“Ena consideration pou bann ki travail dur parmi zot”
“Ena consideration pou bann ki travail dur parmi zot ek ki dirige zot dan le Seigneur, ek ki averti zot.”—1 THESS. 5:12.
1, 2. (a) Ki situation ti existé dan congregation Thessalonique kan Paul ti ecrire zot so premier lettre? (b) Ki Paul ti encourage bann Thessalonicien pou faire?
MAZINÉ ki ou enn membre congregation Thessalonique dan premier siecle, enn parmi bann premier congregation ki’nn etabli dan l’Europe. L’apotre Paul ti’nn passe beaucoup le temps pou fortifié bann frere dan sa congregation-la. Surement li finn etabli bann ancien pou dirige la congregation, pareil couma li ti faire dan lezot congregation. (Actes 14:23) Mais apré ki sa congregation-la ti formé, bann Juif ti rassemblé enn la foule pou tire Paul ek Silas dan la ville. Bann chretien ki ti resté kitfois ti senti-zot abandonné ek kitfois zot ti mem peur.
2 C’est a cause sa ki apré ki li ti quitte Thessalonique, Paul ti tracassé pou sa nouveau congregation ki pa ti ena beaucoup l’experience-la. Li ti essaye retourné, mais “Satan ti barre” so la route. Alors li ti envoye Timothée pou encourage sa congregation-la. (1 Thess. 2:18; 3:2) Kan Timothée ti retourné avek enn bon rapport, sa ti pousse Paul pou ecrire enn lettre bann chretien dan Thessalonique. Parmi bann kitsoz ki li ti mentionné, Paul ti encourage zot pou ’ena consideration pou bann ki dirige zot.’—Lire 1 Thessaloniciens 5:12, 13.
3. Ki raison bann chretien dan Thessalonique ti ena pou donne enn l’estime plus ki special bann ancien?
3 Bann frere ki ti pé dirige congregation Thessalonique pa ti ena autant l’experience ki Paul ek so bann compagnon. En plus, comparé ar bann ancien dan Jérusalem, sa pa ti faire longtemps ki zot ti vinn chretien. Apré tou, sa congregation-la ti’nn existé moins ki enn an! Malgré sa, bann ki ti forme partie dan sa congregation-la ti ena bann bon raison pou montré reconnaissance envers zot bann ancien, ki ti pé “travail dur,” ki ti pé “dirige zot,” ek ki ti pé “averti zot.” Oui, zot ti ena bann bon raison pou “donne [bann ancien] enn l’estime plus ki special dan l’amour.” Apré ki Paul ti demann zot pou faire sa, li ti donne zot enn conseil: “Vive en paix entre zot.” Si ou ti dan Thessalonique, eski ou ti pou montré ki ou bien apprecié travail ki bann ancien ti pé faire? A travers Christ, Bondié finn etabli bann zom “couma bann don” dan ou congregation. Couma eski ou considere zot?—Éph. 4:8.
Zot “travail dur”
4, 5. (a) Kifer eski bann ancien dan lepok Paul ti bizin travail dur pou enseigne congregation? (b) Kifer eski li pareil zordi?
4 Apré ki ti envoye Paul ek Silas dan Bérée, couma eski bann ancien dan Thessalonique ti pé “travail dur”? Pena doute ki pareil couma Paul zot ti servi bann l’Ecriture pou enseigne congregation. Surement ou kapav demann ou-mem: ’Eski bann chretien dan Thessalonique ti apprecié Parole Bondié?’ Apré tou, la Bible dire ki bann Béréen ti “ena bann pli bon l’attitude ki bann ki ti dan Thessalonique, . . . zot ti examine bann l’Ecriture en profondeur toulé-jour.” (Actes 17:11) Sa comparaison-la ti applik ar bann juif ki ti dan Thessalonique en general, mais pa avek bann chretien. Bann ki ti vinn chretien ti accepté parole Bondié “pa couma parole bann zom, mais couma li été vrai-mem, setadir couma parole Bondié.” (1 Thess. 2:13) Sa bann ancien-la ti’nn bizin travail bien dur pou nourri sa bann dimoune-la lor plan spirituel.
