Ihapari Comaana Cantikhiye ni Joau 5:1-47
5 Nuuwakatyaaya Yesu ahorwaa u Yerusalemu, ukhala wiira nwo yahaavo ifesta* Yaayuuta.
2 U Yerusalemu, waattamela wankhorani wokhontwaa, yahaavo itanki yaakhikiceriya nimapotto mathanu, iyo itankiiyo niiheperewu yeehaniya Petesaata.
3 Nenno nipuro nno yaheecatalela atthu yaawerennya, yahoona, yaattumpela ni atthu owuntakya.*
4 ——
5 Ni nenno nipuro nno, ahaavo nlopwana aavirihile myaakha 38 awerennyaka.
6 Yesu umoona wawe uyo nlopwanooyo neecaatalenle, ni ucuwela wawe wiira ahoviriha myaaka cinci awerennyaka, ahonkoha co: “Unaapheela uvona?”
7 Vano nlopwanooyo ahaakhula eeraka co: “Pwiiya, mi akirina ntthu wiira akicusihere utankininwo maacyaayo yatekhumaka vale; masi ukati uneeraka wiira kicusereke, naawa ntthu uhoolo nwo ukittiyelela.”
8 Yesu ahomwiirela: “Wumwe! Ucise ntthatto nanno ni urweeke”
9 Ni woohipica uyo nlopwanooyo ahovona. Ahocisa ntthattonawenno ni ahorwaa.
Nenno nihuku nno naari isaapatu.
10 Nlattu wookhala nihuku no isaapatu, ayuuta yahanca umwiirela nlopwana aavonihiyooyo co: “Nyuuva, ilelo isaapatu; khuntthunihiya ntthu uteesa ntthatto.”
11 Uyo ahaakhula, eeraka: “Nlopwana kivonihilyooyo phikiirenle: ‘Uciseke ntthatto nanno ni urweeke’”
12 Ayo yahonkoha co: “Tipani yooyo wiirenlyooyo: ‘Uciseke ntthatto nanno ni urweeke?’”
13 Masi uyo nlopwanooyo, khancuwenle tipani anvonihile, ukhala wiira Yesu aahorimyarimya iriyari yaatthu yaari nne nipuro nne.
14 Wiirannya waya iyo itthwiiyo, Yesu ahonkumanana-tho ntempulu uyo nlopwanooyo ni ahomwiirela: “Uhoona, uhovona! Uhivare-tho matampi, wiira ihiwiirannyeele itthu yootepa uvikana ile iretta waarineele.”
15 Nlopwanooyo ahorwaa ni ahaahimerya ayuutaayo wiira Yesu phanvonihile.
16 Phimaana ayuuta yanlupatthaaya Yesu, ukhala wiira uyo aapanka nnyo citthunnyo isaapatu.
17 Masi uyo ahowaakhula eeraka: “Apaapa ari moovara nteko mpaka nna va, ni miiva ciicammo kiri moovara nteko.”
18 Phimaana, ayuuta yammwaavya wiira amwiive, kontha uhiya paasi uvara miteko isaapatu, uyova ciicammo ammwiihana Nluku Apaapa, eekhalihaka khampa Nluku.
19 Nlattu wo iyo itthwiiyo, Yesu ahowiirela: “Kinoohimeeryani ikhweeli: Mwaana khiivo inlamuliyaawe upanka yonkhumakhuma veekha cawe, masi uyo nopanka ile nowoonaawe athumwaane yapankaka. Kontha citthu cotheene ayo ampankaaya, mwaanooyo ciicammo phimpankaawe.
20 Kontha athumwaane ananfenta mwaanooyo ni ananthoonyera miteko cotheene cinvaraaya, ni anaahala unthoonyera miteko cuulupale cinhalaaya uvara uvikana cinvaraaya nna co, wiira nyuuva nkhale ootikhinihiya.
21 Toko vaavale athumwaane anwunwelelihaaya atthu ookhwa ni yaavahaka ukumi, ciicammo mwaanooyo nawaavaha ukumi ale naapheelaawe.
22 Kontha athumwaane khanonhukhumu ntthu, uyo ntekooyo ayova anvahacenre mwanaya,
23 wiira atthu otheene anttitthimihe mwanaya, khampa cinaattitthimihaaya athumwaane. Ale ahinonttitthimiha Mwanaya khanaattittimiha ciicammo Athumwaane anrumile.
