ENN grand la misere li enn menace pou la vie. Sa vedir pena assez mangé, de l’eau, courant ou-soit gaz, ek aussi pena enn bon lakaz, enn bon la santé, ek l’education. Sa affecté enn milliard dimoune, apepré mem quantité dimoune ki reste dan bann pays l’Amérique. Pourtant, beaucoup dimoune dan bann l’endroit couma l’Europe de l’Ouest ek l’Amérique du Nord jamais pa finn trouve enn dimoune ki vive dan enn grand la misere. Alors, anou faire connaissance avek certain.

Mbarushimana reste en Rwanda, dan l’Afrique, avek so madame ek so cinq zenfant. Enn sixieme zenfant inn mort ar malaria. Mbarushimana dire: “Mo papa ti partage so la terre avek so six zenfant. Mo part ti tellement tipti ki mo ti bizin prend mo famille ek al reste dan enn la ville. Travail ki mo madame ek mo-mem faire c’est sarié bann sac roche ek bann sac di-sable. Dan nou lakaz pena la fenetre. Nou prend de l’eau dan enn puit, kot station la police. En general, nou mange zis enn repas par jour, mais kan pena travail, nou pa mangé. Kan sa arrivé, mo sorti, mo allé​—mo pa kapav tann mo bann zenfant ploré parski zot pé faim.”

Victor ek Carmen travail couma cordonnier. Zot vive dan enn ti la ville isolé dan Bolivie avek zot cinq zenfant. Zot loué enn la chambre dan enn vié batiment ki dan enn mauvais condition. Toit en tole sa la chambre-la coulé ek pena courant. Dan lekol, ena tellement beaucoup zenfant ek pa assez desk pou zot tou, ki Victor ti bizin faire enn desk pou ki so tifi kapav al lekol. Sa couple-la bizin marche dix kilometre pou coupe di-bois pou cuit mangé ek pou bouilli de l’eau pou zot boire. Carmen dire: “Nou pena toilette. Alors, nou bizin al dan la riviere, kot aussi bann dimoune baigné ek jette saleté. Bann zenfant souvent malade.”

Francisco ek IIídia reste dan la campagne, dan Mozambique. Zot ena quatre zenfant; enn lot zenfant ti’nn mort ar malaria apré ki enn l’hopital pa ti admette li pou donne li enn traitement. Sa couple-la plante assez di-riz ek patate lor zot ti boute la terre pou gagne mangé pou trois mois. Francisco dire: “Parfois la pluie pa tombé ou-soit bann voleur kokin seki nou planté, alors mo coupe bambou ki pou servi dan construction ek mo al vann zot, pou mo kapav gagne enn tipé l’argent. Nou aussi marché pendant deux  heure temps pou al dan bois, pou al rod di-bois pou allume difé. Mo madame ek mo-mem, sakenn nou sarié enn paquet di-bois, enn pou cuit mangé dan la semaine, ek lot-la, pou vendé.”

Beaucoup dimoune pensé ki ena enn kitsoz ki bien pa bon ek ki injuste dan enn le monde kot 1 dimoune lor 7 vive couma Mbarushimana, Victor ek Francisco, alors ki bann milliard dimoune pé konn enn prosperité ki zot pa ti ena avant. Ena dimoune ki finn essaye faire kitsoz pou reglé sa probleme-la. Prochain lartik pou examine bann zeffort ki zot inn faire ek l’espoir ki zot ti ena.

[Zimage page 3]

Carmen avek so deux zenfant, pé prend de l’eau dan enn la riviere