Lamor li kouma enn somey, kot sa dimounn ki’nn mor la li inkonsian ek li pa kapav fer nanye. Me selman, nou Kreater kapav redonn lavi bann ki’nn mor par mwayin enn rezireksion. Pou prouve ki sa li posib, Bondie ti donn Jésus pouvwar pou redonn lavi plizir dimounn ki ti mor.​—Lir Ecclésiaste 9:5; Jean 11:11, 43, 44.

Bondie inn promet ki bann ki’nn mor ek ki dan so memwar, pou resisite pou viv dan enn nouvo lemond kot pou ena lazistis. Bann mor ki pou resisite bizin atann ziska ki Bondie redonn zot lavi. Bondie Tou-Pwisan pe atann avek inpasians moman kot Li pou servi so pouvwar pou redonn lavi bann ki’nn mor.​—Lir Job 14:14, 15.

Kan Bondie pou resisit bann dimounn, zot pou kapav rekonet zotmem, zot bann kamarad, ek zot bann fami. Mem si enn dimounn so lekor inn dekonpoze, Bondie pou resisit mem dimounn, selman avek enn nouvo lekor.​—Lir 1 Corinthiens 15:35, 38.

Se zis enn tigit dimounn ki pou resisite pou al viv dan lesiel. (Révélation 20:6) Laplipar bann ki pou resisite pou regagn lavi lor later ki pou vinn enn paradi. Tou sa bann dimounn-la pou koumans enn nouvo lavi, avek posibilite pou viv pou touletan.​—Lir Psaume 37:29; Actes 24:15.