Question bann lecteur . . .

▪ Beaucoup dimoune finn lire sa bann parole reconfortant ki Jésus ti dire-la: “Bondié finn tellement content le monde ki Li finn donne so sel Garson ki Li finn crée direct, pou ki tou seki ena la foi en li pa detruire, mais gagne la vie pou touletan.” (Jean 3:16) Eski Jésus ti pé rod dire ki tou bann adorateur fidele so Papa, Jéhovah, pou al dan le ciel pou zot gagne la vie pou touletan dan vrai bonheur?

Guette sa parole Jésus ki faire reflechi-la: “Personne pa finn monte dan le ciel a part sa kikenn ki finn desann depuis le ciel-la, Fils de l’homme.” (Jean 3:13) Sa vedir ki bann fidele serviteur dan le passé couma Noé, Abraham, Moïse, ek David, pa finn al dan le ciel. (Actes 2:34) Alors, kot zot tou finn allé? Sa bann serviteur fidele-la dan tombe, zot pé dormi dan la mort, zot pa koné seki pé passé, zot pé attann resurrection.​—Ecclésiaste 9:5, 6; Actes 24:15.

Dan la Bible, c’est aussi Jésus, ki premier fois ti koz lor la vie dan le ciel apré la mort. Li ti dire so bann zapotre ki li pou al prepare enn place pou zot dan le ciel. (Jean 14:2, 3) Sa ti enn kitsoz nouveau pou bann serviteur Bondié. Plitar l’apotre Paul ti expliké ki apré la mort ek resurrection Jésus, Jésus ti ’ouvert enn chemin nouveau ek vivant’ pou so bann disciple​—enn chemin kot okenn humain pa finn passé avant.​—Hébreux 10:19, 20.

Eski sa vedir ki a partir sa moment-la tou bann serviteur fidele pou al dan le ciel? Non, parski resurrection pou al dan le ciel, ena enn rapport avek enn mission ki zis certain dimoune inn gagné. Pendant dernier soirée ki Jésus ti passé ensam avek so bann zapotre, li ti dire zot ki zot pou ’assize lor bann trone pou jugé’ dan so Royaume dan le ciel. Alors, zot ti gagne mission pou regné avek Jésus dan le ciel.​—Luc 22:28-30.

A part bann zapotre, ena aussi lezot dimoune ki finn gagne sa mission extraordinaire-la. Dan enn vision, l’apotre Jean ti trouve Jésus avek enn groupe bann dimoune ki finn ressuscité dan le ciel. Li ti decrire zot couma ’enn royaume ek bann pretre ki pou dirige la terre.’ (Révélation 3:21; 5:10) Comié zot ti été? Pareil couma dan tou gouvernement, zis enn ti groupe dimoune ki gouverné. Li pareil aussi avek Royaume ki dan le ciel. Jésus, l’Agneau Bondié pou regné ensam avek 144,000 associé ki ’finn acheté parmi bann dimoune.’​—Révélation 14:1, 4, 5.

Li vrai ki 144,000 li bien tigit comparé avek tou bann fidele serviteur Bondié, dan le passé ek asterla. Mais selman li logik, parski sa bann 144,000-la pou ressuscité pou al faire enn travail bien precis dan le ciel. Si ou bizin construire enn lakaz, eski ou pou employe tou mason bien qualifié ki ena dan ou l’endroit? Non. Ou pou bizin zis sa quantité dimoune ki bizin pou faire sa travail-la. Pareil, Bondié pa finn choisir tou seki fidele pou sa grand privilege pou regne avek Christ dan le ciel.

Sa gouvernement dan le ciel-la pou realise projet ki Bondié ti ena pou bann dimoune au commencement. Jésus ek so 144,000 associé, pou faire sur ki la terre entier, transformé pou vinn enn paradis. Pou ena enn grand quantité dimoune fidele ki pou vive lor la pou touletan dan bonheur. (Isaïe 45:18; Révélation 21:3, 4) Parmi, pou ena aussi tou bann ki dan memoire Bondié ek ki pou ressuscité.​—Jean 5:28, 29.

Tou serviteur fidele Jéhovah​—dan le passé ou-soit asterla​—kapav gagne sa don extraordinaire la vie eternel-la. (Romains 6:23) Enn tigit dimoune, pou gagne la vie dan le ciel pou enn mission special, ek pli beaucoup dimoune pou gagne la vie lor la terre, ki pou vinn enn paradis.