ESKI seki la Bible dire concernant relation sexuel li’nn demodé ek li trop strict? Non. Au contraire, seki la Bible dire concernant bann relation sexuel kapav aide nou pou evite:

▪ Gagne bann maladie ki transmette par relation sexuel

▪ Bann grossesse en dehors mariage

▪ Bann consequence ki faire souffert kan enn mariage cassé

▪ Enn conscience troublé

▪ Perdi nou l’estime, seki arrivé kan nou laisse lezot servi nou pou satisfaire zot prop desir

Nou Createur, Jéhovah, a envie ki nou apprecié ek gagne bann bienfait kan nou servi bann don ki Li’nn donne nou. Bondié Li-mem ‘enseigne ou pou ou profit.’ (Isaïe 48:17) Enn dimoune ki vive en accord avek bann principe biblik concernant bann relation sexuel:

▪ Gagne faveur Bondié

▪ Gagne la paix l’esprit

▪ Ena bann lien pli solide dan la famille

▪ Gagne enn bon reputation

▪ Ena respé pou li-mem

Mais ki ou pou faire si pou le moment ou pa pé vive en accord avek bann principe moral ki ena dan la Bible? Eski ou kapav change ou fason vive? Eski Bondié pou servi conduite ki ou ti ena dan le passé kont ou?

Guette sa l’exemple-la: certain dimoune ki ti forme partie dan congregation premier siecle, avant ti bann fornicateur, adultere ek homosexuel. Zot ti choisir pou change fason ki zot ti pé vive, ek zot ti gagne bann grand bienfait.  (1 Corinthiens 6:9-11) Zordi, plusieurs millier dimoune a travers le monde inn faire pareil. Zot inn arrete amenn enn la vie immoral ek zot inn gagne bann bienfait parski zot inn commence vive en accord avek bann principe biblik. Par exemple, anou guetté ki ti arrive Sarah, sa tifi ki nou ti mentionné dan premier lartik-la.

“Bien vite mo ti senti-moi soulagé”

Sarah ti rann-li compte ki la vie devergondé ki li ti pé amené pa ti faire li gagne liberté ek satisfaction ki li ti pé rodé. Li dire: “Mo ti ena l’impression ki mo conscience ti’nn vinn insensible. Mo ti honté ek mo ti peur pangar mo tombe enceinte ou-soit ramasse enn mauvais maladie. Jamais mo pa finn arrete croire ki Bondié existé, ek mo ti koné ki la vie ki mo ti pé amené ti faire Li la peine. Mo ti senti-moi sale, ek sa sentiment-la ti pé fatigue moi.”

Finalement, Sarah ti gagne courage pou change so la vie. Li ti rod l’aide ar so bann parent ki Témoins de Jéhovah. Li ti aussi demann l’aide ar bann ancien ki mur dan so congregation. Sarah dire: “Mo ti bien etonné ar bonté ek l’amour ki mo bann parent ek bann ancien ti manifesté envers moi, ek sa ti faire moi bien plaisir. Bien vite mo ti senti-moi soulagé.”

Zordi Sarah ena deux zenfant. Li dire: “Mo pa honté pou dire mo bann zenfant lor bann choix ki mo ti faire. Mo envie ki zot comprend couma sa ti affecté moi parski mo pa ti obeir bann principe Bondié. Mo l’objectif c’est pou aide zot pou apprecié bann bienfait physik, mental ek affectif ki nou gagné kan nou suive bann principe moral lor sexualité. Mo sur ki Bondié donne nou bann principe moral parski Li pa envie trouve nou souffert.”

Ou aussi si ou suive direction ki Bondié donné avek amour, ou pou kapav gagne bann bienfait. La Bible faire sa promesse-la: “Bann l’ordre Jéhovah, zot droite, zot faire leker content; commandement Jéhovah, li pur, li faire lizié brillé. . . . Ena enn grand recompense kan garde zot.”​—Psaume 19:8, 11. b

[Notes]

[L’encadré page 8]

Bann ki pa prend compte bann principe biblik, souvent provok bann douleur affectif

[L’encadré page 9]

Bann ki vive en accord avek bann principe biblik ena enn conscience pur ek bann relation pli solide dan la famille