1. Ki pou aide nou pou contigne veillé ek pou faire face ar bann l’epreuve?

 BANN l’evenement bien important pou arrivé bientot. Nou konn sa parski bann prophetie biblik pé realisé. Alors, nou bizin contigne veillé. Ki pou aide nou pou faire sa? L’apotre Paul ti encourage nou pou “fixé nou lizié . . . lor bann kitsoz ki nou pa trouvé.” Oui, fodé jamais nou blié recompense ki Jéhovah pou donne nou: la vie eternel, soit dan le ciel ou-soit lor la terre. Contexte sa verset-la montré ki Paul ti pé encourage so bann compagnon pou garde zot l’esprit fixé lor zot recompense. Sa ti pou aide zot pou faire face ar bann l’epreuve ek bann persecution.​—2 Cor. 4:8, 9, 16-18; 5:7.

2. (a) Pou garde nou l’esperance bien vivant, ki nou bizin faire? (b) Ki nou pou examiné dan sa lartik-la ek dan prochain lartik?

² Dan l’encouragement ki Paul ti donné ena enn principe important: pou nou kapav garde nou l’esperance bien vivant, nou bizin guette pli loin ki bann kitsoz ki zis devant nou. Nou bizin fixé nou l’attention lor bann l’evenement important ki nou pa trouvé asterla. (Héb. 11:1; 12:1, 2) Alors, anou examine dix l’evenement ki pou arrivé dan l’avenir, ki ena enn rapport avek nou l’esperance pou vive pou touletan. a

3. (a) Dapré 1 Thessaloniciens 5:2, 3, ki kitsoz ki pou arrivé bientot? (b) Ki bann chef politik pou faire, ek kitfois kisannla ki pou associé avek zot?

³ Dan lettre ki Paul ti ecrire bann Thessalonicien, li ti mentionne enn parmi bann kitsoz ki pou arrivé. (Lire 1 Thessaloniciens 5:2, 3.) Li ti attire nou l’attention lor “jour Jéhovah.” Dan sa verset-la, “jour Jéhovah” represente  enn periode le temps ki pou commencé avek destruction fausse religion ek ki pou fini avek la guerre Har-Maguédôn. Selman, zis avant ki jour Jéhovah commencé, bann dirigeant sa le monde-la pou dire: “La paix ek securité!” Li possible ki sa declaration-la faire reference ar enn l’evenement ou-soit ar enn serie l’evenement. Bann nation kitfois pou pensé ki zot pou pré pou reglé certain parmi bann pli grand probleme ki zot ena. Ki bann chef religieux pou faire? Zot faire partie dan le monde, alors kitfois zot pou associé-zot avek bann chef politik. (Rév. 17:1, 2) Lerla, clergé la chretienté pou imite bann fausse prophete dan ancien la ville Juda. Jéhovah ti dire lor sa bann prophete-la: “Zot [pé] dire: ‘Ena la paix! Ena la paix!’ alors ki pena la paix.”​—Jér. 6:14; 23:16, 17.

4. Ki nou comprend, mais ki bann dimoune en general pa comprend?

⁴ Kan pou faire declaration: “La paix ek securité!,” sa pou montré ki jour Jéhovah pou commencé. A cause sa, Paul ti kapav dire: “Bann frere, zot pa dan noirté, pou ki sa jour-la vinn enn coup lor zot couma bann voleur, parski zot tou zot bann garson la lumiere.” (1 Thess. 5:4, 5) Nou pa pareil couma bann dimoune en general, nou, nou comprend signification biblik bann l’evenement ki pé arrivé zordi. Couma sa prophetie ki koz lor ‘la paix ek securité-la’ pou realisé exactement? Nou pou bizin attann ek guetté pou nou koné. Alors, nou bizin bien decidé pou “reste lor nou garde ek garde nou bon sens.”​—1 Thess. 5:6; Tseph. 3:8.

5. (a) Couma ‘la grande tribulation’ pou commencé? (b) Ki “la reine” ki pou dan l’erreur?

