakulihanana Paulu. Akiina yeera: “Isiyani ula nlopwana onciva wuulumacoola impheelaawe uhimya?” Akhwaawe yeera: “Ula unawiira naalalyeera anluku olapo cikhwaawe.” Yoolumaca commo kontha uyo anlalyeera ihapari comaana caamuuluma Yesu ni wunwelelihiya waatthu ookhwa.
19 Vano, yahonvara ni yahonrwaana wa Areopaku, yeeraka: “Citthuni nnya conaanaano cineetthucihannya?”
20 Kontha unawiitthuciha citthu cikhwaawe cihinapaceehu wiiwa ni nimpheela ucuwela itthu intaphulelaaya.
21 Khweeliini, atthu o Ateena ni olapo cikiina yaakhala nwo, khayaavarela nteko ukatyaaya woomumula niitthu ikhwaawe uhikhanle wiiwa ni uhimyaca citthu cophiyaaru.
22 Vano, Paulu ahommwa iriyari ya Areopaku ni aaheera:
“Alopwana o Ateena, kinawoona toko wiira nyuuva nnaathoonyihera uwoova cinene anluku waavikana atthu akiina.
23 Wootakihera, ukati weettakacaaka kihowoona attontto nnaaswaleleenyu, hataa ciicammo kihophwanya nipuro nantikhiye: ‘Nluku hincuweliya.’ Vano, yooyo Nluku nnonswaleleenyu woohincuwelooyo, phinoolalyeerakani.
24 Nluku, umpile ituniya ni citthu cotheene cirivo, khanle Apwiiya owiirimu ni owatuniyani, khankhala itempulu yootekiya naapinaatamu,
25 hataa khampheela uvareliya nteko naapinaatamu, toko wiira ihaavo inonthwa, kontha uyo, nawaavaha ukumi atthu otheene ni citthu cotheene.
26 Ni uyo, honvarela nteko nlopwana mmoca paahi, wiira apanke maloko otheene wiira akhale watuninyani ni hohelela ukati ni mipika mapuro oohala ukhala apinaatamu watuniyani.
27 Nluku nopheela wiira apinaatamu amwaavye, amwaapaapele mpaka umphwanya, kontha uyo khari uttayi wo khula ntthu.
28 Kontha nlattu wawawe, nihaana ukumi, ninaweetta ni nihaavo, toko cihimilyaaya anamantikha o ihantisi cinyu: ‘Kontha hiiva ciicammo nikhanle asaanaawe.’
29 Vano, ukhala wiira hiiva asaana a Nluku, khaninlamuliya wuupuwela wiira uyo nolattanaca ni iwooru, iparaata awula maluku, khampa itthu yoohemiya inoopuwelaciya naapinaatamu.
30 Khweeliini, Nluku hohiyerera nnyo citthunyo cipankiyaka kontha atthwaayo khayaacuwela, masi nna va nowiirela atthu otheene, ni mapuro otheene wiira attharuwe.
31 Kontha uyo, holakela nihuku noohala waahukhumu atthu otheene watuninyani niisariya, anvarelaka nteko nlopwana nthanlalyaawe. Ni uyo, haakhuluveliha apinaatamu otheene umunweleliha wawe.”
32 Wiiwa waya wuulumiyaka wunwelelihiya waatthu ookhwa, akiina yahopacera untarawaca, ni akiina yeera: “Ninaahala uturuwela wiira niwiiwelele-tho uyo mwahooyo.
33 Vano, Paulu ahokhuma,
34 masi atthu akiina, yahotakaneela nuuyo ni yahokhala makristau. Iriyaryaaya atthwaayo, ahaavo Diyonisiu aari suwiisi ootiripunaali yo Areopaku, nthiyana mmoca eehaniya Tamari, ni atthu akhwaawe.
