Lafin Soufrans Bien Pre!
Mazine ki ou pe viv dan enn lemond kot pena okenn soufrans—enn lemond kot pena krim, lager, maladi, ek katastrof natirel. Mazine toule gramatin ou pe leve san ki ou bizin trakase ki ena diskriminasion, ki lezot fer dominer ar ou, ouswa ki ena bann problem ekonomik. Eski se zis enn rev? Se vre ki okenn dimounn ni okenn lorganizasion pa pou kapav amenn bann sanzman koumsa. Me Bondie inn promet pou eliminn tou seki fer bann dimounn soufer, parmi ena osi bann kitsoz ki’nn mansione dan lartik avan. Get bann promes ki ena dan Parol Bondie, Labib:
ENN BON GOUVERNMAN
“Bondie ki dan lesiel pou etabli enn rwayom ki zame pa pou detrir. Ek sa rwayom-la pa pou vinn pou okenn lot pep. Li pou kraz tou sa bann rwayom-la ek li pou fini zot, ek limem li pou regne pou touletan.”—Daniel 2:44.
Rwayom Bondie se enn gouvernman ki trouv dan lesiel. Jésus Christ, ki Bondie inn swazir kouma dirizan sa gouvernman-la, pou ranplas tou bann dirizan imin ek li pou fer tou pou ki volonte Bondie fer pa zis dan lesiel me osi lor later. (Matthieu 6:9, 10) Okenn gouvernman imin pa pou ranplas sa gouvernman-la parski se “rwayom eternel nou Segner ek Sover Jésus Christ.” Ek lerla pou ena lape pou touletan.—2 Pierre 1:11.
FOS RELIZION POU DETRIR
“Satan limem pe kontign transform li kouma enn anz lalimier. Alor, li pa extraordiner ki so bann minis osi pe kontign transform zot kouma bann minis lazistis. Me zot lafin li pou dapre seki zot fer.”—2 Corinthiens 11:14, 15.
Bann dimounn pou kone ki se Lediab ki deryer fos relizion ek fos relizion pou detrir. Pou nepli ena bann fanatik relizie ek bann lager ki vers disan. Sa pou permet tou bann ki kontan “Bondie ki vivan ek vre” pou ador Li dan “enn sel lafwa” ek “avek lespri ek laverite.” Vremem, pou ena lape ek linite!—1 Thessaloniciens 1:9; Éphésiens 4:5; Jean 4:23.
BANN DIMOUNN POU NEPLI INPARFE
“Bondie Limem pou avek zot. Ek Li pou souy tou larm dan zot lizie, ek lamor nepli pou existe. Dimounn nepli pou andey, zot nepli pou plore ek nepli pou ena douler. Bann kitsoz ki ti ena avan finn disparet.”—Révélation 21:3, 4.
Jéhovah pou realiz sa promes-la par mwayin so Garson, Jésus, ki’nn donn so lavi pou limanite. (Jean 3:16) Kan Jésus pou dirize, limanite pou vinn parfe. Pou nepli ena soufrans parski “Bondie Limem pou avek zot” ek Li pou tir “tou larm dan zot lizie.” Biento linperfeksion ek soufrans pou bann kitsoz ansien; “bann dimounn zis pou posed later, ek zot pou res lor la pou touletan.”—Psaume 37:29.
POU NEPLI ENA BANN MOVE LESPRI
“Li [Jésus Christ] ti atrap dragon, sa serpan orizinel la, limem ki Lediab ek Satan, ek li ti atas li pou mil an. Ek li ti zet li dan labim, ti ferm [sa labim-la] ek ti met enn sele lor la pou ki li pa kapav detourn bann nasion ankor.”—Révélation 20:2, 3.
Tou bann linflians satanik pou disparet kan pou zet Satan ek so bann demon dan “labim.” Zot pou dan enn leta kot zot pa pou kapav fer nanye ek zot pou nepli ena kontrol lor bann dimounn. Sa pou vremem enn soulazman pou viv dan enn lemond kot pa pou ena okenn linflians Satan ek so bann move lespri!
“BANN DERNIE ZOUR” POU FINI
“Bann dernie zour” pou fini avek seki Jésus ti apel “gran detres.” Li ti dir: “Lerla pou ena enn gran detres kouma zame inn ena depi koumansman lemond ziska asterla, non, ek ki pa pou ena ankor.”—Matthieu 24:21.
Sa pou enn gran detres parski pou ena bann maler kouma zame pa finn ena avan. Sa pou fini avek “lager gran zour Bondie Tou-Pwisan,” ki apel osi “Harmaguedôn.”—Révélation 16:14, 16, not.
Partou lor later, bann dimounn ki kontan lazistis pe atann lafin sa move lemond-la. Anou get de-trwa benediksion ki bann dimounn pou gagne kan Rwayom Bondie pou dirize.
BONDIE POU FER PLIS KI SA!
“Enn gran lafoul” pou gagn lavi sov ek pou viv dan enn nouvo lemond kot pou ena lape: Parol Bondie dir ki enn “gran lafoul” dimounn ki nou pa kapav konte pou “sorti dan gran detres” ek pou gagn lavi sov. Sa bann dimounn-la pou viv dan enn nouvo lemond kot pou ena lazistis. (Révélation 7:9, 10, 14; 2 Pierre 3:13) Zot pou gagn delivrans gras-a Jésus Christ, “Agno Bondie ki tir pese lemond.”—Jean 1:29.
Lansegnman Bondie pou fer bann dimounn gagn bann gran bienfe: Dan lemond nouvo, “later vremem pou ranpli avek konesans Jéhovah.” (Isaïe 11:9) Dan sa bann lansegnman-la pou ena osi bann linstriksion ki pou montre kouma pou viv anpe avek tou dimounn ek respekte lanvironnman. Bondie promet: “Mwa, Jéhovah, Momem to Bondie, Momem ki ansegn twa pou to profi, Momem ki fer twa mars lor sime kot to bizin marse.”—Isaïe 48:17.
Bann ki nou bien kontan me ki’nn mor pou releve: Kan Jésus ti lor later, li ti resisit so kamarad Lazare ki ti mor. (Jean 11:1, 5, 38-44) Kan li ti fer sa, li ti montre ki li pou resisit pli boukou dimounn ankor kan Rwayom Bondie pou dirize.—Jean 5:28, 29.
Pou ena lape ek lazistis pou touletan: Kan Christ pou dirize, pou nepli ena bann dimounn ki pa obeir lalwa. Kouma nou konn sa? Parski Jésus kapav lir dan leker, li pou servi sa kapasite-la pou zize kisannla ki bon ek kisannla ki move. Bondie pa pou permet bann move dimounn ki refiz sanze viv dan lemond nouvo.—Psaume 37:9, 10; Isaïe 11:3, 4; 65:20; Matthieu 9:4.
Nou finn examinn zis de-trwa parmi bann profesi Labib ki montre lavenir extraordiner ki pe atann nou. Kan Rwayom Bondie pou diriz later, pou ena “labondans lape” pou touletan. (Psaume 37:11, 29) Bondie pou delivre bann dimounn ar tou kitsoz ki ti fer zot lapenn ek soufer. Nou kapav sir ki sa pou arive parski Bondie Limem inn fer sa promes-la: “Gete! Mo pe fer tou kitsoz nouvo. . . . Sa bann parol-la zot fidel ek vre.”—Révélation 21:5.
