TUNDL 4
Ŋmaa n tie Yiesu i?
1. L cil cil nle i g Yiesu tan be i?
Bɛ n bo te g niib g jie yen ban nagn Yiesu i?—MATIEOG 11:29; MARK 10:13-16.
Yiesu yaa miɛl g cil nyan nilieb nyan kaa. G fid wan baal tinŋ po, u bo tie malɛg i g be polu po. (San 8:23) Yendu bo cind g tag wano i, k u mɔ ji tod Yendu k u tag bonliel-nba kul. Yendu mɔno n tag Yiesu, sua g tod’o k u tag’o. L po n te k b yi Yiesu Yendu “bijayenml.” (San 1:14) Yiesu n bo tie Yendu Sundu, l po n te k b yi’ug “Maam.”—Lii Makpanjanm 8:22, 23, 30, MN; Kolɔs Kristo-yab 1:15, 16.
2. Bɛ po i g Yiesu bo baal tinŋ po i?
Yendu bo tug u Bija miɛl hal polu po yo g kuan sipaan nne tug n. B bo yi l sipaan Mari i k u tie Suif g g ban jua. L po n te g Yiesu bo g mɔg baa tinŋ po. (Luk 1:30-35) Bona ŋantaa n baal yen Yiesu tinŋ po ne: (1) U baal k wan tund niib mamɔni i Yendu po, (2) g niib n la u buol i g bann nand k b bu fid gii tie Yendu buam baa l gii sua k b be maba n ninŋ, (3) k wan tug u miɛl nba ŋan g gbenn g ‘yid salg g fiel’ niib.—Lii Matieog 20:28.
3. Bɛ po i k l bo bual g sua ń yid u miɛl salg t po i?
Fielu pann tie pani nba k b tu pa g nyan nil kuum fiɛl n ninŋ i. (Israyɛl Nyanu 21:29, 30) Cilg youg, Yendu bo g bua niib ń gii ciɛnd g biɛ kpenn. Bɛ po n te k t ban k u bo g bua i? Yendu bo maad wan bo cind g tag nil nba k b yi’ug Adam nyan k u gii tien biid u bu kpe i. L ŋɔn k Adam bo gii g tien biid u bo kan ban g kpe. (Cilg 2:16, 17; 5:5) Biibl maad k Adam po i g biid “kua” ŋanduna n ninŋ. Adam n luan u bid yen u yaabuona kul biid g biid baal yen kuum. L po n te k l bo mɔn g sua ń tug u miɛl g pa g nyan’ti kuum nba k Adam kuan’ti nyan ninŋ.—Lii Rom Kristo-yab 5:12; 6:23.
Ŋmaa n bo bu fid g paa fielu pann g nyan’ti kuum n ninŋ i? Youg nba g nil kpe, u tu pa u yaa kukua biid pann i. Adam yaabuona n ninŋ, sua kan fid g kpe g pa u lieb biid pann g dugn t kul mɔg biid.—Lii Rom Kristo-yab 3:23.
4. Bɛ po i g Yiesu kpe i?
Yiesu nuan bo g mɔg biid. L bo g bual k wan kpe g dugn u bo g ban g tien biid. U bo kpe lieb biid po i. Yendu bo ŋɔn k u bua niib bonciɛnn g sun u Bija k u kpe t po. Yiesu mɔ bo ŋɔn k u bua niib bonciɛnn g cɔln u baa g baal g kpe t biid po.—Lii San 3:16; Rom Kristo-yab 5:18, 19.
5. Yiesu suun bɛ i dinne i?
Yiesu n bo be tinŋ po, u bo paag yiɛm, g yied kpiem g biɛ tod danm nba bo be maba n ninŋ. U bo tien nnyan g bua wan ŋɔn wan tan bu tien yal g tod danm nba be fala n ninŋ i. (Matieog 15:30, 31; San 5:28) Yiesu n bo kpe, Yendu bo guan g yied’o g ji tie’og foŋanm gbannand i. (1 Korɛnt Kristo-yab 15:44) L puol po g Yiesu kaln Yendu nuujendu po g guul saa yen youg nba g Jeofa din’o bal tinŋ kul po. (Ebro-nba 10:12, 13) Dinne, Yiesu tie bad i polu po k u ŋuantieb muand u bal laabamann ŋanduna n ninŋ kul.—Lii Dɔgdu 11:15; Matieog 24:14.
L ji kan wai, Yiesu bu tug yikod nba k u mɔg nyan g nyan cicagm kul ŋanduna n ninŋ g biɛ biɛn danm nba kuand lieb cicagm n ninŋ. Danm nba ŋɔnŋ b bontitied n ninŋ k b dug Yiesu po g cɔln u maam tan bu la miɛl nba g mɔg gbennu paradi n ninŋ tinŋ po.—Lii Biɛyani 37:9-11.
