Forme bann frere pou zot qualifié-zot
“N’importe kisannla ki gagne enn l’instruction couma bizin, pou vinn pareil couma so enseignant.”—LUC 6:40.
1. Pendant so ministere lor la terre, couma Jésus ti pose enn base pou enn congregation extraordinaire?
A LA fin so l’Evangile, l’apotre Jean ti ecrire: “En realité, ena encore beaucoup lezot kitsoz ki Jésus inn faire, si ti bizin ecrire zot en detail, mo pensé ki le monde li-mem pa ti pou kapav garde tou sa bann rouleau-la.” (Jean 21:25) Mem si so ministere ti courte, Jésus ti bien actif pendant sa le temps-la. Parmi bann kitsoz ki li ti faire, li ti rod bann missié, li ti donne zot enn formation ek li ti organise zot pou prend la tête dan bann kitsoz spirituel kan li ti pou nepli lor la terre. Kan li ti retourne dan le ciel en l’an 33 nou lepok, Jésus ti pose enn base kot ti pou ena enn congregation extraordinaire. Dan sa congregation-la, bien vite ti pou ena plusieurs millier dimoune.—Actes 2:41, 42; 4:4; 6:7.
2, 3. (a) Kifer nou bien bizin ki bann frere qualifié-zot dan congregation? (b) Ki nou pou examiné dan sa lartik-la?
2 Zordi dan le monde, ena plus ki sept million proclamateur actif dan plus ki 100,000 congregation. Alors, nou encore toujours bizin bann frere pou prend la tête dan bann kitsoz spirituel. Par exemple, bien bizin bann ancien. Nou bizin felicite bann ki ena desir pou gagne sa privilege-la, parski zot pé “rod enn bon travail.”—1 Tim. 3:1.
3 Selman, bann zom pa qualifié-zot dan enn fason automatik pou zot gagne bann privilege dan congregation. Zis l’education ek l’experience dan la vie pa assez pou prepare enn zom pou faire sa qualité travail-la. Pou ki enn zom rempli sa bann responsabilité-la, li bizin qualifié-li lor plan spirituel. Li bizin ena bann qualité spirituel, parski sa li pli important ki so bann capacité ou-soit seki li’nn faire dan so la vie. Couma bann zom dan congregation kapav gagne l’aide pou qualifié-zot? Jésus ti dire: “N’importe kisannla ki gagne enn l’instruction couma bizin, pou vinn pareil couma so enseignant.” (Luc 6:40) Dan sa lartik-la, nou pou examine certain fason couma Jésus Christ, nou grand Enseignant, ti aide so bann disciple pou qualifié-zot pou gagne bann pli grand responsabilité. Nou pou guetté aussi ki bann leson nou kapav aprann ar seki li’nn faire.
“Mo finn appel zot mo bann camarade”
4. Couma Jésus ti montré ki li ti enn vrai camarade pou so bann disciple?
4 Jésus pa ti considere so bann disciple couma pli bas ki li, mais li ti traite zot couma so bann camarade. Li ti passe le temps avek zot, li ti faire zot confiance, ek li ti ‘faire zot konn tou kitsoz ki li’nn tendé ar so Papa.’ (Lire Jean 15:15.) Maziné couma zot ti extra content kan Jésus ti reponn question ki zot ti pose li: “Ki signe pou montré to presence ek conclusion sa systeme-la?” (Mat. 24:3, 4) Li ti aussi partage so bann pensée ek so bann sentiment avek so bann disciple. Par exemple, dan la nuit kot Judas ti pou trahir li, Jésus ti amenn Pierre, Jacques ek Jean dan jardin Gethsémané. La-bas, li ti bien bouleversé ek li ti prié avek tou so leker. Kitfois sa trois zapotre-la pa ti tann seki Jésus ti pé dire dan so la priere, mais surement zot ti senti ki sa situation-la ti grave. (Marc 14:33-38) Maziné aussi ki l’effet transfiguration ti’nn bizin ena lor sa trois-la enn tipé avant. (Marc 9:2-8; 2 Pierre 1:16-18) Sa grand l’amitié ki Jésus ti’nn developpé avek so bann disciple-la, ti donne zot la force pou contigne travail important ki zot ti bizin faire plitar.
5. Cite certain fason couma bann ancien kapav montré-zot disponible pou lezot.
5 Pareil couma Jésus, zordi bann ancien faire camarade ar bann membre congregation ek aide zot. Zot developpe bann bon relation avek sa bann chretien-la kan zot prend le temps pou montré ki zot interessé personnellement avek zot. Mem si bann ancien reconette l’importance pou garde certain kitsoz confidentiel, ena kitsoz ki zot kapav dire. Par exemple, bann ancien faire confiance bann frere ek partage avek zot bann verité biblik ki zot-mem zot finn aprann. Zot pa pensée ki zot pli important ki enn assistant ministeriel, ki kitfois pli jeune ki zot. Au contraire, zot pensé ki li enn kikenn spirituel ki ena capacité ek ki pé faire enn service ki ena beaucoup valeur dan l’interet congregation ek ki plitar, kapav gagne bann pli grand responsabilité.
