Pandan bann premie lane mo lavi, mo fami ti res pre ar Leipzig, dan Les l’Allemagne, pa tro lwin ar frontier République Tchèque ek Pologne. Kan mo ti ena si-z-an, akoz travay mo papa, nou ti bizin kit l’Allemagne​—premierman nou ti al Brésil, apre nou ti al Équateur.

Kan mo ti ena 14 an, mo bann paran ti avoy mwa enn lekol dan l’Allemagne ek mo ti res laba. Parski zot ti res dan Sid l’Amérique, mo ti bizin debrouy par momem. Mo ti vinn bien indepandan. Mo pa ti tro kas latet ki lefe mo bann aksion ti pou ena lor lezot.

Kan mo ti ena 17 an, mo bann paran ti revinn l’Allemagne. O-koumansman, mo ti res ansam avek zot. Me akoz mo ti abitie amenn enn lavi indepandan, mo pa ti pe kapav viv anba lotorite mo bann paran. Kan mo ti ena 18 an, mo ti kit lakaz.

Mo pa ti satisfe ditou ar mo lavi, ek se akoz sa ki mo ti anvi mo lavi ena enn sans. Apre ki mo ti’nn obzerv diferan fason viv ek plizir lorganizasion, mo ti sir ki pli bon kitsoz ki mo ti kapav fer dan mo lavi, se pou explor nou zoli planet avan ki bann dimounn detrir li.

Mo ti kit l’Allemagne, mo ti aste enn motosiklet, ek mo ti roule mo ti al l’Afrique. Me enn tigit apre, mo ti bizin retourn l’Europe pou fer bann reparasion lor mo motosiklet. Landemin, mo ti lor enn laplaz dan Portugal. Se lerla ki mo ti desid pou aret vwayaz par motosiklet ek pou koumans vwayaz par bato.

Mo ti al ansam avek enn group zenn ki ti pe prepar zot pou fer enn vwayaz atraver Losean Atlantique. Parmi zot ti ena Laurie, ki ti pou vinn mo madam. Premierman, nou ti pas par bann zil Caraïbes. Apre enn ti eskal dan Porto Rico, nou ti retourn l’Europe. Nou ti anvi gagn enn bato lavwal ek transform li an enn bato moter, avek enn kabinn lor la pou nou kapav reste. Me apre ki nou finn rod enn bato pandan trwa mwa, enn sel kout nou plan ti tom dan delo, parski mo ti gagn lord pou al servi dan larme l’Allemagne.

Pandan 15 mwa, mo ti travay lor enn bato militer Alman. Pandan sa letan-la, mwa ek Laurie nou ti marye ek nou ti prepar  nou pou kontign nou vwayaz. Enn tipe avan mo servis militer, nou ti aste enn pirog. Kan mo ti dan servis militer, tigit-tigit nou ti fer sa pirog-la vinn enn ti bato lavwal. Nou ti pe pans pou viv lor lamem ek pou kontign explor nou zoli planet. Se lerla​—apre mo servis militer me avan mo terminn bato lavwal-la​—ki nou ti zwenn bann Temwin Jéhovah ek nou ti koumans etidie Labib.

KOUMA LABIB INN SANZ MO LAVI: O-koumansman, mo pa ti trouve ki mo ti bizin fer boukou sanzman dan mo lavi. Mo ti fini marye ar madam ki mo ti pe viv, ek mo ti fini aret fime. (Éphésiens 5:5) Konsernan nou plan pou fer letour lemond, mo ti panse ki sa ti vremem vo lapenn ki nou konsakre nou letan pou obzerv kreasion Bondie ki extraordiner.

Me an realite, mo ti bizin fer bann sanzman​—sirtou dan mo personalite. Parski mo ti ena boukou lorgey ek mo ti bien indepandan, mo ti pans zis lor seki mo kapav fer ek seki mo ti’nn reisi fer. Mo ti amenn enn lavi egois.

Enn zour, mo ti lir Jésus so Sermon lor Montagn, ki bien popiler. (Matthieu, sapit 5-7) O-koumansman, mo pa ti konpran seki Jésus ti pe rod dir lor seki fer enn dimounn ere. Par exanp, li dir ki enn dimounn ki ere se enn kikenn ki fin ek swaf. (Matthieu 5:6) Mo ti pe reflesi kouma enn dimounn ki pena manze ek bwar kapav ere. Amezir ki mo ti pe kontign etidie, mo ti realize ki nou tou nou ena bann bezwin spiritiel, me pou ki nou kapav konble sa, avek imilite nou bizin rekonet ki nou ena sa bezwin-la. Li parey kouma Jésus ti dir: “Ere bann ki rekonet ki zot pov lor plan spiritiel.”​—Matthieu 5:3.

Apre ki nou ti koumans etidie Labib dan l’Allemagne, mwa ek Laurie nou ti al la France, ek apre, nou ti al l’Italie. Partou kot nou ti ale, nou ti zwenn bann Temwin Jéhovah. Mo ti vremem inpresione ar lamour sinser ek linite ki ti ena ant zot. Mo ti trouve ki bann Temwin zot vremem enn fami internasional. (Jean 13:34, 35) Avek letan, mwa ek Laurie nou ti batize.

Apre mo batem, mo ti kontign fer bann sanzman dan mo personalite. Mwa ek Laurie nou ti deside pou vwayaze pou fer lakot l’Afrique ek apre pas par Losean Atlantique pou al l’États-Unis. Se kan nou ti omilie losean​—zis nou de tousel dan enn ti bato antoure ar lamer​—ki mo ti realize ki kantite mo bien tipti konpare ar nou Kreater ki extraordiner. Mo ti ena boukou letan (pa ti ena boukou kitsoz pou fer omilie losean), alor mo ti konsakre sa letan-la pou lir Labib. Kan mo ti lir lor lavi Jésus lor later, sa ti tous mwa. Li ti parfe ek li kapav fer bann kitsoz ki momem mo pa ti pou imazine, pourtan zame li ti atir latansion lor li. Li pa ti amenn enn lavi egois, okontrer li ti touletan atir latansion lor so Papa ki dan lesiel.

Kan mo ti medit lor lexanp Jésus, mo ti trouve ki mo ti bizin met Rwayom Bondie an premie dan mo lavi, olie ki mo ti fer li pas apre bann lezot kitsoz ki mo ti anvi fer. (Matthieu 6:33) Alafin, kan mwa ek Laurie nou ti ariv l’États-Unis, nou ti desid pou etabli laba mem ek pou konsantre lor nou ladorasion.

Avan, kan mo ti pe kont lor momem, souvan mo pa ti sir bann desizion ki mo ti pe pran. Me asterla, mo finn trouve kotsa mo kapav gagn enn vre sazes pou gid mwa. (Isaïe 48:17, 18) Ek mo lavi ena osi enn sans, enn kitsoz ki mo pa ti ena avan​—mo pe ador Bondie ek mo pe ed lezot pou konn Li.

Kan nou’nn aplik bann prinsip Labib, sa inn fer nou maryaz vinn pli solid. Bondie inn beni nou kan Li’nn donn nou enn zoli tifi, ki’nn aprann pou konn Jéhovah ek pou kontan Li.

Sa pa vedir ki touletan nou lavi ti an-roz. Me avek led Jéhovah, nou determine pou zame pa abandonn nou servis ouswa pou aret kont lor Li.​—Proverbes 3:5, 6.