Ihapari Comaana Cantikhiye ni Matewus 3:1-17
3 Unavinreene ukati, Joau Mpattisa ahorwaa ulalyeera muuthakoni wo Yuteya,
2 eeraka co: “Nrukunuse makhalelweenyu, kontha Umwene wa Nluku uhanle wancera ulamulela.”
3 Khweeliini, Joau phi yoole aamuulumilyaawe porofeeta Isaiya, eeraka: “Haavo nokhuwela muuthakoni eeraka: ‘Ntthenkace nttala wa Yehova! Mumpankele iphiro yowookwaa.’”
4 Joau aawaraka ikuwo yomapururu okamelu ni eetthukelaka isintu yonrapala nonama. Iyoolyaawe, caari icoroope ni urawo wontakhwani.
5 Ni apoovu otheene yaakhala u Yerusalemu, u Yuteya ni mapuro yaattamenle mooloko Jordau, yanrwaa mpaka nipuro naaryaawe Joau.
6 Ni uyo aanaapattisa ayo atthwaayo mmoolokoni Jordau, yahimyacaka uhoolo waatthu otheene matampyaaya.
7 Ukati waawonnyaawe mafariseu* ni masatuseu* yawaaka nipuro naapattisaniya, uyo ahowiirela co: “Ucuulu wo inwaa coohapala, pani wiirenleni wiira nnaahala ukhitiri utthawa uviruwa wa Nluku unhala uwa?
8 Wiira moopwee, nhaana mweekurumicaka upanka citthu cinthoonyera wiira nhorukunusa makhalelweenyu.
9 Nhiithepye mweeraka co: ‘Nihaana apaapeehu Aparahaamu.’ Kinoohimeeryani ikhweeli wiira, Nluku pooti utatusa ala malukwaala va, asaana a Aparahaamu.
10 Ipaco iri yootthenkaciyeene wiira cithikilaciye mitithari co miri. Phimaana, mwiri uhineema mihokorokho comaana unaahala ukottoliya ni unaahala uvonyeriya wamooroni.
11 Ukhala wiira nhorukunusa makhalelweenyu, mi kinoopattisani nimaaci, masi ule nowa uttuli waka, khanle oolipa ukipwaha miivano, ni khunkiphwanela unrula isantaaliya cawe. Uyo nohala wuupattisani ninnepa wowaarya ni nimooro.
12 Uyo hocisa mmatatani wawe ikaruma inveereliya itiriku, wiira akawanihe itiriku nimacaasi;* ni naahala ukweca-kweca sana-saana nipuro ninhala uveereliya itirikwiiyo. Vano, amalihaka upanka iyo itthwiiyo, naahala ucisa itirikwiiyo nuurwaana nnikhupini, masi macaasyaayo, naahala uttikhela wamooroni uhinkhitiriya uttipihiya.”
13 Vano, Yesu ahokhuma u Kalileeya nuurwaa umoolokoni Jordau, wiira apattisiye ni Joau.
14 Joau ahomananiha unkhottela, eeraka: “Thi mi kaalamuliya uwaavya wiira ukipattise, vano thi weeva unkaavya miiva?”
15 Yesu ahomwaakhula, eeraka co: “Nna co, uhiye wiira yiirannye iyo itthwiiyo, ukhala wiira ala phiri mananna omaana, hiiva owiirannyeeha citthu cotheene cosariya.” Umwiiwa wawe commo, vano Joau ahohiya unkhottela.
16 Upattisiya wawe, Yesu ahokhuma mmaacinimmo woohipica ni yooyo ukatyuuyo irimu yahohulyaa, ni uyo ahoona nnepa* wowaarya wakhuruwaka khampa ikhuntta, iwaaka nipuro naaryaawe.
17 Ciicammo, naheewannya ncu wiirimu, neeraka: “Ula phi mwanaka, nonfentaaka ni nokitteeliha nrima venci.”
Notas
^ Mafariseu yaari atthu yeettela ittiini yaayuuta. Ayo yanvareseesa cinene malamulo hataa nhina citthu cankaani.
^ Masatuseu yaari atthu yeettela ittiini yaayuuta. Ayo yaari mathaciri, yanhoolela miteko co ntempulu ni yaanawaavaanyiha mafariseu.
^ Awula: “niikokhola cotiriku.”
