“Pou bann dimoune marié, mo donne sa bann instruction-la, pa moi mais nou Seigneur li-mem.”​—1 COR. 7:10.

ESKI OU KAPAV EXPLIKÉ?

Dan ki sens Bondié mette mari ek femme enba enn sel joug?

Couma bann ancien kapav aide bann chretien ki pé gagne probleme dan zot mariage?

Couma nou bizin considere mariage?

1. Couma eski bann chretien considere mariage, ek kifer?

 KAN bann chretien marié, zot faire enn voeu devant Bondié​—enn responsabilité ki zot bizin prend serieux. (Eccl. 5:4-6) Parski Jéhovah inn crée mariage, c’est Li-mem ki’nn “mette enba enn sel joug” deux dimoune ki’nn marié. (Marc 10:9) N’importe ki la loi ena dan enn pays concernant mariage, devant lizié Jéhovah, deux dimoune ki’nn marié zot enba sa joug-la. Ki zot ti bann adorateur Jéhovah kan zot ti marié ou-soit non, bann serviteur Jéhovah bizin considere mariage couma enn l’engagement bien serieux.

2. Ki bann question nou pou examiné dan sa lartik-la?

² Kan enn mariage reussi, sa kapav faire la famille gagne beaucoup la joie. Mais ki enn couple pou faire si zot gagne probleme dan zot mariage? Eski kapav sauve enn mariage coumsa? Ki l’aide enn couple ki pé gagne probleme dan zot mariage, kapav gagné?

ESKI OU MARIAGE POU HEUREUX OU-SOIT NON?

3, 4. Ki kapav arrivé si enn chretien pa prend enn bon decision kan li choisir so conjoint?

³ Kan mariage enn chretien marche bien, c’est enn la joie ek sa honore Jéhovah. Si enn mariage pa pé marche bien, sa kapav faire bann conjoint bien souffert ek kitfois faire zot gagne aussi lezot probleme. Enn chretien celibataire ki decide pou marié ek ki suive bann principe biblik, kapav prend enn bon depart dan so mariage. Parkont, enn chretien ki prend enn mauvais decision kan li choisir enn conjoint, kapav bien malheureux apré. Par exemple, certain jeune commence frequenté alors ki zot pankor pré pou prend bann responsabilité ki ena dan mariage. Certain trouve enn conjoint par Internet ek pressé pou marié ek lerla zot malheureux. Ena lezot ki commette enn peché  grave pendant zot frequentation, mais kan-mem sa, zot marié. Kitfois lerla kan zot marié, zot pena enn grand respé pou zot conjoint ek zot mariage pena enn base solide.

⁴ Certain chretien pa marié “dan le Seigneur,” ek souvent zot souffert a cause bann consequence ki zot bizin payé. (1 Cor. 7:39) Si ou dan sa situation-la, prié pou ki Bondié pardonne ou ek aide ou. Li pa pou empeche ou paye consequence ou bann erreur, mais Li pou aide ou pou faire face ar bann l’epreuve, si ou repenti. (Ps. 130:1-4) Faire tou seki ou kapav pou faire Li plaisir asterla ek dan l’avenir, ek ‘la joie Jéhovah pou ou forteresse.’​—Neh. 8:10.

KAN ENN MARIAGE EN DANGER

5. Concernant enn mariage malheureux, ki qualité raisonnement enn chretien bizin rejeté?

⁵ Bann ki malheureux dan zot mariage, kitfois demann-zot-mem: ‘Eski li vaut la peine ki mo sauve mo mariage? Si selman mo ti kapav ré-commence mo la vie ek marié ar enn lot dimoune!’ Kitfois zot revé pou quitte zot conjoint ek zot dire: ‘Mo envie retrouve mo liberté! Kifer mo pa divorcé? Mem si pena okenn raison biblik pou mo divorcé, mo kapav separé ek profite mo la vie.’ Au lieu ki enn chretien raisonne coumsa ek revé couma so la vie ti pou kapav été, li bizin faire tou pou ameliore so situation ek suive direction Bondié.