⁵ Ki pou arrivé apré? Paul ti dire: “Kan zot pou dire: ‘La paix ek securité!’ lerla, enn sel coup enn destruction pou vinn lor zot.” Premier partie sa ‘destruction-la’ c’est kan pou attak “Babylone la Grande,” l’empire mondial la fausse religion, ki la Bible appel aussi enn “prostitué.” (Rév. 17:5, 6, 15) Sa l’attak ki pou ena kont tou bann fausse religion-la, parmi ena aussi la chretienté, c’est sa-mem commencement ‘la grande tribulation.’ (Mat. 24:21; 2 Thess. 2:8) Pou beaucoup dimoune, sa l’evenement-la pou arrivé par surprise. Kifer? Parski avant sa l’evenement-la, touletan sa prostitué-la ti considere li-mem couma “enn la reine” ki ‘jamais pa ti pou en deuil.’ Mais enn sel coup, li pou decouvert ki li ti dan l’erreur. Li pou disparette bien vite, coumadir dan “enn sel jour.”​—Rév. 18:7, 8.

6. Kisannla pou detruire fausse religion?

⁶ Parole Bondié faire nou koné ki c’est  enn “bête sauvage couleur rouge” ki ena “dix corne” ki pou attak sa prostitué-la. Kan nou etudié livre Révélation, nou aprann ki sa bête sauvage-la represente l’Organisation Nation uni (ONU). “Sa dix corne[-la]” represente tou bann puissance politik ki existé zordi ek ki soutenir sa “bête sauvage.” b (Rév. 17:3, 5, 11, 12) Ki qualité destruction pou ena? Bann pays ki forme partie dan Nation uni, pou prend tou di-bien sa prostitué-la, pou denonce seki li été vrai-mem, pou devore li ek pou ‘brule li net.’ So destruction pou total.​—Lire Révélation 17:16.

7. Ki pou provok l’attak ki la “bête sauvage” pou faire?

⁷ Enn prophetie biblik montré aussi seki pou provok sa l’attak-la. Dan enn certaine fason, Jéhovah pou mette dan leker bann dirigeant politik “pou realise so pensée,” setadir pou detruire sa prostitué-la. (Rév. 17:17) La religion favorise la guerre ek li responsable beaucoup probleme dan le monde; alors, bann nation kitfois pou pensé ki li pou dan zot l’interet si zot detruire sa prostitué-la. En realité, kan sa bann dirigeant-la pou detruire fausse religion, zot pou croire ki zot pé accompli zot prop ek “sel pensée.” Mais en realité, zot pou agir couma enn instrument dan la main Bondié pou detruire tou bann fausse religion. Alors, sans ki personne attann, enn partie systeme Satan pou attak enn lot partie, ek Satan pa pou kapav faire nanyé pou empeche sa.​—Mat. 12:25, 26.

8. Ki été l’attak “Gog dan pays Magog”?

⁸ Apré ki fausse religion pou fini detruire, bann serviteur Bondié pou toujours “reste en securité” ek “sans muraille.” (Ézék. 38:11, 14) Peuple Bondié pou contigne adore Jéhovah ek pou parette sans defense. Mais ki pou arrive zot? Li parette ki pou ena “beaucoup peuple” ki pou vinn attak zot. Parole Bondié dire ki sa l’attak-la pou faire par “Gog dan pays Magog.” (Lire Ézékiel 38:2, 15, 16.) Couma nou bizin considere sa l’attak-la?

9. (a) Ki kitsoz ki pli important pou enn chretien? (b) Ki nou bizin faire asterla pou fortifié nou la foi?

