Ihapari Comaana Cantikhiye ni Matewus 9:1-38
-
Yesu nanvoniha nlopwana owuntakya (1-8)
-
Yesu nanlattula Matewus (9-13)
-
Yesu naakohiya mwaha wootthuka (14-17)
-
Mwaana a Jairo; athiyana amoca anaakwanya nseresere wokuwo yaawanryaawe Yesu (18-26)
-
Yesu nawaavoniha atthu oohoona ni ntthu oohoorya wuulumaca (27-34)
-
Iyoolya yoopheela uhephiya khweeliini khimala, masi ananteko ari vakaani (35-38)
9 Vano, ahokela nkalawani ni ahorwaa u Kafarnau, isittatti yaakhalaawe.
2 Woohipica, ahowaaneliya nlopwana mmoca owuntakya, naataleliye wanrepani.* Woona wawe waamini waarinaaya ayo atthwaayo, Yesu ahomwiirela co: “Ulipe nrima mwanaka! Uholeveleliya matampyaa.”
3 Anamantikha woona waya iyo itthwiiyo, yahanca umwaapa yiiraka: “Ula nlopwanoola nanveeha Nluku.”
4 Yesu ucuwela wawe itthu yoopuwelaaya, uyo ahowiirela: “Kontha isiyani nnoopuweleenyu citthu coohinamaana wanrimani winyu?
5 Wootakihera, irikale isiyani umwiirela ula nlopwana owuntakyoola: ‘Matampyaa aholeveleliya,’ awula: ‘Wunwe, ukuse nrepa naa* weette?’
6 Phimaana, wiira ucuweliye wiira Mwaana Apinaatamu haana ukhulupale woolevelela matampi va watuninyani va . . .”, uyo ahomwiirela nlopwana owuntakyooyo co: “Wunwe, ucise nrepa naa* ni urwee uwaani.”
7 Ni uyo ahonwa ni ahorwaa uwannyawe.
8 Atthwaayo woona waya iyo itthwiiyo, yahoova ni yahonttitthimiha Nluku, nlattu wo waavaha apinaatamu ukhulupale toko uyo.
9 Ukhuma wawe nne nipuronne, Yesu ahomoona nlopwana mmoca eehaniya Matewus, nonkomile nipuro naaliviya nsokho, ni ahomwiirela: “Ukhale nttharyaaka.” Vano uyo ahonwa ni ahontthara.
10 Alyaaka uwannyawe Matewus, yahowa anamaliviha nsokho enci ni anamatampi, vano yaahanca ulya nkhayi nuuyova wamoca ni eetthucyaawe.
11 Mafariseu uwoona waya ayo atthwaayo, yahaakoha atthari a Yesu co: “Kontha isiyani mwiitthucihiinyu naalya naanamaliviha nsokho ni naanamatampi?”
12 Yesu ahowiiwa ni ahowiirela: “Atthu akumi khanrwaa wa meetiku, masi aretta phanrwaa.
13 Phimaana, nrwee ni mwiitthuce itthu impheelaaya uhimya ala moolumwaala: ‘Mi kimpheela uthunku, kahi itthuvo.’ Kontha mi akaawenle anasariya, masi kaawenle anamatampi.”
14 Vano, eetthuci a Joau yahowa ni yahonkoha Yesu co: “Kontha isiyani hiiva ni mafariseu ninaatthuka, masi eetthuciinyu khantthuka?”
15 Yesu aheera: “Niireke apatthannyaawe mpakaneli,* pooti wankhalaaya ooriipiya nrima anaryeene ni mpakanelyuuyo? Masi unaahala uphiya ukati anhalaaya waakhiya mpakanelyuuyo, vano uyo ukatyuuyo phinhalaaya utthuka.
16 Khaavo nokusa ikuwo yo naanaano nuupankela icaapha nkuwoni yo khalayi, kontha apankaka commo, ikuwo yonaananweeyo inaahala utthunyaca ikuwo yokhalayiiyo ni nipuro naanyuwilyaaya ikuwo yokhalayiiyo ninaahala utepaca.
17 Inanna imocaaru, khaavo nohela iviinyu munrupani wo nttapala nokhalayi. Ntthu apankaka iyo itthwiiyo, nrupooyo unaahala uphwyaa, ivinywiiyo inaahala urihya ni nrupooyo unaahala umalamala. Phimaana, iviinyu yophiyaaru inheliya munrupani wonttapala nophiyaaru, commo, coopiili khacinhala uhaleeliya.”