“Mo finn donne zot l’exemple”
6, 7. Couma Jésus ti enn l’exemple pou so bann disciple, ek ki l’effet sa ti ena lor zot?
6 Mem si bann disciple Jésus ti apprecié bann kitsoz spirituel, parfois zot ti laisse-zot influencé par l’education ki zot ti gagné ek par zot culture. (Mat. 19:9, 10; Luc 9:46-48; Jean 4:27) Selman, Jésus pa ti critik ou-soit ti menace so bann disciple. Li pa ti aussi demann zot pou faire bann kitsoz ki zot pa ti kapav faire, ni li ti conseil zot pou faire enn kitsoz alors ki li-mem pa ti pou faire sa. Au contraire, Jésus ti enseigne zot par so l’exemple.—Lire Jean 13:15.
7 Couma Jésus ti enn l’exemple pou so bann disciple? (1 Pierre 2:21) Li ti amenn enn la vie simple pou li kapav servi lezot. (Luc 9:58) Jésus ti reconette so limite ek touletan li ti base so l’enseignement lor bann l’Ecriture sacré. (Jean 5:19; 17:14, 17) Li ti bon ek li ti abordable. C’est l’amour ki ti pousse li pou faire tou seki li ti faire. (Mat. 19:13-15; Jean 15:12) L’exemple Jésus ti ena enn bon l’influence lor so bann zapotre. Par exemple, Jacques pa ti peur kan li ti faire face ar la mort, mais li ti servi Bondié avek fidelité ziska ki ti touye li. (Actes 12:1, 2) Pendant plus ki 60 an, Jean ti suive bann trace Jésus avek fidelité.—Rév. 1:1, 2, 9.
8. Ki l’exemple bann ancien laissé pou bann jeune frere ek pou lezot?
8 Bann ancien ki ena l’esprit sacrifice, ki humble, ek ki ena l’amour, donne enn bon l’exemple bann frere ki pli jeune ki zot. (1 Pierre 5:2, 3) En plus, bann ancien ki donne enn bon l’exemple en rapport avek zot la foi, dan zot l’enseignement, dan zot la vie en tant ki chretien ek dan zot ministere, content kan zot koné ki lezot kapav imite zot la foi.—Héb. 13:7.
‘Jésus ti donne zot bann instruction ek ti envoye zot’
9. Couma nou koné ki Jésus ti forme so bann disciple pou preché?
9 Apré ki Jésus ti preche avek zele pendant apepré deux an, li ti envoye so 12 zapotre aussi preché. Mais avant, li ti donne zot bann instruction. (Mat. 10:5-14) Zis avant ki li ti faire enn mirak pou nourri enn la foule plusieurs millier dimoune, Jésus ti dire so bann disciple couma li ti envie ki zot organise sa bann dimoune-la ek partage mangé avek zot. (Luc 9:12-17) Alors, li clair ki Jésus ti forme so bann disciple kan li ti donne zot bann instruction clair ek precis. Sa formation-la ensam avek l’aide ki l’esprit saint ti donne zot, ti prepare so bann zapotre plitar pou zot organise sa grand travail predication ki ti ena en l’an 33 nou lepok-la ek dan bann l’année ki ti’nn vini apré.
10, 11. Cite certain fason couma kapav forme bann nouveau tigit par tigit pou zot progressé.
10 Zordi, enn missié commence gagne l’enseignement spirituel kan li accepté enn l’etude la Bible. Kitfois nou bizin aide li pou li lire bien. A mesure ki nou faire so l’etude, nou pou contigne aide li. Kan li commence assisté reunion regulierement, li pou contigne progressé dan so formation pou li kapav participe dan Lekol ministere theocratik, pou vinn enn proclamateur non-baptisé, ek pou faire lezot kitsoz encore. Apré so bapteme, li pou contigne gagne formation dan lezot fason encore, couma par exemple pou nettoye la Salle du Royaume. Avek le temps, bann ancien kapav aide enn frere pou li koné ki li bizin faire pou rempli bann condition pou vinn enn assistant ministeriel.
