Ihapari Comaana Cantikhiye ni Matewus 22:1-46
22 Yesu ahowuulumana tootho nimalattanihero awiirelaka co:
2 “Umwene wo wiirimu, pooti ulattanihiya ni mweene mmoca aapankile isukuhuulu yokacamentu ya mwaamwanawe.
3 Uyo ahoruma ipottha cawe wiira caalattule atthu uwa wakacamentuni, masi ayo atthwaayo khayaawile.
4 Ahoruma tootho ipottha cikhwaawe eerelaka: ‘Mwawiirele atthu kaalattunlyaakaayo co: “Kootthenkaca iyoolyeeyo; coohitiya imope ni inama cinci cooneneva, citthu cotheene ciri coolikaneene, phimaana nwe wakacamentuni”’
5 Masi atthu yaalattuliyaayo khaavo aatthunne, ni khula ntthu aarweele nipurunaweru, akhwaawe yahorwaa mmamattani waya, akinakwaayo mmanakosoni waya;
6 ni akhwaawyaayo yahovara ipottha caarumiyennyo, yahohuvihaca ni yaheeva.
7 “Mwennyooyo ahorusiya cinene ni ahaaruma anakhottwaawe iyo isittattiiyo, yahiiviya atakhali otheene ni yahopahiya isittattyaaya.
8 Vano, mwennyooyo ahiirela ipottha cawe co: ‘Isukuhuulu yokacamentu iholikana, masi atthu kaalattunlyaaka khayaaphwanela ukhala nna nipuronna.
9 Phimaana, nkhume nrwee mmaparapaarani, mwaalattule atthu otheene nnohaleenyu waaphwanya, wiira awe va wasukuhuuluni yokacamentu va.’
10 Vano, nnye ipotthannye cahaawaana atthu enci yaaphwanyalyaaya mmaparapaarani, atthu ootakhala nrima ni naayo ooreera nrima, yahowaaniya wakacamentuni vale, ni wahocariya venci.
11 “Vano, amwennyaayo uwa waya wiira yaawoone atthu yaalattuliyaayo, yahomoona nlopwana mmoca ahaawarile ikuwo cowakacamentuni.
12 Vano, amwennyaayo yahonkoha co: ‘Mpatthani, kontha isiyani ukenlya mu uhiwanre ikuwo cowakacamentuni?’ Vano uyo kaakhunle itthu.
13 Vano, amwennyaayo yahowiirela anantekwaayo co: ‘Muntthuke myoononnyo ni mettonnyo, munvonyere vate wooripelanwonwo. Ni wonwo phinhalaawe wunla ni phinhalaawe ukhuura meenwaawe.’
14 “Kontha Nluku naalattula atthu enci, masi vakaani phinaathanlaawe.”
15 Vano, mafariseu yahokhuma nne nipuronne ni yahorwaa waavyaavya mananna wiira anvarihace Yesu ni citthu cuulumaawe.
16 Nuwakatyaaya, yahaaruma attharyaaya wamoca naatthu yanvarela nteko Herooti, wiira yamwiirele Yesu co: “Mwiitthucihi, ninaacuwela wiira ukati wotheene nyuuva nnuuluma ikhweeli ni nyuuva nnawiitthuciha mananna omaana onswalela Nluku, ni khannapheelaka itthu waatteeliha nrima apinaatamu, kontha nyuuva khannonthanla ntthu oopheela umwiitthuciha.
17 Vano, yahomwiirela co: Nnoonela cani? Unaatthunihiya awula mena unliva nsokho Seesari?”
18 Vano, Yesu ucuwela wawe itthu yoohinamaana yoopuwelaaya wanrimani waya, uyo ahowiirela: “Anamootha, kontha isiyani nnokittehatteheenyu?
19 Nkoonihere nsurukhu unliveliya nsokhooyo.” Vano ahowaaneliya itenaariyu imoca.
20 Yesu ahaakoha co: “Ila ilataratweela va ni nna ncinanna naapani?”
21 Vano ayo yahaakhula: “Ca Seesari.” Vano Yesu ahowiirela co: “Munvahe Seesari ikhanle ya Seesari ni munvahe Nluku ikhanle ya Nluku.”