6. Expliké ki Jésus ti pé rod dire dan Matthieu 19:9.

⁶ Si enn chretien decide pou divorcé, kitfois li kapav libre ou-soit pa libre pou ré-marié. Jésus ti dire: “N’importe kisannla ki divorce avek so femme, excepté a cause fornication, ek marié avek enn lot, commette l’adultere.” (Mat. 19:9) Dan sa verset-la, mot “fornication” implik l’adultere ek lezot peché grave dan domaine sexuel. Li bien important ki enn chretien prié pou gagne direction Bondié si li ou-soit so conjoint decide pou divorcé alors ki personne pa finn commette fornication.

7. Ki bann dimoune kapav pensé si mariage enn chretien pa marché?

⁷ Enn mariage ki pa marché kitfois montré ki spiritualité enn chretien faible. L’apotre Paul ti pose sa question bien important-la: “Si enn kikenn pa koné couma pou dirige so prop lakaz, couma li pou prend soin congregation Bondié?” (1 Tim. 3:5) En realité, si toulé-deux conjoint dire ki zot bann serviteur Jéhovah ek pourtant zot mariage pa marche bien, bann dimoune pou kapav pensé ki sa couple-la pa pé vrai-mem mette en pratik seki zot preché.​—Rom. 2:21-24.

8. Si enn couple chretien decide pou separé, ki probleme kitfois zot ena?

⁸ Kan bann chretien ki baptisé decide pou separé ou-soit pou divorcé alors ki zot pena okenn raison biblik pou faire sa, sa vedir ki ena enn probleme spirituel dan  zot couple. Kitfois enn parmi zot, ou-soit toulé-deux pa pé applik bann principe biblik. Si zot ti vrai-mem ‘faire Jéhovah confiance avek tou zot leker,’ zot ti pou kapav sauve zot mariage.​—Lire Proverbes 3:5, 6.

9. Couma certain chretien finn recompensé parski zot finn faire zeffort pou reste avek zot conjoint?

⁹ Beaucoup mariage ki ti parette pé al cassé finn reussi marche bien avek le temps. Bann chretien ki pa finn baisse lé-bras ek pa finn separé couma zot gagne probleme, finn souvent recompensé. Guette seki kapav arrivé dan enn famille kot enn conjoint pa servi Jéhovah. L’apotre Pierre ti ecrire: “Zot bann femme, soumette ar zot prop mari, pou ki si ena ki pa oulé ecoute la parole, kapav gagne zot sans parole grace a conduite zot femme, parski zot finn trouvé ar zot prop lizié couma zot femme ena enn conduite pur ek enn grand respé.” (1 Pierre 3:1, 2) Oui, enn kikenn ki pa servi Jéhovah kapav accepté la verité grace a bon conduite so conjoint! Enn chretien ki faire tou pou sauve so mariage, honore Bondié ek sa kapav faire enn mari, enn femme ou-soit bann zenfant ki zot kapav ena, gagne bann grand benediction.

10, 11. Sans ki enn chretien attann, ki probleme kapav arrivé dan so mariage, mais ki l’assurance li kapav ena?

¹⁰ La plupart chretien celibataire envie faire Jéhovah plaisir, alors zot choisir pou marié ar enn serviteur Jéhovah ki baptisé. Mais kan-mem, sans ki enn chretien attann, situation kapav changé. Li kapav arrivé, mem si li rare, ki apré mariage, enn conjoint gagne bann probleme psychologik assez grave. Ou-soit, kitfois enn conjoint vinn enn proclamateur inactif. Anou guette seki’nn arrive Linda, a enn chretien bien zelé ek enn mama devoué. Sans ki li ti kapav faire nanyin, so mari, ki ti enn chretien baptisé, ti prend enn mauvais chemin, li pa ti repenti ek finalement li ti exclu. Ki enn chretien bizin faire si so mariage en danger a cause enn situation coumsa?

¹¹ Kitfois ou pou demann-ou-mem: ‘Eski mo bizin contigne faire tou pou sauve mo mariage n’importe ki arrivé?’ Personne pa gagne droit prend enn decision dan ou place. Pourtant, ena bann bon raison pou ou pa baisse lé-bras si ou pé gagne probleme dan ou mariage. Enn chretien ki envie faire Bondié plaisir ek ki pé supporte bann l’epreuve dan enn mariage difficile a cause so conscience, ena enn grand valeur devant Bondié. (Lire 1 Pierre 2:19, 20.) Par so Parole ek l’esprit saint, Jéhovah pou aide enn chretien ki pé faire bann grand zeffort pou sauve so mariage.

