BANN ki soutenir lide ki tou relizion bizin zwenn ansam, pa pans koumsa. Eboo Patel, fondater Interfaith Youth Core dir: “Montre mwa enn relizion ki dir fode pa ena konpasion . . . , fode pa pran swin nou lanvironnman . . . , fode pa montre lospitalite.”

An realite, bann Boudis, Katolik, Protestan, Indou, Mizilman, ek boukou lezot relizion ankor, parfwa finn zwenn ansam pou lit kont lamizer. Zot fer osi bann kanpagn konsernan drwa ki sak imin ena, zot fer tou pou ki aret servi bann explozif ki kasiet anba later, ek zot atir latansion lor bann problem lanvironnman. Zot zwenn ansam pou gete kouma sakenn kapav konpran ek ankouraz zot kamarad. Pou selebre zot diversite, zot fer bann seremoni kot zot alim bann labouzi, zot fer bann fet, zwe lamizik, fer lapriyer, ek boukou lezot kitsoz ankor.

Plizir relizion zwenn ansam, eski se sa ki pou regle bann konfli ki ena ant bann relizion? Eski se koumsa ki Bondie pou fer enn pli bon lemond?

Enn parmi bann pli gran lorganizasion ki soutenir sa lide-la, bien fier ki li ena bann manb ki reprezant plis ki 200 relizion. Li fier osi ki sa lorganizasion-la existe dan 76 pei. So lobzektif: “Ankouraz bann relizion pou korpere zour apre zour.” Me, se enn kitsoz ki paret pli fasil pou dir ki pou fer. Par exanp, bann fondater sa lorganizasion-la dir ki zot ti bizin fer bien atansion kan zot ti pe ekrir zot dokiman ofisiel, kot ena tou zot bann lalwa. Kifer? Pou ki zot pa ofans okenn relizion ki’nn sign sa dokiman-la. Zot inn bizin fer sa, parski zot pa ti tom dakor lor enn pwin: Eski bizin inplik Bondie kan pe ekrir sa bann lalwa-la? Finalman zot finn desid pou pa mansionn ouswa inplik Bondie ditou.

Si pa mansionn Bondie, ki rol lafwa ena alor? Anplis, ki diferans ena ant enn lorganizasion ki ankouraz bann relizion pou zwenn ansam ek enn lorganizasion ki ed bann dimounn? Ala kifer, sa lorganizasion nou ti mansione lao la, dekrir limem kouma enn lorganizasion ki konstrir bann pon ant bann relizion, pa kouma enn relizion.

“Dan tou bann gran krwayans relizie nou trouv preske mem mesaz, setadir ena lamour, konpasion ek pardon.” Se seki Dalaï-Lama, enn gran personaz ki soutenir lide ki tou relizion bizin zwenn ansam, finn dir. Li azoute: “Seki pli inportan se ki sa bann kalite-la bizin form parti nou lavi toulezour.”

 Li vre ki zame nou pa pou kapav met ase laksan lor valer lamour, konpasion, ek pardon. Kan Jésus ti sit seki nou apel la Règle d’or, li ti dir: “Alor tou seki zot anvi ki lezot fer pou zot, fer parey pou lezot osi.” (Matthieu 7:12, Nouvo Testaman an Kreol Morisien) Me eski vre lafwa vedir zis ankouraz lezot pou fer seki bon?

Get seki lapot Paul ti dir konsernan bann ki, dan so lepok, ti dir swadizan zot pe servi Bondie: “Mo dir dan zot faver ki zot ena enn zel pou Bondie, me pa dapre konesans exakt.” Kot problem-la ti ete? Lapot Paul kontigne: “Parski zot pa konn zistis Bondie,” zot ti pe “rod etabli zot prop zistis.” (Romains 10:2, 3) Zot pa ti ena enn konesans exakt lor seki Bondie ti anvi zot fer. Akoz sa, zot zel, ek zot lafwa, ti vremem dan vid.​—Matthieu 7:21-23.