5 Zordi, l’esclave fidele et avisé pé donne troupeau Bondié “nourriture dan ler ki bizin.” (Mat. 24:45) Enba direction sa esclave-la, bann ancien dan bann congregation travail dur pou nourri zot bann frere lor plan spirituel. Bann membre dan congregation gagne beaucoup publication ki basé lor la Bible, ek dan certain langue zot ena aussi certain zouti couma l’Index des publications Watch Tower ek CD-ROM Watchtower Library. Pou satisfaire besoin spirituel congregation, bann ancien passe beaucoup l’heure temps pou prepare bann sujet ki zot ena pou faire dan bann reunion. Coumsa zot kapav presente bann renseignement ki zot inn gagné dan enn fason efficace. Eski ou finn deja reflechi comié le temps bann ancien passé pou prepare zot bann sujet pou bann reunion ek bann l’assemblée?
6, 7. (a) Ki l’exemple Paul ti laisse bann ancien dan Thessalonique? (b) Kifer eski li kapav difficile pou bann ancien imite Paul zordi?
6 Bann ancien dan Thessalonique ti rappel bon l’exemple ki Paul ti laissé kan li ti prend soin troupeau Bondié. Li pa ti faire sa par obligation. Couma nou ti trouvé dan lartik avant, Paul ti “montré beaucoup douceur . . . , pareil couma enn mama, prend soin avek beaucoup l’affection so bann zenfant ki li nourri.” (Lire 1 Thessaloniciens 2:7, 8.) Li ti mem disposé ’pou partage so prop nâme’! Kan zot ti pé prend soin troupeau Bondié, bann ancien dan Thessalonique ti bizin faire pareil couma li.
7 Zordi, bann berger chretien imite Paul kan zot ena enn grand l’affection pou troupeau Bondié. Li possible ki certain brebis, dan zot nature mem zot pa amical ek zot pa montré l’affection. Malgré sa, bann ancien essaye montré bon jugement ek “trouve seki bon” en zot. (Prov. 16:20) Li vrai ki parski enn ancien li imparfait, li bizin lutté pou ena enn l’attitude positif lor chaque brebis. Pourtant, li essaye faire tou seki li kapav pou manifesté douceur envers zot tou. Alors, eski nou pa bizin felicite li pou zeffort ki li faire pou montré ki li enn bon berger ki pé travail enba direction Christ?
8, 9. Couma bann ancien zordi ’contigne veille lor nou nâme’?
8 Nou tou nou ena bann bon raison pou nou “soumette” ar bann ancien parski ’bannla pé contigne veille lor nou nâme.’ (Héb. 13:17) Sa l’expression-la faire nou pense bann berger, ki pa ti dormi pou protege zot troupeau. Li pareil pou bann ancien zordi. Kitfois zot bizin sacrifié inpé zot sommeil kan zot bizin prend soin bann brebis ki ena soit enn mauvais la santé, soit enn probleme emotionnel, soit enn probleme spirituel. Par exemple, finn bizin casse sommeil bann frere ki forme partie dan bann comité liaison hospitalier parski ti ena enn urgence medical. Oui, nou bien apprecié zot service kan nou faire face ar enn situation coumsa!
9 Bann ancien ki forme partie dan bann comité construction regional ek bann comité secours zot travail dur pou aide bann frere. Zot merité ki nou soutenir zot avek tou nou leker! Anou examine seki ti arrivé apré ki cyclone Nargis ti passe lor Birmanie en 2008. Pou reussi arrive ziska congregation Bothingone dan region Delta l’Irrawaddy, ki ti bien affecté, l’equipe secours ti bizin passe par enn l’endroit kot ti ena beaucoup degat ek ki ti couvert ar bann cadavre. Kan bann frere local finn trouvé ki dan premier l’equipe secours ki ti arrive Bothingone ti ena zot ancien surveillant circonscription, zot ti criyé: “Guetté! C’est nou surveillant circonscription! Jéhovah finn sap nou!” Eski ou apprecié travail dur ki bann ancien faire la-nuit li-jour? Certain ancien nommé pou servi dan bann comité special pou traite bann probleme judiciaire bien difficile. Sa bann ancien-la pa flatte zot-mem pou seki zot inn faire; pourtant bann ki zot aidé, zot vrai-mem bien reconnaissant.—Mat. 6:2-4.
10. Ki bann travail ki bann ancien faire, ki lezot pa trop koné?
10 Beaucoup ancien zordi ena aussi bann travail papier pou faire. Par exemple, coordinateur college ancien prepare programme bann reunion ki ena chaque semaine. Secretaire congregation compile bann rapport service toulé mois ek toulé l’année. Surveillant lekol prend le temps pou prepare programme lekol. Chaque trois mois, bann frere verifié bann rapport-compte congregation. Bann ancien lire bann lettre ki sorti filiale ek applik direction ki zot gagné, ek sa aide la congregation pou vinn “enn sel dan la foi.” (Éph. 4:3, 13) Grace a bann zeffort ki sa bann ancien ki travail dur-la faire, “tou kitsoz passe couma bizin ek dan l’ordre.”—1 Cor. 14:40.