ZOT PARÉ POU AIDÉ

12. Ki bann ancien pou pensé lor nou si nou rod zot l’aide?

¹² Si ou pé faire face ar bann probleme dan ou mariage, pa hesité pou rod l’aide ar bann chretien mur. Bann ancien zot couma bann berger dan congregation ek zot pou bien content aide ou pou trouve bann conseil inspiré ki ena dan la Bible. (Actes 20:28; Jacq. 5:14, 15) Fodé pa ou pensé ki ou ek ou conjoint pou perdi respé bann ancien si ou rod enn l’aide spirituel ek si ou koz ar zot lor enn probleme grave ki ena dan ou couple. Au contraire,  l’amour ek respé ki zot ena pou ou, pou augmenté parski zot pou trouvé ki ou envie faire Bondié plaisir.

13. Ki conseil nou kapav trouvé dan 1 Corinthiens 7:10-16?

¹³ Kan bann ancien bizin aide enn chretien ki ena enn conjoint ki pa servi Jéhovah, zot servi bann conseil couma seki Paul ti donné kan li ti ecrire: “Pou bann dimoune marié, mo donne sa bann instruction-la, pa moi mais nou Seigneur li-mem: fodé pa ki enn femme separé ar so mari; mais si li’nn separé, li bizin reste coumsa-mem, pa marié, ou-soit li bizin reconcilié avek so mari; ek fodé pa ki enn mari quitte so femme. . . .  Parski, femme, couma to koné ki to pa pou sauve to mari? Ou-bien mari, couma to koné ki to pa pou sauve to femme?” (1 Cor. 7:10-16) Li vrai-mem enn benediction kan enn conjoint ki pa servi Jéhovah accepté la verité!

14, 15. Kan eski enn chretien kitfois kapav pense pou separé, mais kifer li important ki li bien reflechi lor la dan la priere ek examine-li-mem dan enn fason honnete?

¹⁴ Ki bann raison kapav pousse enn femme chretien pou “separé” ar so mari? Certain finn choisir pou separé, parski conjoint-la pa donne so famille seki li bizin pou vive. Lezot finn separé parski zot ti pé gagne batté ek zot la vie ti en danger, ou-soit parski zot spiritualité ti en danger.

¹⁵ Separé ou-soit pa separé, c’est enn decision personnel. Selman, enn chretien bizin bien reflechi lor la dan la priere ek examine-li-mem dan enn fason honnete. Par exemple, eski conjoint ki pa servi Jéhovah-la, c’est li tousel ki responsable si spiritualité sa chretien-la en danger ou-soit eski c’est chretien-la ki pa finn ena enn l’etude la Bible regulier, pa finn assisté reunion ek pa finn sorti predication regulierement?

16. Ki pou empeche enn chretien pressé pou prend decision pou divorcé?

¹⁶ Nou pa pou pressé pou prend decision pou divorcé, parski nou relation avek Jéhovah ena enn grand valeur pou nou ek parski nou considere mariage couma enn don ki Bondié inn faire. En tant ki bann serviteur Jéhovah, sanctification nom Bondié ena enn grand l’importance pou nou. Alors, nou pa pou decidé pou divorcé parski dan nou leker nou’nn fini faire plan pou ré-marié avek enn lot.​—Jér. 17:9; Mal. 2:13-16.

