Miteko co Mapostolu 12:1-25
12 Ale mahukwaale, mwene Herooti ahopacera waahuviha atthu akhwaawe owanlokoni.
2 Uyo ahoruma wiiviya Tiyaku, mwanhimaawe Joau, niikatana.
3 Woona wawe wiira ayuuta waanaacivela, ahontthuka ciicammo Peturu, iyo yeerannyaale mahuku ophaawu coohiheliya ifermentu.
4 Vano, ahonvara ni ahoruma wiira atthukeliye nkhattya, ni anatoropa ikhurupu cese, yaanaavirihana yankhalenlaka Peturu, khula ikhurupu yaari anatoropa acese. Herooti aapheela unhukhumu uhoolo waapoovu navinreene paasikuwa.
5 Vano, Peturu ahotthukeliya nkhattya, masi mayamunna owanlokoni khayaahiyerera unlompela.
6 Waahaleela ukati vakaani wiira Herooti anrwaane Peturu wiira awoonihere apoovu. Yoole uhiyuule, Peturu anrupa, natthukiyeene nuunyolo miili, iriyari yaanatoropa eeli ni uhoolo waya nkhora, yahaavo makwaarta yaakhalenla ikhattya.
7 Masi woohipica, nlayikha na Yehova nahowa ni nkhattyammo wahaarya, nno nahonvara Peturu ni nahonwusa namwiirelaka: “Wunwe woohipica!” Ni unyolo waatthukaniyaawe wahotthukuwa mwaneennyaaya.
8 Nlayikhanno nahomwiirela co: “Uwarace ikuwo caa ni isantaliya caa,” ni Peturu ahopanka iyo itthwiiyo. Vano, nno nahomwiirela: “Uware ihancwaa ni ukitthare.”
9 Vano, ahancera utthara nno nlayikhanno, masi khaacuwela wiira itthu yaapankaaya nlayikhanno yaari ikhweeli. Khweeliini, uyo ooniha toko anloha.
10 Yahovira nipuro naakhalaawe kwaarta oopacera ni onayeeli, ni yahophiya wankhorani woyuuma woosittatti. Uyo waheehula mwaneennyaaya. Ukhuma waya, yahopacera weetta, wohipica nlayikhanno nahorwaa.
11 Ucuwelela wawe itthu yeerannya, Peturu aheera: “Vano kihocuwela wiira Yehova horuma nlayikha wiira naakoopole mmatatani wa Herooti ni citthu cotheene apoovu ayuuta yapheelaaya wiira ciirannye.”
12 Ukati waacuwelenlyaawe itthu yeerannya, uyo ahorwaa uwannyawe Maria, anumwaane Joau, aacuweliya ukhala Marku, nwo phathukumannyaaya atthu enci yalompaka.
13 Ukati Peturu waattilyaawe nkhora, nanteko mmoca nthiyana eehaniya Roote, ahorwaa uthurumela.
14 Aacuwelenlyaawe wiira ncunno naari na Peturu, ahotteeliya cinene ni mpaka khaahunle nkhorooyo, masi ahoturuwela mpaani atthawaka ni ahorwaa waahimeerya atthwaayo wiira Peturu ri wankhorani.
15 Masi yahomwiirela: “Unawootha.” Masi, uyo ahokhanyerera eeraka wiira yaari ikhweeli. Ni ayo yeera: “Nno nlayika nawe.”
16 Vano, Peturu khaahiyerenre waatta nkhora. Ukati waahunlyaaya amoonaka, yahokhala ootikhinihiya cinene.
17 Vano, ahowuulumana nimatata wiira amaale, ni ahaahimeerya citthu cotheene, mananna Yehova cankumihilyaawe nkhattya ni ahowiirela: “Munhimeerye nnya citthunnya Tiyaku ni mayamunna makhwaawe.” Vano, uyo ahokhuma ni ahorwaa nipuro nikhwaawe.
18 Usa waya, anatoropa yahopacera unyakulihana yakohanaka isiyani yaamwiirannyenle Peturu.
19 Herooti ahomwaavyaavya sana-saana, ni ukhala wiira khamphwanyile, ahanca waakohakoha makwaarta ni ahoruma wiira acisiye ni yattarusiye. Vano, ahokhuma u Yuteya ni ahorwaa u Sesareya ni ahokhala ukati vakaani wonwo.
20 Vano, Herooti ahaaviruwela apoovu o Tiro ni o Sitoni. Phimaana, ayo yaholeehana ni yahorwaa umuulumana Palastu, ule aawacera itthoko yaamwene Herooti wiira aakavihere. Kontha atthu o iyo ilapweeyo, yaanathumaka iyoolya micoko caalamulelaawe Herooti. Ni yahorwaa umuulumana mwene wiira nikhale nnema.
21 Nihuku nimoca, Herooti ahowara ikuwo cawe ceemwene, ahonkoma iriyari yaapoovu ni ahopacera utaphulela mwaha.
22 Vano, apoovu yaathukumannyaale yahopacera ukhuwela yiiraka: “Nno nikhanle ncu na nluku, kahi napinaatamu!”
23 Woohipica, nlayikha na Yehova nahonwaanela iretta Herooti, kontha uyo khanttitthimihile Nluku. Ni uyo aholiya niikhune ni ahokhwa.
24 Vano, nuulumo na Yehova nanvira nimwaryeelaka ni atthu enci yaanaamini.
25 Pernape ni Saulu, umaliha waya miteko caavaraaya cowaakavihera aswali u Yerusalemu, yahoturuwa ni yahoncisa Joau, aacuweliya ukhala Marku.
