KITFOIS ou finn tann ou-soit finn enseigne ou enn parmi bann mensonge ki nou habitué tendé lor Bondié, ki sa serie lartik-la finn examiné. Li possible ki ou pé encore hesité pou change ou bann croyance, surtout si sa faire plusieurs l’année ki ou finn croire ladan.

Li normal ki ou hesité. Certain l’Eglise decourage zot bann fidele pou compare zot bann l’enseignement avek seki la Bible dire. Certain essaye defann zot bann mensonge kan zot dire ki la Bible li compliké, ek ki pa tou dimoune ki kapav comprend li. Pourtant, la plupart parmi bann disciple Jésus ti bann dimoune simple, ki pa ti ena enn bel l’education, mais zot ti comprend so bann l’enseignement sans okenn difficulté.​—Actes 4:13.

Kitfois ou kapav hesité pou examine ou bann croyance parski ou peur pangar sa pou montré ki ou pena assez la foi. Eski ou pensé ki Bondié pa pou content ki ou pé faire bann recherche dan la Bible, message ki Li’nn donne l’humanité, pou comprend seki Li demann ou faire? Eski ena enn logik derriere sa? Non, au contraire, so Parole encourage ou pou examine bann l’Ecriture personnellement. Nou kapav lire dan Romains 12:2: “Verifié par zot-mem ki volonté Bondié, li bon, li acceptable ek li parfait.”

Aprann la verité lor Bondié c’est enn kitsoz bien important, c’est plus ki zis aprann enn nouveau kitsoz. Sa kapav ameliore ou la vie. (Jean 8:32) Deanne, ki nou ti mentionné dan premier lartik, finn batir so la foi lor Parole Bondié. Li raconté: “Jamais mo ti realisé ki bann l’Ecriture ti clair coumsa ziska ki mo commence etudié la Bible. Asterla mo konn Jéhovah, pa couma enn Bondié ki pena okenn sentiment, mais couma mo bon Papa ki ena l’amour. Mo la vie finn ena enn vrai but.”

Kitfois ou’nn deja faire bann recherche dan la Bible avant, sans ki ou’nn tire profit. Si ou ena sa sentiment-la, pa baisse lé-bras. Si ou pé essaye comprend la Bible alors ki finn enseigne ou bann mensonge lor Bondié, c’est coumadir ou pé faire enn puzzle ek zimage ki’nn donne ou pou guetté, li pa corresponn. Kitfois ou’nn reussi mette deux-trois piece ensam mais ou laisse tombé kan ou realisé ki sa pa pé corresponn avek zimage ki’nn donne ou. Ou bizin commence avek bon zimage, lerla kan ou pou faire puzzle-la, bann piece-la pou rente enn dan lot.

Eski ou ti pou content aprann la verité lor Bondié? Nou invite ou pou contacté bann Témoins de Jéhovah ki dan ou l’endroit, ou-soit pou ecrire lor enn parmi bann l’adresse ki trouve lor page 4 sa magazine-la, pou gagne enn l’etude la Bible gratis.

[L’encadré page 9]

“Verifié par zot-mem ki volonté Bondié, li bon, li acceptable ek li parfait.”​—ROMAINS 12:2