Sertin dimounn divorse avek lespwar ki zot pou ena enn pli bon lavi. Lezot pa anvi divorse, me zot pena swa parski zot pa kapav obliz zot konzwin pou res avek zot. Pourtan, laplipar bann dimounn ki divorse trouve ki apre divors lavi pli difisil ki zot ti pe panse. Ofet, si ou’nn fek divorse, kitfwa ou pou trouve ki se enn bann sitiasion pli stresan ar ki ou pou bizin fer fas. Alor, li bon ki nou examinn sertin konsey pratik ki ena dan Labib ki kapav ed ou pou sirmont bann difikilte ki ou gagne apre divors.

Kan ou divorse ou kapav strese akoz bann problem larzan, lagard bann zanfan, ek ou santi ou tousel. Ek sa bann santiman-la kapav fatig ou boukou ek pran letan pou ale. Sikolog Judith Wallerstein ki’nn fini mor, ti trouve ki sertin dimounn, mem si sa fer plizir lane ki zot inn divorse, ankor ena santiman ki finn trayir zot ek finn abandonn zot, ek zot panse ki “lavi li inzis, fer gagn bann desepsion, ek [li tris parski zot] tousel.”

 SEKI OU KAPAV FER

• Plor pou seki ou’nn perdi. Kitfwa ou pe mank ou konzwin parski ou ankor kontan li. Mem si zot pa ti ere ansam, ou kapav plore parski ou pa finn gagn lazwa ki ou ti pe atann dan ou maryaz. (Proverbes 5:18) Pa onte pou rezerv enn “letan pou plore.”​—Ecclésiaste 3:1, 4.

• Pa izol ou. Se vre ki ou bizin res tousel pou plore, me selman li pa bon ki ou res tousel tro lontan. (Proverbes 18:1) Kan ou pe koz avek ou bann kamarad, dir bann parol ankourazan parski si souvan ou kritik ou ex-konzwin, mem si ou ena rezon, sa kapav elwagn zot ar ou. Si ou bizin pran bann desizion inportan zis apre ou divors, demann enn kikenn ki ou fer konfians pou donn ou bann konsey bien reflesi.

• Pran swin ou lasante. Kan ou divorse, sa kapav fer ou strese. Ek souvan stres fer gagn bann problem lasante, kouma tansion for ouswa migrenn. Manz bann repa ekilibre, fer lexersis, ek dormi bien.​—Éphésiens 5.29.

• Pa gard bann kitsoz ki pou fer ou rapel ek ankoler kont ou ex-konzwin ouswa bann kitsoz ki ou pa bizin. Me selman, gard bann dokiman inportan. Si sertin kitsoz kouma par exanp bann foto maryaz rann ou tris, met zot dan enn bwat ek gard zot pou ou bann zanfan.

• Lit kont bann panse negatif. Olga ki ti divors avek so misie ki ti komet ladilter, dir: “Touletan mo ti pe demann momem, ‘Ki [sa madam-la] ena plis ki mwa?’” Me plitar, Olga ti rann li kont ki li pa bon pou kontign ena bann panse negatif, parski sa ti pou kapav dekouraz li.​—Proverbes 18:14.

  Boukou dimounn inn remarke ki kan zot ekrir seki zot panse, sa ed zot pou eklersi ek pou kontrol zot bann panse. Si ou fer sa, esey ranplas bann panse negatif ki ou pe rod elimine par bann panse pozitif. (Éphésiens 4:23) Anou get de lexanp:

  Avan: Se mo fot si mo konzwin inn tronp mwa.

  Apre: Mem si mo ena bann defo, sa pa donn mo konzwin drwa pou tronp mwa.

  Avan: Mo finn gaspiy mo bann pli bon lane avek enn misie ki pa’nn fer pou mwa.

  Apre: Mo pou pli ere si mo get lavenir, olie lepase.

