Megan: Bonzour Shirley. Mo’nn bien kontan mo’nn trouv ou pou Memoryal lamor Zezi Kris semenn dernie. a Kouma ou’nn trouv sa renion-la?

Shirley: Mo bien kontan mo’nn vini, me selman pou dir ou fran, mo pa’nn tro konpran tou seki’nn dir. Mo’nn tann bann dimounn dir ki zot selebre nesans Zezi pandan Nwel ek so rezireksion pandan Pak, me zame mo’nn tann kikenn dir ki li komemor lamor Zezi.

Megan: Li vre, Nwel ek Pak se bann fet bien popiler atraver lemond. Me bann Temwin Zeova panse ki li inportan nou rapel lamor Zezi. Si ou ena de-trwa minit, mo ti pou kontan montre ou bann rezon kifer.

Shirley: Wi, ou kapav kontigne.

Megan: Premierman, bann Temwin Zeova komemor lamor Zezi parski li’nn donn lord so bann disip pou fer sa. Anou gete ki’nn pase lanwit avan ki Zezi mor. Eski ou’nn deza tann koz lor enn repa spesial ki Zezi ti pran avek so bann zapot fidel?

Shirley: Ou pe rod dir Lasint Senn?

Megan: Exakteman. Nou osi apel sa Repa Nou Segner. Pandan sa repa-la, Zezi ti donn so bann zapot bann instriksion bien kler. Eski ou ti pou kontan lir seki li’nn dir dan Lik 22:19 silvouple? (NW)

Shirley: OK. “Li ti pran osi enn dipin, li ti remersie Bondie, li ti kas dipin-la, li ti donn zot, ek li ti dir: ‘Sa reprezant mo lekor ki pou bizin done an sakrifis pou zot. Kontign fer sa an mo memwar.’”

Megan: Mersi. Remarke ki lord Zezi done dan lafin sa verse-la: “Kontign fer sa an mo memwar.” Ek zis avan ki li donn sa linstriksion-la so bann zapot, Zezi ti montre bien ki kitsoz zot ti bizin rapel lor li. Li ti dir ki li ti pou donn so lavi pou so bann disip. Zezi ti exprim sa mem panse-la dan Matie 20:28. Sa verse-la dir: “Parey kouma Garson Limanite pa finn vini pouki dimoun servi li, me pou servi dimoun e donn so lavi kouma enn ranson pou boukou dimoun.” An de-trwa mo, se akoz sa ki bann Temwin Zeova reini sak lane pou komemor laniverser lamor Zezi​—pou rapel sakrifis ki Zezi inn ofer. So lamor kapav fer tou bann dimounn obeisan gagn lavi.

Shirley: Mo finn tann bann dimounn dir ki Zezi inn mor pou ki nou kapav gagn lavi.  Me onetman, zame mo’nn konpran kouma sa pase.

Megan: Ou pa tousel Shirley. Laranson li enn size bien profon sa. Me se osi enn parmi bann pli zoli verite ki ena dan Parol Bondie. Ofet, eski ou ena ankor inpe letan?

Shirley: Wi wi, mo ena ankor de-trwa minit.

Megan: Bien bon. Mo’nn fek lir enn lartik lor laranson, ek mo pou esey explik ou li dan enn fason sinp.

Shirley: OK.

Megan: Pou konpran ki’ete laranson, avan nou bizin konpran bien ki konsekans pese Adan ek Ev dan zardin Edenn finn amene. Pou konpran pli bien ki sa ti inplike, anou lir Romin 6:23. Ou kapav lir sa verse-la silvouple?

Shirley: Pena problem. Li dir: “Saler pese, li lamor, me don Bondie li lavi eternel dan Zezi Kris nou Segner.”

Megan: Mersi. Anou gete ki sa verse-la pe rod dir. Avan tou, gete kouma verse-la koumanse: “Saler pese, li lamor.” Sa se enn sinp prinsip ki Bondie ti’nn etabli dan koumansman listwar bann imin​—saler, ouswa konsekans, pese se lamor. Biensir, o-koumansman pa ti ena pese. Bondie ti kree Adan ek Ev parfe, ek zot bann zanfan osi ti pou ne parfe. Alor pa ti ena okenn rezon pou ki enn kikenn mor. Adan ek Ev ek tou zot bann desandan ti ena posibilite pou viv ere pou touletan. Me kouma nou kone sa pa’nn pas koumsa, pa vre?

Shirley: Wi. Adan ek Ev ti manz frwi ki Bondie ti defann zot.

Megan: Exakteman. Ek kan zot ti fer sa, setadir kan Adan ek Ev ti swazir pou dezobeir Bondie, zot ti fer pese. Se koumsa ki zot inn swazir pou vinn inparfe, pou vinn bann dimounn ki fer pese. Sa swa-la ti pou ena bann konsekans bien grav pa zis pou Adan ek Ev me osi pou tou zot desandans.

Shirley: Ki ou pe rod dir?

Megan: Bon si ou’le, les mo pran enn lexanp. Dir mwa, eski ou kontan kwi gato?

