Mo’nn grandi dan enn kartie pov dan lavil Montréal. Kan mo ti ena sis mwa, mo papa ti mor, lerla mo mama tousel ti bizin asim bann responsabilite familial. Ti ena wit zanfan dan nou fami ek momem ti pli tipti.

Mo ti grandi dan enn lanvironnman kot ti ena ladrog, zwe larzan, laviolans, ek mo ti frekant bann bandi. Kan mo ti ena di-z-an, mo’nn koumans travay pou bann prostitie ek pou bann eskro ki pret kas ek pran enn gro lintere. Souvan mo ti koz manti ek mo ti extra kontan pou anbet dimounn dan ninport ki fason malonet. Sa ti kouma enn ladrog pou mwa.

Kan mo ti ena 14 an, mo ti vinn enn fwet lor trik bann dimounn. Par exanp, mo ti aste enn kantite mont, brasle, ek bag an plake or, ek mo ti grav 14 kara lor zot. Apre mo ti vann tousala lor semin ek lor parking bann sant komersial. Mo ti bien kontan pou gagn larzan fasil. Inn deza arive ki dan enn sel zour mo ti gagn apepre Rs 270,000!

Kan mo ti ena 15 an, formantori ti met mwa deor, ek mo pa ti ena okenn plas pou reste. Mo ti dormi lor lari, dan zardin, ouswa kot bann kamarad.

Souvan lapolis ti pran lanket ar mwa parski mo ti pe fer bann tranzaksion ilegal. Zame mo pa ti fer prizon parski mo pa ti pe vann bann lartik kokin. Selman, mo ti pey bann gro lamann parski mo ti fer bann frod, bann fos papie, ek mo ti vann bann lartik san permi. Mo pa ti per personn, ek mo ti mem al sers kas avek bann ki ti dwa bann eskro. Sa ti bien danzere, ek parfwa mo ti amenn enn fizi avek mwa. Detanzantan mo ti travay avek bann mafia.

Se kan mo ti ena 17 an ki premie fwa mo ti tann koz lor Labib. Mo ti pe viv avek mo kopinn kan li’nn koumans etidie Labib avek bann Temwin Zeova. Selman, mo pa ti dakor avek bann prinsip Labib lor  moralite. Alor, mo ti kit li ek mo ti al res avek enn lot fam ar ki mo ti pe sorti.

Finn ena enn tournan dan mo lavi kan mo deziem kopinn osi inn koumans etidie Labib avek bann Temwin! Li’nn fer bann sanzman dan so lavi, ek mo ti inpresione parski li ti vinn pli zanti ek li ti ena plis pasians. Mo ti aksepte linvitasion pou asiste enn renion dan Lasal Bann Temwin Zeova. Bann dimounn respektab ek amikal ti akeyir mwa. Sa ti bien diferan avek lemond ki mo ti kone! Touletan mo ti ena santiman ki mo fami ti rezet mwa ek ki mo pa ti gagn lafeksion ek tandres toutlong mo lanfans. Me lamour ki mo ti resanti parmi bann Temwin Zeova, se samem ki mo ti anvi gagne. Akoz sa, mo ti bien kontan pou aksepte letid Labib ki bann Temwin ti propoz mwa.

Seki mo ti pe aprann dan Labib finn sirman sap mo lavi. Par exanp, mo ti plann pou kokin enn gro som larzan ansam avek de kamarad. Sa ti pou permet mwa pey enn det apepre Rs 1,300,000 ki mo ti fer kan mo ti zwe. Mo vremem bien kontan ki mo pa’nn fer sa! Mo bann kamarad ti al delavan avek sa proze-la. Lapolis ti aret enn ek ti touy lot-la.

Kan mo ti pe etidie Labib, mo’nn trouve ki kantite sanzman mo ti bizin fer. Par exanp, mo ti aprann seki Labib dir dan 1 Korintien 6:10: “Voler, akaparer, soular, bann ki dir dimal lor Bondie ek bann eskro, pa erit Rwayom Bondie.” Kan mo ti lir sa verse-la, mo ti realize ki kantite mo sitiasion ti bien grav ek sa ti fer mwa plore. Mo ti konpran ki mo ti bizin sanz mo lavi net. (Romin 12:2) Mo ti enn dimounn violan ek agresif, ek touletan mo ti koz manti.

Selman, gras-a mo letid Labib, mo ti osi aprann ki Zeova ena mizerikord ek Li pardone. (Izai 1:18) Mo ti fer bann lapriyer bien profon pou sipliy Zeova ed mwa sanz mo lavi. Gras-a so led, tigit-tigit mo’nn reisi sanz mo personalite. Nou ti fer enn pa inportan kan mo kopinn ek mwa ti marye sivil.

Mo ti ena 24 an, mo ti marye ek mo ti ena trwa zanfan. Aster mo ti bizin rod enn travay onet. Me mo pa ti fer gran klas ek mo pa ti ena okenn let rekomandasion. Ankor enn fwa, mo ti priye Zeova avek tou mo leker. Apre, mo’nn al rod enn travay. Mo ti dir bann anplwayer ki mo ti anvi sanz mo lavi ek fer enn travay onet pandan lizour. Parfwa mo ti dir zot ki mo ti pe etidie Labib ek ki mo ti anvi vinn enn pli bon sitwayen. Boukou anplwayer pa ti’le pran mwa pou travay. Finalman, pandan enn lot interview mo ti koz fran lor mo ansien lavi. Sa kikenn ki ti pe interviewe mwa la ti dir: “Mo pa tro kone kifer, me enn kitsoz pe dir mwa ki mo bizin pran ou pou travay.” Mo panse ki sa ti enn repons pou mo bann lapriyer. Plitar, mo madam ek mwa ti batize antan ki Temwin Zeova.

Zordi mo vivan parski mo pe aplik bann prinsip Labib ek mo pe viv kouma enn Kretien. Mo ena osi enn bon fami. Mo ena enn konsians kler parski mo sir ki Zeova inn pardonn mwa.

Sa fer 14 an ki mo dan servis aplintan ek mo pe ed lezot pou aprann seki Labib ansegne. Mo madam inn fek rant dan servis aplintan li osi. Dan lespas 30 an, mo’nn bien kontan pou ed 22 mo bann koleg travay pou ador Zeova. Zordi mo ankor al dan bann sant komersial, me pa pou kokin bann dimounn kouma mo ti fer avan. Asterla, kan mo al laba, souvan mo partaz mo lafwa avek lezot. Mo anvi donn zot lespwar pou viv dan enn nouvo lemond kot pa pou ena bann eskro.​—Psom 37:10, 11.