Ihapari Comaana Cantikhiye ni Matewus 20:1-34
20 “Kontha Umwene wo wiirimu unlattanaca ninlopwana aakhumile wicisu, wiira awaavye atthu oovara nteko mmattani wawe yo uuva.
2 Waaleehanana wawe wiira khula ntthu aahala unliva itenaariyu imoca khula nihuku, ahowiirela wiira pooti waarwaaya wancera uvara ntekooyo.
3 Ahalaka vakaani uruma 9 oora oowicisu, ahowoona-tho atthu aneemenle wasittatti yahoonaka itthu yoovara,
4 ni uyo ahowiirela: ‘Nyuuva ciicammo pooti urwaa uvara nteko mmattani waka yo uuva, ni miiva kinaahala wuuvahani nsurukhu unhala wuuphwanelani waakhela.’
5 Ayo atthwaayo yahorwaa. Vano, uyo ahokhuma-tho 12 oora ni ahokhuma-tho 15 oora, arwaaka uwaavya-tho atthu akhwaawe.
6 Vano waaphiyalyaaya 17 oora, ahokhuma-tho ikwaha yoomalela, ni nwo ahaaphwanya atthu akhwaawe aneemelacile ni uyo ahaakoha: ‘Kontha isiyani nihuku notheene nkhanleenyu va woohivara itthu?’
7 Ayo yahaakhula yeeraka: ‘Kontha khaavo wile unuulumana wiira nanvarele nteko.’ Vano uyo aheera: ‘Ni nyuuva ciicammo pooti urwaa uvara nteko mmattani waka.’
8 “Wiila waya, mwaneene imattooyo ahomwiirela ule aahoolela anantekwaayo: ‘Wawiihane ananteko ni waalive nsurukhuuyo, waapacereke ale kaamalenlyaaka uwiihana, vano waamalihereke ale kaapacenryaaka uwiihana.’
9 Waawilyaaya ananteko yaalattuliye 17 oora, khula nanteko aavahiye itenaariyu* imoca.
10 Vano waawilyaaya ananteko yaapacenre wiihaniyaale, ayo yoopuwela wiira phaahala waakhela nsurukhu mwinci, masi naayova ciicammo yaakhenle itenaariyu imoca-imoca.
11 Waakhela waya nsurukhuuyo, yahancera unroka mwaneene imattooyo,
12 ni yaheera: ‘Ala alopwana oomalelaala, avanre nteko iwoora imoca paasi, masi mwaalivile nsurukhu mmocaaru nuule hiivano waakhenleehu, unookhalaru wiira hiivano nihovara nteko mwinci ni nihovilela ncuwa ninci!’
13 Vano mwaneene imattooyo ahomwaakhula mmocooyo amwiirelaka: ‘Mpatthani, akinoopankaka itthu yoohisariya hataa vakaani. Keera vaavale naaleehanne wuuvaha itenaariyu imoca?
14 Ucise uri wawaa ni urwee, mi kimpheela unliva ula oomaleloola, nsurukhu mmocaaru kuulivilyaaka weeva.
15 Mi akirina isariya yoopanka itthu kimpheelaaka ni citthu caka? Awula, unwoonela nttima ala alopwanaala nlattu kihowaathoonyera unamaana?’
16 Ciicammo, oomalihera anhala ukhala oopacera ni oopacera anhala ukhala oomalihera.”
17 Yesu naattharyaawe 12, anari niiphiro yarwaaka u Yerusalemu, ahowiirela:
18 “Nkiviriyane, va ninrwaa u Yerusalemu, naphiyaka nwo Mwaana a Pinaatamu naahala uhuvihaciya naahooleli aanankuttho, wamoca naanamantikha. Ni ciicammo ayo anaahala unleva wiiviya,
19 ni anaahala uvahiya amalaponi wiira antarawace, amuufyulace ni wiira aamwiive, masi nihuku ninhalaawe upiihera mahuku mararu nakhwile, naahala wunwelelihiya.”
20 Vano, amwaara a Sepeteu wamoca naasaanaaya, yahorwaa mpaka nipuro naaryaawe Yesu ni yahonlepela itthu.
21 Uyo ahaakoha: “Nnopheelani?” Ayo yahaakhula yeeraka: “Kinoolepelani wiira Muumweneni winyu, ala asaanaakaala yonkome mmocooyo moonweenyu wonlopwana ni nkinooyo moonweenyu wonthiyana.”
22 Yesu ahaakhula eeraka: “Nyuuva mwaatthi va khannocuwela itthu inlepheleenyu. Kiireke wiira nnaahala ukhitiri uwurya ile inhalaaka uwurya mwamphiyaaruni?” Ayo yaheera: “Ninaahala ukhitiri.”
23 Vano Yesu ahowiirela: “Khweeliini, nyuuva nnaahala ukhitiri uwurya ile kinhalaaka uwurya, masi kahi thi mi kinonthanla ntthu nolamuliya ukhala moonwaaka wonlopwana awula wonthiyana. Ayo mapurwaayo anonkoma ale athanliye Naapaapa.”
24 Vano atthari 10 wiiwa waya iyo itthwiiyo, yaahokasiriya cinene nlattu wo ale atthari eelyaale.
25 Yesu ahowiihana ni ahowiirela: “Nyuuva nnaacuwela wiira ahooleli anawaalawa atthu anaaholelaaya ni atthu oottitthimihiya anawaaholela ayo atthwaayo.
26 Masi nyuuva khannolamuliya ukhala ciicammo, ule nopheela ukhala muulupale iriyariinyu, haana akupaliki ukhala ipottheenyu,
27 ni ule nopheela ukhala oopacera iriyariinyu, haana akupaliki ukhala ipottheenyu
28 toko Mwana a Apinaatamu hiwenlyaawe uvareliya nteko, masi wile waavarela nteko atthu ni uvaha ukumyaawe, wiira awoopole atthu enci.”
29 Ukati Yesu naattharyaawe waakhumaaya u Jeriko, ahotthariya naatthu enci.
30 Vano alopwana eeli yonkomile nseresere iparapaara, yaheewa wiira Yesu aanaavira, phimaana ayo yahokhuwela yiiraka: “Pwiiya, Mwaana a Davidi, nnoonele ikiriri!”
31 Masi atthu yanttharaayo yahaapwapwela, yawiirelaka wiira amaale. Uhookhalaru commo, ayo yahokhuwela-tho venci yiiraka: “Pwiiya, Mwaana a Davidi, nnoonele ikiriri!”
32 Vano Yesu aheemela, ahowiihana ayo alopwanaayo ni ahowiirela: “Nnopheela wiira kuupankeleni isiyani?”
33 Ayo yahomwaakhula: “Pwiiya, ninawuulepelani uvoniha meethweehu.”
34 Yesu ahowoonela ikiriri ni ahaakwanya meethwaaya, ni woohipica ayo yahancera woona ni yahontthara.
Notas
^ Nwehe Moolumo o Mbiibiliyani Ootaphuleliya.