Zot “dirige” nou
11, 12. Kisannla ki dirige la congregation, ek ki sa impliké?
11 Paul ti decrire bann ancien ki ti travail dur dan Thessalonique couma bann ki “dirige” la congregation. Dan langue original, sa mot-la implik “deboute devant,” ek kapav traduire sa par “prend la tête parmi.” (1 Thess. 5:12; note.) Paul ti decrire sa bann ancien-la couma bann ki “travail dur.” Li pa ti pé koz zis lor enn “surveillant president,” mais lor tou bann ancien dan sa congregation-la. Zordi, la plupart ancien deboute devant congregation ek dirige bann reunion. Changement ki finn ena pa trop longtemps kot finn encourage nou pou servi l’expression “coordinateur college ancien,” aide nou pou considere tou bann ancien couma bann membre enn sel lekor.
12 L’expression “dirige zot” implik plus ki zis enseigné. Dan 1 Timothée 3:4, nou trouve sa mem l’expression-la. Paul ti dire ki enn surveillant bizin “enn zom ki dirige so prop famille dan enn bon fason, ki faire so bann zenfant soumette avek enn grand serieux.” Ici, li clair ki l’expression “dirige so prop famille” pa implik zis enseigne so bann zenfant, mais li implik aussi prend la tête dan la famille ek “faire so bann zenfant soumette.” Oui, bann ancien dirige la congregation, ek aide zot tou pou soumette ar Jéhovah.—1 Tim. 3:5.
13. Kifer eski sa kapav prend le temps avant ki bann ancien prend enn decision pendant enn reunion ancien?
13 Pou zot kapav dirige troupeau Bondié couma bizin, bann ancien discute entre zot-mem lor besoin congregation ek lor pli bon fason pou aide la congregation. Kitfois li ti pou pli bon si enn sel ancien ti prend tou bann decision. Pourtant, bann college ancien zordi suive l’exemple college central dan premier siecle, kan zot koz lor bann kitsoz ki concerne la congregation dan enn fason bien ouvert, ek zot rod direction dan la Bible. Zot l’objectif c’est pou applik bann principe la Bible en rapport avek besoin zot congregation. Sa pli efficace kan chaque ancien prepare-li pou reunion bann ancien, examine bann verset ek bann instruction ki l’esclave fidele et avisé donné. Bien sur, sa prend le temps. Kan ena bann desaccord pareil couma ti ena kan college central dan premier siecle ti examine sujet concernant circoncision, kitfois sa bann ancien-la pou bizin plus le temps ek faire plus recherche pou tombe d’accord lor enn decision ki basé lor bann l’Ecriture.—Actes 15:2, 6, 7, 12-14, 28.
14. Kifer ou apprecié ki college bann ancien travail ensam dan l’unité?
14 Ki kapav arrivé si enn ancien insisté pou faire couma li, li ou’lé ou-soit essaye encourage lezot pou adopté so bann prop l’idée? Ou-soit ki kapav arrivé si enn kikenn, couma Diotréphès dan premier siecle, essaye faire division? (3 Jean 9, 10) Pena doute ki congregation en entier pou souffert. Si Satan ti essaye devire congregation dan premier siecle enba la-haut, nou kapav sur ki li envie troublé la paix congregation dan nou lepok. Li kapav joué lor bann tendance egoïste ki nou ena couma par exemple desir pou gagne grandeur. Alors, bann ancien bizin developpe l’humilité ek travail ensam couma enn sel lekor. Oui, nou bien apprecié l’humilité bann ancien ki coopere ensam couma enn sel lekor!
“Averti zot”
15. Pou ki raison bann ancien averti enn frere ou-soit enn soeur?
15 Apré sa Paul ti attire l’attention lor enn responsabilité difficile mais important ki bann ancien ti ena: averti troupeau Bondié. Dan bann l’Écriture grecques chrétiennes, c’est zis Paul ki ti servi enn terme grec ki’nn traduire par “averti.” Sa terme-la kapav faire reference ar enn conseil bien severe mais ki pa montré la haine. (Actes 20:31; 2 Thess. 3:15) Par exemple, Paul ti ecrire bann Corinthiens: “Mo pé ecrire sa bann kitsoz-la, pa pou faire zot gagne honté, mais pou averti zot couma mo bann zenfant ki mo bien content.” (1 Cor. 4:14) Raison kifer li ti donne sa l’avertissement-la, c’est parski li ti ena l’amour pou lezot ek li ti interessé ar zot.
