TUNDL 5
Bɛ po i g Yendu tag tinŋ i?
1. Bɛ po i g Yendu tag tinŋ i?
Jeofa tag tinŋ g tie niib i. L tie t binbebuol i. U bo g tag nicincinna Adam yen Ɛf g bua ban mal g gbien polu kaa, u bo tag malɛg-nba i g bil’b polu po. (Sɔb 38:4, 7, MN) U bo tug jacincinn nba k u bo tag’o nyan g bil’o paradi n ninŋ i. B bo yi l buol i Edɛnn gɔglug. (Cilg 2:15-17) Jeofa bo bua Adam yen u bid ń gii be tinŋ po g daa ban g kpe i.—Lii Tuona 17:26; 1San 2:17.
Cilg youg, Edɛnn gɔglug kukua n bo tie paradi. Adam yen Ɛf n bo bu mal g gbien tinŋ kul. Banm yen b bid n ji bo baa ŋami tinŋ waam waam tinŋ kul n tan kpand paradi. (Cilg 1:28) Tinŋ kan ban g biɛl. L baa l tie niib binbebuol i youg kul.—Lii Matieog 5:5.
2. Bɛ po i g tinŋ g tie paradi dinne i?
Adam yen Ɛf bo g cenŋ Jeofa. L po n bo te g Jeofa bo bel g nyan’m Edɛnn gɔglug n ninŋ. Paradi ji bo bod, baa sua g fid g te g tinŋ guan g kpand paradi. Nyan Biibl n maad nand nyan, “tinŋ ji be bonbiildaan nui n ninŋ i”.—Sɔb 9:24, MN.—Lii Cilg 3:23, 24.
Jeofa ji bo nyɔl wan bo bobn k u bu tien yal niib po yaa? Ɛn ɛn! U tie paaciɛnudaan i. Siɛl kan fid g paad’o. (Esaayi 45:18, MN) U bu guan g tien wan bo bobn k u bu tien yal niib po.—Lii Rom Kristo-yab 8:21.
3. Yendu bu tien nle i tinŋ n guan g kpand paradi i?
Youg nba g Yiesu tan bu te tinŋ bad i g tinŋ bu guan g kpand paradi. Tɔb nba g Biibl yi Armagedɔn nyan youg gii pund, Yiesu bu gaal Yendu malɛg-nba liig g biɛn yab g cenŋ Yendu kul. L puol po Yiesu bu suol Sitaan g luon’o dansalg bina tudl. L tɔb youg, Yendu tuonsunna nuan bu la fielu g dugn Yiesu bu ŋmagd’b g biɛ guul’b. B bu la miɛl nba g mɔg gbennu paradi n ninŋ tinŋ po.—Lii Dɔgdu 20:1-3; 21:3, 4.
4. Cicagm bu gbenn bɛ youg u?
Bɛ youg u g Yendu bu nyan fala tinŋ po i? Yiesu bo ŋɔn’ti “bonn nba bu ŋɔn” g ŋanduna ne juodyoug ji g fag. Bona nba tie ŋanduna ninŋ dinne saa g lan biɛn niib kul tinŋ po i. Lann mɔno n ŋɔnŋ g “ŋanduna ne juodyoug ji g fag.”—Lii Matieog 24:3, 7-14, 21, 22.
Yiesu bal tinŋ po bu gaal bina tudl i. L youg, u tan baa be polu po yo g nyan cicagm kul ŋanduna n ninŋ. (Esaayi 9:6, 7; 11:9, MN) U tan baa tie Bad yen Salg yidkab kul ciɛn i, nnyan i k u bu fid g piin yab nba kul bua Yendu biid. Yendu tan bu te Yiesu i n nyan yiɛlu, ciɛndug yen kuum.—Lii Esaayi 33:24, MN; 1 Korɛnt Kristo-yab 15:26.
5. Ŋmaa n tan baa be paradi n ninŋ i?
A gii baal Diem Dieog buol, a bu la niib nba bua Yendu g biɛ kpaan ban bu tien nand g manŋ u pal
Yab cenŋ Yendu n tan baa be paradi n ninŋ. (1 San 2:17) Yiesu bo sun u ŋuantieb k ban gad g kpaan danm nba jiind b kua g tund’b ban bann ban bu tien yal nba Yendu pal ń gii man b po. Dinne Jeofa tod niib bonciɛnn g ŋɔnŋ’b ban bu lebd b binbem nand nba g la miɛl paradi n ninŋ tinŋ po. (Sofoni 2:3, MN) Jeofa Sieda-nba Diem Died buol, niib banŋd nand nba k b bu fid g te ŋaagdanm nba mɔn, puob nba mɔn g biɛ gii tie bidanm nba mɔn. L buol, bidanm yen b bid taand g dond Yendu g biɛ banŋd nand nba g laabamann nba be Biibl n ninŋ bu fid g tod’b.—Lii Dɔgdu 15:4.