22 Wiiwa waya iyo, yahokhala ootikhinihiya ni yahorwaa.
23 Nenno nihukunno, masatuseu yahaakupali wunwelelihiya waatthu, yahorwaa mpaka nipuro naaryaawe Yesu, ni yahonkoha:
24 “Mwiitthucihi, Moceesi eerale: ‘Wakhalaka wiira nlopwana oothela naakhwa woohaayarana asaana amwaarawyaayo, mwanhimaawe haana anthelaka uyo nankhwelyuuyo, wiira anyarele asaana ule khwile.’
25 Nahaana va alopwana 7, ntthu nimwanhimaawe. Oopacerooyo ahaathela athiyana ni ahokhwa, ukhala wiira aakhwile hinaaya waayarana asaana, mwanhimaawe ahaathela ayo athiyanaayo.
26 Itthu imocaaru, yahomwiirannyeela onayeelyuuyo ni ooneeraruuyo, otheene caya yahokhwaaca woohaayarana mwaana.
27 Nuuwakatyaaya, athiyanaayo ciicammo yahokhwa.
28 Vano, waphiyaka ukati unhalaaya wunwelelihiya atthu, iriyari wo ala alopwanaala, tipani nhala ukhala amwaarawe? Ukhala wiira otheene yahaathela.”
29 Yesu ahowaakhula eeraka: “Nnawiithepya, kontha khannocuwela Cowantikhiya Cowaarya ni hataa ikuru ca Nluku;
30 kontha waphiyaka ukati unhalaaya wunwelelihiya atthu, alopwana khanhala uthela ni athiyana khanhala utheliya, masi anhala ukhala khampa malayikha owiirimu.
31 ‘Nhina yoola mwaha wowunwelelihiya atthuula, nyuuva khansomile itthu yuulumacilyaawe Nluku eeraka:
32 ‘Mi kikhanle Nluku a Aparahaamu, Nluku a Isaaki ni Nluku a Yakopi?’ Uyo khanakhala Nluku atthu ookhwa, masi atthu akumi.”
33 Atthwaayo wiiwa waya iyo, yahokhala ootikhinihiya nimananna ceetthucihaawe.
34 Mafariseu wiiwa waya wiira masatuseu yahomaalihiya ni Yesu, ayova yahothukumana.
35 Vano, nlopwana mmoca nfariseu aacuwela sana-saana Malamulo, ahonkoha itthu wiira anttehe:
36 “Mwiitthucihi, nlamuloni nitepile ukhala nuulupale?”
37 Uyo ahomwaakhula amwiirelaka: “‘Unfente Yehova Nlukwaa, ninrimaa wotheene, niiroohwaa yotheene ni nimopuwelelwaa otheene.’
38 Nna phiri nlamulo noopacera ni nofayita cinene.
39 Nonayeeli ninlikana ninno, phi nna: ‘Unfente nkhunanaa khampa cineefentaa.’
40 Malamulo ni marumo yantikhilyaawe Moceesi ni maporofeeta, phinlipihereraaya ala malamulo meelyaala.”
41 Vano, mafariseu anathukumanneene, Yesu ahaakoha co:
42 “Nyuuva mwaatthiva nnomoonela cani Kristu? Ni mwaana aapani?” Ayo yahaakhula yiiraka: “Mwaana a Davidi.”
43 Uyo ahaakoha co: “Vano kontha isiyani Davidi ahooleliyaka ni nnepa wowaarya, nomwiirelaawe Pwiiya, eeraka:
44 ‘Yehova howiirela apwiiyaka: “Monkome moonwaaka wonlopwana, mpaka wanhalaaka uweesa awanannyaka vathi inyaa caa”’?
45 Vano, ukhala wiira Davidi nomwiihana Pwiiya, nokhala cani mwanawe?”
46 Vano, khaavo aakhitiri umwaakhula hataa ninuulumo nimoca paasi, ni ukhuma nne nihukunne khaavo ankoha-tho itthu.