11 Kan enn ancien donne enn frere enn responsabilité dan congregation, li bien content pou explik li bann methode ki servi dan l’organisation ek donne li bann instruction necessaire. Sa frere ki pé gagne formation-la bizin comprend ki li bizin faire. Si li pé gagne probleme pou faire seki’nn demann li, enn ancien ki ena l’amour pa pou desuite tire conclusion ki li pa qualifié. Au contraire, avek bonté, ancien-la pou ré-guette avek li dan ki domaine precis li bizin l’aide, seki li bizin faire ek couma li pou faire sa. Kan bann ancien trouve bann frere reagir dan enn fason positif ek lerla gagne la joie pou servi lezot, sa faire zot bien content.—Actes 20:35.
“Enn kikenn ki ecoute conseil, li sage”
12. Kifer bann conseil Jésus ti efficace?
12 Jésus ti forme so bann disciple kan li ti donne zot bann conseil personnel ki ti adapté ar zot besoin. Par exemple, li ti corrige Jacques ek Jean parski zot ti envie faire difé sorti dan le ciel pou vinn lor certain Samaritain ki pa ti accueillir Jésus. (Luc 9:52-55) Jacques ek Jean ti faire zot mama vinn guette Jésus pou demann li pou faire zot gagne bann grand position dan so Royaume. Lerla, Jésus ti dire sa deux frere-la directement: “Pa moi ki decidé kisannla ki pou assize dan mo coté droite ou-soit dan mo coté gauche, mais sa bann place-la finn reservé pou bann dimoune pou ki mo Papa inn prepare sa.” (Mat. 20:20-23) Touletan, Jésus ti donne bann instruction clair, pratik ek ki ti basé lor bann principe Bondié. Li ti enseigne so bann disciple pou raisonne lor sa bann principe-la. (Mat. 17:24-27) Jésus ti reconette aussi ki so bann disciple ti ena bann limite, ek li pa ti attann ki zot agir dan enn fason parfait. C’est l’amour ki ti pousse li pou conseil zot.—Jean 13:1.
13, 14. (a) Kisannla bizin conseil? (b) Ki qualité conseil enn ancien kapav donne enn kikenn ki pa pé progressé lor plan spirituel?
13 Pa zordi pa demain, tou frere ki envie prend responsabilité dan congregation, pou gagne bann conseil ki basé lor la Bible. Proverbes 12:15 dire: “Enn kikenn ki ecoute conseil, li sage.” Enn jeune frere dire: “Mo ti remarké ki pli grand probleme ki mo ti ena c’est pou faire face ar mo prop l’imperfection. Conseil ki enn ancien ti donne moi, ti aide moi pou trouve bann kitsoz dan enn bon fason.”
14 Si bann ancien remarké ki conduite enn chretien pé empeche li pou progressé lor plan spirituel, zot prend bann disposition pou aide li avek douceur pou li faire bann changement. (Gal. 6:1) Parfois, enn frere bizin conseil a cause certain defaut ki li ena. Par exemple, si li parette ki enn frere pa pé faire assez zeffort alors ki li kapav faire plus, enn ancien kapav trouve sa bon pou attire so l’attention lor l’exemple Jésus. Li kapav montré li ki Jésus ti preche la bonne nouvelle avek zele ek li ti donne l’ordre so bann disciple pou faire lezot disciple. (Mat. 28:19, 20; Luc 8:1) Si enn frere parette ena l’ambition, enn ancien kapav montré li couma Jésus ti aide So bann disciple pou trouve danger ki ena kan rod grandeur. (Luc 22:24-27) Si li difficile pou enn frere pardonné, ki enn ancien kapav faire? Li kapav servi l’exemple enn esclave ki pa ti’lé pardonné, alors ki lezot ti’nn pardonne li beaucoup plus. (Mat. 18:21-35) Kan bizin donne conseil, li bon ki bann ancien donne sa pli vite possible.—Lire Proverbes 27:9.
“Entraine-toi”
15. Couma famille enn frere kapav aide li pou servi lezot?
15 C’est bann ancien en premier ki forme bann frere pou prend bann responsabilité dan congregation, mais lezot kapav soutenir zot zeffort. Par exemple, enn frere so famille kapav ek bizin aide li pou prend bann responsabilité dan congregation. Ek si li deja enn ancien, li pou gagne bann bienfait si so madame soutenir li avek amour ek si so bann zenfant pa montré-zot egoïste. Li important ki zot disposé pou partage li avek la congregation pou li kapav rempli so responsabilité. Li ressenti enn grand la joie kan so famille manifesté enn l’esprit sacrifice ek lezot dan congregation bien apprecié sa.—Prov. 15:20; 31:10, 23.
16. (a) Kisannla ki bizin montré en premier ki li ena desir pou servi lezot? (b) Couma enn frere kapav qualifié-li pou gagne privilege dan congregation?
