Eski dan le passé ou ti pé servi Jéhovah? Eski ou finn pense pou ré-commence servi Li, mais ou pé demann-ou-mem si Li pou accepté ou? Alors, s’il vous plait, lire bien sa lartik-la. Li finn preparé zis pou ou.

“MO TI prié Jéhovah ek mo ti suppliye Li pou Li laisse moi retourne lakaz ek ré-commence servi Li, ek aussi pou pardonne moi parski mo finn blesse Li.” C’est seki enn madame ki ti’nn grandi dan la verité, mais ki ti’nn arrete servi Jéhovah ek ti ena enn conduite ki ti contraire ar bann principe biblik, ti dire. Eski ou chagrin li? Eski ou demann-ou-mem: ‘Ki sentiment Bondié ena pou bann ki ti pé servi Li dan le passé? Eski Li rappel zot? Eski Li envie ki zot “retourne lakaz”?’ Pou reponn sa bann question-la, anou examine seki Jérémie ti ecrire. Bann reponse ki ou pou gagné surement pou rassure ou.​—Lire Jérémie 31:18-20.

Anou guetté dan ki contexte Jérémie ti ecrire sa bann parole-la. En 740 avant nou lepok, plusieurs dizaine l’année avant lepok Jérémie, Jéhovah ti permette ki bann Assyrien amenn royaume dix tribu Israël en captivité. a Bondié ti permette sa malheur-la arrivé pou discipline bann Israélite. Kifer? Parski so peuple ti’nn commence faire bann peché bien grave ek zot pa ti prend compte bann l’avertissement ki so bann prophete ti donne zot plusieurs fois. (2 Rois 17:5-18) Kan le peuple ti gagne bann difficulté en captivité, kan zot ti separé ar zot Bondié ek zot ti bien loin ar zot pays, eski sa ti faire zot change zot l’attitude? Eski Jéhovah ti’nn blié zot net? Eski Jéhovah ti pou accepté zot kan zot retourné?

“Mo ti ena regret”

Le peuple ti retourne a la raison kan zot ti en captivité ek sa ti pousse zot pou repenti. Zot ti bien regretté ek Jéhovah ti remarké ki zot ti vrai-mem repenti. Ecoute seki Jéhovah ti dire kan Li ti decrire l’attitude ek sentiment Éphraïm, setadir sa bann Israélite ki ti en captivité-la.

Jéhovah ti dire: “Mo finn bien tann Éphraïm ki pé ploré lor li-mem.” (Verset 18) Li ti tann bann Israélite ki ti pé plaigné a cause consequence zot bann peché. Enn bibliste dire ki sa l’expression “ploré lor li-mem[-la]” kapav vedir “sakouyé ou-soit balancé.” Zot ti pareil couma enn garson ki finn faire peché ek ki pé sakouye so la tête kan li pé reflechi lor malheur ki li finn amenn lor li-mem. Li envie retrouve la vie ki li ti ena avant, kan li ti kot li. (Luc 15:11-17) Ki sa bann Israélite-la ti pé dire?

“To finn corrige moi . . . pareil couma enn veau ki pa finn dressé.” (Verset 18) Le peuple ti reconette ki zot ti merite sa discipline-la. Apré tou, zot ti vinn pareil couma enn veau ki pa ti dressé. Dapré enn livre, kitfois sa comparaison-la vedir ki zot ti pareil couma enn veau ki “pa ti pou gagne piqué ar sa baton ki ti servi pou faire bann zanimo avancé-la, si avant li pa ti rebellé enba so joug.”

“Faire moi retourné ek mo pou retourné volontairement, parski toi to Jéhovah mo Bondié.” (Verset 18) Parski le peuple ti repenti, zot ti demann l’aide Bondié. A cause bann peché ki zot ti faire, zot ti prend enn mauvais chemin, mais asterla, zot ti pé suppliye Bondié pou aide zot retourné ek ré-gagne  so faveur. Enn traduction la Bible dire: “To-mem nou Bondié​—s’il te plait, laisse nou retourne lakaz.”​—Contemporary English Version.