⁹ Mem si nou koné en avance ki pou ena enn l’attak lor peuple Bondié, sa pa faire nou tracassé plus ki bizin. Au contraire, seki pli important pou nou c’est pa si nou pou gagne la vie ou-soit non, mais ki nom Jéhovah sanctifié ek so souveraineté justifié.  En realité, Jéhovah inn dire plus ki 60 fois: “Zot pou bizin koné ki mo-mem Jéhovah.” (Ézék. 6:7; guette note.) Alors, nou bien interessé pou koné couma sa partie extraordinaire dan prophetie Ézékiel-la pou realisé. Nou ena confiance ki “Jéhovah koné couma pou delivré bann dimoune ki attaché ar Li, kan zot dan l’epreuve.” (2 Pierre 2:9) Pendant ki nou pé attann ki sa prophetie-la realisé, nou envie faire tou seki nou kapav pou fortifié nou spiritualité pou ki nou kapav garde nou l’integrité envers Jéhovah dan n’importe ki l’epreuve ki nou pou bizin enduré. Ki nou bizin faire? Nou bizin prié, etudié Parole Bondié ek medite lor la, ek aussi partage message lor Royaume Bondié avek lezot. Kan nou faire sa, nou garde nou l’esperance la vie eternel bien solide, pareil couma “l’ancre enn bateau.”​—Héb. 6:19; Ps. 25:21.

10, 11. Ki pou provok la guerre Har-Maguédôn, ek ki pou arrivé lerla?

¹⁰ Ki l’evenement bien important sa l’attak kont bann serviteur Jéhovah-la pou provoké? Jéhovah pou donne l’ordre Jésus ek bann l’armée ange ki dan le ciel, pou sauve So peuple. (Rév. 19:11-16) Seki Jéhovah pou faire, sa-mem “la guerre grand jour Bondié Tout-Puissant,” ki appel Har-Maguédôn.​—Rév. 16:14, 16.

¹¹ Concernant sa la guerre-la, Jéhovah dire par moyen Ézékiel : “‘Mo pou appel enn l’epée kont [Gog] dan tou bann l’endroit kot ena mo bann montagne,’ c’est seki Souverain Seigneur Jéhovah dire. ‘Sakenn pou tourne so l’epée kont so frere.’” Bann ki dan coté Satan pou paniké ek zot pa pou koné ki pou faire, zot pou tourne zot zarme kont bann dimoune ki dan zot prop camp​—guerrier kont guerrier. Mais selman, Satan pa pou sapé. Jéhovah dire: “Mo pou faire . . . difé, ek soufre, tombe lor [Gog], lor so bann groupe ek lor beaucoup peuple ki avek li.” (Ézék. 38:21, 22) Ki pou arrivé kan Bondié pou faire sa?

12. Ki kitsoz bann nation pou obligé reconette?

¹² Bann nation pou bizin realisé ki tou seki pé arrive zot, setadir zot destruction, c’est par l’ordre Jéhovah Li-mem. Alors, pareil couma dan le passé, l’armée égyptien ki ti poursuive bann Israélite ziska la mer Rouge ti criyé: “Jéhovah pé laguerre pou zot”!, kitfois bann dimoune ki dan coté Satan aussi pou faire pareil. (Ex. 14:25) Oui bann nation pou obligé reconette kisannla Jéhovah. (Lire Ézékiel 38:23.) Ki quantité le temps resté avant ki sa bann l’evenement-la arrivé?

13. Ki nou koné lor cinquieme partie sa statue ki Daniel decrire-la?

¹³ Enn prophetie dan livre Daniel faire nou koné dan ki lepok nou pé vive. Daniel decrire enn statue ki ena enn forme humain ek ki’nn faire avek different metal. (Dan. 2:28, 31-33) Li represente different puissance mondial ki’nn apparette enn apré lot ek ki finn ena enn grand l’influence lor peuple Bondié, dan le passé ek asterla. Sa bann puissance mondial-la c’est Babylone, l’Empire médo-perse, la Grèce, Rome​—ek dernier, dan nou lepok, enn lot puissance mondial. Kan nou etudié prophetie Daniel, nou aprann ki lipié ek bann lé-doigt lipié sa statue-la represente sa dernier puissance mondial-la. Pendant Premier Guerre mondial, la Grande Bretagne ek États-Unis ti faire enn l’alliance. Oui, cinquieme partie sa statue Daniel-la represente Puissance mondial anglo-américain. So lipié forme dernier partie sa statue-la, ek sa montré ki pa pou ena okenn puissance humain ki pou apparette encore.  So lipié ek so bann lé-doigt lipié inn faire avek ferraille ek l’argile, seki montré ki Puissance mondial anglo-américain bien fragile.