18 Oolumacakoono iyo itthwiiyo, nhooleli mmoca ahomwaattamela ni ahokhoroma uhoolo wawe, nuumwiirela: “Mwaamwanaka ula ukatyuula hokhwa, masi nttwee mwamweeserere ntata ninyu ni uyo naahala wunwelela.”
19 Vano Yesu wamoca ni eetthucyaawe yahunwa ni yahontthara uyo nlopwanooyo.
20 Eettakoono, athiyana amoca yaavirihale myaaka 12 yaaweryaaka iretta yookhuma iphome, yahomwaattamela uttuli wawe ni yahokwanya nseresere ikuwo yaawanryaawe,
21 kontha ayo yaaneeciirela imwanennyaaya: “Kakwanyaru nlempe nokuwaawe paasi, kinaahala uvona.”
22 Yesu ahorukunuwa ni uwoona wawe ayo athiyanaayo, aheera: “Ulipe nrima mwanaka, waamini waa uhowiiriha uvona.” Ni ikhumelo ule ukatyuule, ayo athiyanaayo yahovona.
23 Aaphilyaawe uwannyawe ule nhooleli oosinakookoole,* ahiiwa yiipiyaka ampetta ni atthu enci yakhuwelaka,
24 vano Yesu aaheera: “Ukhumiye mu, kontha ula mwaarusyuula khakhwile itthu, masi naarupa.” Atthwaayo wiiwa waya iyo, yahancera unthya.
25 Atthwaayo woomoleliya waya vate, uyova ahokela ni ahovara ntata namwaarusi ni uyo ahonwelela.
26 Iyo itthu yirannyeeleeyo, yahomwaryeela ncoko wotheene ule.
27 Akhumakoono nne nipuronne, alopwana eeli oohoona yahancera untthara yankhuwelelaka, yeeraka co: “Mwaana a Davidi unoonele ikiriri.”
28 Ukela wawe inupa imoca, alopwana oohoonaayo yahontthara mpaka mommo, vano Yesu ahaakoha co: “Nyuuva nnaakupalici wiira miiva kinaahala ukhitiri upanka iyo?” Vano ayo yaahaakhulaca yeeracaka co: “Iyeeni Pwiiya.”
29 Vano, aahaavara mmeethoni ni aahowiirela co: “Yiirannye itthu nnokupaliinyu.”
30 Ni ayova yaahancera woona. Uhiya commo, Yesu aahowiirela: “Ratta, nhinhiye hataa ntthu acuwelaka itthu iwiirannyenleni.”
31 Masi ukhuma waya, ayo yahohimyaca ncoko wotheene itthu yaawiirannyenle.
32 Urwaa waya ale alopwanaale, yahowa atthu akhwaawe yanwaanale nlopwana mmoca ahooluma, uyova aanookeliya nimaciini.
33 Woomoliya waya maciinnyaayo, nlopwana ahoolumooyo aahancera wuulumaca. Vano atthwaayo yaahotikhinaca ni yaheera: “Khaninapaca woona thanku itthu toko ila yiirannyaaka u Isarayeli.”
34 Vano, Mafariseu yaahancera wiira: “Uyo nokhitiri woomola maciini akaviheriyaka ninhooleli omaciini.”
35 Ni Yesu aahancera weetta mmasittatti ni mmaaliteeya motheene, eetthucihaka mmasinakooka waya, alalyeeraka ihapari comaana co Umwene ni avonihaka khula iretta ni ikwerere co khula inanna.
36 Uwoona wawe atthu enci ahowoonela ikiriri, kontha yaantafitiya pusya, ni yankakheliya uno nuuno toko ikhontwaa coohimakampuci.
37 Vano aahowiirela eetthucyaawe co: “Iyoolya yoopheela uhephiya, khweeliini khimala, masi ananteko ari vakaani.
38 Phimaana, mwaalepele aneene imatta wiira awaavye ananteko oohala uhepha mmattani waya.”
Notas
^ Awula: “wankorini.”
^ Awula: “nkoryaa.”
^ Awula: “ikoryaa.”
^ Awula: “ntthu norwaa uthela.”
^ Nwehe Moolumo o Mbiibiliyani Ootaphuleliya.