“Mo ti ena regret. . . .  Mo ti gagne honté ek mo ti aussi senti-moi humilié.” (Verset 19) Le peuple ti regretté parski li ti’nn faire peché. Zot ti accepté zot tort ek zot ti reconette ki zot ti coupable. Zot ti tellement honté ek zot ti senti-zot rejeté, coumadir zot ti pé tape zot l’estomac.​—Luc 15:18, 19, 21.

Bann Israélite ti repenti. Zot ti bien triste, zot ti confesse zot peché ar Bondié ek ti rejette zot bann mauvais fason agir. Eski zot repentance ti pou adouci leker Jéhovah? Eski Li ti pou laisse zot retourne vers Li?

“Vrai-mem mo pou ena pitié pou li”

Jéhovah ti ena enn l’attachement special pou bann Israélite. Li ti dire: “Mo finn vinn couma enn Papa pou Israël; ek Éphraïm li, li mo premier-né.” (Jérémie 31:9) Couma enn papa ki ena l’amour kapav refuse pou accueillir enn garson ki pé retourné avek enn leker rempli ar regret? Remarké couma Jéhovah exprime so bann sentiment pou so peuple pareil couma enn Papa.

“Eski Éphraïm li enn garson ki ena valeur pou moi, enn zenfant ki mo bien gaté? Parski chaque fois ki mo pou koz kont li, pena doute ki mo pou rappel li encore plus.” (Verset 20) Nou trouve enn grand tendresse dan sa bann parole-la, pa vrai? Pareil couma enn parent ki ferme mais ki ena l’amour, Bondié ti obligé koz “kont” so bann zenfant, plusieurs fois Li ti averti zot concernant zot bann peché. Kan zot ti faire la tête dur ek pa ti ecoute Li, Li ti faire zot al en exil​—coumadir, Jéhovah ti faire zot quitte zot lakaz. Mais, mem si Li ti bizin puni zot, Li pa ti blié zot. Jamais Li ti pou kapav faire sa. Enn papa ki content so bann zenfant pa pou blié zot. Alors, ki Jéhovah ti ressenti kan Li ti trouve so bann zenfant manifesté enn vrai repentance?

“Mo bann trippe ti pé cordé pou li. b Vrai-mem mo pou ena pitié pou li.” (Verset 20) Jéhovah ena enn grand l’amour pou so bann zenfant. Zot repentance sincere ti touche so leker, ek Li ti ena enn grand desir ki zot retourne vers Li. Pareil couma sa papa ki Jésus ti cité dan l’exemple fils prodigue-la, Jéhovah “ti ena enn grand pitié” ek ti bien envie accueillir so bann zenfant ki ti pé retourne lakaz.​—Luc 15:20.

“Jéhovah inn laisse moi retourne lakaz!”

Bann parole ki trouve dan Jérémie 31:18-20 aide nou pou comprend pli bien grand compassion ek misericorde Jéhovah. Bondié pa blié bann dimoune ki ti pé servi Li dan le passé. Ki Li pou faire si sa bann dimoune-la envie retourne vers Li? Bondié “disposé pou pardonné.” (Psaume 86:5) Jamais Li pou rejette bann ki vinn vers Li avek enn leker ki pé manifesté repentance. (Psaume 51:17) Au contraire, Li content pou accueillir zot.​—Luc 15:22-24.

Sa madame ki nou ti mentionné dan commencement sa lartik-la, ti faire premier pas pou retourne vers Jéhovah ek pou al dan enn congregation bann Témoins de Jéhovah dan so l’endroit. Au commencement, li ti bizin surmonte so bann sentiment negatif. Li rappel: “Mo pa ti senti-moi digne pou retourne vers Jéhovah.” Mais bann ancien dan congregation ti encourage li ek ti aide li pou ré-vinn fort lor plan spirituel. Avek enn leker rempli ar reconnaissance, sa madame-la dire: “Mo tellement content ki Jéhovah inn laisse moi retourne lakaz!”

Si ou ti pé servi Jéhovah dan le passé ek ou pé pense pou ré-servi Li encore, nou invite ou pou al dan enn congregation bann Témoins de Jéhovah dan ou l’endroit. Rappel ki Jéhovah agir avek compassion ek misericorde kan bann dimoune ki pé repenti dire Li: “S’il te plait, laisse nou retourne lakaz.”

[Notes]