16 Mem si lezot kapav aide li ek soutenir li, c’est sa frere-la ki bizin montré en premier ki li ena desir pou servi lezot. (Lire Galates 6:5.) Bien sur, li pa necessaire ki enn frere li enn assistant ministeriel ou-soit enn ancien pou aide lezot ek participe a fond dan ministere. Mais pou ki enn frere kapav qualifié-li pou gagne bann privilege dan congregation, li bizin faire zeffort pou rempli bann condition ki ena dan la Bible. (1 Tim. 3:1-13; Tite 1:5-9; 1 Pierre 5:1-3) Alors, si enn frere envie servi couma enn assistant ministeriel ou-soit enn ancien, mais li pa encore nommé, li bizin guetté dan ki domaine li bizin faire bann progré lor plan spirituel. Pou li progressé, li bizin lire la Bible regulierement, serieux dan so l’etude personnel, medité, faire bann la priere sincere, ek participe avek zele dan predication. Kan li faire sa, li kapav applik personnellement conseil ki Paul ti donne Timothée: “Entraine-toi pou ki to kapav developpe l’attachement pou Bondié.”—1 Tim. 4:7.
17, 18. Ki enn frere kapav faire si li pa pé prend bann responsabilité parski li peur, li pensé ki li pena assez capacité, ou-soit li pena desir pou servi lezot?
17 Mais ki enn frere pou faire si li pa’lé prend bann responsabilité dan congregation parski li peur ou-soit li pensé ki li pena assez capacité? Li pou bon ki li prend en consideration ki quantité kitsoz Jéhovah ek Jésus Christ pé faire pou nou. En realité, Jéhovah “chaque jour sarié nou fardeau pou nou.” (Ps. 68:19) Alors, nou Papa ki dan le ciel kapav aide enn frere pou prend bann responsabilité dan congregation. Li pou bon aussi ki enn frere ki pa pé servi couma enn assistant ministeriel ou-soit enn ancien prend en consideration ki bien bizin bann zom mur pou accepté bann privilege dan l’organisation Bondié. Kan enn frere medite lor sa bann point-la, sa kapav pousse-li pou faire zeffort pou surmonte bann sentiment negatif. Li kapav prié pou gagne l’esprit saint ek rappel ki parmi bann qualité ki forme partie dan sa l’esprit-la ena la paix ek maitrise de soi—bann qualité ki li bizin pou surmonte so la peur ou-soit sentiment ki li pena assez capacité. (Luc 11:13; Gal. 5:22, 23) Nou kapav sur ki Jéhovah beni tou bann ki pé rod qualifié-zot pou prend bann responsabilité avek enn bon mobile.
18 Eski li possible ki enn frere pa pé prend bann responsabilité parski li pena desir pou servi dan congregation? Ki kapav aide enn frere ki pena sa desir-la? L’apotre Paul ti ecrire: “[Bondié], pou so prop plaisir, pé influence zot pou ki zot envie ek agir toulé-deux.” (Phil. 2:13) C’est Bondié ki aide enn dimoune pou ena desir pou servi dan congregation ek So l’esprit kapav donne li la force pou offert enn service sacré. (Phil. 4:13) En plus, enn chretien kapav prié pou ki Bondié aide li pou faire seki droite.—Ps. 25:4, 5.
19. Ki l’assurance sa donne nou kan nou aprann ki Jéhovah pou etabli “sept berger, oui, huit duc”?
19 Jéhovah beni zeffort ki bann ancien faire pou forme lezot. Li aussi beni bann frere ki ena desir pou servi lezot dan congregation. La Bible donne nou l’assurance ki parmi peuple Bondié pou ena “sept berger, oui, huit duc,” setadir assez zom ki ena capacité, ki Jéhovah pou etabli pou prend la tête dan so l’organisation. (Mika 5:5) C’est vrai-mem enn benediction ki tou sa bann frere-la pé gagne formation ek avek humilité pé qualifié-zot pou gagne bann privilege ek sa loué Jéhovah!
Couma ou pou reponn?
• Couma Jésus ti aide so bann disciple pou qualifié-zot pou prend bann pli grand responsabilité?
• Couma bann ancien kapav imite Jésus kan zot aide bann zom ki dan congregation pou prend la tête?
• Couma famille enn frere kapav aide li pou prend bann responsabilité dan congregation?
• Ki enn frere kapav faire personnellement pou rempli bann condition pou gagne bann privilege dan congregation?
[Questions d’étude]
[Zimage page 31]
Ki formation ou kapav donne ou etudiant la Bible, a mesure ki li pé faire zeffort pou progressé?
[Zimage page 32]
Couma bann zom kapav montré ki zot pé qualifié-zot pou prend bann responsabilité?