Shirley: Wi, mo kontan!

Megan: Fer koumadir ou’nn gagn enn zoli moul nef pou kwi gato. Avan mem ki ou reisi servi li, li’nn tonbe ek li’nn kabose. Aster, ki pou ariv bann gato ki ou pou kwi ladan? Eski zot’si zot pa pou sorti kabose?

Shirley: Be wi.

Megan: Li parey, kan Adan ek Ev inn swazir pou dezobeir Bondie, koumadir zot inn “kabose” ouswa inn gagn defo, akoz pese ek linperfeksion. Ek akoz zot inn fer pese avan zot gagn zanfan, tou zot bann zanfan ti pou ne avek mem defo. Zot tou ti pou ne avek pese. Dan Labib sa mo “pese” la pa vedir zis enn aksion me osi linperfeksion ki nou’nn erite. Ek alafin mem si ou ek mwa nou pa’nn fer okenn erer​—nou pa ti ankor mem ne​—kan Adan ek Ev ti fer pese, zot inn kondann tou zot bann desandan, nou’si parmi, pou gagn linperfeksion ek pese ki amenn lamor. Kouma nou’nn lir dan Romin 6:23, konsekans pese se lamor.

Shirley: Me sa li inzis. Kifer tou dimounn bizin soufer pou touletan akoz pese Adan ek Ev?

Megan: Ou ena rezon​—li paret inzis. Selman, dan so lazistis parfe, Bondie ti deside ki Adan ek Ev ti bizin mor akoz zot ti’nn fer pese. Me nou, zot bann desandan, Bondie pa’nn les nou san okenn lespwar. Bondie finn trouv enn mwayin pou tir nou dan sa sitiasion-la. Se la kot sakrifis Zezi zwe enn rol inportan. Nou reget seki Romin 6:23 dir. Apre ki li dir: “Saler pese, li lamor,” verse-la dir: “Me don Bondie li  lavi eternel dan Zezi Kris nou Segner.” Alor, se gras-a lamor Zezi ki nou kapav libere ar pese ek lamor. b

Megan: Mo ti pou kontan atir ou latansion lor enn lot detay ki ena dan sa verse-la.

Shirley: OK.

Megan: Remarke seki verse-la dir: “Me don Bondie li lavi eternel dan Zezi Kris nou Segner.” Aster, si se Zezi ki’nn soufer ek ki’nn mor pou nou, kifer verse-la koz lor laranson kouma enn “don Bondie”? Kifer Labib pa dir “don Zezi”? c

Shirley: Hmm. Mo pa kone.

Megan: Bon, se Bondie ki ti kree Adan ek Ev, ek se kont Li ki zot ti fer pese kan zot ti dezobeir dan zardin Edenn. Sirman Li finn bien sagrin kan so de premie zanfan lor later ti rebele kont Li. Me Zeova toutswit ti donn enn solision. d Li ti deside ki enn so bann kreatir spiritiel vinn lor later, viv kouma enn imin parfe, ek finalman donn so lavi an sakrifis. Alor vremem nou kapav dir ki laranson ti enn don ki Bondie inn done. Ena enn lot fason ankor kot laranson ti enn don Bondie. Eski ou’nn deza reflesi seki Bondie ti resanti kan ti touy Zezi?

Shirley: Non, zame mo’nn reflesi lor la.

Megan: Mo trouv ena de-trwa zouzou dan ou lakour. Sirman ou ena zanfan.

Shirley: Wi, mo ena de​—enn garson ek enn tifi.

Megan: Antan ki paran, esey panse ki Zezi so Papa dan lesiel, Zeova, ti resanti zour ki Zezi ti mor. Setadir, ki Bondie ti resanti kan depi lesiel Li trouv bannla pe aret so Garson ki Li bien kontan, boufonn li ek donn li koudpwin? Ek ki Papa-la ti resanti kan bannla ti koulout so Garson lor poto ek les li lor la ziska li mor?

Shirley: Sirman Li ti bien tris. Zame mo’nn reflesi lor la avan!

Megan: Biensir, nou pa kone exakteman ki Bondie ti resanti sa zour-la. Me nou kone ki Li ena bann santiman, ek nou kone osi kifer Li’nn les tousala arive. Zan 3:16 explik sa bien. Ou ti pou kontan lir li?

Shirley: Wi. Li dir: “Bondie finn telman kontan lemonn, ki li finn donn so Sel Garson pouki tou dimoun ki krwar dan Li, pa mor me gagn lavi eternel.”

Megan: Mersi. Nou reget koumansman sa verse-la. Li dir: “Bondie finn telman kontan lemonn.” Ou trouve ki’nn pous Bondie pou avoy so Garson lor later pou mor pou nou? Se lamour. Vremem, laranson se pli gran prev lamour ki finn ena. Ala kifer toule lane bann Temwin Zeova selebre laniverser lamor Zezi. Eski sa li kler pou ou aster?

Shirley: Wi li bien kler. Mersi ou’nn pran letan ou’nn explik mwa sa.