16. Ki kitsoz li bon ki bann ancien garde dan zot l’esprit kan zot pé averti lezot?
16 Bann ancien garde dan zot l’esprit ki fason ki zot averti lezot li bien important. Zot faire bann grand zeffort pou imite Paul kan zot montré zot bon, zot manifesté l’amour ek zot aide lezot. (Lire 1 Thessaloniciens 2:11, 12.) Bien sur, bann ancien ’reste bien attaché ar parole ki fidele pou ki zot kapav encourage lezot par l’enseignement ki en accord avek la verité.’—Tite 1:5-9.
17, 18. Ki ou bizin garde dan ou l’esprit kan ou gagne bann conseil ar enn ancien?
17 Bien sur, bann ancien zot imparfait ek zot kapav dire bann kitsoz ki plitar zot regretté. (1 Rois 8:46; Jacq. 3:8) En plus, bann ancien koné ki bien souvent kan bann frere ek soeur spirituel gagne bann conseil sa li pa “enn kitsoz ki donne la joie, mais enn kitsoz ki triste.” (Héb. 12:11) Alors, avant ki enn ancien al koz avek enn kikenn pou averti li, pena doute ki li’nn prend beaucoup le temps pou examine sa sujet-la ek ki li’nn prié lor la. Si enn ancien finn donne ou bann conseil, eski ou apprecié l’amour ek l’interet ki li finn manifesté envers ou?
18 Supposé ki ou ena enn probleme la santé, ek bann docteur pa pé kapav expliké ki ou pé gagné. Finalement, enn docteur reussi koné ki ou’nn gagné, mais seki li dire ou assez difficile pou accepté. Eski ou pou en colere ar sa docteur-la? Non! Mem si li demann ou pou faire enn l’operation, surement ou pou accepté pou faire sa, parski ou sur ki sa pou faire ou di-bien. Kitfois fason ki docteur-la donne ou sa bann l’information-la kapav ena enn l’effet lor ou bann sentiment, mais eski ou pou laisse sa influence decision ki ou pou prend? Surement non. Alors, pa laisse fason ki bann ancien donne ou bann conseil empeche ou ecoute bann ki Jéhovah ek Jésus pé servi pou faire ou koné couma ou kapav protege-ou-mem lor plan spirituel.
Ena reconnaissance pou bann ancien: disposition ki Jéhovah inn prend
19, 20. Couma ou kapav montré ou reconnaissance pou “bann zom [ki] couma bann don”?
19 Ki ou pou faire si ou gagne enn cadeau ki finn faire specialement pou ou? Eski ou pou servi li pou montré ki ou apprecié sa cadeau-la? C’est Jéhovah a travers Jésus ki finn donne nou “bann zom couma bann don.” Enn fason ki ou kapav montré ou reconnaissance pou sa bann don-la c’est kan ou ecoute bien bann discours ki bann ancien faire ek ou essaye applik zot conseil. Ou kapav montré aussi ou reconnaissance kan ou faire bann commentaire bien reflechi pendant bann reunion. Soutenir travail ki bann ancien pé dirigé, couma par exemple travail predication. Si ou finn gagne bann bienfait grace a conseil ki enn ancien inn donne ou, kifer ou pa faire li koné? En plus, ou kapav montré ou reconnaissance envers famille bann ancien. Pa blié ki si enn ancien pé arrivé travail dur pou congregation, c’est parski so famille pé sacrifié le temps ki zot passé avek li.
20 Oui, nou ena beaucoup raison pou montré nou reconnaissance envers bann ancien, ki pé travail dur parmi nou, ki pé dirige nou, ek ki pé averti nou. Sa ’bann zom ki couma bann don-la’ zot vrai-mem enn disposition rempli ar l’amour ki Jéhovah inn donne nou!
Eski ou rappel?
• Ki raison bann chretien dan Thessalonique ti ena pou apprecié bann ki ti dirigé parmi zot?
• Couma bann ancien dan ou congregation travail dur pou ou?
• Parski bann ancien dirige congregation, ki bienfait ou gagné?
• Si enn ancien donne ou bann conseil, ki ou bizin rappel?
[Questions d’étude]
[Zimage page 31]
Eski ou ena reconnaissance envers bann ancien ki prend soin congregation dan different fason?