Kan gran soufrans pou arive, bann dimounn pou konn peryod pli difisil ki zame finn ena. Dapre profesi ki ena dan Labib, sa pou arive pandan “bann dernie zour,” ouswa dan “lepok lafin.” (2 Timote 3:1; Daniel 12:4) Sa pou “enn gran soufrans kouma zame pa finn ena avan, depi koumansman lemond ki Bondie inn kree ziska zordi, ek ki zame pa pou ena ankor.”​—Mark 13:19; Daniel 12:1; Matie 24:21, 22.

Bann levennman pandan gran soufrans

•   Fos relizion pou detrir. Enn sel kout koumsa, fos relizion pou detrir. (Revelasion 17:1, 5; 18:9, 10, 21) Se bann gouvernman sa lemond-la, ki reprezante par l’Organisation des Nations Unies (ONU), ki pou fer sa ek sa pou akonpli Bondie so volonte.​—Revelasion 17:3, 15-18. a

•   Pou atak vre relizion. Dan enn vizion ki Ezekiel ti gagne, li dir ki “Gog ki sorti pei Magog,” setadir plizir nasion ki’nn zwenn ansam, pou esey detrir tou bann ki pratik vre relizion. Me selman, Bondie pou protez so bann adorater ek li pa pou permet ki detrir zot.​—Ezekiel 38:1, 2, 9-12, 18-23.

•   Pou ziz tou bann dimounn lor later. Zezi pou ziz tou bann dimounn ek “li pou separ bann dimounn sakenn ar so kamarad, parey kouma enn berze separ bann mouton ar bann kabri.” (Matie 25:31-33) Zezi pou gete si sak dimounn inn soutenir so bann “frer,” setadir bann ki pou al regne ansam avek li dan lesiel, ek li pou ziz sak dimounn dapre sa.​—Matie 25:34-46.

•   Pou rasanble bann dirizan Rwayom Bondie. Bann dimounn fidel ki finn swazir pou al regne ansam avek Lekris, zot lavi pou termine lor later ek zot pou resisite pou al viv dan lesiel.​—Matie 24:31; 1 Korintien 15:50-53; 1 Tesalonisien 4:15-17.

•   Armagedon. Sa “lager gran zour Bondie Tou-Pwisan” la, li osi apel “zour Zeova.” (Revelasion 16:14, 16; Izai 13:9; 2 Pier 3:12) Bann ki pou gagn enn move zizman ar Lekris, pou detrir. (Sofoni 1:18; 2 Tesalonisien 1:6-10) Parmi bann ki pou detrir, pou ena osi sistem politik mondial, ki Labib dekrir kouma enn bebet sovaz ki ena set latet.​—Revelasion 19:19-21.

Bann levennman apre gran soufrans

•   Pou anprizonn Satan ek so bann demon. Enn anz pwisan pou zet Satan ek so bann demon “dan trou san fon,” setadir zot pou dan enn leta inaktif koumadir zot inn mor. (Revelasion 20:1-3) Kan pou zet Satan dan trou san fon, li pou koumadir dan prizon ek li pa pou kapav ena okenn linflians lor okenn kitsoz.​—Revelasion 20:7.

•   Regn Mil An koumanse. Rwayom Bondie pou koumans so regn 1,000-an, ek sa pou fer bann dimounn lor later antie gagn boukou benediksion. (Revelasion 5:9, 10; 20:4, 6) Enn “gran lafoul” ki personn pa kapav konte pou “travers gran soufrans”; zot pou reisi sirviv ek zot pou trouv Regn Mil An koumanse lor later.​—Revelasion 7:9, 14; Psom 37:9-11.