Jésus ti dir: “Ere bann pasifik.” (Matthieu 5:9) Li ti met an pratik seki li ti prese. Kouma li ti fer sa? Se kan li ti amenn enn mesaz lape ek ti ankouraz bann dimounn dan tou relizion pou pa lager. (Matthieu 26:52) Bann ki ti aksepte so mesaz ti rasanble ansam par enn lamour bien-bien solid, enn lamour ki pa kapav kase. (Colossiens 3:14) Me eski Jésus so sel lobzektif se kree enn pon ant bann dimounn diferan relizion pou ki zot kapav viv ansam dan lape? Eski li ti partisip dan zot bann pratik relizie?

Bann sef relizie dan sekt bann Farizien ek bann Sadiseen ti opoz zot avek violans ar Jésus. Zot finn mem esey touy li. Kouma li’nn reazir? Jésus ti donn so bann disip sa instriksion-la: “Les zot. Bann gid aveg, ala seki zot ete.” (Matthieu 15:14) Jésus pa ti ankouraz personn pou asosie avek sa bann kalite dimounn la, ni li ti fer sa limem.

Enn tipe plitar, enn kongregasion ti forme dan lavil Corinthe, ki trouv dan Grèce. Se enn lavil kot ti ena bann dimounn ki sorti dan plizir kiltir, plizir relizion, ek li ti renome pou sa. Kouma bann Kretien ti bizin reazir dan enn lanvironnman koumsa? Get seki lapot Paul ti dir zot: “Pa met zot ansam anba mem zoug avek bann ki pena mem krwayans ki zot.” Kifer Paul ti dir sa? Li rezonn avek zot: “Ki lakor ena ant Christ ek Bélial [ouswa Satan]? Ouswa, ki par enn dimounn fidel ena avek enn non-krwayan?” Apre, li donn sa konsey-la: “Akoz sa, sorti parmi zot, separe ar zot, ek aret tous bann kitsoz inpir.”​—2 Corinthiens 6:14, 15, 17.

Li kler ki Labib pa dakor ditou avek lide ki tou relizion bizin zwenn ansam. Me sirman ou pe demann oumem: ‘Kouma vre linite li posib?’

Kinz pei inn travay ansam pou invant enn satelit bien sofistike ki tourn otour later, nou apel sa The International Space Station. Eski ou panse sa proze-la ti pou reisi si sa bann pei-la pa ti tom dakor lor plan ki zot ti pou servi?

Azordi, bann lorganizasion ki soutenir lide ki tou relizion bizin zwenn ansam, retrouv zot dan mem sitiasion. Mem si zot tou zot korpere ek zot ena respe pou zot kamarad, lor enn kitsoz zot pa dakor: plan pou batir enn vre lafwa. Rezilta: Touletan ena dezakor lor bann size moral ek bann doktrinn.

Dan Labib, ena bann prinsip ki Bondie inn etabli. Sa bann prinsip-la zot kouma enn plan. Nou kapav servi seki Labib dir kouma enn baz pou konstrir nou lavi. Bann ki’nn fer sa, inn reisi sirmont bann prezize ki zot ti ena an rapor avek ras ek relizion. Zot finn mem aprann pou travay ansam dan linite ek lape. Bondie ti fini predir sa: “Mo pou sanz lang bann pep pou fer li vinn enn lang pir, pou ki zot tou invok nom Jéhovah, pou ki zot servi Li kotakot.” Se selman kan nou koz “lang pir,” setadir nou ador Bondie dan fason ki Li, Li aksepte, ki nou kapav ena linite.​—Tsephania 3:9; Isaïe 2:2-4.

Bann Temwin Jéhovah dan ou landrwa invit ou pou vizit zot Lasal, koumsa avek ou prop lizie, ou kapav trouv lape ek linite ki existe parmi zot.​—Psaume 133:1.