Iwarakha yoopacera yantikheliyaaya akorintu 8:1-13
8 Vano, nuulumaka icoolya coovahereriya anluku oohikhweeli: otheene cihu ninaacuwela uyo mwahooyo. Ucuwelaca unaamwiiriha ntthu wiicoona,* masi nifento ninaalipiha.
2 Wakhala wiira ntthu nawuupuwela wiira ihaavo itthu incuwelaawe, uyo ntthuuyo khanaaya ucuwela inanna yaalamuliyaawe ucuwela.
3 Wakhalaka wiira ntthu nanfenta Nluku, uyo ntthuuyo naacuweliya ni Nluku.
4 Kuulumaka icoolya cinvahereriya anluku oohikhweeli, hiiva ninaacuwela wiira anluku oohikhweeli, khaarina ifayita hataa vakaani mu ntuniyani mu ni khaavo-tho nluku eekhweeli, masi ri mmoca paasi.
5 Kontha hataa ukhalaka wiira wiirimu ni watuniyani ahaavo aneehaniya anluku, toko ciryaaya “anluku” ni “mapwiiya” enci,
6 ni hiiva ninaakupali wiira rivo Nluku mmoca, Apaapeehu yumpile citthu cotheene, ni hiiva numpile wiira nikhale awawe; ni rivo Pwiiya mmoca, Yesu Kristu, anrumilyaawe Nluku wumpa citthu cikhwaawe cottheene, ni hi nirivo nlattu waawawe.
7 Kahi wiira atthu otheene anaacuwela iyo itthwiiyo. Ale yaaswalela khalayi anluku oohikhweeli, ukati anlyaaya iyoolya anvahereriya anluku oohikhweeli, ayo anoopuwela wiira anonswalela nluku oohikhweeli, ni nlattu woohilipa nhina mmoopuweleloni, ayo anawuupuwela wiira ahottheka.
8 Masi, kahi iyoolya phinniiriha umwaataanana Nluku; kontha hataa naahilyeeke, khiivo inhaleeleehu ni nalyaaka khiivo imphwanyeehu.
9 Ratta, wiira citthu cinlakeleenyu upanka, cihaakakathule ale akhanle oololovaca nhina mmoopuweleloni.
10 Kontha wakhalaka wiira nyuuva nnocuwela ila itthwiila, nnaalya ntempuluni ya nluku oohikhweeli, niireke ale ari oohilipa nhina mmoopuweleloni khannohala uwiiriha ulya icoolya anvahiya anluku oohikhweeli?
11 Coo, nlattu woocuwelaca winyu, waamini wa munneenyu oohilipa nhina mmoopuweleloni oopoliye ni Kristu, unaavukuwaca.
12 Mwaakoseraka mayamunneenyu ni mwaakakathulaka, nnonkosera Kristu.
13 Phimaana, wakhalaka wiira ihaavo iyoolya inonkakathula munnaaka, akinhala ukhuura-tho iyo inameeyo, wiira kihinkakathule munnaaka.
Notas
^ Awula: “wiittenca.”
