Non. Dan Labib, ena plizir lexanp bann relizion ki pa fer Bondie plezir. Sa bann relizion-la fer de kitsoz ki Bondie pa kontan.

Nimero 1: Ador bann fos bondie

 Labib dir ki kan nou ador bann fos bondie, se enn kitsoz ki “pa vo nanye,” ki “pa itil,” ek ki “pena valer.” (Zeremi 10:3-5; 16:19, 20) Zeova a ti donn sa lord-la nasion Izrael: “Fode pa to ena lezot bondie apart mwa.” (Exod 20:3, 23; 23:24) Kan bann Izraelit ti ador bann lezot bondie, “Zeova ti bien ankoler.”​—Nonb 25:3; Levitik 20:2; Ziz 2:13, 14.

 Azordi osi, Bondie ena mem santiman anver sa bann “swadizan” bondie-la. (1 Korintien 8:5, 6, NTKM; Galat 4:8, NTKM) Li donn lord bann dimounn ki anvi ador Li, pou aret frekant bann ki pratik fos relizion. Li dir: “Separ zot ar sa bannla, res alekar.” (2 Korintien 6:14-17, NTKM) Si Bondie ti aksepte tou bann relizion, kifer Li ti pou donn sa lord-la?

Nimero 2: Ador vre Bondie dan enn fason ki Li pa kontan

 Parfwa, bann Izraelit ti ador Bondie dan mem fason ki bann lezot dimounn ti ador bann fos bondie. Me Zeova pa ti aksepte ki melanz vre relizion avek seki fos. (Exod 32:8; Deteronom 12:2-4) Zezi ti kondann bann sef relizie dan so lepok akoz fason ki zot ti pe ador Bondie. Zot ti pe fer krwar ki zot relizie, me zot ti bann ipokrit. Kifer? Parski zot ti “negliz seki pli inportan dan lalwa, lazistis e mizerikord ek fidelite.”​—Matie 23:23, NTKM.

 Li parey osi azordi, sel relizion ki Bondie aksepte, se enn relizion ki so lansegnman baze lor laverite. Sa laverite-la li sorti dan Labib. (Zan 4:24, NTKM; 17:17, NTKM; 2 Timote 3:16, 17, NTKM) Bann relizion ki pa ansegn mesaz ki ena dan Labib, an realite, elwagn bann dimounn ar Bondie. Boukou lansegnman ki bann dimounn krwar sorti dan Labib, an realite sorti dan bann relizion ki ti ador bann fos bondie. Parmi sa bann lansegnman-la ena: Trinite, lanfer, ek ki nam pa mor. Bann relizion ki ansegn sa bann kitsoz-la, zot ladorasion li dan vid” ouswa initil, parski zot ranplas bann komannman Bondie ar tradision bann zom.​—Mark 7:7, 8, NTKM.

 Bondie deteste bann relizion ki ipokrit. (Tit 1:16, NTKM) Pou ed bann dimounn vinn pli pros ar Bondie, fode pa ki enn relizion li zis bann tradision ouswa enn formalite. Li bizin ena enn lefe lor lavi bann dimounn. Par exanp, Labib dir: “Si kikenn krwar li enn relizie e li pa vey so lalang, li pe tronp limem, so larelizion pena okenn valer. Ala seki Bondie Papa konsider kouma vre relizion ki pena okenn tas: pran swin bann orfelin ek vev dan zot soufrans e pa les zot kontamine par lemonn.” (Zak 1:26, 27, NTKM) Labib King James Version servi lexpresion “relizion pir,” pou sa ladorasion ki prop ek ki pa ipokrit-la.