17. Dan ki situation nou kapav dire ki Bondié inn appel bann chretien marié pou la paix?

¹⁷ Enn chretien ki marié avek enn kikenn ki pa servi Jéhovah, bizin faire tou pou so mariage reussi. Mais fodé pa ki enn chretien senti-li coupable si so conjoint ki pa servi Jéhovah, decide pou quitte li, malgré tou bann zeffort ki li finn faire pou sauve so mariage. Paul ti ecrire: “Si sa incroyant-la decide pou allé, laisse li allé; dan sa situation-la, enn frere ou-soit  enn soeur nepli enba so controle, mais Bondié inn appel zot pou la paix.”​—1 Cor. 7:15. b

FAIRE JÉHOVAH CONFIANCE

18. Mem si enn dimoune pa reussi sauve so mariage, ki bann bon resultat li kapav gagné grace a so bann zeffort?

¹⁸ Kan ou pé faire face ar n’importe ki probleme dan ou mariage, prié Jéhovah pou ki Li donne ou courage ek touletan faire Li confiance. (Lire Psaume 27:14.) Guette l’exemple Linda, ki nou ti mentionné avant. Finalement, li ek so mari ti divorcé mem si pendant beaucoup l’année Linda ti faire zeffort pou sauve zot mariage. Eski li pensé ki li finn perdi so le temps? Li dire: “Pa ditou, mo bann zeffort ti rann enn bon temoignage pou bann ki ti pé observe nou. Mo ena enn conscience trankil. Ek seki pli bon dan tousala, sa bann l’année-la finn aide mo tifi pou reste fort dan la verité. Li’nn vinn enn Témoin de Jéhovah bien zelé.”

19. Ki kapav arrivé si nou faire zeffort pou sauve nou mariage?

¹⁹ Enn chretienne ki appel Marilyn content ki li ti faire Jéhovah confiance ek li ti faire enn grand zeffort pou sauve so mariage. Li dire: “Mo ti envie separé ar mo mari parski li pa ti soutenir moi lor plan financier ek li ti mette mo spiritualité en danger. Pourtant, mo mari ti enn ancien avant ki li ti implik-li dan bann activité commercial ki pa sage. Li ti commence rate so bann reunion ek nou ti arrete koz ar nou camarade. Ti ena enn l’attak terroriste dan nou la ville ki ti faire moi gagne tellement peur ki mo ti reste dan mo coin ek pa ti frequente personne. Apré sa, mo ti realisé ki mo aussi mo ti en tort. Nou ti ré-commence koz ar nou camarade, reprend nou l’etude familial ek assisté nou bann reunion regulierement. Bann ancien ti bon envers nou ek zot ti bien aide nou. Nou mariage ti prend enn nouveau depart. Avek le temps, mo mari ti ré-gagne bann privilege dan congregation. Sa situation-la ti difficile, [mais] li ti fini bien.”

20, 21. Ki nou bizin bien decidé pou faire en rapport avek mariage?

²⁰ Ki nou celibataire ou-soit nou marié, anou touletan agir avek courage ek faire Jéhovah confiance. Si nou pé gagne bann probleme dan nou mariage, nou bizin faire tou seki nou kapav pou reglé zot, ek rappel ki bann ki marié “zot nepli deux, mais enn sel la chair.” (Mat. 19:6) Ek fodé pa nou blié ki si nou contigne reste avek nou conjoint ki pa pé servi Jéhovah, mem si nou pé gagne bann difficulté, kitfois nou pou ena la joie pou trouve li accepté la verité.

²¹ Dan n’importe ki situation nou été, anou bien decidé pou agir avek sagesse pou ki bann dimoune ki en dehors congregation rann enn bon temoignage lor nou. Si nou mariage pé passe par bann difficulté ek nou envie quitte nou conjoint, nou bizin faire bann la priere profond, examine nou bann mobile dan enn fason honnete, examine bien bann verset biblik, ek rod l’aide avek bann ancien. Nou bizin surtout bien decidé pou faire Jéhovah plaisir dan tou kitsoz ek montré ki mariage, sa don extraordinaire ki Li’nn faire-la, ena enn grand valeur pou nou.

[Notes]

[Questions d’étude]

[L’encadré page 20]

Bann chretien ki pa baisse lé-bras kan zot gagne probleme dan zot mariage, souvent zot recompensé

[L’encadré page 22]

Touletan faire Jéhovah confiance ek prié Li pou gagne courage

[L’encadré page 19]

Jéhovah beni bann conjoint chretien ki faire zeffort pou sauve zot mariage

[Zimage page 21]

Nou kapav gagne reconfort ek l’aide lor plan spirituel dan congregation