14. Ki puissance mondial pou dominé kan Har-Maguédôn pou arrivé?

¹⁴ Sa mem prophetie-la montré ki Royaume Bondié, representé par enn gros roche, finn sorti dan enn montagne, ki represente souveraineté Jéhovah. Sa finn arrivé en 1914. Sa roche-la pé vinn direct lor lipié sa statue-la. Kan Har-Maguédôn pou vini, lipié ek tou bann partie ki resté dan sa statue-la pou crasé net. (Lire Daniel 2:44, 45.) Alors, sa vedir ki Puissance anglo-américain pou toujours puissance mondial ki pou dominé kan Har-Maguédôn pou arrivé. Li pou vrai-mem extraordinaire pou trouve sa prophetie-la realisé dan enn fason complet! c Mais ki Jéhovah inn reservé pou Satan?

15. Apré Har-Maguédôn, ki pou arrive Satan ek so bann demon?

¹⁵ Premierement, Satan pou bizin trouvé couma so l’organisation lor la terre pou disparette net. Apré sa, Bondié pou tourne so l’attention lor Satan li-mem. L’apotre Jean dire seki pou arrivé apré. (Lire Révélation 20:1-3.) Jésus Christ​—sa “ange . . . avek la clé l’abime-[la]”​—pou trappe Satan ek so bann demon, pou jette zot dan l’abime, ek pou garde zot ladan pendant mille an. (Luc 8:30, 31; 1 Jean 3:8) Par sa action-la, Jésus pou commence crase la tête serpent. d​—Gen. 3:15.

16. Ki pou arrive Satan kan li pou dan “l’abime”?

¹⁶ Ki été sa “l’abime” kot pou jette Satan ek so bann demon-la? Mot grec abussos ki Jean servi, vedir “bien-bien fond.” Finn aussi traduire sa mot-la par “ki pena profondeur, ki pena limite,” ek “enn l’espace vide ki pena fond.” Alors, c’est enn place kot personne pa kapav allé, excepté Jéhovah ek so ange ki ena “la clé l’abime.” Dan sa place-la, Satan pou nepli kapav faire nanyé, li pou coumadir dan l’etat enn dimoune mort. Li pa ‘pou kapav detourne bann nation encore.’ Oui, sa “lion ki pé criyé[-la]” pou obligé reste trankil!​—1 Pierre 5:8.

17, 18. (a) Ki bann l’evenement ki nou pankor trouvé, nou finn examiné ziska ler? (b) Ki pou arrivé apré sa bann l’evenement-la?

¹⁷ Bann l’evenement ki ena enn grand l’importance ek enn grand signification pé attann nou dan l’avenir. Nou pé attann avek impatience pou koné couma sa declaration “La paix ek securité-[la]” pou realisé. Lerla, nou pou temoin destruction Babylone la Grande, l’attak Gog de Magog, la guerre Har-Maguédôn. Apré, pou jette Satan ek so bann demon dan l’abime. Finalement, apré sa bann l’evenement-la, kan tou bann mauvais dimoune pou disparette, nou pou konn enn nouveau la vie enba Regne mille an Christ, kot nou pou kapav profite enn “l’abondance la paix.”​—Ps. 37:10, 11.

¹⁸ A part sa cinq l’evenement ki nou finn examiné-la, ena lezot “kitsoz ki nou pa trouvé” lor ki nou bizin “fixé nou lizié.” Nou pou examine sa bann lezot l’evenement-la dan prochain lartik.