• Pa pran kont bann komanter blesan. Mem si zot ena bann bon lintansion, bann kamarad ek bann fami kapav dir bann kitsoz blesan ek ki pa exakt. Par exanp zot kapav dir: ‘Li pa ti fer pou twa toutfason’ ouswa ‘Bondie pa kontan divors.’ b Akoz sa ki Labib ena rezon kan li donn sa konsey-la: “Pa ekout tou seki dimounn dir.” (Ecclésiaste 7:21) Martina, ki’nn divorse depi de-z-an, dir: “Olie ki mo kontign pans lor bann parol blesan, mo esey trouv bann kitsoz parey kouma Bondie. So bann panse boukou pli ot ki pou nou.”​—Isaïe 55:8, 9.

• Priye Bondie. Li ankouraz so bann adorater pou ‘zet tou zot traka lor Li,’ sirtou kan zot dan enn gran lapenn.​—1 Pierre 5:7.

Juliana, ki ti marye pandan 11 an, dir: “Mo ti sipliy mo misie pou res avek mwa. Me kan li ti ale,  mo ti bien ankoler ar li ek sa madam avek ki li ti al reste la.” Boukou dimounn ki’nn divorse kontign gard enn gran koler kont zot ex-konzwin pandan plizir lane. Selman, souvan zot pou bizin koz avek zot kamarad, sirtou si zot ena bann zanfan.

SEKI OU KAPAV FER

• Gard enn bon relasion avek ou ex-konzwin. Koz zis lor bann size inportan ek res bref ek presi. Boukou finn remarke ki kan zot fer sa, sa favoriz lape.​—Romains 12:18.

• Evit dir bann parol blesan. Sirtou kan ou ena linpresion ki ou ex-konzwin pe provok ou, li bon ki ou pans lor sa bon konsey ki ena dan Labib-la: “Enn kikenn ki metriz so parol ena konesans.” (Proverbes 17:27) Si ou pa pe kapav kontrol enn konversasion ki pe tourn an-ron, ou kapav dir: “Mo bizin reflesi lor seki to’nn dir ek mo pou koz avek twa plitar.”

• Tanki ou kapav, separ ou bann zafer ar seki pou ou ex-konzwin; sa inplik bann dokiman ki konsern bann zafer legal, finans ek medikal.

Maria rapel kouma sa ti ete zis apre so divors. Li dir: “Mo pli tipti tifi touletan ti pe plore ek ti rekoumans pipi lor lili. Ek mem si mo gran tifi ti pe rod kasiet so bann santiman, mo ti trouve ki sa ti pe afekte li osi.” Malerezman, ou kapav ena linpresion ki ou pena ase letan ek lafors moral pou ed ou bann zanfan dan bann moman kot zot pli bizin ou.

SEKI OU KAPAV FER

• Ankouraz ou bann zanfan pou koz avek ou lor zot bann santiman, mem si sa kapav pous zot pou dir bann parol “san reflesi.”​—Job 6:2, 3.

• Sakenn bizin zwe so rol. Si ou pe rod enn soutien moral ek li paret ki ou zanfan pe anvi donn ou sa soutien-la, li pou inzis ek li pa pou bon ki ou demann li ed ou ar bann problem gran dimounn. (1 Corinthiens 13:11) Evit fer ou zanfan vinn ou konfidan ouswa fer li vinn port-parol ant ou ek ou ex-konzwin.

• Ed ou zanfan pou ena enn lavi stab. Kan ou kontign res dan mem lakaz kot ou ti pe reste ek ou gard mem program ki avan, sa kapav ed ou zanfan. Me seki pli inportan se gard enn bon program spiritiel kouma par exanp, lir Labib ek ador Bondie an fami.​—Deutéronome 6:6-9.

Ou kapav kontign avanse apre divors. Melissa, ki ti’nn marye pandan 16 an, dir: “Kan mo ti divorse, mo ti dir momem: ‘Se pa koumsa ki mo ti anvi mo lavi deroule.’” Me, asterla, li’nn reisi gagn enn sertenn satisfaksion malgre so sitiasion. Li dir: “Kan mo’nn fer zefor pou aret sanz lepase, mo ti santi mwa pli bien.”