ROMAN ti encore enn ti garson kan so bon camarade ti mort dan enn accident. Li dire: “La mort mo camarade ti enn grand sok pou moi. Plusieurs l’année apré sa accident-la, mo ti demann mo-mem ki arrive nou kan nou mort.”

La mort bann dimoune pa parette normal. N’importe ki l’age nou ena, en general, nou pa content pou mort. Beaucoup dimoune peur seki passé apré la mort.

Beaucoup pensé ki kan enn dimoune mort, enn partie sa dimoune-la contigne vive. Zot croire ki bann bon dimoune pou gagne zot recompense dan le ciel ek bann mauvais dimoune pou puni pou touletan a cause zot peché. Ena lezot ki pensé ki kan enn dimoune mort, li arrete existé ek avek le temps, bann dimoune blié li net.

Premier reponse-la faire croire ki kan enn dimoune mort, li pa vrai-mem mort. Deuxieme reponse-la montré ki la vie pena enn but. Bann dimoune ki pense coumsa parfois ena sa l’attitude-la: “Anou mangé-boire, parski demain nou pou mort.”​—1 Corinthiens 15:32.

La Bible pa enseigné ki kan enn dimoune mort, enn parti sa dimoune-la contigne vive. Bondié ti inspire le roi Salomon pou ecrire: “Bann ki vivant koné ki zot pou mort; mais bann dimoune mort zot, zot pa konn nanyé ditou.” (Ecclésiaste 9:5) Sa bann dimoune ki’nn mort-la, zot pa “konn nanyé ditou” setadir zot pa koné ki pé passé autour zot. Zot pena okenn sentiment ek zot pa kapav faire nanyé. Alors bann dimoune mort pa kapav ni aidé, ni faire di-tort bann dimoune vivant.

Bondié pa ti crée bann dimoune pou zot mort, couma beaucoup dimoune croire. Li ti crée premier zom, Adam, avek l’esperance pou vive pou touletan lor la terre. Sel fois ki Bondié ti mentionne la mort c’est kan Li ti dire Adam ki punition li ti pou gagné si li desobeir. Li ti defann Adam mange fruit enn certain pié ek Li ti averti li ki, si li mange sa, ‘vrai-mem li pou mort.’ (Genèse 2:17) Si Adam ek Ève ti obeir  Bondié, zot ek tou zot bann descendant ki ti pou reste fidele envers Bondié ti pou vive pou touletan lor la terre.

Adam ti choisir pou pa prend compte l’avertissement ki Bondié ti donne li. Li ti faire peché kan li ti desobeir Bondié, alors li ti mort. (Romains 6:23) Pena okenn parti dan Adam ki ti contigne vive apré so la mort. Au contraire, kan li ti mort, Adam ti arrete existé. Bondié ti dire Adam: “To pou bizin transpiré pou to gagne to di-pain, ziska ki to retourne dan la terre, parski c’est ladan ki to finn sorti. Parski to finn faire avek la poussiere ek to pou ré-vinn la poussiere.” (Genèse 3:19) Nou tou nou finn herite peché ek la mort par Adam parski nou tou, nou so bann descendant.​—Romains 5:12.

Malgré ki Adam ti faire enn mauvais choix, Bondié pou realise So projet pou rempli la terre avek bann descendant Adam. (Genèse 1:28; Isaïe 55:11) Bientot, Jéhovah pou ressuscite majorité bann dimoune ki’nn mort. Kan l’apotre Paul ti koz lor sa lepok-la, li ti dire: “Pou ena enn resurrection bann dimoune ki juste ek bann dimoune ki pa juste, toulé-deux.”​—Actes 24:15.

Roman, ki nou ti mentionné au commencement, ti etudié la Bible ek ti aprann seki la Bible dire lor la mort ek lor Jéhovah. Seki li ti aprann finn ena enn grand l’effet lor li. Ou kapav lire so l’experience lor page 11 dan La Tour de Garde 1^er novembre 2012, en français.