24 Kinoohimyeerani ikhweeli wiira: Ule noviriyana moolumwaaka ni nonkupali ule kirumile, naahala uphwanya ukumi woohimala ni khanhala uhukhumwiya, masi hokhuma muukhwaani ni horwaa muukumini.
25 “Kinoohimyeerani-tho ikhweeli wiira: Unaahala uphiya ukati, ni uyo ukatyuuyo uhophiya, atthu akhwile anhalaaya wiiwa ncu na Mwaana a Nluku, ni ale anhala uviriyana anaahala ukhala akumi.
26 Kontha khampa Athumwaane arinaaya ikuru yoovaha ukumi, ciicammo ahonvaha Mwanaaya ikuru yoovaha ukumi.
27 Ni ciicammo ahonvaha ukhulupale woohukhumu, kontha uyo Mwaana a Pinaatamu.
28 Ihuutikhiniheni iyo itthwiiyo, kontha unaahala uphiya ukati atthu otheene ari mmahiye anhalaaya wiiwa ncu nawe
29 ni anaahala ukhuma: Ale apankile citthu comaana, anaahala ukhuma wiira akhale akumi; ni ale apankile citthu cootakhala, wiira ahukhumwiye.
30 Khiivo itthu inlamuliyaaka upanka yookikhumakhuma miiva. Mi kinhukhumu khampa Apaapa cikihimyeenryaaya, ni uhukhumu waka ukhanle wosariya, kontha akinaavya upanka citthu cinkicivela miiva, masi citthu cinaacivela ale akirumile.
31 Miiva keecuulumaka waatthuni, ale anhala ukiiwa khanhala ukikupali.
32 Haavo ntthu nkhwaawe nokuuluma miiva, ni kinaacuwela wiira itthu noolumaawe akaacaka miiva, ikhanle ikhweeli.
33 Nyuuva mwahaaruma atthu wiira yamuulumane Joau, ni uyo ahooluma citthu ceekhweeli akaacaka miiva.
34 Masi mi akimpheela wiira ntthu akuulume, kinoohimyeerani nnya citthunnya wiira moopwee.
35 Uyo nlopwanooyo ari khampa ilampata yoopharela ni yowaarya, ni nyuuva mwahopheela utteeliya nlattu woluuswaawe, masi nwo upheelanwo khuwaapicile umala.
36 Mi kihaana itthu yofayita cinene uvikana ile ihimilyaawe Joau, kontha citthu cikirumilyaaya Apaapa upanka ni citthu cinvaraaka, cinawoonihera wiira ayova phikirumile.
37 Ni Apaapa yaayo akiveleelihile, ahohimyaca miiva kimpani. Nyuuva mwaatthi khannapaca wiiwa ncu naya ni khannatoko woona ikhovyaaya,
38 ni nuulumo naya khamweesile wanrimani winyu, kontha khannomwaamini ule anrumilyaaya.
39 “Nyuuva nnaasomasoma Cowantikhiya Cowaarya moonihaka toko wiira nnyo cinaahala wuuphwanyihani ukumi woohimala, ni nnyo cinaakuuluma miiva.
40 Masi, nyuuva khannotthuna ukitthara wiira mwaakhele ukumi woohimala.
41 Miiva akimpheela uttitthimihiya naapinaatamu,*
42 kinaacuwela sana-sana wiira nyuuva khannonfenta Nluku.
43 Miiva kiwile mwancina Naapaapa, masi nyuuva khankaakhelenle. Unari wiira ahaavo ntthu nkhwaawe aawile mwancina nawe, nyuuva mwanhala umwaakhelela.
44 Vano mwaahala ukikupali cani miiva ni nyuuva nttitthimihanaka ayaayoru, ni nhaavyaka uttitthimihiya ni Nluku mmoca paasi?
45 Nhoonihe toko wiira kinaahala wuukasarini Waapaapa; masi haavo nohala wuukasarini: Moceesi, yooyo nonkhuluveleenyuuyo.
46 Khweeliini, mwaamwaamini Moceesi, ni miiva mwanhala ukaamini, kontha Moceesi hantikha akuulumaka miiva.
47 Masi, wakhala wiira khannaamini citthu cantikhilyaawe, nnohala waamini cani itthu inhimyaaka?”
